ەركىن تۇنياز نەگىزگى ساتى ۋاكىلدەرى اڭگىمە ءماجىلىسىن باسقارىپ اشتى
ۇكىمەت قىزمەتىنەن بايانداما جونىندە پىكىر - ۇسىنىس تىڭدادى
انار بۇلت / شينجياڭ گازەتىنىڭ ءتىلشىسى لي ياڭ 12 - ايدىڭ 4 - كۇنى ۇرىمجىدەن حابارلايدى. 12 - ايدىڭ 4 - كۇنى تۇستەن بۇرىن اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ۋاقىتشا ءتوراعاسى ەركىن تۇنياز اڭگىمە ءماجىلىسىن باسقارىپ اشىپ، نەگىزگى ساتى ۋاكىلدەرىنىڭ «ۇكىمەت قىزمەتىنەن بايانداما (پىكىر الۋ نۇسقاسى)» جونىندەگى پىكىر - ۇسىنىسىن تىڭدادى. اۆتونوميالى رايوندىق پارتكومنىڭ تۇراقتى مۇشەسى، اۆتونوميالى رايوننىڭ ۇنەمىلىك ىستەرگە جاۋاپتى ورىنباسار ءتوراعاسى چىن ۋيجۇن اڭگىمە ماجىلىسكە قاتىناستى.
ەركىن تۇنياز الدىمەن «ۇكىمەت قىزمەتىنەن باياندامانىڭ (پىكىر الۋ نۇسقاسى)» دايىندالۋىنا قاتىستى جاعدايلاردى تانىستىردى. ول بىلاي دەدى: ۇكىمەت قىزمەتىنەن باياندامانى ويداعىداي دايىنداۋ كەلەر جىلعى ەكونوميكالىق، قوعامدىق دامۋدىڭ ءتۇرلى قىزمەتتەرىن ويداعىداي ىستەۋدى ىلگەرىلەتۋ جونىنەن اسا ماڭىزدى سانالادى. كوپشىلىك نەگىزگى ساتىنىڭ ءبىرىنشى شەبىندەسىزدەر، ەكونوميكالىق، قوعامدىق تۇرمىسقا ەڭ تىكە ارالاسىپ وتىرسىزدار، بۇقارامەن بايلانىستارىڭىز ەڭ قويۋ، پارتيانىڭ لۋشيان، باعىت - ساياساتتارىنىڭ تياناقتانىپ ءونىم بەرۋىن سەزىنۋلەرىڭىز ەڭ شىنايى، ءوز ءىس جۇزىندىكتەرىڭىزبەن بىرلەستىرىپ، ۇكىمەت قىزمەتىنەن باياندامانى ويداعىداي دايىنداۋعا بەلسەنە ۇسىنىس قويىپ، كەڭەس بەرۋلەرىڭىزدى ءۇمىت ەتەمىن.
نەگىزگى ساتى كادرى، وقىتۋشى، كاسىپورىن قىزمەتكەرى، ەگىنشى، عىلىم - تەحنيكا قىزمەتكەرى قاتارلىلاردان 12 ادام اڭگىمە ماجىلىستە بەلسەنە لەبىز ءبىلدىرىپ، اۆتونوميالى رايوننىڭ ەكونوميكالىق، قوعامدىق دامۋدا قول جەتكىزگەن تابىستارىن تولىق تۇراقتاندىرىپ، ءوز قىزمەت سالاسى، كاسىپ جانە كاسىپورىن ەرەكشەلىگى توڭىرەگىندە تازا ەنەرگيانى جالپىلاستىرۋ، قولدانۋ، عىلىم - تەحنيكادا جاڭالىق اشۋ ارقىلى جوعارى ساپالى دامۋعا دەم بەرۋ، ءجۇزىم شارابى كاسىپ سالاسىن دامىتۋ، حالىقتىق كاسىپورىنداردىڭ دامۋىن بارىنشا قولداۋ، كاسىپتىك مەكتەپتەردى كاسىپورىندارمەن سەلبەستىك جاساۋعا شابىتتاندىرۋ، نەگىزگى ساتىنىڭ كوپ نەگىزدى جونگە سالۋىن كۇشەيتۋ، كومىردى ەلەكترگە وزگەرتۋ ينجەنەرياسىن ىلگەرىلەتۋ سياقتى جاقتاردان پىكىر - ۇسىنىستار ورتاعا قويدى.
كوپشىلىكتىڭ پىكىر - ۇسىنىسىن مۇقيات تىڭداعاننان كەيىن ەركىن تۇنياز بىلاي دەدى: كوپشىلىك ۇكىمەت قىزمەتىنەن بايانداما ءۇشىن تاتىمدى، ورەلى پىكىر - ۇسىنىس بەرىپ، كۇشتى جاۋاپكەرشىلىك ارقالاۋ تانىمىن تولىق ايگىلەپ، نەگىزگى ساتى بۇقاراسىنىڭ ويىنداعى سوزدەردى اڭىس ەتتىڭىزدەر، مۇندا شينجياڭنىڭ دامۋىنا دەگەن شىن ىقىلاستى ارمان - تىلەكتەرىڭىز قامتىلدى. ءبىز كوپشىلىكتىڭ پىكىر - ۇسىنىسىن مۇقيات زەرتتەپ، تولىق قابىلداپ، ۇكىمەت قىزمەتىنەن باياندامادا پارتيا ورتالىق كوميتەتىنىڭ شەشىمدەرىنىڭ، ورنالاستىرۋلارىنىڭ اناعۇرلىم ايگىلەنۋىنە، شينجياڭنىڭ ءىس جۇزىندىگىنە اناعۇرلىم ۇيلەسۋىنە، ءار ۇلت بۇقاراسىنىڭ ارمان - تىلەگىنە اناعۇرلىم جاقسى جاۋاپ قايتارۋعا مۇمكىندىك جاسايمىز. كوپشىلىكتىڭ ۇكىمەت قىزمەتىنە بۇرىنعىداي ءمان بەرىپ، نازار اۋدارىپ، شينجياڭنىڭ ءتۇرلى ىستەرىنىڭ دامۋىنا، العا باسۋىنا اقىل - پاراساتتارىڭىز بەن كۇش - قۋاتتارىڭىزدى ارناۋلارىڭىزدى ءۇمىت ەتەمىن.
ەركىن تۇنياز بىلاي دەپ اتاپ كورسەتتى: 2022 - جىلى پارتيا 20 - قۇرىلتايى جەڭىسپەن اشىلاتىن جىل، شينجياڭنىڭ ورنىقتىلىعىن، رەفورماسىن، دامۋىن ىلگەرىلەتۋدەگى شەشۋشى جىل، كەلەر جىلعى ۇكىمەت قىزمەتىن جاقسى ىستەۋدىڭ ءمانى ەرەكشە زور. ءبىز شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 19 - كەزەكتى ورتالىق كوميتەتى التىنشى جالپى ءماجىلىسىنىڭ رۋحىن مۇقيات دايەكتىلەندىرىپ، تياناقتاندىرىپ، جاڭا داۋىردەگى پارتيانىڭ شينجياڭدى جونگە سالۋ جالپى جوباسىن تولىق، دالمە - ءدال دايەكتىلەندىرىپ، قوعام ورنىقتىلىعى مەن باياندى تىنىشتىق باس نىساناسىن مىقتاپ يگەرىپ، اۆتونوميالى رايوندىق 10 - رەتكى پارتيا قۇرىلتايى مەن اۆتونوميالى رايوندىق 10 - كەزەكتى پارتكومنىڭ ەكىنشى جالپى ءماجىلىسىنىڭ ورنالاستىرۋىنا، تالابىنا ساي، دامۋ مەن حاۋىپسىزدىكتى ءبىر تۇتاس جوسپارلاپ، ىندەتتەن ساقتانۋ - تىزگىندەۋدى جانە ەكونوميكالىق، قوعامدىق دامۋدى ءبىر تۇتاس جوسپارلاپ، شينجياڭنىڭ جوعارى ساپالى دامۋىنىڭ تاعى دا تىڭ ساتىعا كوتەرىلۋىن ىلگەرىلەتىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىنىڭ شينجياڭ تاراۋىن كۇش سالا ويداعىداي جازىپ، پارتيا 20 - قۇرىلتايىنىڭ جەڭىسپەن اشىلۋىن ۇزدىك ناتيجەمەن قارسى الۋىمىز كەرەك.
