تيانشان تورى   ›   جاڭالىقتار   ›   ەل ءىشى حابارى

امەريكا - جۇڭگو قارىم - قاتىناسى مەملەكەتتىك كوميتەتىنىڭ جىلدىق كەشكى قوناعاسى وتكىزىلدى

جۇڭگو - امەريكا ەكى ەل باسشىلارى جەكە - جەكە قۇتتىقتاۋ حات جولدادى

  شينحۋا اگەنتتىگىنىڭ 11 - ايدىڭ 9 - كۇنى نيۋ - يوركتەن بەرگەن حابارى. امەريكا - جۇڭگو قارىم - قاتىناسى مەملەكەتتىك كوميتەتى 11 - ايدىڭ 9 - كۇنى نيۋ - يوركتە 2021 - جىلعى كەشكى قوناعاسىن وتكىزدى. جۇڭگونىڭ مەملەكەت ءتوراعاسى شي جينپيڭ مەن امەريكانىڭ زۇڭتۇڭى بايدەن جەكە - جەكە قۇتتىقتاۋ حات جولدادى، قۇتتىقتاۋ حاتتارىن جۇڭگونىڭ امەريكادا تۇراتىن باس ەلشىسى چين گاڭ مەن امەريكا - جۇڭگو قارىم - قاتىناسى مەملەكەتتىك كوميتەتى جورالار القاسىنىڭ ءتوراعاسى جاكوب لۋ جەكە - جەكە وقىدى.

  ءتوراعا شي جينپيڭ امەريكا - جۇڭگو قارىم - قاتىناسى مەملەكەتتىك كوميتەتىنىڭ جانە ءارقايسى مۇشەلەردىڭ ۇزاق ۋاقىتتان بەرى جۇڭگو - امەريكا قارىم - قاتىناسىنىڭ دامۋىن جانە ەكى ەلدىڭ ءارقايسى سالاداعى اۋىس - كۇيىس، سەلبەستىگىن ىلگەرىلەتۋگە كۇش سالىپ كەلگەندىگىن القادى جانە تۇراقتاندىردى. شي جينپيڭ بىلاي دەپ اتاپ كورسەتتى: جۇڭگو - امەريكا قارىم - قاتىناسى قازىرگى دۇنيە جۇزىندەگى ەڭ ماڭىزدى ەكى جاقتى قارىم - قاتىناستىڭ ءبىرى. جۇڭگو مەن امەريكا جەكە - جەكە ەڭ ءىرى وركەندەپ كەلە جاتقان ەل جانە ەڭ ءىرى دامىعان ەل، سونداي - اق بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى بولۋ رەتىندە، ءوزارا قارىم - قاتىناستى ويداعىداي ءبىر جاقتى ەتە الۋ - الماۋى ەكى ەل مەن ەكى ەل حالقىنىڭ ءتۇبىرلى مۇددەسىنە سايادى، دۇنيە ءجۇزىنىڭ بولاشاق تاعدىرىنا سايادى. قازىر جۇڭگو - امەريكا قارىم - قاتىناسى ماڭىزدى تاريحي وتكەلدە تۇر، ەكى ەل سەلبەسسە ەكى جاققا ءتيىمدى، تىرەسسە ەكى جاققا دا زياندى، سەلبەستىك بىردەن - ءبىر دۇرىس تالعام. شي جينپيڭ بىلاي دەپ باسا دارىپتەدى: جۇڭگو جاق ءوزارا قۇرمەت ەتۋ، بەيبىت قاتار تۇرۋ، سەلبەستىك جاساپ تەڭ يگىلىكتەنۋ پرينسيبى بويىنشا امەريكا جاقپەن ءارقايسى سالاداعى اۋىس - كۇيىس، سەلبەستىكتى كۇشەيتىپ، كەلەلى حالىقارالىق جانە وڭىرلىك ماسەلەلەرگە، الەمدىك سىن - سايىستارعا بىرگە توتەپ بەرۋدى، سونىمەن بىرگە الاۋىزدىقتاردى ۇيلەسىمدى مەڭگەرىپ، جۇڭگو - امەريكا قارىم - قاتىناسىنىڭ قايتادان اقاۋسىز، ورنىقتى دامۋدىڭ دۇرىس ارناسىنا ورالۋىن ىلگەرىلەتۋدى قالايدى. امەريكا - جۇڭگو قارىم - قاتىناسى مەملەكەتتىك كوميتەتىنىڭ جانە جۇڭگو - امەريكا قارىم - قاتىناسىنىڭ دامۋىنا كوڭىل ءبولىپ، قولداۋ كورسەتكەن ءار سالاداعى دوستاردىڭ سەنىمدى بەكەمدەپ، ۇزدىكسىز قۇلشىنىس جاساپ، جۇڭگو مەن امەريكانىڭ دوستىق ىستەرىنە اناعۇرلىم مول اقىل - پاراساتىن جانە كۇش - قۋاتتارىن ارناپ، ەكى ەل حالقىنا جانە دۇنيە جۇزىندەگى ءار ەل حالقىنا اناعۇرلىم باقىت جاراتۋىن ءۇمىت ەتەمىن.

  زۇڭتۇڭ بايدەن قۇتتىقتاۋ حاتىندا مىنالاردى ءبىلدىردى: 50 نەشە جىلدان بەرى امەريكا - جۇڭگو قارىم - قاتىناسى مەملەكەتتىك كوميتەتى امەريكا - جۇڭگو سەلبەستىگىن ىلگەرىلەتۋگە كۇش سالىپ، ءوزارا ءتۇسىنىسۋ مەن ورەلى كەڭەستى جەبەۋ ارقىلى ەكى ەلدىڭ ورتاق ءتۇيىندى تابۋىنا قول ۇشىن بەردى. بۇگىن دۇنيە ءجۇزىمىز تاريحي بۇرىلىس تۇيىنىندە تۇر. جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋدەن كليمات وزگەرىسى داعدارىسىنىڭ رەال حاۋپىن شەشۋگە دەيىن، امەريكا - جۇڭگو قارىم - قاتىناسى الەمدىك مانگە يە. وسى سايىستاردى شەشۋ مەن قىرۋار ورايدى مىقتى يگەرۋ حالىقارالىق قوعامنىڭ اناعۇرلىم كەڭ كولەمدە ىنتىماقتاسۋىن قاجەت ەتەدى، ءبىز ءاربىر ادام تۇگەلدەي ءوزىمىزدىڭ ءبىر ۇلەس كۇش - قۋاتىمىزدى ارناپ، حاۋىپسىز، بەيبىت، ومىرشەڭدىك كۇشكە تولى بولاشاق جاراتۋىمىز كەرەك. امەريكا - جۇڭگو قارىم - قاتىناسى مەملەكەتتىك كوميتەتىنىڭ ءبىز ەكى ەل حالقى اراسىنداعى بايلانىستى كۇشەيتۋگە قۇلشىنعانىنا العىس ايتامىن. سىزدەردىڭ وسىنداي ۇيىمدارىڭىزدىڭ باستاماشىلدىق ەتۋى ارقىلى ءبىز ءتىپتى دە كەڭ بايلانىستى قاراستىرىپ، ءبىز ەكى ەلدىڭ جانە دۇنيە ءجۇزىنىڭ مۇددەسىن جەبەي الامىز جانە ىقپال ەتە الامىز.

  چين گاڭ سوزىندە مىنالاردى ءبىلدىردى: ءتوراعا شي جينپيڭ قۇتتىقتاۋ حاتىندا جۇڭگو جاقتىڭ جۇڭگو - امەريكا قارىم - قاتىناسىن دامىتۋداعى بەلسەندى پوزيتسياسى مەن پرينسيپتىك تۇرعىسىن ءبىلدىردى. جۇڭگو جاق امەريكاعا قاراتقان ساياساتتىڭ وسكەلەڭ ۇلاسپالىلىعى مەن تۇراقتىلىعىن ساقتايدى، باستان - اياق ەكى ەل حالقى مەن دۇنيە ءجۇزى حالقىنىڭ ءتۇبىرلى مۇددەسىن شىعار ءتۇيىن ەتىپ، ستراتەگيالىق بيىكتىك پەن ۇزاق بولاشاقتىق تۇرعىدان جۇڭگو - امەريكا قارىم - قاتىناسىنا مامىلە جاسايدى جانە يگەرەدى. بىرەۋلەر جۇڭگو - امەريكا قارىم - قاتىناسى بۇرىنعىداي بولا المايدى دەيدى، سوندا وسى سەبەپتى ءبىز قاستەرلەمەۋىمىز، ءتىپتى، مەيلىنشە ءبۇلدىرۋىمىز كەرەك پە؟ ءبىز مۇنى استە قۇپتامايمىز. ءبىز امەريكا ۇكىمەتى جانە ءار سالاداعى بىلىمدىلەرىمەن بىرگە جۇڭگو - امەريكا باسشىلارىنىڭ تەلەفونداعى ءسوزىنىڭ رۋحى بويىنشا تىلدەسۋدى كۇشەيتىپ، الاۋىزدىقتى مەڭگەرىپ، نازاردى سەلبەستىككە شوعىرلاندىرىپ، جۇڭگو - امەريكا قارىم - قاتىناسىنىڭ دۇرىس جولعا قايتا ءتۇسۋىن ىلگەرىلەتۋ ءۇشىن بىرگە قاجىماي قۇلشىنىس جاساۋدى ءۇمىت ەتەمىز.

  امەريكانىڭ بۇرىنعى مەملەكەت ىستەرى حاتشىسى كەسەنگر، بۇرىنعى ەڭبەك مينيسترى جاۋ شياۋلان دا جەكە - جەكە ءسوز سويلەدى. كەشكى قوناعاسىندا، امەريكا - جۇڭگو قارىم - قاتىناسى مەملەكەتتىك كوميتەتى امەريكاداعى جۇڭگولىقتار ۇرپاعىنان شىققان كاسىپورىنشى جانە قايىر - ساحاباتشى شيە ميڭگە سيلىق ۇسىنىپ، ونىڭ جۇڭگو - امەريكا قارىم - قاتىناسىنىڭ دامۋىن جەبەۋگە بەلسەنە ۇلەس قوسقاندىعىن ماداقتادى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.