قاعىلىق اۋدانى مال شارۋاشىلىعىنىڭ جوعارى ساپالى دامۋ جولىنا قادام تاستادى
كاسىپ سالاسى نىعايدى، كاسىپ سالاسى تىزبەگى ۇزاردى
□ انار بۇلت / شينجياڭ گازەتىنىڭ ءتىلشىسى ءرايدا، ءپاريزات ابدۇل
قورادا 400دەن استام كوپ ءتولدى قوي جايبىراقات جەم - ءشوپ جەۋدە؛ جۇمىرتقالىق تاۋىق فەرماسىندا ءجۇز نەشە مىڭ جۇمىرتقالىق تاۋىق جەم جەۋدە؛ كەپتەر قورادا نەشە مىڭ كەپتەر ۇشىپ - قونۋدا... 11 - ايدىڭ 27 - كۇنى قاعىلىق اۋدانى مال شارۋاشىلىعى كاسىپ سالاسىنان ۇلگى كورسەتۋ باقشا رايونىنداعى مال شارۋاشىلىعى بويىنشا ءوندىرۋ، وقىتۋ، زەرتتەۋ، باۋلۋ ورتالىعىنا كىرگەنىمىزدە، باعىمشىلىق باقشا رايونىنىڭ جالپى كورىنىستىك بۇلت تۇعىرىنىڭ ۇلكەن ەكرانىنان ءارقايسى باعىمشىلىق شاعىن اۋماقتارىنىڭ جاعدايى كورسەتىلىپ تۇر ەكەن.
”باقشا رايونىنىڭ كولەمى 36 مىڭ مۋ، وندا 17 باعىمشىلىق شاعىن اۋماعى، 447 ولشەمدەنگەن باعىمشىلىق قوراسى بار؛ باقشا رايونىندا قازىر ءبىر ميلليون 270 مىڭ مال - قۇس بار، وسى جالپى كورىنىستىك بۇلتتىق تۇعىر ارقىلى ءاربىر قورانىڭ كورىنىسىن كەز كەلگەن ۋاقىتتا ەكراندا كورۋگە بولادى، بۇل جان - جاقتى باقىلاۋعا، باسقارۋعا قولايلى بولدى“، - دەيدى قاعىلىق اۋدانى اۋىل شارۋاشىلىعى جانە اۋىل - قىستاق مەكەمەسى پارتيا باسشىلىق گرۋپپاسىنىڭ مۇشەسى، قاعىلىق اۋدانى مال شارۋاشىلىعى كاسىپ سالاسىنان ۇلگى كورسەتۋ باقشا رايوننىڭ ۇنەمىلىك ىستەرگە جاۋاپتى ورىنباسار مەڭگەرۋشىسى لين گويىن.
قاعىلىق اۋدانى مال شارۋاشىلىعى كاسىپ سالاسىنان ۇلگى كورسەتۋ باقشا رايونى − اۆتونوميالى رايون دارەجەلى مال باعىمشىلىعىنان ۇلگى كورسەتۋ باقشا رايونى، 2012 - جىلى سالىنعان، قازىر ”مال باعىمشىلىعى + سورتتى تۇقىم جەتىلدىرۋ“، ”مال باعىمشىلىعى + ەرەكشە قۇس باعىمشىلىعى“، ”مال باعىمشىلىعى + سۋىق تىزبەكتى زات جەتكىزۋ“، ”مال باعىمشىلىعى + جەم - شوپپەن قامداۋ“، ”مال باعىمشىلىعى + تىڭايتقىش ماتەريالدارىن پايدالانۋ“ كاسىپ سالاسى جۇيەسىن قالىپتاستىرعان.
قاعىلىق اۋدانىنىڭ مال شارۋاشىلىعى بۇرىن ۇتىمسىز دامۋ تاسىلىمەن جۇرەتىن. ”بىتىراڭقى وتباسىلىق باعىمشىلىعىنىڭ وزىندىك قۇنى جوعارى، ءولىم - ءجىتىم مولشەرى جوعارى، پايداسى تومەن بولاتىن“، - دەيدى لين گويىن.
بىرنەشە جىلدان بەرى قاعىلىق اۋدانى وسى زامانعى مال شارۋاشىلىعىن زور كۇشپەن دامىتىپ، ”باقشا رايونى +كاسىپورىن + سەلبەستىك كووپەراتيۆى + شارۋا وتباسى“ ۇلگىسىنە سۇيەنىپ، مال شارۋاشىلىعىنىڭ جوعارى ساپالى دامۋىن پارمەندى ىلگەرىلەتتى.
”باقشا رايونى جالپى كاسىپ سالاسى تىزبەگىنىڭ تۇيىق اينالىمىن قالىپتاستىرىپ، ’ءوندىرىس، وقىتۋ، زەرتتەۋ‘ ءبىر تۇلعالانعان دامۋدى جۇزەگە اسىردى“. لين گويىننىڭ ايتۋىنشا، بيىل شينجياڭ مال شارۋاشىلىعى عىلىم اكادەمياسى باقشا رايونىنىڭ ىشىنەن قاعىلىق اۋدانى قىزمەت پۋنكتىن قۇرىپ، قاعىلىق اۋدانىنداعى مال شارۋاشىلىعىنىڭ جوعارى ساپالى دامۋى، مال شارۋاشىلىعى كاسىپ سالاسىنىڭ دامۋ جوباسىن جاساۋ جانە مال شارۋاشىلىعىنا قاتىستى ساياساتتار بەلگىلەۋ سياقتى جاقتاردان عىلىم - تەحنيكالىق كەڭەس، شەشىم قابىلداۋعا قىزمەت وتەۋ ۇسىنعان.
قازىرگى تاڭدا باقشا رايونىندا باعىمشىلىق، سويىس، جەم - ءشوپ وڭدەۋ، تاسىمال سياقتىلارعا ساياتىن 8 كاسىپورىن، 12 سەلبەستىك كووپەراتيۆى بار، ولار 4000نان استام ادامدى جۇمىستانۋعا جەتەكتەپ وتىر.
قاعىلىق اۋدانى حىڭيۇيشين كەپتەر شارۋاشىلىعى شەكتى جاۋاپكەرشىلىك سەرىكتەستىگى وسى باقشا رايونىنا ىرگە تەپكەن كاسىپورىنداردىڭ ءبىرى. قازىر اتالعان سەرىكتەستىك باقشا رايونىنىڭ ىشىنەن 200 مىڭ جۇپ تۇقىمدىق كەپتەر جەتىلدىرۋ بازاسىن قۇرىپ، عىلمي باعۋ ارقىلى تۇقىمدىق كەپتەردەن جىلىنا 3 ميلليون 600 مىڭىن جەتىلدىرۋدى جۇزەگە اسىرعان.
”ءبىز ’باعىمشىلىق بازاسى +سەلبەستىك كووپەراتيۆى + كاسىپتىك باعىمشىلىق وتباسى‘ ۇلگىسى ارقىلى بۇكىل اۋدان بويىنشا 60 مىڭنان استام ەگىنشى - مالشىنى كەپتەر باعىمشىلىعىمەن شۇعىلدانۋعا جەتەكتەدىك. ءبىزدىڭ ءوزىمىزدىڭ كەپتەر سويىسحانامىز بار، باعىمشىلىق وتباسىلارىنان ساتىپ العان كەپتەرلەر تۇگەلدەي وسى جەردە سويىلىپ، ونان سوڭ باقشا رايونىنىڭ زات تاسىمال كاسىپورنى ارقىلى بۇكىل ەلدىڭ جەر - جەرىنە جەتكىزىلەدى“، − دەيدى قاعىلىق اۋدانى حىڭيۇيشين كەپتەر شارۋاشىلىعى شەكتى جاۋاپكەرشىلىك سەرىكتەستىگىنىڭ اكىمشىلىك ورىنباسار باس ديرەكتورى گاۋ زىحان. قازىر اتالعان سەرىكتەستىك جىنتىكتەي وڭدەۋ زاۆودىن سالىپ جاتىر ەكەن، مەجەمەن 2022 - جىلدىڭ باسىندا وندىرىسكە قوسىلاتىن بۇل زاۆود ءوز كەزەگىندە اناعۇرلىم كوپ شارۋانى كىرىستەرىن ارتتىرۋعا باستاماق.
بىلتىر قاعىلىق اۋدانىنا ىرگە تەپكەن حۋاليڭ قاعىلىق سيىر شارۋاشىلىعىنىڭ تيانيۋان كەشەندىك نىسانى دا اتالعان اۋدانداعى مال شارۋاشىلىعىنىڭ جوعارى ساپالى دامۋىنا قۋاتتى قوزعاۋشى كۇش ۇستەدى.
حۋاليڭ قاعىلىق ەگىن، مال شارۋاشىلىعىن دامىتۋ شەكتى سەرىكتەستىگىنىڭ سيىر باعىمشىلىعى بازاسىنا كىرسەڭىز، شىمىر دا ءىرى تۇلعالى سەمينتال سيىرلاردىڭ جەم - ءشوپ كۇيسەپ جاتقانىن كورەسىز.
قىزمەتكەر ءيۇسۇپالي سامەت قاعىلىق اۋدانى اقتاش قالاشىعى شاراكلا قىستاعىنىڭ تۇرعىنى. ول بىلاي دەدى: ”مەن ايىنا 4000 يۋاننىڭ ۇستىندە تابىس تاۋىپ قانا قويماي، بۇل جەردەن تەحنيكا دا ۇيرەندىم“.
حۋاليڭ قاعىلىق ەگىن، مال شارۋاشىلىعىن دامىتۋ شەكتى سەرىكتەستىگىنىڭ باس ديرەكتورى ما يۇيلۇڭ بىلاي دەدى: ”بىزدە قازىر 4280 سەمينتال سيىر بار، جەرگىلىكتى ورىننان 5000نان استام ەگىنشى - مالشىنى جۇمىستانۋعا باستاپ وتىرمىز. كەلەر جىلدىڭ سوڭىندا سويىس سيىر باعىمشىلىعىنىڭ كولەمى 50 مىڭعا جەتىپ، مەجەمەن 20 مىڭنان استام ادامدى جۇمىستانۋعا تارتاتىن بولامىز“.
”ءبىز مال شارۋاشىلىعىنىڭ جالپى كاسىپ تىزبەگىن ونان ارى كەمەلدەندىرىپ، كولەمدەنگەن، شوعىرلى، جاسىل، سيفرلى مال شارۋاشىلىعىنىڭ جوعارى ساپالى دامۋ جولىنا قادام تاستايمىز“، − دەيدى لين گويىن.
