جالپى ءونىم 5 ميلليون 200 مىڭ 600 تونناعا جەتەتىندىگى مەجەلەندى
انار بۇلت / شينجياڭ گازەتىنىڭ ءتىلشىسى ليۋ ي 10 - ايدىڭ 14 - كۇنى ۇرىمجىدەن حابارلايدى. ”13 - بەسجىلدىقتا“ بۇكىل رايوننىڭ اۋىل شارۋاشىلىعى، اۋىل - قىستاق، شارۋالار دامۋىنىڭ ناتيجەسى جانە ”14 - بەسجىلدىقتىڭ“ باستالۋ جاعدايى جونىندەگى اقپار جاريالاۋ ماجىلىسىنەن ۇعىسۋىمىزشا، بيىل بۇكىل رايوندا ماقتا ەگىلگەن جەر اۋماعى مەجەمەن 37 ميلليون 180 مىڭ مۋعا، جالپى ءونىم 5 ميلليون 200 مىڭ 600 تونناعا جەتەدى ەكەن. بۇكىل رايوننىڭ ماقتا وندىرىسىندە ەگىلگەن جەر اۋماعى 349 مىڭ مۋ ازايعان جاعدايدا، جالپى ءونىمدى 39 مىڭ 600 توننا ارتتىرۋ جۇزەگە اسىرىلىپ، ساپا مەن ونىمدىلىك ۇزدىكسىز جوعارىلاپ، ماقتا وندىرىسىندە تاعى مول ءونىم الىندى.
بيىل اۆتونوميالى رايوننىڭ ماقتا ساپاسىن جوعارىلاتۋ جىلى، بۇكىل رايونداعى اۋىل شارۋاشىلىعى، اۋىل - قىستاق تاراۋلارى ماقتانىڭ جوعارى ساپالى دامۋىن ءتۇيىن ەتىپ، ءوندىرىس ورنالاسۋىن باسىم ماقتا القاپتارىنا قاراي شوعىرلانۋعا جەتەكتەپ، ماقتا سورتى قۇرىلىمىن ساپالىلاندىرىپ، ماقتانىڭ ساپاسىن جوعارىلاتىپ، ماقتانىڭ ساپا مەن ونىمدىلىك ەكەۋىنەن بىردەي جوعارىلاۋىن ىلگەرىلەتتى. بۇكىل رايوندا 10 مىڭ مۋدان استام جەردەگى ماقتا سورتىنىڭ سانى بىلتىرعى 64تەن 45كە ازايدى.
اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى 100 اۋىل شارۋاشىلىعى تەحنيگىن ماقتانى باپتاپ - باسقارۋدىڭ شەشۋشى جۇمىسى كەزىندە ماقتا ەگەتىن 34 اۋدان، قالاعا بارۋعا تاڭداپ جىبەرىپ، جەرگىلىكتى ورىنداعى اۋىل شارۋاشىلىق تەحنيكتەرىمەن ارالاس گرۋپپاعا ورنالاستىرىپ، جاپپاي قامتىعان تور جايۋ ۇلگىسىندەگى تەحنيكالىق قىزمەت وتەۋ جەتەكشىلىگىن ورىستەتىپ، شارۋالاردىڭ سۋارۋ، تىڭايتقىش بەرۋ، عىلمي باپتاۋ، قاداعالاۋ سياقتى شەشۋشى تەحنيكالىق شارالاردى تياناقتاندىرۋىنا جەتەكشىلىك ەتۋ ارقىلى ماقتا اتىزىن باپتاۋدى بار كۇشپەن مىقتاپ يگەرىپ، ماقتا ءوندىرىسى ورەسىن جوعارىلاتتى. ساناققا قاراعاندا، بيىل بۇكىل رايوندا ماقتانىڭ مۋ باسىندىق ورتاشا بىرلىك ءونىمى 139.9 كيلوگرامعا جەتەتىندىگى مەجەلەنىپ، بىلتىرعىمەن سالىستىرعاندا ءار مۋىنان 1.28 كيلوگرام ارتىپ، دۇنيە جۇزىلىك ورتاشا ورەدەن الدەقايدا اسقان.
بيىل بۇكىل رايون ماقتا ءوندىرىسىنىڭ ساپاسى مەن ونىمدىلىگىن ءۇرتىس جوعارىلاتۋمەن بىرگە، ماقتانى ماشينامەن تەرۋدى جالپىلاستىرۋ تەبىنىن ۇزدىكسىز كۇشەيتىپ، ماقتانى كولەمدەندىرىپ ەگۋدى دامىتۋعا جەتەكتەپ، وڭتۇستىك شينجياڭ ماقتا ءوندىرىسىنىڭ ۇساق شارۋالاردىڭ بىتىراندى شارۋاشىلىعىنان ۇيلەسىمدى كولەمدەگى شارۋاشىلىققا قاراي بۇرىلىس جاساۋىنا ۇلگى كورسەتىپ، دەم بەردى. بۇكىل رايوندا (جەرگىلىكتى ورىندا) ماقتانىڭ ماشينامەن تەرىلۋ مولشەرى ％75تەن اسىپ، وڭتۇستىك شينجياڭدا ％60كە جەتىپ، بۇكىل رايوندا ％80تەن استامعا جەتىپ، ماقتانىڭ ماشينامەن تەرىلۋ مولشەرى بىلتىرعىمەن سالىستىرعاندا اناعۇرلىم جوعارىلايتىندىعى مەجەلەندى.
باعا جاعىندا بيىل ماقتا ءونىمىن جيناۋ قىزمەتى باستالعاننان كەيىن، بۇكىل رايوندا ماقتانىڭ باعاسى ءۇرتىس جوعارىلاپ، ونان كەيىن ءسال تومەندەدى. 10 - ايدىڭ 12 - كۇنىنە دەيىن بۇكىل رايون جيىنى 2 ميلليون 222 مىڭ 700 توننا ءشيتتى ماقتا (جىڭىشكە تالشىقتى ماقتا) ساتىپ الىپ، بۇكىل رايوندا ءشيتتى ماقتانى ساتىپ الۋ ورتاشا باعاسى جوعارى اينالىمدى ساقتاپ، ءار كيلوگرامى 10.66 يۋانعا جەتىپ، بىلتىرعى سايكەس مەزگىلدەگىدەن جوعارى بولدى.
