شينحۋا اگەنتتىگىنىڭ 9 - ايدىڭ 23 - كۇنى كاتماندۋدان بەرگەن حابارى. «شي جينپيڭ ەل باسقارۋ جونىندە» 2 - تومىنىڭ نەپال تىلىندەگى باسىلىمىنىڭ تۇڭعىش تاراتىلۋ سالتى جانە 3 - تومىنىڭ اعىلشىن تىلىندەگى باسىلىمىن تانىستىرۋ جيىنى 9 - ايدىڭ 23 - كۇنى نەپالدىڭ استاناسى كاتماندۋدا وتكىزىلدى. وسى رەتكى قيمىلدى جۇڭگو مەملەكەتتىك كەڭەس اقپارات كەڭسەسى، نەپال زۇڭتۇڭ سارايى، جۇڭگو شەتەل تىلدەرى باسپا - تاراتۋ ىستەرى مەكەمەسى، جۇڭگونىڭ نەپالداعى باس ەلشىلىگى بىرلەسىپ وتكىزدى.
نەپالدىڭ زۇڭتۇڭى بانداري قيمىلعا قاتىناستى ءارى ءسوز سويلەدى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت ۇگىت ءبولىمىنىڭ باستىعى حۋاڭ كۇنميڭ بەينە ەكراندا ءسوز سويلەدى. جۇڭگونىڭ نەپالداعى باس ەلشىسى حوۋ يانچي، نەپالدىڭ جۇڭگو زەرتتەۋ ورتالىعىنىڭ اتقارۋشى ءتوراعاسى بحاتتاراي قاتارلى ءار سالا قايراتكەرلەرى سول كۇنگى قيمىلعا قاتىناستى.
بانداري سوزىندە مىنالاردى ءبىلدىردى: جۇڭگو ەل باسقارۋ جانە ەكونوميكالىق قۇرىلىس جاعىندا بۇرىن بولماعان تابىستارعا قول جەتكىزىپ، دۇنيە ءجۇزىنىڭ جاپپاي نازارىن اۋداردى. بۇگىن ءبىز «شي جينپيڭ ەل باسقارۋ جونىندە» 2 - تومىنىڭ نەپال تىلىندەگى باسىلىمىن تۇڭعىش تاراتۋ سالتى قيمىلىن وتكىزىپ وتىرمىز، وقىرمانداردىڭ بۇل كىتاپتى وقىعان كەزدە جۇڭگونىڭ تاياۋ 10 جىلدا قول جەتكىزگەن عالامات دامۋ ناتيجەلەرىمەن تانىسىپ، ءتوراعا شي جينپيڭنىڭ يدەيالىق نازارياسىن، ساياسي كوزقاراسىن، ساياسات باعىتىن، سونداي - اق ونىڭ تابىستى امالياتىن تۇسىنەتىندىگىنە سەنەمىز. جۇڭگونىڭ كەدەيلىكتەن ارىلتۋدان قامال الۋ جانە جاقسى جونگە سالۋ جاقتارىنداعى مول تاجىريبەلەرى نەپالدى قامتىعان وركەندەپ كەلە جاتقان ەلدەرگە پايدالى ۇلگى ازىرلەدى.
حۋاڭ كۇنميڭ سوزىندە مىنالاردى ءبىلدىردى: «شي جينپيڭ ەل باسقارۋ جونىندە» جۇڭگولىق - شەتەلدىك وقىرمانداردىڭ شي جينپيڭ جاڭا ءداۋىر جۇڭگوشا سوتسياليزم يدەياسىن تانۋىنا، ونى يگەرۋىنە ماڭىزدى حۇجاتتىق ماتەريال ازىرلەدى. بۇل يدەيا ماركسيزمنىڭ نەگىزگى قاعيدالارىن جۇڭگونىڭ ناقتى امالياتىمەن ۇشتاستىرۋعا، جۇڭحۋانىڭ تاڭداۋلى ءداستۇرلى مادەنيەتىمەن ۇشتاستىرۋعا تاباندى بولۋدىڭ نازاريالىق جاۋھارى، جۇڭگو حالقىنىڭ تاماشا تۇرمىسقا تالپىنىسىن جۇزەگە اسىرۋدىڭ ارەكەت تۇعىرناماسى، ول جاپپاي سوتسياليستىك وسىزاماندانعان مەملەكەت قۇرۋعا عىلمي جەتەكشىلىك ەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە جۇڭگو اقىل - پاراساتىن قوستى. ءبىز وسى رەتكى قيمىلدى وراي ەتىپ، جۇڭگو، نەپال ەكى ەل مەملەكەت باسشىلارى كەلىسكەن ماڭىزدى ورتاق تانىمدى ىشكەرىلەي دايەكتىلەندىرىپ، گۋمانيتارلىق اۋىس - كۇيىستى ۇزدىكسىز تەرەڭدەتىپ، ءداستۇرلى دوستىقتى جەبەپ، جۇڭگو مەن نەپالدىڭ دامۋدى جانە گۇلدەنۋدى بەتكە العان ۇرپاقتار بويى دوس ءوتۋ سىندى ستراتەگيالىق سەلبەستىك سەرىكتەستىك قارىم - قاتىناس ورناتۋىنا بەلسەنە ۇلەس قوسامىز.
قيمىلدا بانداري «شي جينپيڭ ەل باسقارۋ جونىندە» 2 - تومىنىڭ نەپال تىلىندەگى جاڭا كىتابىنىڭ شىمىلدىعىن اشتى، حوۋ يانچي جۇڭگو جاق اتىنان نەپالدىق سيلى قوناقتارعا 2 - تومنىڭ نەپال تىلىندەگى جانە 3 - تومنىڭ اعىلشىن تىلىندەگى كىتابىن ۇسىندى.
«شي جينپيڭ ەل باسقارۋ جونىندە» 2 - تومىنىڭ نەپال تىلىندەگى باسىلىمىن جۇڭگو شەتەل ءتىلى باسپاسى جانە نەپالدىڭ جۇڭگو زەرتتەۋ ورتالىعى بىرگە اۋدارىپ باسپادان شىعارعان. قازىرگە دەيىن «شي جينپيڭ ەل باسقارۋ جونىندە» 2 - تومى 13 تىلدە اۋدارىلىپ باسپادان شىقتى.
