انار بۇلت / شينجياڭ گازەتىنىڭ ءتىلشىسى لۋ فىڭباۋ
9 - ايدىڭ 30 - كۇنى تاڭ اتا بەرىسىمەن ءۇرىمجى سولتۇستىك ۆوكزالىنان جياڭجۇنمياۋعا دەيىنگى تەمىر جولدىڭ قۋاتىن ارتتىرىپ، جاڭالاۋ ينجەنەرياسىنىڭ جاڭادان كوبەيتىلگەن 2 - جەلىسى − ۋتۇڭساۋزىدان بەيسانتايعا دەيىنگى بولىگىندە گۇرىلدەگەن داۋىس شىعىپ، قازۋ ماشيناسى، توسەنىش اعاشتى اۋىستىراتىن ماشينا سياقتى ماشينالار قاتار - قاتار ءتىزىلىپ، قۇرىلىسشىلار گرۋپپالارعا ءبولىنىپ ساپ تۇزەپ، قۇرىلىس ورنىنا كىرۋگە دايىندالدى.
”ارالىق ۋاقىت باستالدى، تەز كىرىڭدەر“. جۇڭگو تەمىر جول 15 - مەكەمەسى توبى شەكتى سەرىكتەستىگى ءۇرىمجى - جياڭجۇنمياۋ تەمىر جولىنىڭ قۋاتىن ارتتىرىپ، جاڭالاۋ ينجەنەرياسى S1 مەردىگەرلىك بولىگى نىسانى ديرەكتور ءبولىمىنىڭ ورىنباسار ديرەكتورى سۇن ياجۇننىڭ ايعاي سالعان داۋىسىمەن قۇرىلىسشىلار مەن ماشينالار اعىلىپ كىرىپ، 500دەن استام قۇرىلىسشى ءوز جۇمىس ورنىنا جىلدام ورنالاستى.
تەمىر جول كاسىپ سالاسىندا ارالىق ۋاقىت دەگەندە پويەز جۇمىس كەستەسىندە پويەزدىڭ قاتىناۋ لەنياسىن توسەمەي نەمەسە پويەزدىڭ قاتىناۋىن رەتتەپ، ازايتىپ، قۇرىلىس جۇرگىزۋگە جانە جوندەۋ جۇمىسىنا ارنايى قالدىرعان ۋاقىت مەڭزەلەدى، قولدانىلاتىن ورنىنا قاراي جۇمىس جۇرگىزۋ ارالىق ۋاقىتى جانە جوندەۋ ارالىق ۋاقىتى دەپ بولىنەدى. ارالىق ۋاقىتتا عانا قۇرىلىس جۇرگىزۋگە بولادى، ۋاقىت تولىسىمەن دەرەۋ شەگىنۋ كەرەك.
قۇرىلىس ورنى توتەنشە قاربالاس، قىزمەتكەرلەردىڭ كەيبىرەۋى بولات رەليستى كەسسە، كەيبىرەۋى دانەكەرلەدى، 35 قازۋ ماشيناسى تەمىر جول جەلىسىن بويلاپ قاتارلاسا ءتىزىلىپ كەلىپ، بولات رەليس پەن توسەنىش اعاشىن جىلجىتىپ جاتتى.
S1 مەردىگەرلىك بولىگىنىڭ باس ينجەنەرى ساي شۋاڭشي ارلى - بەرلى ءجۇرىپ ءجۇر، قۇرىلىسشىلار الدا - جالدا تەحنيكالىق قيىن ماسەلەلەرگە جولىقسا، ول دەرەۋ بارىپ سول ورىندا شەشەدى.
35 جاستاعى ساي شۋاڭشي پارتيا مۇشەسى، قىزمەتتە ول وزىنە توتەنشە قاتاڭ تالاپ قويادى.
ءۇرىمجى - جياڭجۇنمياۋ تەمىر جولىنىڭ قۋاتىن ارتتىرىپ، جاڭالاۋ ينجەنەرياسىنىڭ قۇرىلىس مەرزىمى 2 جىل، كوپ تۇردەگى ينجەنەرياعا سايادى. مۇنىڭ ىشىندە كوبەيتىلىپ سالىناتىن ءۇرىمجى (سولتۇستىك ۆوكزالى) - جوڭعار (سولتۇستىك ۆوكزالى) 2 - جەلىسى ينجەنەرياسى 194 كيلومەترگە جەتەدى، وسى جىلدىڭ ىشىندە ىسكە قوسىلىپ، جۇمىس جۇرگىزىلۋى كەرەك.
S1 مەردىگەرلىك بولىگىنە ساياتىن كوبەيتىلىپ سالىناتىن 2 - جەلىسىنىڭ ۇزىندىعى 91.3 كيلومەتر، ۋاقىت تىعىز، مىندەت اۋىر، ۇستەمەلەپ ىستەۋ قالىپتى جاعدايعا اينالعان. ”جۇمىس توتەنشە كوپ، تاڭعى ساعات بىردەن بۇرىن ۇيىقتاپ كورمەدىك“، - دەدى ساي شۋاڭشي، -”الايدا بۇل ينجەنەريا جەلى بويىنداعى كاسىپورىندار مەن ونەركاسىپ باقشا رايوندارىنىڭ تاسىمال قاجەتىنە سايادى، قانشا شارشاسام دا شىداۋىم كەرەك“.
S1 مەردىگەرلىك بولىگىندە جيىنى 62 پارتيا مۇشەسى بار، ولار ساي شۋاڭشي سياقتى ءوز جۇمىس ورنىندا ەرلىكپەن شايقاسىپ، قاجىرلى تاباندىلىعىمەن نىسان اياق الىسىنىڭ جەدەلدەۋىن ىلگەرىلەتتى.
قۇرىلىس ورنىندا ماشينست باقىتبەك زاكارقان رەليس بويىندا تىنىمسىز ولشەۋ جۇمىسىن جۇرگىزىپ جاتتى، ەگەر بولات رەليس ءدال ورنىنا قويىلماسا، ول جۇمىستاستارىمەن بىرگە بولات رەليستى سۇيمەنمەن ورنىنا قويادى.
22 جاستاعى باقىتبەك فۋكاڭ قالاسى سانگۇڭحى قازاق اۋىلى بەسقۇم قىستاعىنىڭ تۇرعىنى، بيىل 3 - ايدا ول وسى نىسانعا كەلىپ، تەمىر جول قۇرىلىسشىسىنا اينالدى.
”ءبىر، ەكى، ءۇش!“ باقىتبەك جانە باسقا دا 20 نەشە جۇمىستاسى سۇيمەنمەن بولات رەليستى سىرتقا قاراي 10 سانتيمەتر جىلجىتتى. سۇيمەنىن سۇيەي سالىپ، بولات رەليستىڭ ورنىن ولشەپ تۇراقتاندىرعاننان كەيىن، ول تاعى ءبىر قۇرىلىس تۇيىنىنە باردى.
ۋاقىت بىلىنبەي ءوتىپ جاتتى، ەندى ساعات 14 بولادى، ارالىق مەرزىم اياقتاۋ الدىندا تۇر، سۇن ياجۇن كوپشىلىكتى قۇرىلىس ورنىنان تەز شەگىنۋگە ۇيىمداستىرىپ جاتتى. ”ءبىز شەكتى ۋاقىتتا بەلگىلەنگەن قۇرىلىس مىندەتىن ورىندادىق، ۋتۇڭساۋزىدان بەيسانتايعا دەيىنگى بولىگى وسىدان كەيىن ىسكە قوسىلىپ، جۇمىس جۇرگىزىلەدى“، - دەدى.
تولتىرا جۇك تيەگەن پويەز الىستان زاۋلاپ كەلەدى، پويەزدىڭ وتە شىققانىن كورىپ، باقىتبەكتىڭ كوڭىلى تولقىپ سالا بەردى. بۇل ول ات سالىسقان تۇڭعىش تەمىر جول قۇرىلىس نىسانى. الدا ول تاعى كوپتەگەن تەمىر جول نىسانىن سالۋعا تىنباي ات سالىسادى، ۇزىننان - ۇزىنعا سوزىلا تۇسكەن بولات رەليسپەن بىرگە شينجياڭ تەمىر جولىنىڭ دامۋىنا كۋا بولادى.
