− اۆتونوميالى رايوندىق 10 - رەتكى پارتيا قۇرىلتايىنىڭ رۋحىن ىشكەرىلەي دايەكتىلەندىرۋ، تياناقتاندىرۋ جونىندە (6)
□ گازەتىمىزدىڭ شولۋشىسى
حالىق تۇرمىسى حالىقتىڭ باقىتىنىڭ نەگىزى، قوعامنىڭ جاراسىمدىلىعىنىڭ وزەگى. حالىق تۇرمىسىنىڭ قۇت - ىرىسىن ارتتىرۋ دامۋدىڭ ءتۇبىرلى ماقساتى. اۆتونوميالى رايوندىق 10 - رەتكى پارتيا قۇرىلتايى نازاردى باس نىساناعا شوعىرلاندىرىپ، حالىق تۇرمىسىن كۇش سالا قامتاماسىز ەتىپ، جاقسارتىپ، ءار ۇلت بۇقاراسىنىڭ قۇت - ىرىسىن جوعارىلاتۋ كەرەكتىگىن اتاپ كورسەتتى.
پارتيامىز بۇكىل ەلدەگى ءار ۇلت حالقىن ىنتىماقتاستىرىپ، باستاپ، توڭكەرىس، قۇرىلىس، رەفورما جۇرگىزۋدەگى، بارلىق كۇرەسىنىڭ ءتۇبىرلى ماقساتى حالىقتىڭ جاقسى تۇرمىس كەشىرۋى ءۇشىن. حالىق تۇرمىسىن قامتاماسىز ەتۋ مەن جاقسارتۋ جۇڭگوشا سوتسياليزم ىستەرىن دامىتۋدىڭ ماندىك تالابى، پارتيامىزدىڭ جالپى ءۇشىن پارتيا قۇرۋىنىڭ، حالىق ءۇشىن بيلىك جۇرگىزۋىنىڭ دە ماندىك تالابى. شينجياڭ سياقتى شەكارا، شالعاي، كوپ ۇلتتى ءوڭىر جونىنەن العاندا، حالىق تۇرمىسىن قامتاماسىز ەتۋ مەن جاقسارتۋ ۇلتتار ىنتىماعىنا، قوعام ورنىقتىلىعىنا ءتىپتى دە سايادى، پارتيامىزدىڭ ۇيىستىرۋ قۋاتى مەن باۋراۋ قۋاتىنا سايادى.
پارتيا 18 - قۇرىلتايىنان بەرى شي جينپيڭ جولداستى ۇيتقى ەتكەن پارتيا ورتالىق كوميتەتى باستان - اياق شينجياڭنىڭ حالىق تۇرمىسى قۇرىلىسىنا كوڭىل ءبولىپ، نازار اۋدارىپ كەلەدى. باس شۋجي شي جينپيڭ 12 - كەزەكتى مەملەكەتتىك حالىق قۇرىلتايىنىڭ 5 - ماجىلىسىندە شينجياڭ ۋاكىلدەر ۇيىرمەسىنىڭ باياندامانى قاراۋىنا قاتىناسقاندا: شينجياڭنىڭ ورنىقتىلىعىن ساقتاۋدىڭ، شينجياڭنىڭ تىنىشتىعىن ساقتاۋدىڭ ستراتەگيالىق بيىگىن شىعار ءتۇيىن ەتىپ، ءار ۇلت بۇقاراسىنىڭ تىنىش ءومىر، شات - شادىمان تىرشىلىك كەشىرۋىن تىعىز ارقاۋ ەتىپ، ءوندىرىس، تۇرمىس شارت - جاعدايىن جاقسارتۋ جاعىنداعى نىسانداردى كوبىرەك جولعا قويىپ، حالىق تۇرمىسىنا تيىمدىلىك جەتكىزۋ ناقتى ىستەرىن كوبىرەك ىستەپ، ءار ۇلت بۇقاراسى قام ەتىپ وتىرعان ماسەلەلەردى كوبىرەك شەشىپ، ءار ۇلت بۇقاراسىنىڭ پارتيانىڭ قامقورلىعى مەن وتاننىڭ ۇلى شاڭىراعىنىڭ مەيىرىن شىنايى سەزىنۋىنە مۇمكىندىك جاساۋ كەرەك، - دەپ اتاپ كورسەتتى. 3 - رەتكى ورتالىقتىڭ شينجياڭ قىزمەتى جونىندەگى اڭگىمە ماجىلىسىندە، باس شۋجي شي جينپيڭ: حالىق تۇرمىسىمەن تىعىز جاناسىپ جوعارى ساپالى دامۋدى ىلگەرىلەتۋ كەرەك، - دەپ باسا دارىپتەدى.
وتكەن 5 جىلدا، اۆتونوميالى رايوندىق پارتكوم مەن بۇكىل رايونداعى ءار دارەجەلى پارتيا ۇيىمدارى باس شۋجي شي جينپيڭنىڭ ىقىلاستى تاپسىرماسىن ەستەرىندە بەرىك ساقتاپ، حالىقتى وزەك ەتكەن دامۋ يدەياسىن بەرىك ورناتىپ، ءار دارەجەلى قازىنالىق شىعىستىڭ ％70تەن استامىن حالىق تۇرمىسىن قامتاماسىز ەتۋ مەن جاقسارتۋعا پايدالانۋعا تاباندى بولىپ، حالىققا پايدالى، حالىققا ءتيىمدى ناقتى ىستەردى، جاقسى ىستەردى ۇزدىكسىز ويداعىداي ىستەدى، حالىق تۇرمىسىنا ۇسىنىلىم تەبىنىنىڭ كۇشتىلىگى، حالىق تۇرمىسىنا قاتىستى شارالاردىڭ كوپتەپ شىعارىلۋى بۇرىن بولىپ كورمەگەن دارەجەدە بولىپ، ءار ۇلت بۇقاراسى قام ەتىپ وتىرعان، شۇعىل، قيىن، ۋايىمداعان، ءزارۋ ءبىر توپ ماسەلەلەردى ءونىمدى شەشتى. 5 جىلدان بەرى رايونىمىز كەدەيلىكتەن ارىلتۋدان قامال الۋ شايقاسىنىڭ جەڭىسىنە ۋاعىندا قول جەتكىزدى، ءار ۇلت بۇقاراسىنىڭ جۇمىستانىپ كىرىسىن ارتتىرۋ ونىمدىلىگى كورنەكتى بولدى، وقۋ - اعارتۋ ارقىلى حالىققا تيىمدىلىك جەتكىزۋ جۇرت كوڭىلىنەن تەرەڭ ورىن الدى، ەمدەۋ دەڭگەيى ۇزدىكسىز جوعارىلادى، قوعامدىق قامتاماسىزداندىرۋ ۇزدىكسىز كۇشەيدى، تۇرمىس شارت - جاعدايى كورنەكتى جاقساردى، مەكتەپكە دەيىنگى تاربيەدەن يگىلىكتەنۋ، وقيتىن مەكتەبى بولۋ، ەڭبەگىنىڭ جەمىسىن كورۋ، اۋىرعاندا ەمدەلەتىن مۇمكىندىگى بولۋ، قارتايعاندا كۇتىمدەلەتىن ورىن بولۋ، تۇراقتى باسپاناسى بولۋ، كومەككە ءزارۋ جاندار كومەكتەن يگىلىكتەنە الاتىن بولۋدا ۇزدىكسىز تىڭ ىلگەرىلەۋشىلىكتەرگە قول جەتكىزدى، ءار ۇلت بۇقاراسى ورنىقتىلىقتىڭ، دامۋدىڭ، رەفورمانىڭ جەتىستىكتەرىنەن تولىق يگىلىكتەنىپ، تابىس سەزىمى، باقىت سەزىمى، حاۋىپسىزدىك سەزىمى كورنەكتى كۇشەيىپ، تيانشان الابىندا ىنتىماقتى، جاراسىمدى، گۇلدەنگەن، باي، وركەنيەتتى، العا باسقان، تىنىش ءومىر، شات - شادىمان تىرشىلىك كەشىرگەن، ەكولوگياسى تاماشا كورىكتى كورىنىس جارىققا شىقتى.
حالىق تۇرمىسىن قامتاماسىز ەتۋ مەن جاقسارتۋدىڭ سوڭعى مارەسى بولمايدى، تەك قانا ۇزدىكسىز جالعاسقان جاڭا باستامالارى بولادى. 5 جىلدان بەرى رايونىمىز ەكونوميكالىق، قوعامدىق دامۋدا جانە حالىق تۇرمىسىن جاقسارتۋدا بۇرىن بولىپ كورمەگەن تابىستارعا قول جەتكىزىپ، ءار ۇلت بۇقاراسى بۇكىل ەل حالقىمەن بىرگە جاپپاي دوڭگەلەك داۋلەتتى قوعامعا قادام تاستادى. الايدا، مىنانى دا ايقىن كورە ءبىلۋ كەرەك، شينجياڭنىڭ دامۋىنىڭ باستالۋ ءتۇيىنى تومەن، نەگىزى ءالسىز، حالىق تۇرمىسى سالاسىندا ءالى دە كوپتەگەن ولقىلىقتار بار، تاماشا تۇرمىسقا دەگەن تالپىنىستا بۇقارانىڭ ءالى دە كوپتەگەن مازالاعان، ۋايىمداتقان، الاڭداتقان ىستەرى بار. ءبىز باستان - اياق حالىقتى كوڭىلدىڭ ەڭ بيىك تورىنە قويىپ، بۇقارانىڭ ويلاعانىن، كۇتكەنىن، قام جەگەنىن، اسىققانىن دالمە - ءدال ۇعىسىپ، حالىق تۇرمىسىن قامتاماسىز ەتۋ مەن جاقسارتۋ قىزمەتىن بار كۇشتى سالىپ، باعىتتامالى تۇردە ۇزدىكسىز جاقسى ىستەپ، بۇقارانىڭ وزگەرىستەردى كورە الۋىنا، ناقتى يگىلىككە كەنەلە الۋىنا قۇلشىنا مۇمكىندىك جاساپ، حالىقتىڭ كۇن سايىن ارتىپ وتىرعان تاماشا تۇرمىس قاجەتىن ۇزدىكسىز قاناعاتتاندىرۋىمىز كەرەك.
اۆتونوميالى رايوندىق 10 - رەتكى پارتيا قۇرىلتايى مۇنان كەيىنگى، ءتىپتى، ونان دا ۇزاعىراق ءبىر مەزگىلدەگى حالىق تۇرمىسىن قامتاماسىز ەتۋ مەن جاقسارتۋ قىزمەتىنە ءبىر قىدىرۋ ورنالاستىرۋلار، جايعاستىرۋلار جاساپ، جۇمىستاندىرۋدى كەڭەيتۋدى، كىرىستى ارتتىرىپ بايىتۋ، وقۋ - اعارتۋدىڭ دەڭگەيىن جوعارىلاتۋ، جالپى حالىقتىق سالاماتتىق، قوعامدىق قامسىزداندىرۋدىڭ اياسىن كەڭەيتىپ، ساپاسىن جوعارىلاتۋ، بەيقۇت ۇيمەن قامتاماسىز ەتۋ، ”كومىردى ەلەكترگە وزگەرتۋ“، شەكارا ءوڭىردى گۇلدەندىرىپ حالىقتى بايىتۋ، الەۋمەتتىك حاۋىپسىزدىك قامتاماسىزدىعى، ورنىقتىلىق ارقىلى حالىققا تيىمدىلىك جەتكىزۋ سىندى 10 ءىرى حالىققا تيىمدىلىك جەتكىزۋ ينجەنەرياسىن ۇزدىكسىز ىشكەرىلەي ويداعىداي اتقارۋدى ورتاعا قويىپ، حالىق بۇقاراسىنىڭ جاڭا ۇمىتىنە، جاڭا تىلەگىنە جاۋاپ قاتۋمەن بىرگە، بولاشاقتا ءار ۇلت بۇقاراسىنىڭ تۇرمىسىن جاقسارتۋدىڭ جاڭا جوباسىن، جاڭا كەلەشەگىن سىزىپ، پارتيامىزدىڭ حالىققا تىعىز سۇيەنۋ، حالىقتى ۇزدىكسىز باقىتقا كەنەلتۋ، حالىققا تەرەڭ تامىر تارتۋداي بيلىك جۇرگىزۋ ۇستانىمىن تەرەڭدەي ءتۇسىندىردى.
حالىق تۇرمىسى حالىق تىلەگىمەن جالعاسىپ جاتادى، حالىق تىلەگى حالىق كۇشىن ۇيىستىرادى. جاڭا ساپاردا، ”حالىقتىڭ تاماشا تۇرمىسقا دەگەن تالپىنىسى ءبىزدىڭ كۇرەس نىسانامىز“ دەگەندى ەستە بەرىك ساقتاپ، شىنايى، ناقتى سۇيىسپەنشىلىكپەن حالىق تۇرمىسىن قامتاماسىز ەتۋ مەن جاقسارتۋ قىزمەتىن ناقتى، تەرەڭ، ەگجەي - تەگجەيلى، تىڭعىلىقتى ىستەپ، بۇقارانىڭ قيىن ماسەلەلەرىن شەشۋىنە شىنايى كومەكتەسىپ، بۇقارانىڭ قۇت - ىرىسىن ارتتىرىپ، ءار ۇلت بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن اناعۇرلىم تولىق، اناعۇرلىم قامتاماسىز، اناعۇرلىم باياندى ەتىپ، ءار ۇلت بۇقاراسىنىڭ جاپپاي دوڭگەلەك داۋلەتتىلىكتەن بىرگە بايۋ نىساناسىنا قاراي العا ىلگەرىلەۋىن جەبەيىك.
