11 - ايدىڭ 29 - كۇنى كەشتە مەملەكەت ءتوراعاسى شي جينپيڭ بەيجيڭدە بەينە ەكران تاسىلىمەن جۇڭگو - افريكا سەلبەستىك تالقى مىنبەرى 8 - كەزەكتى مينيستر دارەجەلىلەر ءماجىلىسىنىڭ اشىلۋ سالتىنا قاتىناستى ءارى «قيىندىقتى بىلەك بىرىكتىرە جەڭىپ، الدىڭعىلاردىڭ ءىزىن باسىپ، بولاشاققا جول اشىپ، جاڭا داۋىردەگى جۇڭگو - افريكا تاعدىرلاس ورتاق تۇلعاسىن قول ۇستاسا قۇرايىق» دەگەن تاقىرىپتا ارقاۋ ءسوز سويلەدى.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
11 - ايدىڭ 29 - كۇنى كەشتە مەملەكەت ءتوراعاسى شي جينپيڭ بەيجيڭدە بەينە ەكران تاسىلىمەن جۇڭگو - افريكا سەلبەستىك تالقى مىنبەرى 8 - كەزەكتى مينيستر دارەجەلىلەر ءماجىلىسىنىڭ اشىلۋ سالتىنا قاتىناستى ءارى «قيىندىقتى بىلەك بىرىكتىرە جەڭىپ، الدىڭعىلاردىڭ ءىزىن باسىپ، بولاشاققا جول اشىپ، جاڭا داۋىردەگى جۇڭگو - افريكا تاعدىرلاس ورتاق تۇلعاسىن قول ۇستاسا قۇرايىق» دەگەن تاقىرىپتا ارقاۋ ءسوز سويلەدى.
□ سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن
شينحۋا اگەنتتىگىنىڭ 11 - ايدىڭ 29 - كۇنى بەيجيڭنەن بەرگەن حابارى (ءتىلشى جىڭ ميڭدا). مەملەكەت ءتوراعاسى شي جينپيڭ 11 - ايدىڭ 29 - كۇنى كەشتە بەيجيڭدە بەينە ەكران تاسىلىمەن جۇڭگو - افريكا سەلبەستىك تالقى مىنبەرى 8 - كەزەكتى مينيستر دارەجەلىلەر ءماجىلىسىنىڭ اشىلۋ سالتىنا قاتىناستى.
حالىق سارايىنىڭ شىعىس زالىندا، جۇڭگو مەن افريكاداعى 53 مەملەكەتتىڭ تۋى، سونداي - اق افريكا ەلدەرى وداعىنىڭ تۋى قاتار ءتىزىلىپ، ايبىندى دا اسقاق، جالىندى دا جارقىن بەينەمەن جۇڭگو مەن افريكانىڭ ۋاقىت وتكەن سايىن بەكەمدەلگەن دوستىق سۇيىسپەنشىلىگىن ايگىلەپ تۇر.
شي جينپيڭ «قيىندىقتى بىلەك بىرىكتىرە جەڭىپ، الدىڭعىلاردىڭ ءىزىن باسىپ، بولاشاققا جول اشىپ، جاڭا داۋىردەگى جۇڭگو - افريكا تاعدىرلاس ورتاق تۇلعاسىن قول ۇستاسا قۇرايىق» دەگەن تاقىرىپتا ارقاۋ ءسوز سويلەدى.
شي جينپيڭ بىلاي دەپ اتاپ كورسەتتى: بيىل جۇڭگو مەن افريكانىڭ ديپلوماتيالىق قارىم - قاتىناس ورناتا باستاعاندىعىنىڭ 65 جىلدىعى. 65 جىلدان بەرى جۇڭگو مەن افريكا ەكى جاق يمپەرياليزمگە قارسى تۇرۋ، وتارلاۋعا قارسى تۇرۋ كۇرەسىندە مىزعىماس بەرىك باۋىرلاستىق سۇيىسپەنشىلىك ورناتىپ، دامۋ، گۇلدەنۋ جورىعىندا ەرەكشەلىگى ايقىن سەلبەستىك جولىمەن ءجۇرىپ، الماعايىپ، كۇردەلى وزگەرىس بارىسىندا ءوزارا قارايلاسۋدىڭ تارتىمدى تاراۋلارىن جازىپ، جاڭاشا حالىقارالىق قارىم - قاتىناس تۇلعالاۋدىڭ جارقىن ۇلگىسىن ورناتتى.
شي جينپيڭ بىلاي دەپ باسا دارىپتەدى: جۇڭگو مەن افريكانىڭ قارىم - قاتىناسى نەلىكتەن وسىنشاما جاقسى؟ جۇڭگو مەن افريكانىڭ دوستىعى نەلىكتەن وسىنشاما تەرەڭ؟ مۇنىڭ تەتىگى − ەكى جاق ۋاقىت وتكەن سايىن بەكەمدەلگەن جۇڭگو - افريكا دوستىق، سەلبەستىك رۋحىن جاراتقاندىعىندا، اتاپ ايتقاندا، ول ”شىنايى، بەرەكەلى بولۋ، تەڭ مامىلە جاساۋ، ءوزارا تيىمدىلىك جەتكىزىپ، بىردەي يگىلىككە كەنەلۋ، بىرگە دامۋ، ادىلدىكتى جاقتاۋ، تۋراشىلدىقتى قورعاۋ، ءداۋىر اۋقىمىنا ۇيلەسۋ، اشىق، سيىسىمدى بولۋ“ بولىپ تابىلادى. بۇل جۇڭگو مەن افريكا ەكى جاقتىڭ نەشە ونداعان جىلداردان بەرى بەينەت پەن زەينەتتە بىرگە بولىپ، تىزە قوسا كۇرەس جۇرگىزگەندىگىنىڭ شىنايى كارتيناسى، جۇڭگو مەن افريكانىڭ دوستىق قارىم - قاتىناسىنىڭ الدىڭعىلاردىڭ ءىزىن باسىپ، بولاشاققا جول اشۋىنىڭ كۇش قاينارى.
شي جينپيڭ بىلاي دەپ اتاپ كورسەتتى: بيىل جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنى قالپىنا كەلگەندىگىنىڭ 50 جىلدىعى، مەن سول جىلدارى جۇڭگونى قولداعان قالىڭ افريكالىق دوستارعا شىن جۇرەكتەن العىس ايتامىن! جۇڭگو افريكا ەلدەرىنىڭ تەرەڭ سۇيىسپەنشىلىگىن، مىزعىماس دوستىعىن ماڭگى ۇمىتپايدى، شىنايى، ناقتى، ەتەنە، ادال ۇستانىمدى جانە دۇرىس بورىش - مۇددە كوزقاراسىن ۇزدىكسىز بەرىك ۇستانىپ، افريكاداعى دوستارمەن بىرگە جۇڭگو مەن افريكانىڭ دوستىق سەلبەستىك رۋحىن ۇرپاقتار بويى جالعاستىرادى، ساۋلەلەندىرە بەرەدى.
شي جينپيڭ جاڭا داۋىردەگى جۇڭگو - افريكا تاعدىرلاس ورتاق تۇلعاسىن قۇرۋ جونىندە 4 دارىپتەمەنى ورتاعا قويدى.
ءبىرىنشى، ىنتىماقتاسا وتىرىپ ىندەتكە قارسى اتتانۋعا تاباندى بولۋ. حالىقتى بارىنەن جوعارى قويۋعا، ءومىردى بارىنەن جوعارى قويۋعا تاباندى بولىپ، عىلىم رۋحىن اسقاقتاتىپ، ۆاكسينا ءبىلىم مەنشىك ۇقىعىن تەكتەمەۋدى قولداپ، ۆاكسينانىڭ افريكادا قولجەتىمدى جانە كوتەرىمدىلىگىن شىن مانىندە قامتاماسىز ەتىپ، ”يممۋنيتەت كەدەرگىلەرىن“ الاستاۋ كەرەك.
ەكىنشى، ناقتى سەلبەستىكتى تەرەڭدەتۋ. ساۋدا جانە قارجى قوسۋ كولەمىن كەڭەيتىپ، كەدەيلىكتى ازايتۋ، كەدەيلىكتەن ارىلتۋ تاجىريبەلەرىنەن بىرگە يگىلىكتەنىپ، سيفرلى ەكونوميكا سەلبەستىگىن كۇشەيتىپ، افريكا جاستارىنىڭ شارۋاشىلىق قۇرۋىن جانە ورتا، شاعىن كاسىپورىنداردىڭ دامۋىن جەبەۋ كەرەك. افريكا ەلدەرىنىڭ الەمدىك دامۋ باستاماسىن بەلسەندىلىكپەن قولداۋىن، وعان ات سالىسۋىن قارسى الامىز.
ءۇشىنشى، جاسىل دامۋدى ىلگەرىلەتۋ. جاسىل، تومەن كومىر قىشقىل گاز ۇستانىمىن دارىپتەپ، كۇن ەنەرگياسى، جەل ەنەرگياسى سياقتى تۋىندامالى ەنەرگيالاردى بەلسەندىلىكپەن دامىتىپ، كليمات وزگەرىسىنە توتەپ بەرۋ جونىندەگى «پاريج كەلىسىمىنىڭ» ءونىمدى اتقارىلۋىن ىلگەرىلەتىپ، باياندى دامۋ قابىلەتىن ۇزدىكسىز كۇشەيتۋ كەرەك.
ءتورتىنشى، ادىلدىكتى، تۋراشىلدىقتى قورعاۋ. دۇنيە ءجۇزى شىن مانىندەگى كوپ جاقتىلىقتى قاجەت ەتەدى. بەيبىتشىلىك، دامۋ، ادىلدىك، تۋراشىلدىق، دەموكراتيا، ەركىندىك تۇتاس ادامزاتتىڭ ورتاق قۇندىلىعى، جۇڭگو مەن افريكا ەكى جاق تىنباي تالپىنىپ كەلە جاتقان ورتاق نىسانا. ءبىز بارلىعىمىز ءوزىمىزدىڭ مەملەكەت جاعدايىنا ۇيلەسەتىن دامۋ جولىمەن ءجۇرۋدى دارىپتەيمىز، وركەندەپ كەلە جاتقان ەلدەردىڭ ۇقىق - مۇددەسىن قورعاۋعا كۇش سالامىز، ىشكى ىسكە كيلىگۋگە، ناسىلدىك كەمسىتۋگە، جەكە - دارا جازالاۋعا قارسى تۇرامىز. ءبىز وركەندەپ كەلە جاتقان ەلدەردىڭ ادىلەتتى دارىپتەمەسىنە تايسالماستان تاباندى بولىپ، ءوزىمىزدىڭ ورتاق تالاپ - تىلەگىمىز بەن ورتاق مۇددەمىزدى ورتاق ارەكەتكە اينالدىرۋىمىز كەرەك.
شي جينپيڭ بىلاي دەپ اتاپ كورسەتتى: «جۇڭگو - افريكا سەلبەستىگىنىڭ 2035 - جىلعا دەيىنگى جوباسىنىڭ» باستاپقى 3 جىلدىق جوباسى رەتىندە، جۇڭگو افريكا ەلدەرىمەن تىعىز سايكەسىپ، ”9 ينجەنەريانى“ بىرگە اتقارادى.
ءبىرىنشى، دەنساۋلىق ساقتاۋ، سالاماتتىق ينجەنەرياسى. جۇڭگو افريكا جاققا تاعى دا ءبىر ميلليارد ۆاكسينا بەرەدى، مۇنىڭ ىشىندە 600 ميلليونى تەگىن كومەك، 400 ميلليونىن جۇڭگو جاقتىڭ كاسىپورىندارى قاتىستى افريكا ەلدەرىمەن بىرلەسىپ ءوندىرۋ سياقتى تاسىلدەرمەن قامدايدى. جۇڭگو تاعى افريكا ەلدەرىنە كومەكتەسىپ 10 ەمدەۋ، دەنساۋلىق ساقتاۋ نىسانىن اتقارىپ، افريكاعا 1500 ەمدەۋ قىزمەتكەرى مەن الەۋمەتتىك دەنساۋلىق ساقتاۋ مامانىن جىبەرەدى.
ەكىنشى، كەدەيلىكتى ازايتۋ، اۋىل شارۋاشىلىعىنا تيىمدىلىك جاساۋ ينجەنەرياسى. جۇڭگو افريكاعا كومەكتەسىپ كەدەيلىكتى ازايتۋ جانە اۋىل شارۋاشىلىعى بويىنشا 10 نىسان اتقارىپ، 500 اۋىل شارۋاشىلىعى مامانىن جىبەرەدى، جۇڭگودا ءبىر توپ جۇڭگو - افريكا وسى زامانعى اۋىل شارۋاشىلىعى تەحنيكاسى اۋىس - كۇيىس ۇلگى كورسەتۋ جانە باۋلۋ بىرلەسكەن ورتالىعىن قۇرىپ، جۇڭگو قۇرىلىمدارى مەن كاسىپورىندارىن افريكادا جۇڭگو - افريكا اۋىل شارۋاشىلىعىن دامىتۋ جانە كەدەيلىكتى ازايتۋدان ۇلگى كورسەتۋ قىستاعىن قۇرۋعا شابىتتاندىرادى، افريكاداعى جۇڭگو كاسىپورىندارىنىڭ قوعامدىق جاۋاپكەرشىلىك وداعىنىڭ ”100 كاسىپورىن، 1000 قىستاق“ قيمىلىن باستاۋىنا قولداۋ كورسەتەدى.
ءۇشىنشى، ساۋدانى جەبەۋ ينجەنەرياسى. جۇڭگو افريكانىڭ اۋىل شارۋاشىلىق ونىمدەرىن جۇڭگوعا تاسۋدىڭ ”جاسىل ارناسىن“ ورناتىپ، بولاشاقتاعى 3 جىلدا افريكادان يمپورت ەتۋ جالپى سوماسىن 300 ميلليارد دوللارعا جەتكىزۋگە كۇش سالادى. جۇڭگو 10 ميلليارد دوللارلىق ساۋداعا قارجى قۇراۋ سوماسىن دايىنداپ، افريكا ەكسپورتىن قولداۋعا پايدالانادى، جۇڭگودا جۇڭگو - افريكا ەكونوميكا، ساۋدا تەرەڭ سەلبەستىگىن الدىمەن اتقارۋ رايونىن جانە ”ءبىر بەلدەۋ، ءبىر جول“ جۇڭگو - افريكا سەلبەستىك كاسىپ باقشاسىن قۇرادى. افريكاعا كومەكتەسىپ قۇرىلعىلاردى ۇلاستىرۋ نىسانىنان 10ىن اتقارىپ، جۇڭگو - افريكا ەكونوميكالىق سەلبەستىك ماماندار گرۋپپاسىن قۇرىپ، افريكا قۇرلىعىنىڭ ەركىن ساۋدا رايونى قۇرىلىسىنا ۇزدىكسىز قولداۋ كورسەتەدى.
ءتورتىنشى، قارجى قوسۋ ارقىلى دەم بەرۋ ينجەنەرياسى. جۇڭگو الداعى 3 جىلدا كاسىپورىنداردىڭ افريكادا قوسقان قارجى جالپى سوماسىنىڭ 10 ميلليارد دوللاردان تومەن بولماۋىن جەبەپ، ”جۇڭگو - افريكا حالىقتىق قارجى قوسۋدى جەبەۋ تۇعىرىن“ قۇرىپ، افريكاعا كومەكتەسىپ 10 ونەركاسىپتەندىرۋ جانە جۇمىستاندىرۋدى جەبەۋ نىسانىن اتقارىپ، افريكانىڭ فينانس قۇرىلىمدارىن 10 ميلليارد دوللارلىق سەنىمدىلىك سوماسىمەن قامداپ، جۇڭگو - افريكا شەكارا اتتاعان حالىق اقشاسى ورتالىعىن قۇرادى. جۇڭگو افريكاداعى ەڭ دامىماعان ەلدەردىڭ 2021 - جىلدىڭ اياعىنان بۇرىن مەرزىمى تولىپ، ءالى قايتارماعان ۇكىمەت ارالىق ءوسىمسىز نەسيە قارىزىن كەشىرىم ەتەدى، حالىقارالىق اقشا قورى ۇيىمىنىڭ ۇستەپ بەرگەن ەرەكشە اقشا الۋ ۇقىعىنان 10 ميلليارد دوللار شىعارىپ، افريكا ەلدەرىنە وتكەرمەلەپ نەسيەگە بەرۋدى قالايدى.
بەسىنشى، سيفرلى جاڭالىق اشۋ ينجەنەرياسى. جۇڭگو افريكاعا كومەكتەسىپ، 10 سيفرلى ەكونوميكا نىسانىن اتقارادى، جۇڭگو - افريكا جاساندى سەرىكپەن قاشىقتان بارلاۋ قولدانىلمالى سەلبەستىك ورتالىعىن قۇرىپ، جۇڭگو - افريكا بىرلەسكەن تاجىريبەحاناسىن، سەرىكتەسىپ زەرتتەۋ ورنىن، عىلىم - تەحنيكادا جاڭالىق اشۋ سەلبەستىك بازاسىن قۇرۋدى قولدايدى. جۇڭگو افريكا ەلدەرىمەن قول ۇستاسا وتىرىپ ”جىبەك جولى ەلەكتروندى ساۋدا“ سەلبەستىگىن ورىستەتىپ، افريكانىڭ تاماشا زاتتارىن ينتەرنەت جەلىسىنەن ساتىپ الۋ مەرەكەسىن جانە ساياحاتتىق ەلەكتروندى ساۋدانى جالپىلاستىرۋ قيمىلىن وتكىزىپ، افريكانىڭ ”100 دۇكەنىن، 1000 تاۋارىن تۇعىرعا شىعارۋ“ ارەكەتىن اتقارادى.
التىنشى، جاسىل دامۋ ينجەنەرياسى. جۇڭگو افريكاعا كومەكتەسىپ، 10 جاسىل، قورشاعان ورتانى قورعاۋ جانە كليمات وزگەرىسىنە توتەپ بەرۋ نىسانىن اتقارىپ، ”افريكانىڭ جاسىل قورعان“ قۇرىلىسىن قولداپ، افريكادا تومەن كومىر قىشقىل گازدى ۇلگى كورسەتۋ رايونىن جانە كليمات وزگەرىسىنە ۇيلەسۋدەن ۇلگى كورسەتۋ رايونىن قۇرادى.
جەتىنشى، قابىلەت قۇرىلىسى ينجەنەرياسى. جۇڭگو افريكاعا كومەكتەسىپ، 10 مەكتەپتى جاڭادان قۇرىپ نەمەسە دەڭگەيىن جوعارىلاتىپ، افريكانىڭ جوعارى دەڭگەيلى 10 مىڭ دارىندىسىن ءبىلىم ءوسىرۋ، زەرتتەۋ - تالقىلاۋ قيمىلىنا قاتىناسۋعا ۇسىنىس ەتەدى. ”بولاشاقتاعى افريكا − جۇڭگو - افريكا كاسىپتىك تاربيە سەلبەستىك جوسپارىن“ اتقارىپ، ”افريكانىڭ شەتەلدە وقىپ جاتقان وقۋشىلارىن جۇمىستاندىرۋ توتە ارناسى“ قيمىلىن ورىستەتەدى. افريكاداعى ەلدەرمەن ۇزدىكسىز سەلبەسىپ ”لۋبان شەبەرحاناسىن“ قۇرىپ، افريكاداعى جۇڭگو كاسىپورىندارىن جەرگىلىكتى ورىندى 800 مىڭنان كەم بولماعان جۇمىستانۋ ورنىمەن قامداۋعا شابىتتاندىرادى.
سەگىزىنشى، گۋمانيتارلىق اۋىس - كۇيىس ينجەنەرياسى. جۇڭگو افريكاداعى ديپلوماتيالىق قارىم - قاتىناس ورناتقان بارلىق ەلدىڭ جۇڭگو ازاماتتارىنىڭ ۇيىرمە قۇراپ شەكارادان شىعىپ ساياحاتتاپ باراتىن مەملەكەتكە اينالۋىنا قولداۋ كورسەتۋدى قالايدى. جۇڭگودا افريكا كينو فەستيۆالىن، افريكادا جۇڭگو كينو فەستيۆالىن وتكىزەدى. جۇڭگو - افريكا جاستار قىزمەت وتەۋ تالقى مىنبەرىن جانە جۇڭگو - افريكا ايەلدەر تالقى مىنبەرىن وتكىزەدى.
توعىزىنشى، بەيبىتشىلىك، حاۋىپسىزدىك ينجەنەرياسى. جۇڭگو افريكاعا كومەكتەسىپ، بەيبىتشىلىك، حاۋىپسىزدىك سالاسىنا ساياتىن 10 نىسان اتقارىپ، افريكا ەلدەرى وداعىنا اسكەري ىستەر جاعىنان كومەكتەسۋدى ۇزدىكسىز تياناقتاندىرادى، افريكا ەلدەرىنىڭ ءوڭىردىڭ حاۋىپسىزدىگىن دەربەس قورعاۋ جانە لاڭكەستىككە قارسى تۇرۋ جاعىنداعى قۇلشىنىسىن قولدايدى، جۇڭگو - افريكا بەيبىتشىلىكتى قورعاۋ اسكەري بولىمدەرىنىڭ بىرلەسكەن جاتتىعۋىن، سول جەردىڭ وزىندە باۋلۋ، جەڭىل، شاعىن قارۋلاردى باسقارۋ - مەڭگەرۋ سەلبەستىگىن ورىستەتەدى.
شي جينپيڭ سوڭىندا مىنانى باسا دارىپتەدى: جۇڭگو، افريكا ەكى جاقتىڭ ورتاق قۇلشىنۋىندا، وسى رەتكى جۇڭگو - افريكا سەلبەستىك تالقى مىنبەرى ءماجىلىسىنىڭ، ءسوز جوق، تولىق تابىسقا قول جەتكىزىپ، جۇڭگو مەن افريكاداعى 2 ميلليارد 700 ميلليون حالىقتىڭ تەلەگەي كۇشىن ۇيىستىرىپ، جوعارى دەڭگەيلى جۇڭگو - افريكا تاعدىرلاس ورتاق تۇلعاسىن قۇرۋدى ىلگەرىلەتەتىندىگىنە سەنەمىن.
جۇڭگو - افريكا سەلبەستىك تالقى مىنبەرىنە افريكا جاقتان تەڭ ءتوراعا ەل سەنەگالدىڭ زۇڭتۇڭى سالل سول جەردىڭ وزىندە قاتىناستى ءارى اشىلۋ سالتىن باسقاردى. كونگو دەموكراتيالىق رەسپۋبليكاسىنىڭ زۇڭتۇڭى تسيشەكەدي، ەگيپەتتىڭ زۇڭتۇڭى سيسي، كومورونىڭ زۇڭتۇڭى ازالي، وڭتۇستىك افريكانىڭ زۇڭتۇڭى رامافوسا، افريكا ەلدەرى وداعى كوميتەتىنىڭ ءتوراعاسى فاكي جانە بىرلەسكەن مەملەكەتتەر ۇيىمىنىڭ باس حاتشىسى گۋتەرەس بەينە ەكران تاسىلىمەن ماجىلىسكە قاتىناستى. افريكاداعى 53 مەملەكەتتىڭ سىرتقى ىستەر مينيسترلەرى مەن سىرتقى ەكونوميكالىق سەلبەستىك ىستەرىنە جاۋاپتى مينيسترلەرى نەمەسە ۋاكىلدەرى، سونداي - اق ءىشىنارا حالىقارالىق ۇيىمدار مەن وڭىرلىك ۇيىمداردىڭ ۋاكىلدەرى سول جەردىڭ وزىندە ماجىلىسكە قاتىناستى.
ماجىلىسكە قاتىناسقان افريكا جاقتىڭ باسشىلارى جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار ماجىلىسىنەن بەرى جۇڭگو مەن افريكانىڭ قاتىستى سالالارداعى سەلبەستىگىندە قول جەتكەن جەتىستىكتەردى تولىق تۇراقتاندىرىپ، جۇڭگو جاقتىڭ افريكا ەلدەرىنىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋىن ۆاكسينامەن قامداۋ سياقتى باعالى كومەكتەرىنە ايرىقشا القاۋ ايتتى. ولار مىنالاردى ءبىلدىردى: افريكا مەن جۇڭگو ديپلوماتيالىق قارىم - قاتىناس ورناتۋدى باستاعان 65 جىلدان بەرى ەكى جاق باستان - اياق شىنايى دوس بولىپ، ىنتىماقتاسىپ، ءوزارا قارايلاسىپ، ءوزارا سەنىپ، ءوزارا قۇرمەت ەتىپ كەلدى، افريكا - جۇڭگو ءداستۇرلى دوستىعى ءتۇرلى سىناقتاردان سۇرىنبەي ءوتتى، افريكا - جۇڭگو سەلبەستىگى وزگەشە تاريحي تابىسقا قول جەتكىزدى، افريكا جاق مۇنى ماقتانىش ەتەدى. ءتوراعا شي جينپيڭنىڭ افريكا - جۇڭگو قارىم - قاتىناسىنىڭ دامۋىن ىلگەرىلەتۋ جونىندەگى 4 دارىپتەمەنى جانە افريكا مەن جۇڭگونىڭ ناقتى سەلبەستىگىن كۇشەيتۋ جونىندەگى ”9 ينجەنەريانى“ العا قويۋى جۇڭگو جاقتىڭ افريكانىڭ ىندەتكە قارسى اتتانۋىنا جانە جاسىل، باياندى دامۋدى جۇزەگە اسىرۋىنا كومەكتەسۋ شىن نيەتى مەن باتىل قولداۋىن تاعى ءبىر مارتە ايگىلەدى. افريكا جاق جۇڭگو جاقپەن ىنتىماقتى، دوستىقتى بەكەمدەپ، ءوزارا پايدا جەتكىزىپ سەلبەسۋدى تەرەڭدەتىپ، ”ءبىر بەلدەۋ، ءبىر جولدى“ بەلسەنە بىرگە قۇرىپ، افريكا - جۇڭگو قارىم - قاتىناسىنىڭ جاڭا ءداۋىرىن اشىپ، جاڭا داۋىردەگى افريكا - جۇڭگو تاعدىرلاس ورتاق تۇلعاسىن قۇرۋدى قالايدى. افريكا جاق جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنى قالپىنا كەلگەندىگىنىڭ 50 جىلدىعىن قىزۋ قۇتتىقتايدى، ءبىر جۇڭگو ساياساتىن ۇزدىكسىز باتىل اتقارىپ، جۇڭگونىڭ بىرلىككە كەلۋ ۇلى ءىسىن قولدايدى. افريكا جاق جۇڭگو جاق العا قويعان الەمدىك دامۋ باستاماسىن قولدايدى، جۇڭگو جاقتىڭ بەيجيڭ قىسقى وليمپياداسىن، مۇگەدەكتەر قىسقى وليمپياداسىن تابىستى وتكىزۋىن قولدايدى. افريكا جاق جۇڭگو جاقپەن قول ۇستاسا وتىرىپ كوپ جاقتىلىقتى قورعاپ، حالىقارالىق سايكەسۋدى، سەلبەسۋدى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. افريكا - جۇڭگو دوستىعى جاساسىن! افريكا - جۇڭگو سەلبەستىگى جاساسىن!
ديڭ شۋەشياڭ، ياڭ جيەچى، حى ليفىڭ قاتارلىلار اشىلۋ سالتىنا قاتىناستى.
ۋاڭ ي سەنەگالدىڭ استاناسى داكاردا ماجىلىسكە قاتىناستى.
