اۆتونوميالى رايون ”ەڭبەك تاماشا تۇرمىس جاراتادى“ اتىندا اڭگىمە ءماجىلىسىن اشتى
”ماقتا مەنىڭ باقىت گۇلىم“
انار بۇلت / شينجياڭ گازەتىنىڭ ءتىلشىسى جاڭ يانفاڭ، پراكتيكانت لي جيڭ 11 - ايدىڭ 27 - كۇنى ۇرىمجىدەن حابارلايدى. 11 - ايدىڭ 26 - كۇنى اۆتونوميالى رايون ”ەڭبەك تاماشا تۇرمىس جاراتادى“ اتىندا اڭگىمە ءماجىلىسىن اشتى، تيانشان الابىنان كەلگەن ماقتاشىلار جانە ماقتا كاسىبىمەن شۇعىلدانۋشىلار اڭگىمە ماجىلىسىندە ماقتا ەگۋگە، ماقتا تەرۋگە سۇيەنىپ جاقسى تۇرمىس وتكىزگەن حيكايالارىن بايانداپ، امەريكاداعى، باتىستاعى جۇڭگوعا قارسى كۇشتەردىڭ شينجياڭدا ايتىلمىس ”زورلىقپەن ەڭبەككە سالۋ“ ءومىر ءسۇرىپ وتىر دەگەن شىلعي وتىرىگىنە پارمەندى تويتارىس جاسادى.
”شينجياڭنىڭ ماقتاسى كىرشىكسىز اپپاق، وعان داق تۇسىرۋگە بولمايدى“. باعراش اۋدانى باعراش اۋىلىنداعى ماقتاشى يالقۇن قۇربان بىلاي دەدى: اكە - شەشەم ماقتاشى، 20 نەشە جىلدان بەرى ءبىزدىڭ ءۇيىمىزدىڭ ماقتا ەككەن جەر اۋماعى 400 نەشە مۋدان 1200دەن استام مۋعا كەڭەيدى، جاقىنعى بىرنەشە جىلدا ماشينامەن تەرىلەتىن ماقتا ەكتىك، تۇقىم ءسىڭىرۋ بارىسىندا بەيدوۋ جول نۇسقاۋ جۇيەسى ورناتىلعان جوعارى ات كۇشىندىك تراكتورمەن دالمە - ءدال تۇقىم ءسىڭىرۋ، اتىز - ارىق باپتاۋدا سۋ ۇنەمدەپ تامشىلاتىپ سۋارۋ، ۇشقىش اپپاراتپەن ءدارى شاشۋ تەحنيكاسى قاتارلىلار قولدانىلىپ، وزىندىك قۇن زور كولەمدە تومەندەدى، اسا كوپ ادام كۇشى ءتىپتى قاجەت تە ەمەس، مۇندا قايدان كەلگەن ”زورلىقپەن ەڭبەككە سالۋ“ بولسىن؟
كورلا قالاسى قارايولعۇن اۋىلىنىڭ ماقتاشىسى اكرام اركىن بيىل 40 نەشە مۋ جەرگە ماقتا ەگىپ قالماستان، كورلا قالاسى يولعۇن جىنكى عىلىم - تەحنيكالىق اۋىل شارۋاشىلىعى شەكتى سەرىكتەستىگىنە كىرىپ، ۇشقىش اپپارات ۇشىرۋشىعا اينالدى. ”ۇشقىش اپپارات ارقىلى نەبارى بىرنەشە اپتادا - اق بۇكىل اۋىلدىڭ 50 مىڭ مۋ ماقتا اتىزىنداعى ماقتاعا جاپىراق ءتۇسىرۋ ءدارىسىن شاشۋ قىزمەتىن تىندىردىق“. ول: امەريكاداعى، باتىستاعى جۇڭگوعا قارسى كۇشتەردىڭ شينجياڭدا ايتىلمىس ”زورلىقپەن ەڭبەككە سالۋ“ ءومىر ءسۇرىپ وتىر دەپ جالا جابۋىنىڭ ەشقانداي فاكت نەگىزى جوق، مەن جۇمىس تەحنيكامدى كورسەتىپ، وسىزاماندانعان ەڭبەكتىڭ نە ەكەندىگىن ولارعا كورسەتۋدى قالايمىن، - دەدى.
”نە ەككىڭ كەلسە سونى ەگەسىڭ، بۇكىلدەي ءوز قالاۋىڭا ساي كاسىپ تاڭداۋىڭا نەمەسە شارۋاشىلىق قۇرۋىڭا بولادى“، - ءپايزاۋات اۋدانى گۇللۇك اۋىلىنىڭ ماقتاشىسى ابدۇزايىر ءشامار وسىلاي دەدى. 2018 - جىلى داشۋەدەن وقۋ تاۋىسقان سوڭ، ول اۋىلىنا قايتىپ شارۋاشىلىق قۇرۋ سۇيەمەل قاراجاتىن ءوتىنىش ەتىپ، شيننۇڭ اۋىل شارۋاشىلىعى ماشينالارى كاسىپتىك سەلبەستىك كووپەراتيۆىن قۇردى. قايسى ەگىنشى وتباسى جەر جىرتۋ، تۇقىم ءسىڭىرۋ، ءدارى شاشۋ، تەرۋ جۇمىستارىن ىستەمەك بولىپ، ءبىر تەلەفون بەرسە بولعانى، ماشينا جابدىقتارىن ماقتاشىنىڭ جۇمىس باسىنا ايداپ اپارادى. ”قازىر اۋىلىمىزدا تۇقىم ءسىڭىرۋ ％100 ماشينالاستى، سەلبەستىك كووپەراتيۆىمىز جانە 10 نەشە ادامنىڭ ورنىقتى جۇمىستانۋىنا دەم بەردى، مەن قازىرگى تاماشا تۇرمىسىمدى ماقتانىش سەزىنەمىن“، - دەدى ول.
يوپۇرعا اۋدانى تەرىم قالاشىعىنىڭ ماقتاشىسى ابدۇقيۇمجان راحمان بيىل 200 مۋ ماقتا اتىزىن كوتەرمەگە الىپ، 300 مىڭ يۋان كىرىس تاپتى. ماقتا ەگۋ ارقىلى ول اۋداننان قابات ءۇي ساتىپ الۋمەن بىرگە، ەگىن جۇمىستارىنىڭ سايابىر كەزىنەن پايدالانىپ شوفەرلىك كۋالىككە ەمتيحان بەرىپ، جەڭىل اۆتوكولىك ساتىپ الىپ، تۇرمىس ساپاسىن جوعارىلاتتى. ول: ”ءبىز ەڭبەكشىل قوس قولىمىزبەن كوركەم تۇرمىس جاراتتىق، ءارقانداي ادامنىڭ ونى داتتاۋىنا، وعان كۇيە جاعۋىنا بولمايدى!“، - دەدى.
”ماقتا تەرۋشىدەن ماقتا ەگەتىن ءىرى وتباسىنا اينالعانعا دەيىن ماقتا مەنىڭ باقىت گۇلىم بولدى.“ ماناس اۋدانى گۋاڭدۇڭدي اۋىلىنىڭ ماقتاشىسى ما چينليڭ بىلاي دەدى: بۇرىن ءبىزدىڭ ءۇي ماقتا ەگۋدە، ماقتا تەرۋدە، نەگىزىنەن، ادام كۇشىنە سۇيەنەتىن، كەيىن ماشينالاسۋ تەحنيكاسىنىڭ جالپىلاسۋىنا ىلەسە، ەگىن سالۋ بارعان سايىن وڭايلاستى، قازىر كۇيەۋىم ءوزى - اق جەتىسەدى، مەن تاعامجاي اشىپ الدىم، ەكەۋىمىز ءبىر جىلدا 300 مىڭ يۋاننان استام كىرىس تابامىز. تۇرمىسىمىز بارعان سايىن جاقساردى، مىنە وسىنىڭ ءوزى وسەك - اياڭعا ەڭ پارمەندى قايتارما سوققى.
اۆتونوميالى رايوننىڭ باسشىلارىنان لي شۋەجۇن، نۇرىم سىمايىلقان قاتارلىلار اڭگىمە ماجىلىسىنە قاتىناستى.
