اۆتونوميالى رايون ”ماقتادان مول ءونىم الدىق“ ارناۋلى اقپار جاريالاۋ ءماجىلىسىن وتكىزدى
”كىرشىكسىز دە اپپاق ماقتا ءبىزدى تاماشا تۇرمىسقا كەنەلتتى“
انار بۇلت / شينجياڭ گازەتىنىڭ ءتىلشىسى جىڭ جو 10 - ايدىڭ 12 - كۇنى لوپنۇردان حابارلايدى. ءبىر مەزگىلدەن بەرى امەريكاداعى، باتىستاعى جۇڭگوعا قارسى كۇشتەر شينجياڭدا ”زورلىقپەن ەڭبەككە سالۋ“ ءومىر ءسۇرىپ وتىر دەپ پالە جاپتى، سونداي - اق وسىنى سىلتاۋراتىپ شينجياڭنىڭ ماقتا كاسىبى سالاسىن قيسىنسىز جازالادى. 10 - ايدىڭ 12 - كۇنى شينجياڭ ۇيعۇر اۆتونوميالى رايونى بايىنعولين موڭعۇل اۆتونوميالى وبلىسىنىڭ لوپنۇر اۋدانىندا ”ماقتادان مول ءونىم الدىق“ ارناۋلى اقپار جاريالاۋ ءماجىلىسىن وتكىزدى، جەرگىلىكتى ماقتاشىلار مەن ماقتا كاسىبىمەن شۇعىلدانۋشىلاردان 6 ادام ءتول كەشىرمەلەرىن اڭگىمەلەۋ ارقىلى شينجياڭ ماقتاسىنىڭ ناقتى جاعدايىن قايتالاي باياندادى.
مۇندا ايتا كەتەرلىك ءبىر ءىس، وسى رەتكى اقپار جاريالاۋ ءماجىلىسى لوپنۇر اۋدانى گۇلباق اۋىلىنىڭ ماقتا اتىزىندا وتكىزىلدى. ماشينانىڭ گۇرىلدەگەن داۋىسىمەن بىرگە، قىزىل ءتۇستى 3 ماقتا جيۋ ماشيناسى ارلى - بەرلى بىرنەشە قايتارا ءجۇردى، كوپ وتپەي اتىزدا اۆتوماتتى تايلانعان اپپاق ماقتا ورامدارى پايدا بولدى. وسىمدىك قورعايتىن ۇشقىشسىز ۇشاق ۇشىرۋشى ءبىر شەتتە ۇشقىشسىز ۇشاقپەن ماقتا اتىزىنا جاپىراق تۇسىرەتىن ءدارى شاشىپ تۇردى. كەزىندە قىرۋار ادام كۇشىمەن زورعا بىتەتىن جۇمىس قازىر ماشينامەن ورىندالاتىن بولدى.
اقپار جاريالاۋ ماجىلىسىندە لوپنۇر اۋدانى دوڭقوتان اۋىلى دوڭقوتان قىستاعىنىڭ ماقتاشىسى نۇرالي ءومار ءوزىنىڭ ماقتا ەگۋ كەشىرمەلەرىن اڭگىمەلەدى. نۇرالي 1000 مۋ جەرگە ماقتا ەگىپتى، 2018 - جىلدان بۇرىن ماقتا ەگۋ، جيۋ جۇمىسى نەگىزىنەن ادام كۇشىمەن بىتەتىن. ءار جىلى ماقتا جيۋ مەزگىلىندە ولار ماقتا تەرەتىن 70 تە 80 جۇمىسشى جالداپ ماقتا تەرگىزەتىن، ولاردىڭ ىشىندە وسى قىستاقتىڭ تۇرعىندارى، قاشقار، حوتان سياقتى جەرلەردەن كەلگەن جۇمىسشىلار، سونداي - اق باسقا ولكەلەردەن شينجياڭعا ارناۋلى ماقتا تەرگەلى كەلگەن جۇمىسشىلار دا بار بولاتىن. ماقتا جيۋ مەزگىلىندە ماقتا تەرگەن ءاربىر جۇمىسشى ورتا ەسەپپەن 10 مىڭ يۋاننان استام كىرىس كىرگىزەدى. نۇرالي بىلاي دەدى: قازىر مەندە 8 تراكتور، ءبىر جول نۇسقاۋشىسى بار تۇقىم ءسىڭىرۋ ماشيناسى، ءبىر تەگىستەۋ ماشيناسى، 8 شاعىن تيپتى اۋىل شارۋاشىلىق ماشيناسى بار، 1000 مۋ جەردەگى ماقتانى باسقارۋعا 5 ادام عانا قاجەت. ”وسى بەسەۋى بۇرىن اۋىلداعى شارۋالار بولاتىن، قازىر ولار ماقتا ەگۋدىڭ شەبەرلەرىنە اينالدى. مەن ولارمەن ەڭبەك توقتامىنا قول قويىستىم، جىلىنا 40 مىڭ يۋان ەڭبەكاقى بەرەمىن“.
كەزەكتە شينجياڭنىڭ ماقتا وندىرىسىندە جوعارى ورەدە ماشينالاسۋ الدەقاشان جۇزەگە استى. لوپنۇر اۋدانىنىڭ ورىنباسار اكىمى حى مياۋ بىلاي دەپ تانىستىردى: 2021 - جىلى لوپنۇر اۋدانىندا ماقتا ەگىلگەن جەر اۋدانى ءبىر ميلليون مۋدان اسىپ، اۋىل شارۋاشىلىعىنىڭ ماشينالاسۋ سالىستىرماسى ％96كە جەتتى. قازىر ماقتا جيۋ جۇمىسى ەڭ قاۋىرت جۇرگىزىلەتىن مەزگىل بولعانىمەن، ماقتا تەرۋشىلەردى كوپتەپ اكەلۋدىڭ قاجەتى قالعان جوق. اقپار جاريالاۋ ماجىلىسىندە ماقتا جيۋ ماشيناسىن جۇرگىزۋشى ءسامي ءيۇسىپ، وسىمدىك قورعايتىن ۇشقىشسىز ۇشاق ۇشىرۋشى ءومارجان بۇرحان جانە اۋىل شارۋاشىلىق تەحنيكاسىن جالپىلاستىرۋشى قىزمەتكەر كەرىم راحىمان ماقتانى ماشينامەن ەگۋ، جيۋ سياقتى جاعدايلاردى تانىستىردى.
”500 نەشە مۋ جەرگە ماقتا ەكتىم، ءبىر مۋ جەردىڭ ءونىمى 400 نەشە كيلوگرامعا جەتەدى، ماقتا جيۋ ماشيناسىمەن ەكى - اق كۇندە جيىپ بولامىن. قازىرگى باعا بويىنشا ءبىر ميلليون يۋاننان استامعا ساتامىن“. لوپنۇر اۋدانى گۇلباق اۋىلىنىڭ ماقتاشىسى اركىن رەيىم بيىل ماقتا اتىزىن باسقارۋعا سىچۋاندىق 5 جۇمىسشىنى جالداپ ىستەتكەندىگىن، كولەمدى ماشينالاسقان جۇمىس جۇرگىزۋ ماقتاشىلاردىڭ ەڭبەك كۇشەمەلىلىگىن جەڭىلدەتكەندىگىن، بوس ۋاقىت جەتەرلىك ەكەندىگىن، ەگىن سالۋدان سىرت، تاعى 38 سيىر، 100 نەشە قوي باعاتىندىعىن، كىرىسىنىڭ دە بارعان سايىن ارتىپ كەلە جاتقاندىعىن ايتتى.
”كىرشىكسىز دە اپپاق ماقتا ءبىزدى تاماشا تۇرمىسقا كەنەلتتى. ەڭبەكتەنىپ ماقتا ەگىپ، ماڭداي تەرىمىزبەن باقىتقا قول جەتكىزدىك، مۇنىڭ نەسى قاتە؟“ اركىن شينجياڭداعى ءار ۇلت ماقتاشىلارىنىڭ جۇرەك ءسوزىن ايتتى. ماجىلىستە كەشىرمەلەرىن بايانداعان 6 ادام مىنالاردى ءبىلدىردى: اپپاق ماقتا شينجياڭداعى ءار ۇلت ماقتاشىلارىنىڭ ماڭداي تەرىمەن سۋارىلعان، وسەك - اياڭ تاراتۋشىلاردىڭ ونى داتتاۋىنا جول بەرمەيمىز. فاكت الدىندا وسەك - اياڭ، اقىرى، تويتارىسسىز - اق توزىپ جوعالادى، شينجياڭنىڭ ەرتەڭى ءتىپتى دە تاماشا بولادى.
