□ انار بۇلت / شينجياڭ گازەتىنىڭ ءتىلشىسى ۋاڭ شينحۇڭ
”قۇرىلىس كومەكشىسىنەن“ باسقارۋشى بانجاڭ بولۋعا دەيىن، باكىر الىم ءبىر جىل عانا ۋاقىت جۇمسادى.
باكىر قاراقاش اۋدانى كۇيا اۋىلى پاۋان قىستاعىنىڭ تۇرعىنى. ۇرىمجىگە كەلىپ جۇمىس ىستەۋدەن ىلگەرى ول قىستاقتا ەگىن ەگىپ، اۋىل بازارىندا اياق كيىم ساتقان ەدى.
بىلتىر 3 - ايدا ءۇرىمجى حالىقارالىق اۋەجايىن كەڭەيتىپ سالۋ قۇرىلىسى اۋەجاي عيماراتىنىڭ نىسان قۇرىلىسى ورنىنا جۇمىسكەر قاجەت ەكەنىن ەستىگەن ول ىرىقتىلىقپەن تىزىمدەلىپ، ۇرىمجىگە كەلىپ جۇمىس ىستەيدى.
”قۇرىلىس ورنىنا العاش كەلگەنىمدە مەن ەشتەڭەنى دە ىستەي الماۋشى ەدىم، تەك ءار كۇنى سورە سوگۋ، سورە ورناتۋ جۇمىسىن عانا ىستەيتىنمىن“، - دەدى 10 - ايدىڭ 30 - كۇنى باكىر تىلشىگە.
قۇرىلىس ورنىنداعى كەيبىر جۇمىسشىلاردىڭ ءارى قالىپ جۇمىسشىسى، ءارى بولات شىبىق ورناتاتىن جۇمىسشى بولىپ ىستەي الاتىندىعىن كورگەندە باكىر قاتتى قىزىعادى.
” بارلىعىمىز ۇقساس جۇمىسشىمىز، نە ءۇشىن باسقالاردىڭ قولىنان بارلىعى كەلەدى، ال مەن تەك سورە سوگىپ، سورە ورناتىپ جۇرە بەرەمىن؟“، ”ۇقساس قۇرىلىس ورنىندا جۇمىس ىستەپ، نە ءۇشىن مەن 3500 يۋان عانا الامىن، ال باسقالاردىڭ كىرىسى مەنەن ءبىر ەسە، ءتىپتى 2 ەسە جوعارى بولادى؟“. مۇنى ويلاعاندا كەشتە باكىردىڭ ۇيقىسى قاشادى.
ول سودان باستاپ قولى بوساي قالسا بولعانى، تەحنيكالىق قامتىمى بار جۇمىس ورىندارىنا بارىپ، تەحنيك جۇمىسشىلاردان سۇراپ، ۇعىسىپ، ۇيرەنە باستايدى.
قۇلشىنعانعا قۇت ۇيىر دەگەن. جارتى جىلدان كەيىن، باكىر دا قالىپ جۇمىسشىسى، بولات شىبىق ورناتاتىن جۇمىسشى بولادى. ”كىرىسىم بىردەن ارتتى“ دەدى باكىر كۇلىپ تۇرىپ، ”بۇل ماعان ۇيرەنۋدىڭ ماڭىزدىلىعىن ۇعىندىردى، تەك قۇلشىنسام بولعانى، ءسوز جوق، تابىسقا جەتەتىندىگىمدى ءتۇسىندىردى“، - دەدى.
جۇڭگو قۇرىلىس 8 - ينجەنەريا مەكەمەسى باتىس سولتۇستىك سەرىكتەستىگى شينجياڭ بولىمشە سەرىكتەستىگىنىڭ اتقارۋشى باس ديرەكتورى، قوسىمشا ءۇرىمجى اۋەجايى نىسانىنىڭ ديرەكتورى يۇي جياڭ باكىردىڭ جۇمىستى تىڭعىلىقتى ىستەيتىندىگىن، تەحنيكانى تەز ۇيرەنىپ قانا قويماي، ونىڭ ۇستىنە مەملەكەتتە ءبىر تۇتاس قولدانىلاتىن ءتىل - جازۋ دەڭگەيىنىڭ دە ءبىرشاما جاقسى ەكەنىن بايقادى، سونىمەن سەرىكتەستىككە باكىردىڭ باسقارۋشى بانجاڭ بولۋى جونىنەن ءوتىنىش بەرىپ، ءوتىنىشى تەز ارادا بەكىتىلەدى. مۇنداي سەنىم ارتۋدان باكىر اسەرلەنەدى ءارى ماقتانىش سەزىنەدى. سودان باستاپ ول قىزمەتتى ءتىپتى دە بەلسەندىلىكپەن، ىرىقتى تۇردە ىستەيدى.
ءار كۇنى تاڭەرتەڭ جۇمىسشى سەرىكتەرى ۇيقىدا جاتقاندا باكىر ورنىنان تۇرادى. ول بىلاي دەدى: ”باسقارۋشى بانجاڭ بولعان ەكەنسىڭ، باسقارۋشى بانجاڭنىڭ بەينەسى بولۋ كەرەك، مەن ءاربىر جۇمىستا جۇمىسشى سەرىكتەرىمە ۇلگى بولۋىم ءتيىس“. باكىردىڭ جاتىن ورنىندا جۋىنۋ بۇيىمدارىنان تارتىپ كورپە - جاستىقتارىنا دەيىن تۇگەلدەي رەتتى ءتىزىلىپ قويىلعان.
”قازىر مەن 4 قۇرىلىس اۋماعىنداعى 60 نەشە جۇمىسشىنىڭ جۇمىسقا شىعۋ جوقتاماسىن جانە قۇرىلىس جۇرگىزۋ ساپاسىن باسقارۋعا جاۋاپتىمىن. ءاربىر جۇمىسشى نە ىستەۋى كەرەك، قالاي ىستەدى، مەن بارلىعىن قانىق بىلەمىن“. باكىردىڭ سوزىنەن وزىنە دەگەن سەنىم اڭعارىلادى.
سوڭعى بىرنەشە ايدا قۇرىلىس ورنىنا تاعى ءبىر توپ جاڭا جۇمىسكەرلەر كەلدى. ”مەن ولارعا ءبىزدىڭ ىستەگەنىمىزدىڭ اۆتونوميالى رايونداعى ءتۇيىندى نىسان ەكەندىگىن، سالىنىپ بولعاننان كەيىن شينجياڭنىڭ دامۋىنا جەبەۋشى بولاتىندىعىن ايتتىم، مۇنى ەستىگەننەن كەيىن كوپشىلىكتىڭ قىزمەت بەلسەندىلىگى ءتىپتى دە ارتا ءتۇستى“ ، - دەدى باكىر.
باسقارۋشى بانجاڭ بولعاننان كەيىن، باكىردىڭ تەز ارادا تولىسىپ - جەتىلىپ، كوز اياسى دا كەڭەيە ءتۇستى. ”بۇرىن مەن قايتكەندە كوپ اقشا تابۋدى عانا ويلايتىنمىن. قازىر مەن ۇزدىك نىسان مەڭگەرۋشىلەرىنەن اناعۇرلىم كوپ باسقارۋ تاجىريبەلەرىن ۇيرەنىپ، ەرتەرەك نىسان ديرەكتورى بولۋعا قۇلشىنۋدامىن“، - دەدى باكىر.
