تيانشان تورى   ›   جاڭالىقتار   ›   شينجياڭ حابارلارى

بۇكىل قىستاقتاعىلاردىڭ ”جان اشىر شۋجيى“

  ءپۇربۇ:

   بۇكىل قىستاقتاعىلاردىڭ ”جان اشىر شۋجيى“

  □انار بۇلت / شينجياڭ گازەتىنىڭ ءتىلشىسى سۇڭ يا - ۋىن

  قازىر اراسان اۋدانى اڭگىلىك قالاشىعى توسحۇرت قىستاعىندا قىستاق پارتيا ياچەيكاسىنىڭ شۋجيى ءپۇربۇ جايلى ءسوز بولسا، قىستاق تۇرعىندارىنىڭ بارلىعى باس بارماعىن كورسەتىپ القايدى. ول بۇكىل قىستاقتاعى كادر - بۇقارانى باستاپ قۇلشىنا كۇرەس جاساپ، قىستاقتا زور وزگەرىس تۋىلدى، قىستاقتاعىلاردىڭ ءبارى ونى جاقىن تارتىپ ”جان اشىر شۋجي“ دەپ اتاپ كەتتى.

  10 - ايدىڭ 10 - كۇنى توسحۇرت قىستاعىنا كەلگەنىمىزدە، قىستاقتىڭ رەتتى دە تازا، كوشەلەرىنىڭ كەڭ دە تەگىس ەكەنىن، شارۋالار اۋلاسىنان كوكونىس، جەمىس - جيدەكتىڭ حوش ءيىسى اڭقيدى، تۇرعىندار وزگەرتىپ جاساعان وزگەشە شارۋالار شاتتىعى ساياجايى كوپتەگەن ساياحاتشىلاردى وزىنە باۋرادى.

  ”ءپۇربۇ شۋجيدىڭ ارقاسى. ونىڭ كومەگىندە ءۇيىمدى شارۋالار شاتتىعى ساياجايى ەتىپ وزگەرتىپ، ساياحاتشىلاردى تاماقتانۋعا، قونۋعا قابىلدادىم، تاعى ءسۇت ونىمدەرىن ساتتىم، مەرەكە دەمالىس كۇندەرى، ءبىر كۇندىك تيجارات سومام 2000 يۋاننان اسادى“، - دەدى قىستاق تۇرعىنى ەركىن جۇزىنەن كۇلكى ەسىپ.

  ءپۇربۇ قىستاقتاعى ايتۋلى بايۋ شەبەرى. 2017 - جىلى توسحۇرت قىستاعى پارتيا ياچەيكاسىنىڭ شۋجيى زەينەتكە شىعىپ، ءپۇربۇ قىستاق پارتيا ياچەيكاسىنىڭ شۋجيى مىندەتىن ۇستىنە الادى.

  ”اراسان اۋدانى ساياحات اۋدانى، ءبىزدىڭ قىستاق سايرام كولى كورىنىس وڭىرىنە باراتىن جولدىڭ ۇستىندە، ءار جولى ساياحاتتىڭ قاۋىرت ماۋسىمىندا كوپتەگەن ساياحاتشى كەلەدى. ءبىز ورايدى يگەرىپ، اۋىل - قىستاق ساياحاتىن دامىتىپ، شارۋالار شاتتىعى ساياجايىن اشىپ، قىستاق تۇرعىندارىنىڭ كىرىسىن ارتتىرۋىمىز كەرەك“، - دەدى ءپۇربۇ.

  اۋىل - قىستاق ساياحاتىن دامىتۋدا ماڭداي الدى ءىرى ءىس قىستاقتىڭ بەت - بەينەسىن وزگەرتۋ. ءپۇربۇنىڭ جەتەكشىلىگىندە 2018 - جىلى قىستاق 800 مىڭ يۋان قارجى قوسىپ، 6 كيلومەتر قۇبىر تارتىپ، حاۋىپسىز اۋىز سۋ ماسەلەسىن شەشتى؛ 2019 - جىلى نىسانعا قول جەتكىزىپ، 4600 مۋ جەرگە تامشىلاتىپ سۋارۋ جۇيەسىن ورناتتى؛ 2020 - جىلى تۇتاس قىستاقتا جاسىلداندىرۋ، كورىكتەندىرۋ نىسانىن جۇرگىزىپ، كورىنىس اعاشى مەن جەمىس اعاشىن ەكتى... قىستاق كەلبەتىن، قىستاق بەينەسىن جانە قونىستانۋ ورتاسىن رەتتەۋ، وڭاۋ ارقىلى قىستاق كورىكتەندى، ساياحاتشىلار كەلىپ ارالاپ، قونىپ قايتاتىن بولدى.

  توسحۇرت قىستاعىندا 8000 مۋدان ارتىق جەر بار، الايدا، بۇرىننان بەرى قىستاق تۇرعىندارى مال باعۋدى نەگىزگى كاسىپ ەتىپ، جەرلەرىن ءار مۋىن بىرنەشە ون يۋاندىق باعامەن كوتەرمەگە بەرىپ جىبەرگەن ءارى توقتامدى ءبىر جولدا 10 دا 20 جىلعا دەيىن جازىپ، قىستاق تۇرعىندارىنىڭ مۇددەسىنە قاتتى زيان جەتكىزەدى.

  اراسان اۋدانىنىڭ جوعارى ءونىمدى سۋ ۇنەمدەپ سۋارۋ ينجەنەرياسىن ىلگەرىلەتۋىن وراي ەتىپ، ءپۇربۇ بەلسەندى تۇردە نىسانعا قول جەتكىزىپ، تۇتاس قىستاق جەرىن بىرىكتىردى. 2019 - جىلى اشىق مەردىگەر شاقىرۋ ارقىلى ءار مۋىن 710 يۋاندىق باعامەن جەردى قايتادان اينالىمعا سالىپ، قىستاق تۇرعىندارىنىڭ كىرىسىن ارتتىردى.

  مال شارۋاشىلىعى توسحۇرت قىستاعىنىڭ ءداستۇرلى كاسىبى، الايدا جەرگىلىكتى سيىردىڭ ءسۇت پەن ەت ءتۇسىمى جوعارى بولماعاندىقتان، قىستاق تۇرعىندارى ماندىمدى اقشا تابا المايدى. ءپۇربۇ كوپ رەت قىستاق تۇرعىندارىن ەرتىپ سىرتقا شىعىپ تەكسەرۋ جۇرگىزىپ، وزىق باعىمشىلىق تەحنيكاسىن ۇيرەنىپ، باعىمشىلىق سەلبەستىك كووپەراتيۆىن ۇيىمداستىرىپ قۇرىپ، مالدىڭ تۇقىمىن اناعۇرلىم جاقسارتتى. قازىرگە دەيىن وسى قىستاق جالپى 5000نان ارتىق سيىر، 15 مىڭ قوي، 2000 جىلقى باعىپ، مال شارۋاشىلىعى قىستاق تۇرعىندارىنىڭ بايۋىنداعى ماڭىزدى كاسىپ سالاسىنا اينالدى.

  قازىر توسحۇرت قىستاعىنىڭ ءوندىرىس، تۇرمىس شارت - جاعدايىندا زور وزگەرىس تۋىلدى، ءپۇربۇ دا ۇيىم مەن قىستاق تۇرعىندارىنىڭ مويىنداۋىنا يە بولدى. اۆتونوميالى رايوندىق تاڭداۋلى كوممۋنيستىك پارتيا مۇشەسى، مەملەكەتتىك ەڭبەك ەرى، مەملەكەتتىك تاڭداۋلى كوممۋنيستىك پارتيا مۇشەسى... داڭق الدىندا، ءپۇربۇ بىلاي دەدى: ”بۇقارا ءۇشىن پايدالى، ناقتى ءىستى كوبىرەك ىستەۋ كوممۋنيستىك پارتيا مۇشەسىنىڭ جاۋاپكەرشىلىگى. مەن قىستاقتاعى تۇرعىنداردى باقىتتى تۇرمىس كەشىرۋگە باستاپ، قىستاق دارەجەلى كوللەكتيۆ ەكونوميكاسىن دامىتۋعا، زورايتۋعا كوبىرەك جول قاراستىرىپ، تىنباي امال ىزدەيمىن“.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.