تيانشان تورى   ›   ۇيرەنۋ   ›   شولۋ

بيڭتۋاننىڭ ەرەكشە رولىن ساۋلەلەندىرىپ، رەفورمادا ەكپىندەي ىلگەرىلەۋ تاراۋىن جازدى

− اۆتونوميالى رايوندىق 9 - رەتكى پارتيا قۇرىلتايىنان بەرگى ەكونوميكالىق، قوعامدىق دامۋ جونىندە جالپى شولۋ (6)

  انار بۇلت / شينجياڭ گازەتىنىڭ ءتىلشىسى ميھرگۇل عوپۇر

  شينجياڭ ءوندىرىس - قۇرىلىس بيڭتۋانى − پارتيا ورتالىق كوميتەتىنىڭ شينجياڭ قىزمەتى باس نىساناسىن جۇزەگە اسىرۋداعى ماڭىزدى ستراتەگيالىق كۇش، شينجياڭنىڭ ەكونوميكالىق، قوعامدىق دامۋىنداعى ماڭىزدى كۇش. اۆتونوميالى رايوندىق 9 - رەتكى پارتيا قۇرىلتايىندا مىنالار اتاپ كورسەتىلدى: بيڭتۋاننىڭ قىزمەتىنە وسكەلەڭ ءمان بەرىپ، قولداۋ كورسەتىپ، قوعام ورنىقتىلىعى مەن باياندى تىنىشتىق باس نىساناسىن مىقتاپ ارقاۋ ەتىپ، بيڭتۋاننىڭ ەرەكشە رولىن تولىق ساۋلەلەندىرۋ كەرەك.

  5 جىلدان بەرى اۆتونوميالى رايوندىق پارتكومنىڭ ءبىر تۇتاس باسشىلىعىندا بيڭتۋان جاڭا داۋىردەگى پارتيانىڭ شينجياڭدى جونگە سالۋ جالپى جوباسىن جانە پارتيا ورتالىق كوميتەتىنىڭ بيڭتۋاننىڭ ورنى جونىندەگى تالابىن ىشكەرىلەي دايەكتىلەندىرىپ، مەملەكەت مۇددەسى − بيڭتۋاننىڭ مۇددەسى، شينجياڭنىڭ كەلەلى جاعدايى − بيڭتۋاننىڭ كەلەلى جاعدايى دەگەنگە تاباندى بولىپ، شينجياڭ قىزمەتى باس نىساناسىن مىقتاپ يگەرىپ، ورنىقتىلىقتى قورعاپ، شەكارانى كۇزەتۋ مىندەت جاۋاپكەرشىلىكتەرىن باتىل اتقارىپ، رەفورمانى ۇزدىكسىز تەرەڭدەتىپ، بيڭتۋان مەن جەرگىلىكتى ورىننىڭ توعىسپالى دامۋىن ىلگەرىلەتىپ، ءتۇرلى ىستەردە تىڭ تىنىس تىرشىلىك، ومىرشەڭدىك كۇش قاۋلاتتى.

  بورىشتى ەستە بەرىك ساقتاپ، ورنىقتىلىقتى قورعاپ، شەكارانى كۇزەتتى

  10 - ايدىڭ 1 - كۇنى ساعات 8دەن 30 مينۋت وتكەندە، شاعانتوعاي اۋدانىنىڭ ساربۇلاق ساحاراسى، تاڭ ءالى اتا قويعان جوق، شينجياڭ ءوندىرىس - قۇرىلىس بيڭتۋانى 9 - شىسى 161 - تۋانىنىڭ زەينەتكە شىققان جۇمىسشى - قىزمەتكەرى ۋي دىيوۋ مەن جۇبايى ليۋ جيڭحاۋ اۋلاعا كەلىپ بەس جۇلدىزدى قىزىل تۋ شىعاردى ءارى مەملەكەت تۋىنا قۇرمەت ءبىلدىردى.

  ”تالاي جىلدان بەرى ءار جولى شارلاۋدان بۇرىن جۇبايىم ەكەۋىمىز الدىمەن مەملەكەت تۋىن شىعارىپ كەلدىك. بۇگىن مەملەكەت مەرەكەسى، وتانىمىزدىڭ گۇلدەنىپ - كوركەيۋىن تىلەيمىز“، - دەدى ۋي دىيوۋ.

  1964 - جىلدان قازىرگە دەيىن 57 جىل ءوتتى، جاستىق شاعىنان باسىن اق قىراۋ شالعانعا دەيىن ۋي دىيوۋ ءار كۇنى شەكارا سىزىعىن بويلاپ 10 نەشە كيلومەتر جول باسىپ، جيىنى 200 مىڭ كيلومەتردەن استام جول باسىپ، باتىس سولتۇستىك شەكارا سىزىعىنداعى ”ءتىرى شەكارا ەسكەرتكىشى“ دەپ اتالدى.

  ورنىقتىلىقتى قورعاپ، شەكارانى كۇزەتۋ − پارتيا ورتالىق كوميتەتىنىڭ بيڭتۋانعا جۇكتەگەن قاسيەتتى بورىشى جانە جاۋاپكەرشىلىگى. بيڭتۋان قۇرىلعان كۇننەن باستاپ، بۇل ءسوز ءاربىر بيڭتۋاندىقتاردىڭ كوڭىلىنە تەرەڭ ۇيالادى.

  بيڭتۋان 3 - شىسى قاعىلىق 2 - مال فەرماسىنىڭ 3 - ليانىندا پارتيا ياچەيكاسىنىڭ شۋجيى ليۋ چياندۇڭ اكەسىنىڭ ءىزىن باسىپ، بيڭتۋانداعى تەڭىز دەڭگەيىنەن ەڭ بيىك شەكاراداعى ليان - دۇيلەردە حالىق جاساقتارى قوسىنى قۇرىلىسىن يگەرىپ، جىل بويى حالىق جاساقتارىن شارلاۋ، شەكارانى قورعاۋعا ۇيىمداستىردى.

  ۇرپاقتان - ۇرپاققا جالعاسقان قالتقىسىز تاباندىلىق بيڭتۋاندىقتاردىڭ وتانعا دەگەن شەكسىز ادالدىعىن ايگىلەدى.

  5 جىلدان بەرى بيڭتۋان پارتكومى ورنىقتىلىقتى قورعاپ، شەكارانى كۇزەتۋدى باستان - اياق بارلىعىن باسىپ تۇسەتىن مىندەت جاۋاپكەرشىلىگى، بورىش ەتىپ، بيڭتۋاننىڭ ”شەكارانى ورنىقتىراتىن، شەكارانى بەكەمدەيتىن ورنىقتىرعىشتىق“ رولىن تولىق ساۋلەلەندىرىپ، ماڭداي الدى حالىق جاساقتارى قوسىنى قۇرىلىسىن تىڭعىلىقتى يگەرىپ، ورنىقتىلىقتى قورعاپ، شەكارانى كۇزەتۋ قابىلەتىن ۇزدىكسىز كۇشەيتىپ، شەكارانى كۇزەتۋ، شەكارانى قورعاۋ قابىلەتىن جوعارىلاتىپ، شەكارانىڭ حاۋىپسىزدىگىنە، شەكارانىڭ ورنىقتىلىعىنا شىنايى كەپىلدىك ەتتى.

  رەفورمانى تەرەڭدەتىپ، ومىرشەڭدىك كۇشتى قاۋلاتتى

  ”بۇرىن وتباسىمنىڭ جىلدىق كىرىسى 30 مىڭ يۋان اينالاسىندا بولاتىن، قازىر 100 مىڭ يۋانعا تايادى. ەگىس الاڭى رەفورماسىنان كەيىن، ءبىزدىڭ ەگىن ەگۋدەگى تابىسىمىز ءتىپتى دە جاقساردى“. 10 - ايدىڭ 9 - كۇنى ءوز ەگىستىگىنە كوز تاستاعان بيڭتۋان 6 - شىسى كوممۋنيستىك جاستار وداعى ەگىس الاڭى 2 - ليانىنىڭ جۇمىسشى - قىزمەتشىسى جاڭ جيانگونىڭ قۋانىشى قوينىنا سيمادى.

  2017 - جىلى شي جينپيڭ جولداستى ۇيتقى ەتكەن پارتيا ورتالىق كوميتەتى ستراتەگيالىق ورنالاستىرۋ جاساپ، شينجياڭ ءوندىرىس - قۇرىلىس بيڭتۋانى رەفورمانى جاپپاي تەرەڭدەتۋدى باستادى، تۋان الاڭداردىڭ جالپىلىق سايكەستى رەفورماسى ەڭ ماڭىزدى ىسكە اينالدى.

  رەفورمانىڭ ۇزدىكسىز ىلگەرىلەۋىنە بايلانىستى، جۇمىسشى - قىزمەتكەرلەر شىن مانىندە بازار شارۋاشىلىعىنىڭ نەگىزگى تۇلعاسىنا اينالىپ، ءىس تىندىرىپ، شارۋاشىلىق قۇرۋ بەلسەندىلىگى بۇرىن بولىپ كورىلمەگەن دارەجەدە جوعارىلادى، ولار ارت - ارتىنان سەلبەستىك كووپەراتيۆىنە كىرىپ بازاردى بىرگە اشتى؛ ليان - دۇيلەردىڭ ”ەكى كوميتەتىن“ ليان - دۇيلەر دەموكراتيالىق جولمەن سايلاپ شىعىپ، بارلىق ىستەرگە، ءسوزسىز، ”ءتورتتى اقىلداسۋ، ەكىنى اشىق جاريالاۋ“ ارقىلى شەشىم جاسالدى. سونىمەن ءبىر ۋاقىتتا، مەملەكەت مەنشىگىندەگى مال - مۇلىك، مەملەكەت مەنشىگىندەگى كاسىپورىندار رەفورماسى ورنىقتى قاداممەن ىلگەرىلەتىلىپ، بيڭتۋاننىڭ جالپىلىق ناقتى كۇشىنىڭ زورايۋىنا كۇش توپتادى.

  ءبىرسىپىرا رەفورما شارالارىنىڭ تياناقتانىپ ءونىم بەرۋىنە بايلانىستى، بيڭتۋان بۇرىن بولماعان دامۋ ومىرشەڭدىك كۇشىن جارىققا شىعاردى.

  9 - ايدىڭ 27 - كۇنى شىحىزى قالاسى بەيچۋان قالاشىعى جۋجياجۋاڭ 7 - ليانىنداعى قىزمەتكەر جوۋ جۇنچاۋدىڭ 131 مۋلىق ماقتا اتىزىندا 2 ءىرى ماقتا تەرۋ ماشيناسى ماقتا تەرىپ جاتتى. ”بيىل ءار مۋىنان 440 دا 450 كيلوگرام ءونىم الىناتىندىعى، مۋ باسىندىق ءونىم قۇنى 4000 نەشە يۋان بولاتىندىعى مەجەلەنۋدە“، - دەدى جوۋ جۇنچاۋ قۋانا.

  اۆتونوميالى رايوندىق پارتكوم بيڭتۋان قىزمەتىن باستان - اياق جالپى جاعدايعا ساياتىن ماڭىزدى ورىنعا قويىپ، بيڭتۋاننىڭ رەفورما، دامۋ اياق - الىسىن جەدەلدەتۋىنە بار كۇشپەن قولداۋ كورسەتتى. 5 جىلدان بەرى بيڭتۋان وسى زامانعى كاسىپ سالاسى جۇيەسىن ورناتۋدى جەدەلدەتىپ، وسىزاماندانعان، ماشينالاسقان، كولەمدەنگەن ەگىمشىلىكتى ەڭ الدىمەن قولدانىپ، اۋىل شارۋاشىلىعى ءوندىرىس ءتاسىلىن جاڭالاۋدى جەدەلدەتىپ، ەكونوميكالىق كولەم ۇزدىكسىز ارتىپ، وسىزامانداندىرۋ اياق الىسى ورنىقتى ىلگەرىلەدى.

  توعىسپالى دامۋ بۇقاراعا پايدا اكەلدى

  اۆتونوميالى رايون ەجەلدەن ”بيڭتۋان مەن جەرگىلىكتى ورىن ءبىر تۇتاس جۇيە“ يدەياسىن بەرىك ورناتىپ، بيڭتۋان مەن جەرگىلىكتى ورىننىڭ توعىسپالى دامۋىن ەڭ ماڭىزدى ورىنعا قويىپ، بيڭتۋان مەن جەرگىلىكتى ورىننىڭ ەكونوميكا، مادەنيەت، قوعام، كادر - دارىندىلار، ورنىقتىلىقتى قورعاۋ سياقتى جاقتارداعى توعىسۋىن ىشكەرىلەي ىلگەرىلەتتى. بيڭتۋان مەن جەرگىلىكتى ورىن ءبىر نيەتپەن قول ۇستاسىپ، بىرگە العا ىلگەرىلەپ، توعىسپالى دامۋ ءار ۇلت بۇقاراسىنا پايدا اكەلدى.

  9 - ايدىڭ 24 - كۇنى بيڭتۋان 5 - شىسى 88 - تۋانىنىڭ اراسان اۋدانىمەن بىرگە قۇرعان ”بيڭتۋان مەن جەرگىلىكتى ورىننىڭ توعىسۋى كوشەسىندە“ ۇلتتار ىنتىماعىنداعى، العاباسارلىعىنداعى ۇلگىلى ساۋداگەر ليۋ حۇڭمەي ەڭبەكاقىنى اسپاز ابدۇجاپپار ميجيتتىڭ قولىنا تابىس ەتتى. ”وسى ايدا ساۋدا كۇسەت بولدى، ساعان 1000 يۋان سيلىق اقشا قوسىپ بەردىم، كۇش ۇستىنە كۇش قوسىپ قايراتتانا ىستەيىك“، - دەدى ليۋ حۇڭمەي.

  2019 - جىلى 88 - تۋاننىڭ قىزمەتكەرى ليۋ حۇڭمەي ”بيڭتۋان مەن جەرگىلىكتى ورىننىڭ توعىسۋى كوشەسىندە“ پالاۋحانا اشادى ءارى اراسان اۋدانىنداعى ابدۇجاپپاردى اسحاناسىنىڭ اسپازى بولۋعا ۇسىنىس ەتەدى. ابدۇجاپپار قۇلشىنا ۇيرەنىپ، اسپازشىلىق ونەرىنە تەز جەتىلىپ، ايلىق ەڭبەكاقىسى باستابىنداعى 3000 يۋاننان قازىرگى 5000 يۋانعا جوعارىلايدى.

  88 - تۋان اراسان اۋدانىنىڭ قىستاقتارىمەن ىرگەلەس، ەگىنجايلارى تۇتاسقان. كوپ جىلدان بەرى تۋان الاڭنىڭ جۇمىسشى - قىزمەتكەرلەرى مەن اراسان اۋدانىنداعى ءار ۇلت بۇقارا ءىس بولسا بىرگە اقىلداسىپ، جايشىلىقتا ۇنەمى بارىس - كەلىس جاساسىپ، ءبىر ءۇيدىڭ ادامىنداي تاتۋ - ءتاتتى ءوتىپ، ىنتىماقتاسا ەكپىندەي ىلگەرىلەۋدىڭ جان تەبىرەنتەرلىك سيمفونياسىن جازدى.

  5 جىلدان بەرى بيڭتۋان پارتكومى ءتۇرلى قىزمەتتى شينجياڭنىڭ ەكونوميكالىق، قوعامدىق دامۋ جالپى جاعدايىمەن بايلانىستىرا وي جۇگىرتىپ جانە ىلگەرىلەتىپ، وڭىرلىك دامۋ ۇستانىمىمەن بيڭتۋان مەن جەرگىلىكتى ورىننىڭ توعىسپالى دامۋىن جوبالاۋعا، تياناقتاندىرۋعا تاباندى بولىپ، بيڭتۋان مەن جەرگىلىكتى ورىندى توعىستىرۋ ءتۇزىلىسىن، مەحانيزمىن كەمەلدەندىرىپ، ءىس جۇزىندىك ارەكەتى ارقىلى توڭىرەگىنىڭ دامۋىنا ىقپال جاساپ، جەتەكشىلىك ەتىپ جانە دەم بەرىپ، ورنىقتىلىقتى قورعاۋدىڭ، ىنتىماقتى نىعايتۋدىڭ بىرىككەن كۇشىن قالىپتاستىردى.

  توعىسپالى دامۋ جولىندا بارلىق جەردەن جاڭا لەپ ەستى. تۇمسىق قالاسى قاشقار ايماعىنىڭ ”ءبىر قالا، ەكى اۋدان“ رەليستى قاتىناس نىسانى قۇرىلىسىنا ىرىقتى تۇردە ات سالىسىپ، ىسكە قوسىلعان جانە سالىنىپ جاتقان تاس جولدىڭ ۇزىندىعى 465 كيلومەترگە جەتىپ، بيڭتۋان مەن جەرگىلىكتى ورىنداعى 700 مىڭعا تارتا بۇقارانى يگىلىككە كەنەلتتى؛ شىحىزى قالاسى مەن ماناس اۋدانى بىرگە 490 ميلليون يۋان قارجى قوسىپ، ماناس وزەنىن ەندەي وتەتىن، ەكى جەردى تۇتاستىراتىن شىحىزى - ماناس كوپىرىن سالدى...

  قازىر ارال قالاسى، تۇمسىق قالاسى، قۇرۇمقاش قالاسى، ارميا تىڭ يگەرگەن جاڭا قالالار جارقىراعان مەرۋەرتتەي وڭتۇستىك شينجياڭنىڭ بايتاق دالاسىندا كوركەيۋدە.

  جاڭا تاريحي باستامادا تۇرعان بيڭتۋاندىقتار قاشاندا اۋەلگى ماقساتتى ۇمىتپاي، بورىشتى ەستە بەرىك ساقتاپ، توراڭعى رۋحى مەن بيڭتۋان رۋحىن امالياتتا ايگىلەپ، جاڭا داۋىردە بيڭتۋان قىزمەتىنىڭ تىڭ ساتىعا كوتەرىلۋىن ۇزدىكسىز ىلگەرىلەتىپ كەلەدى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.