يمىنجان جانە ونىڭ جۇبايى:
2 جىل جۇمىس ىستەپ عانا 60 مىڭ يۋان اقشا قۇرادىق
انار بۇلت / شينجياڭ گازەتىنىڭ ءتىلشىسى سۇڭ ۋيگو
10 - ايدىڭ 25 - كۇنى يمىنجان مۇقارىپتىڭ ۋيچاتىنان ”دىڭ، دىڭ“ ەتكەن دىبىس ەستىلدى، ايەلى وعىلام ابىلەز ۋيچات ارقىلى وعان 4000 يۋان جولداپ بەرگەن ەدى.
”وتاعاسى، مىناۋ بۇگىن تاراتقان ەڭبەكاقىم“. ىلە - شالا وعىلام يمىنجانعا دىبىستىق ينفورماتسيا جولدادى.
”مەنىڭ وسى ايداعى ەڭبەكاقىم 3200 يۋاننان اسادى، ءبىزدىڭ امانات اقشامىز تاعى دا كوبەيدى، جالعاستى قۇلشىنايىق“، - دەپ جاۋاپ قاتتى يمىنجان.
بيىل 39 جاستاعى يمىنجان اۋات اۋدانى يىڭارىق اۋىلى شاقۇر قىستاعىنان كەلگەن، وعىلاممەن بىرگە اقسۋ شينجۋە توقىماشىلىق شەكتى جاۋاپكەرشىلىك سەرىكتەستىگىنىڭ قىزمەتكەرى بولىپ ىستەيدى.
2017 - جىلدان ىلگەرى ول اكە - شەشەسىمەن بىرگە ۇيىندە ەگىن ەگەتىن، وقتا - تەكتە سىرتقا شىعىپ ۇساق - تۇيەك جۇمىس ىستەيتىن. 5 − 6 جىل ىستەسە دە، بانكەگە قويعان كوك تيىن اقشاسى بولماعان، سول شاقتا اشتى تەرىنىڭ بوداۋىنا كەلگەن اقشانى بانكەگە قويۋ ونىڭ ەڭ ۇلكەن ارمانى بولاتىن.
2017 - جىلى 12 - ايدا جاڭارىق اۋىلدىق ەڭبەك جانە قوعامدىق قامتاماسىزداندىرۋ بولىمشەسىنىڭ كومەگىندە، ول اقسۋ شينجۋە توقىماشىلىق شەكتى جاۋاپكەرشىلىك سەرىكتەستىگىنە كەلىپ جۇمىس ىستەيدى. جۇمىس كيىمىن كيىپ، جاتاققا جايعاسىپ، جۇمىسقا كۇندەلىكتى ۋاعىندا كەلىپ - كەتەدى... يمىنجان كەزىندە تەك ەلدەن ەستيتىن تۇرمىس رەالدىققا اينالادى.
ءوزىنىڭ قۇلشىنىسى ارقىلى ءتىپتى مول اقشا تابۋ يمىنجاندى مەيلىنشە قۋانىشقا بولەدى. ”سەرىكتەستىك ءار ايدىڭ 25 - كۇنى ءدال ۋاعىندا ەڭبەكاقى تاراتادى، ءار ايدىڭ وسى كۇنى مەن ءۇشىن ەڭ قۋانىشتى كۇن“.
تۇراقتى كىرىسى بار، ونىڭ ۇستىنە سەرىكتەستىك تاماقپەن، جاتار ورىنمەن قامدايدى، تۇرمىستا شىعىن جوق دەرلىك. يمىنجان سول ماڭداعى بانكەگە بارىپ ءبىر بانكە كارتچكاسىن ءبىتىردى، ءار ايداعى ەڭبەكاقىسىنان ازىن - اۋلاق اقشا الىپ قالعاننان سىرت، قالعانىن تۇگەلدەي بانكە كارتچكاسىندا ساقتادى.
”العاش كەلگەن كەزىمدە تەحنيكادا جەتىلمەگەم، مەملەكەتتە ءبىر تۇتاس قولدانىلاتىن ءتىل - جازۋ قابىلەتىم دە تومەن بولعاندىقتان، ايلىعىم دا جوعارى بولمادى“، - دەدى يمىنجان. ءوزىنىڭ كەمشىلىگىن قانىق بىلگەن سوڭ، يمىنجان تەحنيكانى جانە مەملەكەتتە ءبىر تۇتاس قولدانىلاتىن ءتىل - جازۋدى مۇقيات ۇيرەنە باستايدى.
قىزمەت ىستەگەنىنە كوپ وتپەي - اق، ول ايەلى وعىلامعا سەرىكتەستىككە كەلىپ جۇمىس ىستەۋى تۋرالى كەڭەس بەرەدى. باۋلۋدان وتكەن سوڭ، وعىلام سەرىكتەستىككە قابىلدانىپ، گاز اعىنى توقىما سەحىنداعى جۇمىس جۇرگىزەتىن جۇمىسشى بولادى. وعىلام دا كۇيەۋى سياقتى قاجىرلىلىقپەن ۇيرەنەدى، ۇنەمى ساقا قىزمەتكەرلەردەن تالىقپاي ءتالىم الا ءجۇرىپ، كوپ وتپەي مايتالمان جۇمىسشىعا اينالادى، جۇمىسى دا باستاپقىداعى 2 ادام ءبىر ماشيناعا قاراۋدان ءبىر ءوزى ءبىر جارىم ماشيناعا قاراۋعا وزگەرەدى. وعىلامنىڭ قىزمەتى ونىمىنە قاراي ەڭبەكاقى بەرىلەتىن بولعاندىقتان، ونىڭ ەڭبەكاقىسى دا قىزمەت مولشەرىنىڭ ارتۋىنا ساي مولايا تۇسەدى.
2020 - جىلعا بارعاندا يمىنجان مەن جۇبايىنىڭ بانكە كارتچكاسىنداعى اقشاسى 60 مىڭ يۋاننان اسادى، ەكەۋى نەشە كۇن بويى شاتتىققا شومادى.
بانكەدە امانات اقشا بولعاننان كەيىن، يمىنجان مەن وعىلام وزدەرىنىڭ جاڭا تۇرمىستارى جايلى جوسپار جاسايدى، ولار اقسۋ قالاسىنىڭ لينيۋان شاعىن اۋماعىنان 75 شارشى مەترلىك قابات ءۇي ساتىپ الادى. ارتىنان ەكەۋى نوپوستارىن اقسۋ قالاسىنا اۋىستىرىپ اكەلىپ، بالالارىن اقسۋ توقىماشىلىق ونەركاسىپ باقشا رايونىنداعى باستاۋىش مەكتەپتەن وقىتادى.
”قازىر بىزدە جاڭا نىسانا بار: 5 جىلدان سوڭ كەپىلدى قارىز اقشانى قايتارىپ بولعاننان كەيىن، بالامىزدىڭ وقۋىنا ءبىراز قارجى جينايمىز“. جۇبايى ەكەۋىنىڭ ورتاق نىساناسىن اۋىزعا العاندا، يمىنجاننىڭ جۇزىنەن باقىت كۇلكىسى ەستى.
