□ انار بۇلت / شينجياڭ گازەتىنىڭ ءتىلشىسى يۇي مىڭفان
11 - ايدىڭ 25 - كۇنى كەشتە ساياحاتشىلار شينجياڭ حالىقارالىق ۇلكەن بازارى ءدامدى تاعامدار كوشەسىندە ەرەكشە تاعامداردى تاڭداپ ساتىپ الۋدا. □ سۋرەتتى انار بۇلت/ شينجياڭ گازەتىنىڭ ءتىلشىسى تاڭ يۇڭ تۇسىرگەن
”كەل، ءبارىمىز بىرگە سۋرەتتىك كورىنىس الايىق، 1، 2، 3، يە! 11 - ايدىڭ 25 - كۇنى ساعات 20، ءۇرىمجى شىراق نۇرىمەن جايناپ تۇر. شينجياڭ حالىقارالىق ۇلكەن بازارى جاياۋلار كوشەسىنىڭ ورتالىعىنداعى ساحنادا تارتىمدى كونسەرت نومىرلەرىنىڭ باستالۋىنا ىلەسە، ارى - بەرى وتكەن ساياحاتشىلار ايالداپ تاماشالادى جانە شاتتانا سۋرەتكە ءتۇستى.
سول كۇننەن باستاپ، شينجياڭ حالىقارالىق ۇلكەن بازارى 24 ساعات تيجارات جۇرگىزدى. اۋا رايى سۋىق بولعانىمەن، ادامداردىڭ ىنتاسىنا كەدەرگى بولا المادى. ءۇرىمجى قالاسىنىڭ تۇرعىنى چىن رۇييىڭ مەن دوستارى شينجياڭ حالىقارالىق ۇلكەن بازارىنىڭ جاياۋلار كوشەسىنە كەلىپ ءان - بيدەن ءلاززات العان سوڭ، ءدامدى تاعامدار كوشەسىن ارالادى. ”قىزمەتتەن تۇسە سالا كونسەرت كورۋگە كەلدىم، تاڭ سارىدە دوستارىممەن بىرگە قاقتاما جەيمىن، تۇنگى تۇرمىسىم بارعان سايىن بايي ءتۇستى“، - دەگەن چىن رۇييىڭ شاڭحايداعى دوسىمەن كەلەر ايدا ۇلكەن بازاردى كەشتە سەرۋەندەۋگە ۋادەلەسىپ قويعانىن ايتتى.
ساحناعا جاقىن ”بيڭتۋان ەستەمەسى“ دۇكەنىندە دۇكەنشى نۇرامينا ابىلەز ساياحاتشىلارعا دۇكەندەگى مادەنيەت جاسامپازدىعى ونىمدەرىن تانىستىردى. سول كۇنگى قوناقتار جايشىلىقتاعىدان كوپ كەلگەنىن بايقاپ، قاتتى قۋانعان ول اپەكەلى - سىڭلىلەرمەن بىرگە قىزمەتتەن تۇسكەننەن كەيىنگى قيمىلدارىن جوسپارلاپ: ”ساعات نولدەن كەيىن جاياۋلار كوشەسىندەگى ءدامدى تاعامدار اۋماعىندا ’1 يۋاندىق كاۋاپ‘ تيىمدىلىك جاساۋ قيمىلى باستالىپتى، بىزدە بارىپ اۋىز تيەيىك“، − دەستى.
”تۇتاس الاڭ بويىنشا ％80كە ءتۇسىرىلدى، نە قاجەت قاراپ كورىڭىز؟“. جاقىن ماڭداعى نان دۇكەنىندە شۇي يوۋميڭ قىزمەتتەستەرىمەن بىرگە ”24 ساعات تيجارات جۇرگىزەمىز“ دەپ جازىلعان قاعازدى باداناداي ەتىپ جاپسىرىپ جاتتى. وسى ارادا 3 جىل قىزمەت ىستەگەن ول تۇڭعىش رەت ءتۇن بويى تيجارات جاسايتىن كۇندى قارسى الدى. ”ءۇمىت“ دەگەن ءسوزدى قايتا - قايتا اۋزىنا العان ول اناعۇرلىم كوپ ساياحاتشىنىڭ شينجياڭنىڭ نانىن ۋاقىت شەكتەمەسىنە ۇشىراماي تاتىپ كورۋىنە، ساتىپ الۋىنا، نان مادەنيەتىن تۇسىنۋىنە مۇمكىندىك جاسالاتىن بولعانى ءۇشىن جۇمىسىنىڭ وتە ءماندى ەكەنىن سەزىندى.
”الدىڭعى ەسىكتەن شىعىپ، جولدان وتسەك جەتىپ بارامىز“. كونسەرت اياقتاعان سوڭ، تيىمدىلىك جاساۋ قيمىلىنان حابار تاپقان كوپتەگەن كورەرمەن ءدامدى تاعامدار كوشەسى اۋماعىنا بارىپ كورمەكشى بولدى، تيانشان رايونى ۇلكەن بازار اۋماعى پارتيا قىزمەتى كوميتەتىنىڭ ورىنباسار شۋجيى ليۋ بو ساياحاتشىلارعا ىستىق ىقىلاسپەن جول نۇسقادى. شينجياڭ حالقارالىق ۇلكەن بازار كورىنىس اۋماعىنىڭ تۇنگى قىزمەت وتەۋىن ويداعىداي قامتاماسىز ەتۋ ءۇشىن، ۇلكەن بازار اۋماعى تۇنگى ەكونوميكاعا قىزمەت وتەۋدى قامتاماسىزداندىرۋ گرۋپپاسىن قۇردى. قىزمەتتىك كەزەكشى باسشىلار ءتۇن بويى الاڭدى شارلايدى، اۋماق پەن ۇلكەن بازار الەۋمەتتىك اۋماعىنىڭ قىزمەتكەرلەرى ساياحاتشىلارعا جول نۇسقاپ، اۆتوكولىك توقتاتىپ، سەرۋەندەۋشىلەرگە سۋرەت تارتىپ بەرەدى، اۋەلى، ءدامدى تاعامدار كوشەسى اۋماعىنان ساياحاتشىلارعا بوس ورىن ىزدەۋدىڭ ءوزى دە قامتاماسىز ەتۋدىڭ ءبىر ءتۇرى بولدى.
جاياۋلار كوشەسىنىڭ B ,A اۋماعىنان جولدىڭ قارسىسىنداعى ءدامدى تاعامدار كوشەسى اۋماعىنا دەيىن تيانشان رايونى مادەنيەتتى، ساياحاتتى دامىتۋ شەكتى سەرىكتەستىگى باس ديرەكتورىنىڭ كومەكشىسى ۋاڭ في مەن قۇرىلىس ءبولىمىنىڭ جاۋاپتىسى شۇي جيادۇڭ جۇرە ءجۇرىپ جول بويىنداعى ساۋداگەرلەردىڭ جارىقتاندىرۋ قۇرىلعىلارىن تەكسەردى. جارىقتاندىرۋمەن قامتاماسىز ەتۋدى جاقسى ىستەۋ ءۇشىن، شۇي جيادۇڭ مەن قۇرىلىس بولىمىندەگى 5 قىزمەتكەر 24 ساعات كەزەكتەسىپ كەزەكشى بولىپ، ءسات سايىن قاجەتتىڭ قاسىنان تابىلدى.
”ماعان 10 كاۋاپ بەر“، ” مەن دە 10 كاۋاپ الامىن“. ساعات 22دە ءدامدى تاعامدار كوشەسىندە ادامدار قايشالىستى. اتۇش كاۋاپحاناسىنىڭ باستىعى لي چۇڭيۇڭ مەن 3 دۇكەن قىزمەتكەرى قاربالاستىققا ءتۇستى. 24 ساعات تيجارات جۇرگىزۋدى اۋزىنا العاندا لي چۇڭيۇڭنىڭ قۋانىشى قوينىنا سيمايدى. وسى كەزدە ”1 يۋاندىق كاۋاپ“ قيمىلىنا تاعى 2 ساعات ۋاقىت بار بولسادا تيجارات سوماسى وتكەن ءبىر كۇنگى تيجارات سوماسىمەن تەڭەستى، ول تيىمدىلىك جاساۋ قيمىلىنا 1000 كاۋاپ دايىندادى.
”1 يۋاندىق كاۋاپ“ ۇلكەن بازار جاياۋلار كوشەسىنىڭ كەشكى ەكونوميكا جەلىلەس ساۋدا قيمىلىنىڭ ءبىرى. قالا تۇرعىندارى مەن ساياحاتشىلار جانە دە ساعات 8دەن ساعات 11گە دەيىن 6 يۋاندىق تاڭعى استان يگىلىكتەنە الادى، بەلگىلەنگەن ورىندا سۋرەت ءتۇسىرىپ دوستار شەڭبەرىنە جولداسا اقشالىق بەلەت الۋىنا دا بولادى.
11 - ايدىڭ 26 - كۇنى ساعات 1دە ”1 يۋاندىق كاۋاپ” قيمىلىنىڭ باستالعانىنا ءبىر ساعات بولعاندا اتۇش كاۋاپ دۇكەنى ”1 يۋاندىق كاۋاپتان“ 1160ىن ساتتى.
ءتۇن ورتاسىنا جاقىندادى، ءبىراق جاياۋلار كوشەسىندە ادامدار ءباز - باياعىسىنداي قايشالىسادى. قالا تۇرعىنى ابدۇۋايىت تۇرسۇننىڭ ۇيىندەگىلەرى، دوستارى ءدامدى تاعامدار كوشەسىندە قورالانا وتىرىپ، ءدامدى تاعام مەن كەشكى تۇرمىستان ءلاززاتتاندى.
ۇعىسۋعا قاراعاندا، 11 - ايدىڭ 25 - كۇنى شينجياڭ حالىقارالىق ۇلكەن بازارى جاياۋلار كوشەسىندەگى ءدامدى تاعامدار كوشەسىنىڭ تيجارات سوماسىنىڭ ءوزى بۇرىنعى ءبىر كۇندەگى تيجارات سوماسىنىڭ ％110ىندەي ارتقان.
ءۇرىمجى قالالىق مادەنيەت جانە ساياحات مەكەمەسى (قالالىق مادەنيەت ەسكەرتكىشتەر مەكەمەسى) پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى فىڭ شيا بىلاي دەدى: ءۇرىمجى قالاسى كوپ ءتۇرلى شارانى العا قويىپ، ”ساياحات + ءدامدى تاعام“، ”ساياحات + كونسەرت“، ”ساياحات + حالىقتىق تۇسەلحانا“ سياقتى كوپ ءتۇرلى ساياحات ەكونوميكالىق فورماتسيالارى ارقىلى كەشكى ەكونوميكانىڭ ومىرشەڭدىك كۇشىن تاسقىنداتىپ، بۇقارانىڭ تۇندە سەيىل - سەرۋەن جاسايتىن ورنى بولۋىنا، ەرەكشە ساياحات كورىنىس وڭىرلەرىنىڭ، كورىنىس تۇيىندەرىنىڭ ساياحاتشىلار، ءسوز جوق، باراتىن جەرگە اينالۋىنا مۇمكىندىك جاسايمىز.
