جاڭا داۋىردەگى جاڭا جورىقتا جاڭا بەينە، جاڭا ىسكەرلىك كورسەتەيىك

− رايونىمىزداعى قالىڭ پارتيا مۇشەلەرى، كادرلار، بۇقارا پارتيا 19 - كەزەكتى ورتالىق كوميتەتى التىنشى جالپى ءماجىلىسىنىڭ رۋحىن قىزۋ مەرەيمەن تالقىلادى

□ انار بۇلت / شينجياڭ گازەتىنىڭ تىلشىلەرى

　　11 - ايدىڭ 11 - كۇنى پارتيا 19 - كەزەكتى ورتالىق كوميتەتىنىڭ التىنشى جالپى ءماجىلىسى جەڭىسپەن جابىلدى، رايونىمىزداعى قالىڭ پارتيا مۇشەلەرى، كادرلار، بۇقارا جالپى ءماجىلىستىڭ رۋحىن دەرەۋ ۇيرەندى، يگەردى. كوپشىلىك ءبىر اۋىزدان مىنالاردى ءبىلدىردى: پارتيا 19 - كەزەكتى ورتالىق كوميتەتىنىڭ التىنشى جالپى ءماجىلىسى پارتيامىزدىڭ 100 جىلدىق مەرەيتويىنىڭ ماڭىزدى ساتىندە، ”قوس 100 جىلدىق“ كۇرەس نىساناسىنىڭ تاريحي توعىسىنداعى شەشۋشى كەزەڭدە اشىلعان ءبىر رەتكى ماڭىزدى ءماجىلىس، ءبىز شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، تاريحتى اينا ەتىپ، بولاشاققا جول اشىپ، قاجىرلىلىقپەن قۇلشىنا ىستەپ، ەرلىكپەن العا باسىپ، جاڭا داۋىردەگى جاڭا جورىقتا جاڭا بەينە، جاڭا ىسكەرلىك كورسەتەمىز.

　　100 جىلدىق كۇرەس داڭق اكەلدى

　　اۆتونوميالى رايوندىق حالىق قۇرىلتايى تۇراقتى كوميتەتى كەڭسەسى ءماجىلىس ىستەرى باسقارماسىنىڭ باستىعى لي مەي بىلاي دەدى: جالپى ءماجىلىس پارتيانىڭ 100 جىلدىق كۇرەسىنىڭ كەلەلى تابىستارى مەن تاريحي تاجىريبەلەرىن جالپى بەتتىك قورىتىندىلادى، بۇل بۇكىل پارتيانىڭ ونان ارى يدەيانى بىرلىككە كەلتىرۋدى، ەرىكتى بىرلىككە كەلتىرۋدى، ارەكەتتى بىرلىككە كەلتىرۋدى ىلگەرىلەتۋى، بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، جاڭا داۋىردەگى جۇڭگوشا سوتسياليزمنىڭ جاڭا ۇلى جەڭىسىنە قول جەتكىزۋى جونىنەن كەلەلى رەال مانگە جانە تەرەڭ تاريحي مانگە يە. ءبىز جۇڭگو كوممۋنيستىك پارتياسى دەگەن نە، نە ىستەۋى كەرەك دەگەن ءتۇبىرلى ماسەلەنى ەستە بەرىك ساقتاپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، العان بەتتەن قايتپايتىن قايسارلىقپەن بەلگىلەنگەن نىسانانى كۇش سالا جۇزەگە اسىرامىز.

　　”پارتيانىڭ 100 جىلدىق كۇرەسىنىڭ كەلەلى تابىستارى مەن تاريحي تاجىريبەلەرى ءبىزدى مۇرات - سەنىمدى اناعۇرلىم بەكەمدەۋگە، اۋەلگى ماقساتتى، بورىشتى اناعۇرلىم سانالى تۇردە امالياتتا ايگىلەۋگە ىنتالاندىردى“. اۆتونوميالى رايوندىق ساياسي كەڭەس كەڭسەسى حاتشىلار باسقارماسىنىڭ باستىعى گاۋ يۋانتاۋ مىنالاردى ءبىلدىردى: ساياسي كەڭەستىڭ ورگان كادرى رەتىندە، ءبىز جۇڭگو كوممۋنيستىك پارتياسىنىڭ باسشىلىعىنداعى كوپ پارتيا سەلبەستىگى مەن ساياسي كەڭەس ءتۇزىمى سىندى وسى نەگىزگى ساياسي ءتۇزىمدى سانالىلىقپەن قورعاپ، حالىق ساياسي كەڭەسىنىڭ ارناۋلى كەڭەس تۇعىرىنان ويداعىداي پايدالانىپ، تىلەكتەس، باعىتتاس بولىپ، زەيىن - زەردەنى، كۇش - قۋاتتى شوعىرلاندىرىپ، جاڭا جورىقتا قاجىماي - تالماي كۇرەس جۇرگىزۋىمىز كەرەك.

　　اۆتونوميالى رايوندىق پارتكوم پارتيا مەكتەبىنىڭ (اكىمشىلىك شۋەيۋانى) فيلوسوفيا وقىتۋىن زەرتتەۋ ءبولىمىنىڭ مەڭگەرۋشىسى، دوتسەنت ۋاڭ پىڭ بىلاي دەدى: جالپى ءماجىلىس «جۇڭگو كوممۋنيستىك پارتياسى ورتالىق كوميتەتىنىڭ پارتيانىڭ 100 جىلدىق كۇرەسىنىڭ كەلەلى تابىستارى مەن تاريحي تاجىريبەلەرى تۋرالى قارارىن» قاراپ ماقۇلدادى، بۇل نۇر - شۇعىلالى ماركسيزمدىك تۇعىرنامالىق حۇجات، جاڭا داۋىردەگى جۇڭگو كوممۋنيستەرىنىڭ اۋەلگى ماقساتتى، بورىشتى ەستە بەرىك ساقتاعان، جۇڭگوشا سوتسياليزمگە تاباندى بولعان جانە ونى دامىتقان ساياسي جارناماسى، تاريحتى اينا ەتىپ، بولاشاققا جول اشۋدىڭ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ ارەكەت باعدارناماسى.

　　اۆتونوميالى رايوندىق كوممۋنيستىك جاستار وداعى كوميتەتى پارتيا باسشىلىق گرۋپپاسىنىڭ شۋجيى جاۋ چۋان مىنالاردى ءبىلدىردى: پارتيا مەن حالىق 100 جىل كۇرەس جۇرگىزىپ، جۇڭحۋا ۇلتىنىڭ نەشە مىڭ جىلدىق تاريحىنداعى ەڭ ۇلى داستاندى جازدى. اۆتونوميالى رايوندىق وداق كوميتەتى ”پارتيا ۇندەۋ سالسا، وداقتا ارەكەت بولۋ“ تاڭداۋلى ءداستۇرىن ۇزدىكسىز اسقاقتاتىپ، نەگىزگى تاقىرىپتىق وداق كۇنى، نەگىزگى تاقىرىپتىق وداق ساباعى، پيونەرلەر وتريادى قيمىل ساباعى سياقتى تاسىلدەر ارقىلى جاڭا اقپارات قۇرالدارى تۇعىرىنان تولىق پايدالانىپ، جالپى ءماجىلىس رۋحىن ۇيرەنۋدىڭ، ۇگىتتەۋدىڭ قويۋ رايىن ۇزدىكسىز قالىپتاستىرىپ، بۇكىل رايونىمىزداعى قالىڭ وداق مۇشەلەرى مەن جاستاردى ”پارتيا الاڭسىز بولىڭىز، مەملەكەتتى قۇدىرەتتەندىرۋدە ءبىز بارمىز“ دەيتىن جاۋاپكەرشىلىك سەزىمى مەن بورىشتىلىق سەزىمىن اناعۇرلىم كۇشەيتۋگە جەتەكتەيدى.

　　قاجىرلىلىقپەن قۇلشىنا ىستەپ، ەرلىكپەن العا باسامىز

　　جالپى ءماجىلىس مىنالاردى باسا دارىپتەدى: شي جينپيڭ جاڭا ءداۋىر جۇڭگوشا سوتسياليزم يدەياسى زامانىمىزداعى جۇڭگو ماركسيزمى، 21 - عاسىر ماركسيزمى، جۇڭحۋا مادەنيەتى مەن جۇڭگو رۋحىنىڭ داۋىرلىك جاۋھارى، ماركسيزمنىڭ جۇڭگوشالانۋىنىڭ تىڭ سەكىرۋىن جۇزەگە اسىردى. يىڭىسار اۋداندىق پارتكوم ۇيىمداستىرۋ ءبولىمىنىڭ ورىنباسار باستىعى كامىل تۇرسۇن بىلاي دەدى: تۋ جولدى بەلگىلەيدى، يدەيا بەتالىسقا جەتەكشىلىك ەتەدى. ءبىز شي جينپيڭ جاڭا ءداۋىر جۇڭگوشا سوتسياليزم يدەياسىنىڭ عىلمي جەتەكشىلىگىندە جالپى ءماجىلىستىڭ رۋحىن ىشكەرىلەي ۇيرەنىپ، دايەكتىلەندىرىپ، پارتيالىلىق جەتىلىمدى جوعارىلاتىپ، ساياسي قاسيەتتى شىڭداپ، ىسىلعان شەبەرلىكتى شىڭداپ، ءداۋىر بىزگە جۇكتەگەن اۋىر مىندەتتى ارقالاۋىمىز كەرەك.

　　اۆتونوميالى رايوندىق مەملەكەت مەنشىگىندەگى مال - مۇلىكتى باقىلاۋ - باسقارۋ كوميتەتى پارتكومىنىڭ شۋجيى، ورىنباسار مەڭگەرۋشىسى ۋاڭ گاڭ مىنالاردى ءبىلدىردى: جاڭا جاعداي، جاڭا مىندەت، جاڭا تالاپ الدىندا، اۆتونوميالى رايوندىق مەملەكەت مەنشىگىندەگى مال - مۇلىكتى باقىلاۋ - باسقارۋ كوميتەتى پارتكومى پارتيانىڭ مەملەكەت مەنشىگىندەگى كاسىپورىندارعا باسشىلىعىنا باستان - اياق بۇلجىماي تاباندى بولىپ، پارتيانىڭ 100 جىلدىق شۇعىلالى كۇرەس بارىسىنان ۇزدىكسىز العا باسۋ كۇشىن قابىلداپ، جالپى ءماجىلىستىڭ رۋحىن ۇيرەنۋ، ۇگىتتەۋ، دايەكتىلەندىرۋ جەتىستىكتەرىن جوعارى ساپالى دامۋدى ىلگەرىلەتۋدىڭ جاندى امالياتىنا شىنايى اينالدىرىپ، مەملەكەت مەنشىگىندەگى مال - مۇلىكتىڭ، مەملەكەت مەنشىگىندەگى كاسىپورىنداردىڭ ”ورنىقتىرعىش“، ”تىرەك بولۋ“ رولىن شىنايى ساۋلەلەندىرىپ، مەملەكەت مەنشىگىندەگى كاسىپورىنداردى ۇزدىكسىز كۇشەيتىپ، ساپالىلاندىرىپ، زورايتىپ، جاڭا داۋىردەگى جۇڭگوشا سوتسياليستىك شينجياڭدى قۇلشىنا قۇرۋعا اناعۇرلىم زور ۇلەس قوسادى.

　　پارتيا 18 - قۇرىلتايىنان بەرى، پارتيانى جاپپاي قاتاڭ باسقارۋ جاعىندا، پارتيانىڭ ءوزىن - ءوزى كىرشىكسىزدەندىرۋ، ءوزىن - ءوزى كەمەلدەندىرۋ، ءوزىن - ءوزى جاڭارتۋ، ءوز دەڭگەيىن جوعارىلاتۋ قابىلەتى كورنەكتى كۇشەيدى. بۋىرشىن اۋداندىق پارتكومنىڭ تۇراقتى مۇشەسى، ءتارتىپ تەكسەرۋ كوميتەتىنىڭ شۋجيى، باقىلاۋ - تەكسەرۋ كوميتەتىنىڭ مەڭگەرۋشىسى جاڭ لياڭجۇن بىلاي دەدى: ءتارتىپ تەكسەرۋ، باقىلاۋ - تەكسەرۋ ورگانىنداعى كادر رەتىندە، جالپى ءماجىلىستىڭ رۋحىن ىشكەرىلەي ۇيرەنىپ، ءتۇسىنىپ، مىندەتتى ادالدىقپەن اتقارىپ، جاۋاپكەرشىلىكتى ادا ەتىپ، پارتيانى جاپپاي قاتاڭ باسقارۋدىڭ ىشكەرىلەي دامۋىن ۇزدىكسىز ىلگەرىلەتۋىمىز كەرەك.

　　اۆتونوميالى رايوندىق توتەنشە جاعدايعا توتەپ بەرۋدى باسقارۋ مەڭگەرمەسى پارتكومىنىڭ شۋجيى ءماردان مۇقيت بىلاي دەدى: ءبىز توتەنشە جاعدايعا توتەپ بەرۋدى باسقارۋدىڭ ءتۇرلى قىزمەتتەرىن بار كۇشپەن ويداعىداي ىستەپ، اۋىر حاۋىپسىزدىك حاۋىپ - قاتەرىنەن كۇش سالا ساقتانىپ جانە ونى شەشىپ، شۇعىل جاعدايعا توتەپ بەرۋگە دايىندالۋ جانە حاۋىپتەن اراشالاۋ، قۇتقارۋ قىزمەتتەرىن ويداعىداي ىستەپ، ءوندىرىس حاۋىپسىزدىگىن تيتتەي دە بوساڭسىماي مىقتى يگەرىپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىن مۇمكىندىكتىڭ بارىنشا قورعايمىز.

　　جۇڭگو عىلىم اكادەمياسىنىڭ اكادەميگى، جۇڭگو عىلىم اكادەمياسى شينجياڭ بولىمشەسىنىڭ باستىعى شياۋ ۋىنجياۋ مىنالاردى ءبىلدىردى: جاڭا داۋىردەگى عىلىم - تەحنيكا قىزمەتكەرى رەتىندە، وتانشىلدىقتى ەرەكشەلىك ەتكەن عالىمدار رۋحىن ۇزدىكسىز ساۋلەلەندىرىپ، باتىلدىقپەن عىلىم - تەحنيكادا جاڭالىق اشۋدىڭ سەركەسى بولامىز.

　　سەنىمدى بەكەمدەپ، بولاشاققا جول اشامىز

　　حۋاديان شينجياڭ ەلەكتر تاراتۋ شەكتى سەرىكتەستىگى پارتكومىنىڭ شۋجيى، باس جوراسى حان سۇڭ مىنالاردى ءبىلدىردى: پارتيانىڭ 100 جىلدىق كۇرەسى ءداۋىردىڭ الدىڭعى لەگىندە جۇرگەن جۇڭگو كوممۋنيستىك پارتياسىن شىڭداپ، پارتيا قۇرۋ ۇلى رۋحىن باستاۋ ەتكەن رۋحاني شەجىرەنى قالىپتاستىرىپ، پارتيانىڭ العاباسارلىعى مەن كىرشىكسىزدىگىن ساقتاپ، پارتيانىڭ بيلىك جۇرگىزۋ قابىلەتى مەن باسشىلىق دەڭگەيىن ۇزدىكسىز جوعارىلاتتى، جۇڭگو كوممۋنيستىك پارتياسى ايتسا ايتقانداي ۇلى، داڭقتى، دۇرىس پارتيا بولدى.

　　اۆتونوميالى رايوندىق سالىق مەكەمەسى ورگانى پارتكومىنىڭ ارناۋلى مىندەتتەگى ورىنباسار شۋجيى حاۋ لەي مىنالاردى ءبىلدىردى: جالپى ءماجىلىس ورتاعا قويعان جوعارى ساپالى دامۋدى ىلگەرىلەتۋ − ءاربىر سالىق قىزمەتكەرىنىڭ باس تارتۋعا بولمايتىن جاۋاپكەرشىلىگى. ءبىز ەكونوميكالىق دامۋدىڭ ءىس جۇزىندىگىن تياناق ەتىپ، ءتىپتى دە كوپ ساپالى، ءونىمدى، حالىققا دا، كاسىپورىنعا دا ءتيىمدى ناقتى شارالاردى شىعارىپ، باجى كىرىسىن وسىزامانداندىرۋدى كۇش سالا ىلگەرىلەتىپ، جوعارى ساپالى دامۋعا قۇلشىنا قىزمەت وتەۋىمىز كەرەك.

　　”جالپى ءماجىلىس مىنالاردى باسا دارىپتەدى: بۇكىل پارتيا حالىق بۇقاراسىمەن ەتەنە بايلانىسىن، ءسوز جوق، ماڭگى ساقتاپ، حالىقتى وزەك ەتكەن دامۋ يدەياسىن امالياتتا ايگىلەپ، ەڭ كوپ حالىقتىڭ ءتۇبىرلى مۇددەسىن ۇزدىكسىز ويداعىداي جۇزەگە اسىرىپ، ويداعىداي قورعاپ، ويداعىداي دامىتىپ، بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، تاماشا تۇرمىس جولىندا ۇزدىكسىز كۇرەس جۇرگىزۋىمىز كەرەك. وسىناۋ جىلدارى، مەكەنىمىزدە تۋىلعان وزگەرىستەردىڭ بارلىعى بيلىك دەگەنىمىز حالىق، حالىق دەگەنىمىز بيلىك ەكەندىگىن دالەلدەدى“، - دەدى ءۇرىمجى قالاسى تيانشان رايونى يان - ان جولى اۋماعى فۋچۋان ءمالىسى الەۋمەتتىك اۋماعىنىڭ تۇرعىنى ماۋلەنجان مامۇت تەرەڭ اسەرمەن.

　　جاڭا ءشار اۋدانى ياندۇما اۋىلى اياقشىگاتۇع قىستاعى قىستاق تۇرعىندار كوميتەتىنىڭ ورىنباسار مەڭگەرۋشىسى ءالي وبۇلقاسىم بىلاي دەدى: ءبىز جالپى ءماجىلىستىڭ رۋحىن ىشكەرىلەي ۇيرەنىپ، تياناقتاندىرىپ، پارتيا مۇشەلەرى مەن بۇقارانى باستاپ قۇلشىنا كۇرەس جۇرگىزىپ، ءتىپتى دە كوركەم بولاشاق جاراتۋىمىز كەرەك!

　　”ءداۋىر ەمتيحان الۋشى، ءبىز ەمتيحان تاپسىرۋشىمىز، حالىق ەمتيحان تەكسەرۋشى. ءبىز جاڭا دامۋ كەزەڭىن تياناق ەتىپ، جاڭا دامۋ ۇستانىمىن دايەكتىلەندىرىپ، جاڭا دامۋ ارناسىن قالىپتاستىرىپ، وسى زامانعى امبەباپ قاتىناس - تاسىمال جۇيەسىن ۇزدىكسىز، جەدەل ورناتىپ، پارتيا 20 - قۇرىلتايىنىڭ جەڭىسپەن اشىلۋىن ۇزدىك ناتيجەمەن قارسى الۋىمىز كەرەك“، - دەدى اۆتونوميالى رايوندىق قاتىناس - تاسىمال مەڭگەرمەسى پارتكومىنىڭ شۋجيى، ورىنباسار مەڭگەرمە باستىعى لي شۋەدۇڭ كامىل سەنىممەن.

　　(ءتىلشى لي ياڭ، قاتىناسقان تىلشىلەر لياڭ ليحۋا، جاڭ يۇنمەي، فان حۇڭي، يان شياۋتيان، جاڭ يانفاڭ، شى شين، جىڭ جو، ياڭ شۋحان، ميھىرگۇل عوپۇر، شيە حۇيبيان، چىن چياڭۋي، ميھىرگۇل ناسىر، ما بويۇي، لۋ فىڭباۋ، ەرىكتى ءتىلشى ياڭ شۋاڭلۇڭ)