ءدىلشات اۋشان:
تاۋ قويناۋىنداعى قورعاۋشى
□ انار بۇلت / شينجياڭ گازەتىنىڭ ءتىلشىسى جازيرا نەسىپبەك
تەكەس اۋدانى قارادالا قالاشىعىنىڭ ۇلكەن قۇشتاي قىستاعى مال شارۋاشىلىق قىستاق، سونداي - اق تاريحي مادەنيەتى ايگىلى قىستاق، مەملەكەتتىك اۋىل - قىستاق ساياحاتىنداعى ءتۇيىندى قىستاق، كوركەم ءومىردى اڭساعان ساياحاتشىلاردىڭ بارار جەرى. 37 جاستاعى ءدىلشات اۋشان قارادالا قالاشىعى ساقشى بولىمشەسىنىڭ ۇلكەن قۇشتاي قىستاعىنداعى ساقشى ىستەرى كەڭسەسىنىڭ باس ساقشىسى، ول وسىناۋ تاۋ قويناۋىنداعى قىستاقتا 8 جىل قىزمەت ىستەدى. ”ۇلكەن قۇشتاي قىستاعىندا قىزمەت ىستەگەنىمدە مالشىلار مەن ساياحاتشىلار تۇگەلدەي مەنىڭ قىزمەت وتەۋ وبيەكتىم بولدى“، - دەدى 10 - ايدىڭ 15 - كۇنى ءدىلشات اۋشان كۇلىمسىرەي سويلەپ.
10 - ايدىڭ 15 - كۇنى ءدىلشات اۋشاننىڭ تەكەس اۋدانىنىڭ ەڭ كولەمدى قىستاۋلىعى بوزادىردان كەلگەنى وسى ەكەن. مالشىلار قىستاۋعا قونعاننان كەيىن، ول ارا - تۇرا بارىپ ارالاپ جاعداي ۇعىسىپ تۇرادى. ”قازىر موتوتسيكل ءمىنىپ بارۋعا بولادى، ال قىستا تەك اتقا ءمىنىپ، جولعا ارا قونىپ زورعا جەتەمىز“ دەدى ءدىلشات اۋشان.
2013 - جىلى 6 - ايدان بەرى ۇلكەن قۇشتاي قىستاعىندا قىزمەت ىستەپ كەلە جاتقان ءدىلشات اۋشان ءبىر جىلدىڭ ءتورت ماۋسىمىندا قىستاقتان تابان اۋدارماي كەلەدى.
”مالشىلار قىزمەتىمىزدى ەرەكشە قولدايدى، بىزگە ەرەكشە سەنەدى، سوعان دا وسى قىزمەتىمدى اناعۇرلىم قىزۋ سۇيەمىن“، - دەدى ءدىلشات اۋشان.
قىزمەتتەسى ساعىمجان اكي بىلاي دەدى: ءدىلشات شىن كوڭىلىمەن، ادال نيەتىمەن مالشىلارعا ىستەپ بەرگەن ءاربىر جاقسى ىستەرىمەن مالشىلاردىڭ كوڭىل تورىنەن ورىن الدى، كوپشىلىك ونى ءوز وتباسىنىڭ ءبىر مۇشەسىندەي كوردى.
”2014 - جىلى قىستا ءبىر مالشى دەلو مالىمدەپ ۇيىندەگى 50 قويىنىڭ ۇرلانعانىن ايتادى. ءدىلشات ءۇرتىس ءبىر اپتا بويى سىرتتا ءجۇرىپ قىلمىس كۇماندىسىن ىزدەيدى، ارالىقتا تۇماۋ ءتيىپ، دەنە قىزۋى ورلەپ كەتسەدە سىرقاتىن ەلەمەي تاباندىلىقپەن دەلو انىقتاپ، اقىرىندا 2 قىلمىس كۇماندىسىن قولعا ءتۇسىردى“، - دەيدى ساعىمجان اكي.
2018 - جىلى ءدىلشات اۋشان داڭقپەن جۇڭگو كوممۋنيستىك پارتياسىنا مۇشە بولدى.
2019 - جىلى ۇلكەن قۇشتاي قىستاعى ءبىرىنشى توپتاعى مەملەكەتتىك اۋىل - قىستاق ساياحاتىنداعى ءتۇيىندى قىستاق بولىپ تاڭدالىپ، ساياحاتشىلار توپ - توبىمەن كەلىپ، ءدىلشات اۋشاننىڭ قىزمەتىندە دە وزگەرىس تۋىلدى. ”بيىل جازدا ەڭ كوپ كەزدە بۇل جەرگە كۇنىنە 8000نان استام ساياحاتشى كەلدى، ولار دا ءبىزدىڭ قىزمەت وتەۋ وبيەكتىمىز“، - دەدى ءدىلشات اۋشان.
اۆتوموبيلدەرىنىڭ جانار مايى تاۋسىلادى، ۇشقىش اپپاراتتارى اعاش باسىنا ءىلىنىپ قالادى، جاتار ورىن تابا الماي قالادى، اداسىپ كەتەدى... وسى بىرنەشە جىلدا ءدىلشات اۋشان ساياحاتشىلاردىڭ ءتۇرلى ماسەلەلەرىن شەشىپ بەردى. ”كەيدە ساياحاتشىلار جاتار ورىن تابا الماعاندا ءبىز ساقشى ىستەر كەڭسەسىنىڭ ەكى اعاش ءۇيىن ساياحاتشىلارعا تەگىن قونۋىنا بەرەمىز. ساياحاتشىلار بىزگە سەنگەن ەكەن، ءبىز، ءسوزسىز، قىزمەت وتەۋ ساپامىزدى جوعارىلاتۋىمىز كەرەك“، - دەدى ءدىلشات اۋشان.
نۇربول تۇرسىنباي ۇلكەن قۇشتاي قىستاعىندا ءبىرىنشى توپتا ساياحات كاسىبىمەن شۇعىلدانعان مالشى. ”مەنىڭ پۋتۇڭحۋام جاقسى ەمەس، ساياحاتشىلارمەن اڭگىمەلەسكەندە كۇلكىلى جايتتەر كوپ تۋىلدى. ءدىلشات ۇنەمى كەلىپ بىزگە اۋدارماشى بولادى“، - دەدى نۇربول تۇرسىنباي.
”قىستاق بارعان سايىن كورىكتەنىپ كەلەدى، ساياحاتشىلار بارعان سايىن كوبەيدى، مالشىلاردىڭ تۇرمىسى دا بارعان سايىن جاقساردى، مەن بۇعان ىشتەي قاتتى قۋانىشتامىن“، - ءدىلشات اۋشان تەبىرەنە بىلاي دەدى: ”مەن وسى اراداعى ادامداردى، وسى ارانىڭ تاۋ - وزەنىن ۇزبەي قورعاي بەرۋگە پەيىلمىن“.
