− ىندەتكە قارسى اتتانۋ رۋحى جونىندەگى شولۋ
□ شينحۋا اگەنتتىگىنىڭ ءتىلشىسى حوۋ ۋىنكۇن
جيحاي جىلىنىڭ سوڭىندا، گىڭزى جىلىنىڭ كوكتەمىندە، الاپات ىندەت توسىن تاپ بەردى.
جاڭا تيپتى ايدارشا ۆيرۋس وكپە قابىنۋ ىندەتى 100 جىلدان بەرى دۇنيە ءجۇزى كولەمىندە تۋىلعان ەڭ اۋىر جۇقپالى اۋرۋدىڭ كەڭ تارالۋى، جاڭا جۇڭگو قۇرىلعاننان بەرى ەلىمىز تاپ بولعان تارالۋ جىلدامدىعى ەڭ تەز، جۇعىمدالۋ كولەمى ەڭ كەڭ، ساقتانۋ - تىزگىندەۋ قيىندىعى ەڭ ۇلكەن بولعان ەلەۋلى تۇتقيىل الەۋمەتتىك دەنساۋلىق ساقتاۋ وقيعاسى سانالادى.
حالىقتى بارىنەن جوعارى قويىپ، ءومىردى بارىنەن جوعارى قويىپ، ۋاقىتپەن جارىسىپ، اۋرۋمەن ايقاستى − ىندەتتەن ساقتانۋ - تىزگىندەۋدىڭ حالىقتىق شايقاسى، جالپى تۇلعالىق شايقاسى، توسقاۋىل شايقاسى دەرەۋ باستالىپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ باسشىلىعىندا، ءبىر ميلليارد 400 ميلليون جۇڭگو حالقى ەل بىرلىگىنەن بەرىك قامال تۇرعىزىپ، ىندەتتەن ساقتانۋ - تىزگىندەۋدىڭ مىعىم قورعانىس شەبىن قۇرىپ، ادامزاتتىڭ اۋرۋمەن كۇرەس جاساۋ تاريحىنداعى تاعى ءبىر قاھارماندىق ۇلى ارەكەت جاراتتى ءارى ءومىردى بارىنەن جوعارى قويۋ، بۇكىل ەل ءبىر نيەتپەن جۇمىلۋ، ولىمنەن قورىقپاي، باسىن ءباي تىگۋ، عىلىمعا قۇرمەت ەتۋ، تاعدىرلاس بولۋ سىندى ىندەتكە قارسى اتتانۋ ۇلى رۋحىن سومدادى.
ءومىردى بارىنەن جوعارى قويۋ: ادامدىق قاسيەتتىڭ نۇر شۇعىلاسىن كورسەتتى
ىندەت توسىننان تۋىلىپ، حۋبەي ۋحاندا ەمدەۋ - كۇتىمدەۋ قىزمەتكەرلەرىنىڭ جەتىسپەۋشىلىگى، اۋرۋ توسەكتەرىنىڭ جەتىسپەۋشىلىگى، مەديتسينالىق زاتتىق ماتەريالدار تاپشىلىعى، تۇرمىستىق بۇيىمداردىڭ تاپشىلىعى تۋىلدى!...
توسىن تۋىلعان اۋىر ىندەت الدىندا، شي جينپيڭ جولداستى ۇيتقى ەتكەن پارتيا ورتالىق كوميتەتى جالپى جاعدايدى ءبىر تۇتاس مەڭگەرىپ، باتىل شەشىم قابىلداپ، ەرەكشە ىسكە ەرەكشە شارامەن توتەپ بەردى. پارتيا ورتالىق كوميتەتى حالىقتىڭ باس اماندىعى مەن دەنساۋلىعىن ءبىرىنشى ورىنعا قويۋعا تاباندى بولىپ، دەرەۋ ورتالىقتانعان، ءبىر تۇتاس باسشىلىق جۇرگىزىپ، سەنىمدى بەكەمدەۋ، قيىندىقتى بىلەك بىرىكتىرە جەڭۋ، عىلمي ساقتانۋ - ەمدەۋ، دالمە - ءدال شارا قولدانۋ سىندى باس تالاپتى ورتاعا قويىپ، ىندەتتىڭ تارالۋ جاعدايىن باتىل تەجەۋ، ىندەتتەن ساقتانۋ - تىزگىندەۋ توسقاۋىل شايقاسىنىڭ جەڭىسىنە باتىل قول جەتكىزۋدەي باس نىسانانى ايقىنداپ، ۋحاندى قورعاۋ شايقاسىن، حۋبەيدى قورعاۋ شايقاسىن ەگجەي - تەگجەيلى ورنالاستىرىپ، كەزەڭگە، جاعدايعا قاراي ەلەۋلى ستراتەگيالىق تاكتيكالار جاساپ، ورتالىقتىڭ ىندەتكە توتەپ بەرۋ قىزمەتى باسشىلىق گرۋپپاسىن قۇرىپ، ورتالىق جەتەكشىلىك ەتۋ گرۋپپالارىن جىبەرىپ، مەملەكەتتىك كەڭەستىڭ بىرلەسىپ ساقتانۋ، بىرلەسىپ تىزگىندەۋ مەحانيزمىن ورناتتى...
”حالىقتىڭ باس اماندىعى مەن دەنساۋلىعىن ءبىرىنشى ورىنعا قويۋ كەرەك“، ”مۇمكىندىكتىڭ بارىنشا اناعۇرلىم كوپ ناۋقاستىڭ ءومىرىن قۇتقارۋ كەرەك“، ”ەمدەپ ساۋىقتىرۋ مولشەرىن ەڭ جوعارى دەڭگەيگە جەتكىزۋ، اۋرۋدان ءولۋ مولشەرىن بارىنشا تومەندەتۋ كەرەك“... باس شۋجي شي جينپيڭ ىندەتكە قارسى اتتانۋ جونىندە ماڭىزدى ورنالاستىرۋ جاسادى.
40 مىڭنان استام ”اق حالاتتى پەرىشتەلەر“ بۇكىل ەلدىڭ جەر - جەرىنەن حۋبەيگە كومەككە اتتانىپ، اجالمەن جارىستى؛ سونىمەن ءبىر ۋاقىتتا، 40 مىڭنان استام قۇرىلىس جۇمىسشىلارى حۋبەيگە اتتانىپ، حوشىنشان، لەيشىنشان جۇقپالى اۋرۋلار ارنايى شيپاحاناسى 10 نەشە كۇننىڭ ىشىندە سالىنىپ ءبىتىپ پايدالانۋعا بەرىلىپ، جۇرتتى تاڭ قالدىرعان ”جۇڭگو جىلدامدىعىن“ جاراتتى.
نارت قىزىل پارتيا تۋى ىندەتتەن ساقتانۋ - تىزگىندەۋدىڭ ءبىرىنشى شەبىندە اسقاق جەلبىرەدى. حوشىنشان شيپاحاناسىندا ءاربىر پارتيا مۇشەسىنىڭ قورعاعىش كيىمدەرىنە پارتيا بەلگىسىنىڭ ورنەگى جاپسىرىلدى. ”ءبىز ءوز ارەكەتىمىزبەن ناۋقاستارعا قانداي قاتەرلى جەر بولسا دا، پارتيا مۇشەلەرىنىڭ ولارمەن بىرگە بولاتىندىعىن ۇعىندىرۋىمىز كەرەك“، - دەدى سالماقتى اۋرۋ مەديتسيناسى 1 - ءبولىمىنىڭ ورىنباسار مەڭگەرۋشىسى سۇڭ ليچياڭ.
سول كەزدە ۋحان قالاسى جينينتان شيپاحاناسىنىڭ باستىعى بولىپ تۇرعان جاڭ ديڭيۇي ناۋقاسىن ەلەڭ عۇرلى كورمەي، قيىندىققا قارسى اتتانىپ، اۋاشالانعان ناۋقاستار اۋماعىن قۇرۋعا ۇيىمداستىرىپ، ءبىرىنشى بولىپ ۇلگى جيناپ ۆيرۋسقا تەكسەرۋ جۇرگىزىپ، شەپتىڭ ەڭ الدىندا ءجۇردى.
ءومىردى قورعاپ، بوداۋ بەرۋدەن تايىنبادى −
”ونى، ءسوز جوق، اجالدان الىپ قالۋىمىز كەرەك!“. 25 كۇن دەنە سىرتىنداعى جاساندى مەمبارانا اپپاراتىن (ECMO)، 50 كۇن وكپەنى جاساندى جولمەن تىنىس الدىرۋ اپپاراتىن قولدانىپ، لياۋنيڭ، حىنان، فۋجيان قاتارلى جەرلەردەن حۋبەيگە كومەككە بارعان ەمدەۋ اترەتىندەگىلەر ۋحان داشۋەسى حالىق شيپاحاناسى شىعىس شيپاحاناسىنىڭ ەمدەۋ قىزمەتكەرلەرىمەن بىرگە ءبىر سالماقتى ناۋقاستى اجال اۋزىنان ”تارتىپ“ الدى.
بۇكىل ەلدەگى ەڭ ۇزدىك شيپاگەرلەردى، ەڭ وزىق جابدىقتاردى، ەڭ قاجەتتى بايلىقتاردى ىندەت اۋىر بولعان ۋحان قاتارلى جەرلەرگە شوعىرلاندىرۋدا تەكسەرۋ مولشەرىن ەڭ جوعارى شەكتە جوعارىلاتۋدى، ەمدەپ ساۋىقتىرۋ مولشەرىن ەڭ جوعارى شەكتە جوعارىلاتۋدى، جۇعىمدالۋ مولشەرىن، اۋرۋدان ءولۋ مولشەرىن ەڭ جوعارى شەكتە تومەندەتۋدى ماقسات ەتتى.
2020 - جىلى 2 - ايدىڭ ورتا شەنىندەگى ەڭ كوپ مەزگىلدە كۇنىنە جۇعىمدالعان ناۋقاستار سانى 10 مىڭعا تاياسا، 4 - ايدىڭ 14 - كۇنى 57 ناۋقاسقا دەيىن ازايىپ، ۋحانداعى جاڭا تيپتى ايدارشا ۆيرۋس وكپە قابىنۋ ىندەتىندەگى سالماقتى ناۋقاستاردىڭ ەمدەلىپ ساۋىعۋ مولشەرى ％89تەن استى.
ماسكى ءجىبى بۋناپ جاراقاتتاعان جۇزدەر، شىلقا تەرگە مالشىنعان كيىمدەر... 40 مىڭنان استام اق حالاتتى جاۋىنگەرلەر مەن حۋبەي ولكەسىندەگى جانە ۋحان قالاسىنداعى 540 مىڭ ەمدەۋ قىزمەتكەرى ءوز دەنەلەرىن قالقان ەتىپ توسىپ، ومىرگە ەڭ بەرىك قورعانىس بولدى.
ەل بىرلىگىنەن بەرىك قامال تۇرعىزۋ: قۋاتتى كۇش توپتادى
بارشا وتباسى باس قوسىپ قاۋىشاتىن كوكتەم مەرەكەسىنە قاراعان تۇندە، اق حالاتتى پەرىشتەلەر ”قاسقايا قارسى ءجۇرىپ“ ۋحانعا اتتاندى؛ قىسقا عانا ۋاقىتتا، 19 ولكە باعىتتامالى كومەك بەرۋ تاسىلىمەن حۋبەي ولكەسىنىڭ ۋحان قالاسىنان باسقا 16 قالا - وبلىسىنا جانە اۋدان دارەجەلى قالالارىنا كومەك بەردى.
سان - ساناقسىز ادامدار شىنايى سۇيىسپەنشىلىكپەن ومىرگە قورعانىش بولىپ، ىندەتكە توسقاۋىل سوققى بەرۋدىڭ قۋاتتى كۇشىن توپتادى.
”ءبىز سالماقتى ناۋقاسقا، جۇعىمدالۋعا جانە تىنىس جولىنا قاتىستى بولىمدەردىڭ مەڭگەرۋشىلەرىن دەرلىكتەي حۋبەيگە جىبەردىك، ولاردىڭ ىشىندە تالاي ادامنىڭ سارسقا قارسى اتتانۋ تاجىريبەسى بار“، - دەيدى بەيجيڭ شيەحى شيپاحاناسىنىڭ ورىنباسار باستىعى حان ديڭ.
وكپەنى جاساندى جولمەن تىنىس الدىرۋ اپپاراتى، قورعاعىش كيىم، قۇتقارۋ ماشيناسى سياقتى ءار ءتۇرلى مەديتسينالىق زاتتىق ماتەريالدار بۇكىل ەلدەن تاسىمالدانىپ، استىق، ازىقتىق ماي، كوكونىس، جەمىس - جيدەك سياقتى ءتۇرلى تۇرمىستىق قاجەتتى بۇيىمدار شار تاراپتان جينالدى... بۇكىل ەل حالقى ەل بىرلىگىنەن بەرىك قامال تۇرعىزىپ، تار جول، تايعاق كەشۋدەن بىرگە ءوتتى.
حوشىنشان، لەيشىنشان شيپاحانالارىنىڭ قۇرىلىسىنا ادام جەتپەي جاتقاندىعىن بىلگەن حىناننىڭ تايكاڭ اۋدانى لانزىچىن قىستاعىنداعى ”90 - جىلداردىڭ تۇلەگى“ 5 جىگىت وزدىكتەرىنەن ۇجىمداسىپ ۋحانعا اتتاندى؛
اس - سۋ كاسىبىمەن شۇعىلداناتىن سىچۋاندىق بويجەتكەن ليۋ شيان ۋحانداعى كەيبىر ەمدەۋ - كۇتىمدەۋ قىزمەتكەرلەرىنىڭ ىستىق ۇرتتاي الماي جۇرگەنىن ەستىپ، اسپازى مەن ازىقتىق ماتەريالدارىن الىپ ۋحانعا كەلىپ، ءار كۇنى ەمدەۋ - كۇتىمدەۋ قىزمەتكەرلەرىنە بۋى بۇرقىراعان قالبىر تاعام ۇسىندى؛
ءار كۇنى 60 نەشە كيلومەتر جول باساتىن جەدەل جەتكىزۋشى ازامات جۋ حۇڭتاۋ جان بالاسى جوقتىڭ قاسى ۋحان كوشەلەرىن قايتا - قايتا شارلاپ، جولدامالار جەتكىزىپ قانا قويماي، الەۋمەتتىك اۋماقتىڭ زات ساتىپ الۋشىسى بولىپ، قارت اجەيلەرگە ءدارى ساتىپ اپارىپ بەردى؛
ءار الۋان مۋزيكالار قويىپ، ديكتورلىق جاريالانىم تاراتقان ”90 - جىلداردىڭ تۇلەگى“ ەرىكتى حۋا يۇيچىن ءوز ۇنىمەن جۇرتقا كۇش - جىگەر بەردى، مۋزيكا وقىتۋشىسى بولعان ول ىندەت بارىسىندا شوفەر، تاسىمال جۇمىسشىسى، فاڭساڭ شيپاحاناسىنىڭ راديو حابارلاندىرۋشىسى سياقتى كوپ ءتۇرلى ماماندىقتىڭ يەسى بولدى.
...
10 ميلليون حالقى بار ۋحاننىڭ ”جابىق كۇيدەگى“ 2 ايدا نەگىزىنەن ورنىقتىلىقتى ساقتاۋىنا، ارينە، ميلليارد جۇرەكتىڭ مەيىرى تىرەك بولدى!
ىندەتپەن شايقاستى عىلمي جۇرگىزۋ: ”جۇڭگو جوباسىن“ ۇسىندى
ءبىر ايدان استام ۋاقىت ىشىندە ىندەتتىڭ تارالۋ بەتالىسىن العاشقى قادامدا تەجەپ، 2 اي مولشەرىندە جەرگىلىكتى ءار كۇن جاڭادان ارتقان ناۋقاستار سانىن بىرلىك ورىن سانى ىشىندە مەڭگەرىپ، 3 اي ۋاقىت مولشەرىندە ۋحاندى قورعاۋ شايقاسىنىڭ، حۋبەيدى قورعاۋ شايقاسىنىڭ شەشۋشى جەتىستىگىنە قول جەتكىزىپ، ونان ارى جالعاستىرا بىرنەشە ءىشىنارا وڭىرلىك توپتالۋ سيپاتتى ىندەتتى جويۋ شايقاسىن جۇرگىزىپ، بۇكىل ەلدىڭ ىندەتكە قارسى اتتانۋ كۇرەسىنىڭ كەلەلى ستراتەگيالىق تابىسىنا قول جەتكىزدى... 2020 - جىلى 9 - ايدىڭ 8 - كۇنى باس شۋجي شي جينپيڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ جونىندەگى مەملەكەتتىك ماداقتاۋ - سيلاۋ جينالىسىندا ماڭىزدى ءسوز سويلەپ، بىلاي دەپ اتاپ كورسەتتى: ”جۇڭگونىڭ ىندەتكە قارسى اتتانۋ كۇرەسى جۇڭگو رۋحىن، جۇڭگو كۇشىن، جۇڭگو جاۋاپكەرشىلىگىن تولىق ايگىلەدى“.
وسى رەتكى ىندەتكە قارسى اتتانۋدا، عىلىمنىڭ ”قۋاتتى كۇشى“ ىندەتكە توسقاۋىلداپ سوققى بەرۋدىڭ پارمەندى قارۋىنا اينالدى.
”ءتورت ەرتە بولۋدان“، ”ءتورتتى شوعىرلاندىرۋدان“ بىرلەسىپ ساقتانۋعا، بىرلەسىپ تىزگىندەۋگە، بۇقارالىق ساقتانۋعا، بۇقارالىق تىزگىندەۋگە دەيىن؛ وڭىرلەرگە، دارەجەگە ءبولىپ پارىقتى ساقتانۋ - تىزگىندەۋ جۇرگىزۋدەن ىندەتتەن ساقتانۋ - تىزگىندەۋدى ۇدايىلاندىرۋدى ويداعىداي يگەرۋگە دەيىن، كەزەڭگە، جاعدايعا قاراي ەلەۋلى ستراتەگيالىق تاكتيكالار جاسادى؛ جۇڭگوشا شيپاگەرلىك پەن باتىس شيپاگەرلىگىن ۇشتاستىرىپ كلينيكالىق ەمدەۋدىڭ ءونىمدى ءتاسىلىن قاراستىرۋدان 50 كۇن ىشىندە دياگنوز قويۋ - ەمدەۋ جوباسىن ۇزدىكسىز بۋىن جاڭالاپ، جاڭارتىپ وتىرۋعا دەيىن؛ فاڭساڭ شيپاحاناسىن جەدەل قۇرۋدان كەڭ كولەمدە حىسۋان تەكسەرۋ قىزمەتىن ورىستەتۋگە دەيىن؛ ۇلكەن ساندى مالىمەتتەن پايدالانىپ ۆيرۋستىڭ تەگىن انىقتاۋ مەن سالاماتتىق كودىن تانۋدى ىلگەرىلەتۋدەن جاڭا تيپتى ايدارشا ۆيرۋس ۆاكسيناسىن زەرتتەپ جاساۋعا جانە ونى ەگۋگە دەيىن... جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ كۇرەسى بارىسىندا، ەلىمىزدىڭ قۇتقارۋ - ەمدەۋ تاجىريبەسى ۇزدىكسىز توپتالىپ، ساقتانۋ - تىزگىندەۋ شارالارى بىرتىندەپ كەمەلدەنە ءتۇستى.
شىندىققا جۇگىنىپ، ناقتى ءىس ىستەۋ، عىلمي ىزدەنىس جاساۋ رۋحى ىندەتكە قارسى اتتانۋ كۇرەسىندە مەيلىنشە ايقىن كورىنىس تاپتى.
جۇڭگو ينجەنەريالىق عىلىمدار اكادەمياسىنىڭ اكادەميگى، اسكەري ىستەر اكادەمياسىنىڭ اسكەري مەديتسينا زەرتتەۋ ورنىنىڭ زەرتتەرمەنى چىن حۇي باستاعان اسكەري مەديتسينالىق ماماندار ۇجىمى ۋحاندا ۇدايى 113 كۇن ەرلىكپەن شايقاس جۇرگىزىپ، ۆاكسينا زەرتتەۋ - جاساۋ، يممۋنيتەت قالتقىسىن ورناتۋ ءۇشىن بار كۇشتەرىن جۇمسادى.
كلينيكالىق قۇتقارۋ - ەمدەۋ مەن عىلمي زەرتتەۋدەن قامال الۋعا جەتەكشىلىك ەتتى، جۇڭگوشا شيپاگەرلىك پەن باتىس شيپاگەرلىگىن بىرلەستىرىپ ىندەتكە قارسى اتتاندى، ىندەتتىڭ جاعدايىن جانە بەتالىسىن ۇزدىكسىز ءدال تۇجىرىمدادى... بۇرىن بولماعان وسىناۋ ىندەتتەن ساقتانۋ - تىزگىندەۋ كۇرەسىندە جۇڭ نانشان، لي لانجۋان، ۋاڭ چىن، جاڭ بولي قاتارلى كوپتەگەن اكادەميكتەر باستان - اياق ءبىرىنشى شەپتە ەرلىكپەن شايقاس جۇرگىزدى.
وسىدان سوڭ حيلۇڭجياڭ، بەيجيڭ، شينجياڭ، لياۋنيڭ، حىبەي، يۇننان، جياڭسۋ قاتارلى جەرلەردە عىلمي توتەپ بەرۋ شارالارى قولدانىلعاندىقتان، ىندەت دەر كەزىندە ءونىمدى تەجەلدى.
سونىمەن قاتار، جۇڭگو دۇنيە جۇزىندەگى ءار ەلمەن بىرگە قول ۇستاسا سەلبەسىپ، ۋاقىتتىق قيىندىقتى بىلەك بىرىكتىرە جەڭىپ، الەمدىك ىندەتكە قارسى اتتانۋعا پاراسات جانە كۇش ارنادى −
اشىق، جاريا بولۋ، جاۋاپكەرشىلىك ارقالاۋ پوزيتسياسىن نەگىزگە الا وتىرىپ، جۇڭگو حالىقارالىق بورىشىن بەلسەنە اتقارىپ، دۇنيە جۇزىلىك دەنساۋلىق ساقتاۋ ۇيىمىنا، قاتىستى ەلدەرگە جانە وڭىرلىك ۇيىمدارعا ىندەت ينفورماتسياسىن دەر كەزىندە ىرىقتى تۇردە حابارلاندىرىپ، جاڭا تيپتى ايدارشا ۆيرۋستىڭ گەن قاتارى سياقتى ينفورماتسيالاردى دەر كەزىندە جاريالاپ، دياگنوز قويۋ - ەمدەۋ جوباسىن جانە ساقتانۋ - تىزگىندەۋ جوباسىن دەر كەزىندە جاريالاپ، كوپتەگەن مەملەكەتتەرمەن، حالىقارالىق جانە وڭىرلىك ۇيىمدارمەن ىندەتتەن ساقتانۋ - تىزگىندەۋ بويىنشا اۋىس - كۇيىس قيمىلدارىن ۇيىمداستىرىپ وتكىزىپ، ىندەتتەن ساقتانۋ - تىزگىندەۋدىڭ ينتەرنەتتىك ءبىلىم ورتالىعىن اشىپ جانە ونى بارلىق مەملەكەتتەرگە اشىق ۇستاپ، ساقتانۋ - تىزگىندەۋ جانە قۇتقارۋ - ەمدەۋ تاجىريبەلەرىن ءار جاقپەن ەشقانداي بۇكپەسىز ءبولىستى. وزىندەگى ىندەتتەن ساقتانۋ - تىزگىندەۋ اۋىر قىسىمعا ءدوپ كەلگەن جاعدايدا دا، جۇڭگو حالىقارالىق قوعام ءۇشىن قولىنان كەلگەنشە ءتۇرلى كومەك - جاردەم بەرىپ، الەمدىك ىندەتتەن ساقتانۋ - تىزگىندەۋگە پارمەندى قولداۋ كورسەتىپ، ناقتى ارەكەتىمەن بۇكىل الەمدەگى ميلليونداعان ادامنىڭ ءومىرىن قۇتقارۋعا كومەكتەسىپ، ناقتى ارەكەتىمەن جۇڭگونىڭ ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتەتىن شىنايى تىلەگىن كورسەتتى.
كەزەكتە ىندەت دۇنيە جۇزىندە ءالى تارالۋ ۇستىندە، ادامزاتتىڭ ءومىرىنىڭ حاۋىپسىزدىگى مەن دەنساۋلىعىنىڭ سالاماتتىعىنا قاتەر ءتوندىرۋى ءالى دە جالعاسۋدا؛ ەل ىشىندە بىتىراڭقى جۇعىمدالعان ناۋقاستار مەن ءىشىنارا بولىكتە بولاتىن ىندەت حاۋىپ - قاتەرى ءالى ءومىر سۇرۋدە، سىرتتان كىرۋدەن ساقتانۋ، ىشتە قايتا بەلەڭ بەرۋدەن ساقتانۋ قىزمەتى ءالى دە ماشاقاتتى. ءبىز ىندەتكە قارسى اتتانۋ ۇلى رۋحىنىڭ، ءسوز جوق، جۇڭحۋا پەرزەنتتەرىن بارلىق قيىندىقتاردى جەڭىپ، ىندەتكە قارسى اتتانۋ كۇرەسىنىڭ جالپى بەتتىك جەڭىسىنە جەتكەنگە دەيىن ىنتالاندىراتىندىعىنا كامىل سەنەمىز؛ بۇل ۇلى رۋحتىڭ جاپپاي سوتسياليستىك وسىزاماندانعان مەملەكەت قۇرۋدىڭ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ قۋاتتى كۇشىنە اينالارى ءسوزسىز.
(شينحۋا اگەنتتىگىنىڭ 10 - ايدىڭ 11 - كۇنى بەيجيڭنەن بەرگەن حابارى)
