بىلتىرعى جۇك تاسىمال مولشەرىنەن 19 كۇن بۇرىن استى
انار بۇلت / شينجياڭ گازەتىنىڭ ءتىلشىسى لۋ فىڭباۋ 12 - ايدىڭ 19 - كۇنى ۇرىمجىدەن حابارلايدى. جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگىنەن ۇعىسۋعا قاراعاندا، 12 - ايدىڭ 12 - كۇنىنە دەيىن شينجياڭ تەمىر جولىنىڭ بيىلعى جۇك تاسىمال مولشەرى 175 ميلليون 300 مىڭ تونناعا جەتىپ، بىلتىرعى تۇتاس جىلداعى جۇك تاسىمال مولشەرىنەن 19 كۇن بۇرىن اسقان.
بيىل جىل باسىنان بەرى، شينجياڭ تەمىر جولى تاسىمال قۇرىلىمىن رەتتەۋگە كۇش سالىپ، ”تاس جول تاسىمالىن تەمىر جول تاسىمالىنا اينالدىرۋ“ سىندى تاسىمالدى جەدەل ىلگەرىلەتىپ، كوپ تۇتىنىلاتىن زاتتار تاسىمالىنىڭ ىركىلىسسىز بولۋىن بار كۇشپەن قامتاماسىز ەتىپ، كومىر، مەتال رۋداسى سياقتى كوپ تۇتىنىلاتىن زاتتار تاسىمال مولشەرىن ورنىقتى ارتتىردى.
”ءبىز ءتۇيىندى كاسىپورىندارمەن الدىن الا ۇشتاسىپ، كاسىپورىنداردىڭ تاسىمال قاجەتىن انىقتاپ، تۇتاس شينجياڭ تاسىمالىن ’ءبىر تۇتاس جۇيە‘ رەتىندە اتقارىپ، كاسىپورىندارعا جاعدايىنا قاراي جۇك تاسىمال جوباسىن جاساپ، سايابىر مەزگىل مەن قاۋىرت مەزگىلدە ءوزارا قامتاماسىز ەتۋدى جۇزەگە اسىرىپ، تاسىمال قۋاتىن ەڭ قاجەتتى نارسەگە پايدالانىپ، قاريدارلاردىڭ تاسىمال قاجەتىن ەڭ جوعارى شەكتە قاناعاتتاندىردىق“، - دەدى جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگى جۇك تاسىمال ءبولىمىنىڭ ورىنباسار مەڭگەرۋشىسى لي شيڭ.
ەلەكتر، كومىر، حيميا ونەركاسىپ ونىمدەرى، ماقتا سياقتى جۇك تاسىمالىنا شىنايى كەپىلدىك ەتۋ ءۇشىن، شينجياڭ تەمىر جول تاراۋلارى، ءبىر جاعىنان، مەملەكەت تەمىر جول توبىنىڭ قولداۋىنا بەلسەندىلىكپەن قول جەتكىزىپ، شينجياڭعا كىرەتىن بوس ۆاگونداردى ورنالاستىرۋ تەبىنىن ارتتىردى؛ ەندى ءبىر جاعىنان، تۇتاس شينجياڭ كولەمىندە تاسىمال قۋاتىن ۇيلەسىمدى ۇيىمداستىرىپ، ءارقايسى نەگىزگى جۇك تيەۋ پۋنكتتەرىنىڭ جۇك اۆتوموبيلدەرىن پايدالانۋ جاعدايىنا ساي، جۇك تۇسىرەتىن ماشينالاردىڭ سانىن ارتتىرىپ نەمەسە كەمەيتىپ، كەپتەلىس جاعدايىن سەيىلتتى؛ جۇگى تۇسىرىلگەننەن كەيىنگى بوس اۆتوموبيلدەردەن قايتالاي پايدالانۋدى مىقتى يگەرىپ، اۆتوموبيلدەردىڭ اينالىمىن تەزدەتىپ، اۆتوموبيلدەردىڭ پايدالانىلۋ ونىمدىلىگىن جوعارىلاتتى.
شينجياڭ تەمىر جول تاراۋى تۇڭعىش رەت جۇندۇڭ بەكەتىندە جۇندۇڭ ورنالاستىرۋ بولىمشەسىن قۇرىپ، تاسىمال ءبولىمى، جۇك تاسىمال ءبولىمى، ورنالاستىرۋ ورنى، اۆتوموبيل ءبولىمى، ماشينا ىستەرى ءبولىمى بىرلەسىپ قيمىلداۋ مەحانيزمىن ورناتىپ، تاسىمال قۋاتىن دالمە - ءدال ورنالاستىرۋدى جۇزەگە اسىردى.
شينجياڭ تەمىر جولى، ءبىر جاعىنان، قۇرىلىس جۇرگىزۋگە، ەندى ءبىر جاعىنان، جۇمىس جۇرگىزۋگە تاباندى بولىپ، ارنا قابىلەتىن ۇزدىكسىز جوعارىلاتتى. 4 - ايدان بەرى ءۇرىمجى سولتۇستىك ۆوكزالى - جياڭجۇنمياۋ تەمىر جولىنىڭ يقۋاتىن كەڭەيتىپ وزگەرتىپ سالۋ قۇرىلىسىندا ”ءبىر بولەگى سالىنسا، ءبىر بولەگىن پايدالانۋدان“ جازباي، وسى ەلەكتر، كومىر تاسىمال ارناسىنىڭ تاسىمال قۋاتىن ۇزدىكسىز ارتتىردى.
11 - ايدىڭ 20 - كۇنى ءۇرىمجى - جياڭجۇنمياۋ تەمىر جولىنىڭ جۇندۇڭنان جۇندىڭبەيعا دەيىنگى قوس جەلىسى ىسكە قوسىلعاننان كەيىن، شينجياڭنىڭ تەمىر جول تاراۋلارى جاڭادان قوسىلعان تەمىر جول جەلىسىنىڭ قابىلەتىنەن ويداعىداي، جاندى پايدالانىپ، ۆاگونعا جۇك تيەۋدىڭ ”ەكپىندى“ ۇلگىسىن جاپپاي باستاپ، ۆاگونعا مول جۇك تيەۋدەن قامال الىپ، ۆاگونعا جۇك تيەۋ جاعدايىن ۇزدىكسىز جاقسارتتى. 11 - ايدىڭ 15 - كۇنىنەن 19 - كۇنىنە دەيىن ءۇرتىس 5 كۇن ۆاگونعا جۇك تيەۋ رەكوردىن جاڭالاپ، شينجياڭ تەمىر جولىنىڭ جۇك تاسىمال مولشەرىنىڭ ءۇرتىس ارتتىرۋىنا جەتەكشىلىك ەتتى.
