تيانشان تورى
تيانشان تورى   ›   ۇيرەنۋ   ›   شولۋ

جوعارى شەككە سايىس جاريالاپ، باتىلدىقپەن اعالاپ العا شىعۋ

− چيڭحاي - شيزاڭ تەمىر جولى رۋحى تۋرالى شولۋ

□ شينحۋا اگەنتتىگىنىڭ تىلشىلەرى جوۋ يۋان، فان شي

  70 جىلدىڭ الدىندا، جاڭا جۇڭگو 40 مىڭنان استام تۇيەنى ىسكە سالىپ شيزاڭعا زاتتىق ماتەريالدار تاسىدى، ءبىر كيلومەتر جۇرگەندە ورتاشا ەسەپپەن ”ءشول قايىعىنان“ 12سىن شىعىندادى.

  بۇگىنگى كۇندە قۇرىشتان جاسالعان ”اسپان جولى“ 1000 شاقىرىمعا سوزىلىپ، پويەز دىتتەگەن جەرىنە ءبىر كۇندە جەتىپ، قارلى القاپ، بيىك ۇستىرتكە سالاماتتى ءومىر سيلادى.

  ۇلان - قايىر قارلى القاپ، اسقارالى كۇنلۇن دۇنيە ءجۇزى تەمىر جول قۇرىلىسى تاريحىنداعى كەرەمەتكە كۋا بولدى. چيڭحاي - شيزاڭ تەمىر جولى ”جوعارى شەككە سايىس جاريالاپ، باتىلدىقپەن اعالاپ العا شىققان“ چيڭحاي - شيزاڭ تەمىر جولى رۋحىن تۋىنداتتى.

  2020 - جىلى 11 - ايدا باس شۋجي شي جينپيڭ سىچۋان - شيزاڭ تەمىر جولىنىڭ قۇرىلىس باستاۋى جونىندە ماڭىزدى نۇسقاۋ بەرىپ بىلاي دەپ باسا دارىپتەدى: قالىڭ تەمىر جول قۇرىلىسشىلارى ”2 جول“ رۋحىن جانە چيڭحاي - شيزاڭ تەمىر جولى رۋحىن ساۋلەلەندىرىپ، قۇرىلىستى عىلمي جۇرگىزىپ، قۇرىلىستى حاۋىپسىز جۇرگىزىپ، قۇرىلىستى جاسىل جولمەن جۇرگىزىپ، ينجەنەريا قۇرىلىسىن جوعارى ساپامەن ىلگەرىلەتىپ، جاپپاي سوتسياليستىك وسىزاماندانعان مەملەكەت قۇرىپ شىعۋعا تىڭ ۇلەس قوسۋلارى كەرەك.

  وتاندى ءسۇيىپ ۇلەس قوسۋ، جوعارى شەككە سايىس جاريالاۋ

  ”كۇنلۇن تاۋ سىلەمى باردا تەمىر جول ەشقاشان لحاساعا جەتە المايدى“ دەپ جازادى 20 - عاسىرداعى امەريكا ساياحاتشىسى پاۋل تەروۋ «جۇڭگوداعى ساياحات» اتتى كىتابىندا.

  تاريحتىڭ ءوزى دە بۇل كەسىمدى دالەلدەپ جاتقانداي ەدى −

  1958 - جىلى 9 - ايدا شيڭحاي - شيزاڭ تەمىر جولىنىڭ شينيڭنان گولمۋدقا دەيىنگى بولىگىنىڭ قۇرىلىسى باستالدى، سونىمەن ءبىر ۋاقىتتا گولمۋدتان لحاساعا دەيىنگى بولىگىندە كەڭ كولەمدى بارلاۋ - ولشەۋ جۇمىستارى باستالدى. ايتسە دە قۇرىلىستىڭ كەشەۋىلدەۋىن، توقتاۋىن، قايتا باستالۋىن باستان كەشىرىپ، 1984 - جىلعا كەلگەندە عانا شينيڭ - گولمۋد بولىگىنىڭ قۇرىلىسى ءبىتىپ، پويەز قاتىنادى. سۇركەيلى جاراتىلىستىق ورتا، ەكونوميكالىق قۋات سياقتى كوپ جاقتاعى فاكتورلاردىڭ شەكتەۋىندە، گولمۋد - لحاسا بولىگىنىڭ قۇرىلىسى امالسىز توقتاپ تۇردى.

  ”كۇنلۇن تاۋىنا جەتكەندە، كەلەدى القىمىڭا اقتىق دەمىڭ؛ ۋداۋلياڭنان وتكەندە، شەشە ءجۇزىن كورۋ مۇڭ اكە ءوڭىن؛ فىڭحو تاۋىنا شىققاندا، قىل كوپىر سايلاپ قويار اجال - ءولىم“ دەپ كەلەتىن جەرگىلىكتى حالىق ولەڭىندە چيڭحاي - شيزاڭ تەمىر جولى بويىنداعى تىرشىلىك ورتاسىنىڭ وتە سۇركەيلىگى بەينەلەنگەن.

  تالاي - تالاي سان - سيفرلار قابىرعانى قايىستىرعان قاسىرەت پەن قاتىگەزدىكتى ەستەلىككە الىپ، نەنىڭ ”تىرشىلىك شەكتەلگەن اۋماق“ ەكەنىن ءتۇسىندىرىپ جاتتى: 1953 - جىلى چيڭحاي - شيزاڭ تەمىر جولىن سالاتىن كەزدە ورتاشا ەسەپپەن ءار كيلومەتر جەردە ءبىر ادام قۇربان بولعان؛ 1985 - جىلى تاس جولدى وزگەرتىپ سالۋ كەزىندە ءبىر قۇرىلىس ءبولىمى 3 اي ۋاقىتتا اۋىرعاندى باساتىن ءدارىنىڭ وزىنەن 130 مىڭىن جەپ تاۋىسقان؛ تەڭىز دەڭگەيىنەن 4000 مەتر بيىكتەگى جول جەلىسى 960 كيلومەتردەن اسىپ، ۇشىنا شىققان سۇركەيلى اۋا تەمپەراتۋراسى نولدەن تومەن 40 سەلتسي گرادۋسقا جەتكەن...

  2001 - جىلى 6 - ايدىڭ 29 - كۇنى كوپ كەزەك دالەلدەۋدەن كەيىن، چيڭحاي - شيزاڭ تەمىر جولىنىڭ گولمۋدتان لحاساعا دەيىنگى بولىگىنىڭ قۇرىلىسى رەسمي باستالدى. جول سالاتىن 100 مىڭ قولدىق كولەمدى قوسىن ەڭبەك ءسىڭىرىپ، ۇلەس قوساتىن اسقاق مۇرات ۇستانىپ، شاپشاڭ جينالىپ، ”مەملەكەتتىڭ كۇرە تامىرىن جاساپ، التىننان كوپىر سالىپ، وتان ايباتىن اسقاقتاتىپ، ىنتىماقتى جەبەۋ“ تۋىن بيىك ۇستاپ، ”تىرشىلىك شەكتەلگەن اۋماققا“ قاراي نىق قادام تاستادى.

     قۇرىلىس جۇرگىزۋ ءزايىرى، قانشالىق قيىنعا سوقتى؟ 

  كەزىندە جۇڭگو تەمىر جولى 1 - مەكەمەسى چيڭحاي - شيزاڭ تەمىر جولىنىڭ توسەۋ - تۇرعىزۋ اترەتىنىڭ باستىعى لي جيانگونىڭ ەسكە الۋىنشا، تەڭىز دەڭگەيىنەن 4000 مەتردەن بيىك جەردە توسەۋ - تۇرعىزۋ جۇمىسىن جۇرگىزگەندە، جۇمىسشىلار 2 قابات ءجۇن پوپايكا، ءجۇن شالبار كيىپ، ونىڭ ۇستىنە تەرى ىشىك، تەرى شالبار قاباتتاپ السا دا سەپ بولماپتى؛ قۇرىلىس الاڭىندا ماشينالاردى جوندەگەن كەزدە 4 − 5 مينۋتتا ءبىر كەزەك ادام اۋىسۋعا ءماجبۇر بولاتىن، 2 تال ۆەنتتى شەشىپ بولماي جاتىپ ادام توڭىپ سىرەسىپ قالادى ەكەن.

  بولات رەليس، رەليس شەگەسى، جاستىق اعاشپەن بىرگە وتتەگى ساۋىتى دا قۇرىلىس الاڭىندا ەڭ كوپ كەزدەسەتىن زاتتارعا اينالدى. جۇمىسشىلار ۇنەمى 5 كيلوگرام اۋىرلىقتاعى وتتەگى ساۋىتىن ارقالاپ جۇرەتىن، تىنىسى تارايسا بىرنەشە مارتە وتتەگىن سورىپ، جان شاقىرىپ العان سوڭ جالعاستىرىپ ىستەدى. تەڭىز دەڭگەيىنەن 4600 نەشە مەتر بيىكتەگى كۇنلۇن تاۋىنىڭ تۋنەل قۇرىلىسى الاڭىندا ءبىر جىلعا جەتپەي جۇمىسشىلار 120 مىڭ وتتەگى ساۋىتىن جۇمساپ تاۋىستى.

  ”جاپا - ماشاقاتتا بەينەت شەگۋدەن قورىقپادى، بوران - بۇرقاسىن كۇشتى بولعانىمەن، ەرىك - جىگەر ونان دا مىعىم شىقتى، وتتەگى جەتىسپەگەنىمەن، ءورشىل رۋحتان كەندە بولمادى، تەڭىز دەڭگەيى بيىك بولعانىمەن، تالپىنىس ونان دا بيىكتى كورسەتتى!“ تەمىر جول قۇرىلىسشىلارى تاڭ قالارلىق قايسارلىقپەن جانە باتىلدىقپەن ۇسكىرىك ايازعا قاراماي، بۇرقاسىن بورانعا بەتتى توسەپ، وتتەگى جەتىسپەۋشىلىكپەن كۇرەسىپ، تىرشىلىكتىڭ جوعارى شەگىنە سايىس جاريالادى.

  اياز بەن اپتاپ بەس رەت اۋىسىپ، قاز - قاتار بولات رەليس قارلى القاپ، بيىك ءۇستىرتتىڭ تەرەڭ قويناۋىنا قاراي سوزىلا بەردى −

  2006 - جىلى 7 - ايدىڭ 2 - كۇنى ءنول ساعات 31 مينۋتتا، لحاسا ۆوكزالىنىڭ ىشىندە گولمۋدتان شىققان ”چيڭ 1“ رەتكى شيزاڭعا كىرگەن العاشقى پويەز بەكەت تەكشەسىنە باياۋ كەلىپ كىردى. جۇڭگو دۇنيە جۇزىنە تەمىر جولدى لحاساعا دەيىن جەتكىزدىك! دەپ جاريالادى.

  ”ءسال قىبىرلاعان سوڭ - اق وتتەگى ساۋىتىنا جۇگىرەتىن جاعدايدا كىم تەمىر جولدىڭ رەليسىن توسەي الادى؟ بۇل تەمىر جول جۇڭگونىڭ ’جۇرەكتىلىكپەن ءىس تىندىرۋ‘ رۋحىنىڭ ەڭ تاماشا ايعاعى“ دەپ جازدى انگليانىڭ «گۆارديا» گازەتى.

  قامال الىپ، قيىندىقتى ەڭسەرۋ، باتىلدىقپەن اعالاپ العا شىعۋ

  گۇمپ ەتكەن جارىلىس داۋىسىنان كەيىن، كوز الداعى كورىنىس ءبىرتالاي جۇمىسشىنى قايران قالدىردى: فىڭحو تاۋى تۋنەلىن جارۋدان توپىراق پەن تاس ەمەس، دەرلىكتەي مۇز قيىرشىقتارى شىقتى.

  فىڭحو تاۋى تۋنەلىنىڭ جالپى ۇزىندىعى 1338 مەتر، رەليس بەتى تەڭىز دەڭگەيىنەن 4900 مەتردەي بيىك، تۇتاسىمەن ماڭگىلىك ۇستىرتتىك توڭ قاباتىنا ورنالاسقان، مۇنداي گەولوگيالىق ورتا تۋنەل قۇرىلىسىندا ”شەكتەلگەن اۋماق“ ەسەپتەلەدى.

  ”ۇستىرتتىك توڭ قاتقان جەردە قۇرىلىس جۇرگىزۋدىڭ تەتىگى تەمپەراتۋرانى مەڭگەرۋدە. تەمپەراتۋرا تومەن بولسا، بەتون قاتپاي قويادى؛ جوعارى بولسا، قورشاما جىنىس قاباتى جىلۋدان ەرىپ، ۇڭگىر قابىرعاسىنىڭ سىرعىپ، قۇلاۋىنا اپارىپ سوعادى“، - دەيدى كەزىندە فىڭحو تاۋى تۋنەلىن قازۋ اترەتىنىڭ باستىعى بولعان رىن شاۋچياڭ.

  ەل ءىشى - سىرتىندا تىكەلەي قولدانۋعا بولاتىن تولىسقان تاجىريبە جوق جاعدايدا، قالىڭ عىلىم - تەحنيكا قىزمەتكەرلەرى مەن قۇرىلىسشىلار ءوز كۇشىنە سۇيەنىپ ءومىر ءسۇرىپ، دەربەس جاڭالىق اشىپ، 2 ءىرى تيپتى تۋنەل اۋاسىن رەتتەگىش اگراگاتىن جاسامپازدىقپەن زەرتتەپ جاساپ، تۋنەلدە قۇرىلىس جۇرگىزۋ تەمپەراتۋراسىن بەلگىلى كولەمدە دالمە - ءدال مەڭگەرىپ، قازۋ جۇمىسىنىڭ قاجەتىنە كەپىلدىك ەتتى.

  تاياز كومىلگەن توڭ قاباتى تۋنەلىن قازۋ، مۇز جىنىسىن جازىق بەتتىك جارۋ، توڭ قاباتىن سۋدان، جىلۋدان قورعاۋ... ۇستىرتتىك توڭ قاباتىندا قۇرىلىس جۇرگىزۋدىڭ الەمدىك 20 نەشە ءتۇرلى قيىن تاقىرىبىنان ىركەس - تىركەس قامال الىنىپ، دۇنيە جۇزىندە تەڭىز دەڭگەيىنەن ەڭ بيىك تەمىر جول تۋنەلى فىڭحو تاۋىندا قازىلىپ ءبىتىپ، شەتەلدىك مامانداردىڭ ”چيڭحاي - شيزاڭ تەمىر جولى فىڭحو تاۋىنان وتە المايدى“ دەيتىن بولجالىنىڭ تاس - تالقانىن شىعاردى.

  بيىك ۇستىرتتە وتتەگى جەتىسپەۋ، ۇزاق جىلدىق توڭ قابات، ەكولوگياسى ءالسىز بولۋ، قۇرىلىستىڭ 3 ۇلكەن الەمدىك قيىن تاقىرىبى الدىندا، سۇركەيلى ورتامەن كۇرەس، تەحنيكالىق بوگەتپەن بەلدەسۋ، ونان دا ماڭىزدىسى، رۋح شىڭداۋ شايقاسى جۇرگىزىلدى.

  −ءۇستىرت سۋىعىمەن شايقاستى. تەمىر جول بويىندا ورتاشا ەسەپپەن ءار 10 كيلومەترگە جەتپەيتىن جەردە ءبىر شيپاحانا بولدى، جۇمىسشىلار اۋىرىپ - سىرقاسا جارتى ساعات ىشىندە ءونىمدى ەمدەلدى؛ فىڭحو تاۋىندا، بيىك ۇستىرتتە وتتەگىن شىعاراتىن دۇنيە ءجۇزى بويىنشا تۇڭعىش پۋنكت سالىنىپ، تەڭىز دەڭگەيىنەن بيىك جەردە وتتەگىن شىعارۋ تەحنولوگياسىنىڭ الەمدىك اقتاڭداعىن تولتىردى... 100 مىڭ قولدىق ۇلكەن قوسىن، 5 جىل جۇرگىزىلگەن شايقاستا بىردە - ءبىر ادام ۇستىرتتىك اۋرۋدان كوز جۇمعان جوق. جۇڭگو ينجەنەريالىق عىلىمدار اكادەمياسىنىڭ اكادەميگى ۋ تيان - ي بىلاي دەدى: ”بۇل جۇڭگونىڭ ۇستىرتتىك اۋرۋدىڭ الدىن الۋ جانە ونى ەمدەۋ جاعىندا جاساعان الەمدىك كەرەمەتى“.

  − توڭ قاباتىمەن بەلدەستى. تەمىر جولى بويىندا جالعاسپالى كوپ جىلدىق توڭ قاباتى اۋماعى 550 كيلومەترگە جەتتى. ”توڭ قاباتى تەحنيكاسىن يگەرۋ − چيڭحاي - شيزاڭ تەمىر جولى ينجەنەرياسىنىڭ شەشۋشى تەتىگى“. كەزىندە چيڭحاي - شيزاڭ تەمىر جولىنىڭ باس جوبالاۋشىسى بولعان لي جينچىڭ تانىستىرىپ بىلاي دەدى: قۇرىلىسشىلار قايتا - قايتا تاجىريبەدەن وتكىزىپ، تەمىر جول بويىنداعى جالعاسپالى ۇزاق جىلدىق توڭ قاباتىنىڭ تارالۋ ەرەكشەلىگى مەن وزگەرىس زاڭدىلىعىن يگەرىپ، ”ىرىقتى تۇردە تەمپەراتۋرانى تومەندەتۋ، جەر تاعانىن سۋىتۋ، توڭ قاباتىن قورعاۋدى“ تەحنيكالىق يدەيا ەتكەن توڭ قاباتى قۇرىلىسىنىڭ جۇڭگو ۇلگىسىن تۇراقتاندىردى.

  چيڭحاي - شيزاڭ تەمىر جولىندا پويەز قاتىناعاننان بەرى، جولاۋشىلار پويەزىنىڭ ساعاتتىق جىلدامدىعى 100 كيلومەترگە جەتىپ، توڭ جەردەگى تەمىر جول قاتىناۋىنىڭ ساعاتتىق جىلدامدىعىنىڭ الەمدىك رەكوردىن جاڭالادى، ول جاڭالىق اشقان توڭ قاباتىنىڭ كەشەندى قۇرىلىس تەحنيكاسى جۇڭگو تەمىر جولىنىڭ 21 - عاسىرداعى الەمدىك ينجەنەريا قۇرىلىسى سالاسىنا قوسقان ماڭىزدى ۇلەسى دەپ سانالدى.

  − ەكولوگيانى قورعادى. چيڭحاي - شيزاڭ ءۇستىرتىنىڭ ءالسىز ەكولوگيالىق ورتاسىن قورعاۋ ءۇشىن، قورشاعان ورتانى قورعاۋ ينجەنەرياسىنا شامامەن ءبىر ميلليارد 500 ميلليون يۋان قارجى سالىندى؛ عىلمي زەرتتەۋ قىزمەتكەرلەرى ”ۇستىرتتىك توڭ جەر اۋماعىنداعى وسىمدىك جامىلعىلارىن قالپىنا كەلتىرۋ جانە قايتا جاساۋ“ تۋرالى زەرتتەۋ ورىستەتىپ، تەمىر جولعا پايدالانىلعان جەرگە ەگىلگەن وسىمدىكتەردىڭ قاتارعا قوسىلۋ مولشەرىن %70تەن اسىردى، بۇل تابيعي جاعدايدا قاتارعا قوسىلۋ مولشەرىنەن ءبىر ەسەدەن ارتىق كوپ بولدى؛ بۇكىل جەلى بويىندا 33 جابايى حايۋاناتتار ارناسىن قۇردى؛ تيبەت بوكەنىنە جول بەرۋ ءۇشىن، ينجەنەريا قۇرىلىسى 2 مارتە توقتادى... 2008 - جىلى چيڭحاي - شيزاڭ تەمىر جولىنىڭ گولمۋد - لحاسا بولىگى ينجەنەرياسى ”مەملەكەتتىك قورشاعان ورتاعا قايىرىمدى ينجەنەريا“ سيلىعىنا يە بولدى.

  ماڭداي الدى بارلاۋ - جوبالاۋ جۇمىسى، ماڭداي الدى قۇرىلىس جۇرگىزۋ تەحنيكاسى، ماڭداي الدى ينجەنەريا ساپاسى، ماڭداي الدى باسقارۋ، ماڭداي الدى قىزمەت وتەۋ دەڭگەيى... چيڭحاي - شيزاڭ تەمىر جولى كوپتەگەن ”ماڭداي الدى“ ناتيجەمەن الەمدىك تەمىر جول قۇرىلىس تاريحىنىڭ كەرەمەتىن كەسكىندەدى.

  ”قۇرىلىسشى قوسىن تاڭدانارلىق قايسارلىقپەن جانە عىلمي پەيىلمەن ادام ويىنا كەلمەيتىن ءار ءتۇرلى قيىندىقتاردى جەڭىپ، دۇنيە ءجۇزى بويىنشا ماڭداي الدى ۇستىرتتىك تەمىر جول سالۋ نىساناسىن ورىندادى“، - دەيدى جۇڭگو تەمىر جول عىلمي قوعامىنىڭ القا باستىعى لۋ چۇنفاڭ.

  جالعاستىرا كۇرەس جۇرگىزۋ، تاعى دا بيىك شىڭعا ۇمتىلۋ

  ”اسپان جولى“ قارلى القاپتىڭ ءىشى - سىرتىن ۇلاستىرىپ، ءبىر رۋح كەشەگى وتكەن مەن ەرتەڭگى بولاشاقتى ساباقتاستىردى.

  دۇنيە جۇزىندەگى تەمىر جولدىڭ ەڭ بيىك جەرى تانگلا وڭىرىندە، جول كۇتىمدەۋ جۇمىسشىسى يۇي بىنفان گولمۋد - لحاسا بولىگىندە پويەز قاتىناعاننان بەرى وسى جەردى تابان اۋدارماي كۇزەتىپ كەلەدى، ”اتتاپ باسۋدىڭ ءوزى مۇڭ“ قورشاعان ورتادا، ول ءار كۇنى، كەمىندە، 10 كيلومەتر ءجۇرىپ تەكسەرۋ جۇرگىزىپ، جۇمىس ىستەيدى. 10 نەشە جىلدى ءبىر كۇنگىدەي وتكىزىپ، بولات رەليستىڭ ءار سۇيەمىن قالت جىبەرمەي كۇتىپ - قورعاپ كەلەدى. ”بوران - بۇرقاسىننان جاسقانبايتىن جولدىڭ تاعان تاسى بولۋعا قۇلشىنامىن“، - دەيدى يۇي بىنفان.

  سيگنال ماشيناسىنىڭ شامىن جاعىپ، جول ايىرعىشتى جىلجىتىپ، پويەزعا العا تارتار باعىت سىلتەدى. شيزاڭنىڭ العاشقى بۋىن زاڭزۋ تەمىر جول قىزمەتشىسى بولعان پۋساڭنىڭ ”اسپان جولىنىڭ“ سيگنال جابدىعىن كۇزەتكەنىنە 15 جىل بولدى. ”چيڭحاي - شيزاڭ تەمىر جولى مەنىڭ اۋىلىمدى باقىتقا كەنەلتتى، وسى جەردە ءبىر جۇمىسشى بولۋ مەن ءۇشىن ومىرلىك ابىروي“، - دەيدى پۋساڭ.

  پاراۆوزدى جالعاۋ، وتالدىرۋ، جىلدامدىقتى مەڭگەرۋ، پويەزدى توقتاتۋ، قاي - قايسىنىڭ ءبارىن قالت جىبەرمەي شاپشاڭدىقپەن ورىنداپ، بەلگى بەرىپ، جاۋاپ قاتىپ، جول بويىنا نازار سالىپ وتىرادى. ءار رەت قاتىناعان سايىن پويەز شوفەرى شۇي باۋپيڭ ءاربىر دەتالعا دەيىن مۇلتىكسىز ورىنداۋعا تىرىسادى. 10 نەشە جىلدان بەرى ول قىزمەتتەستەرىنىڭ نازارىندا ”ولشەمدى جۇمىس اتقارۋدىڭ نۇسقاۋلىعىنا“ اينالعان. ”جاپالى ەكەنى، شىنىمەن، جاپالى، ءبىراق چيڭحاي - شيزاڭ تەمىر جولىندا پويەز جۇرگىزۋ باقىتى بۇيىرعانى ءۇشىن جاساعان بارلىق تاباندى قۇلشىنىسىم اسا ءماندى ماعىنا ارقالادى“، - دەيدى شۇي باۋپيڭ.

  جالعاسىن تاپقان رۋح وشپەيدى، ءبىرىنىڭ ءىزىن ءبىرى باسقان تەمىر جول قۇرىلىسشىلارى جوعارى شەككە سايىس جاريالايتىن، باتىلدىقپەن اعالاپ العا شىعاتىن ەرلىكپەن قارلى القاپ، بيىك ۇستىرتتەگى دامۋدىڭ شىت جاڭا تاراۋىن اشتى.

  2020 - جىلى 11 - ايدىڭ 8 - كۇنى سىچۋان - شيزاڭ تەمىر جولىنىڭ يا - ان - لينجى بولىگىنىڭ قۇرىلىسى باستالدى، تاعى ءبىر قۇرىشتان جاسالعان ”اسپان جولى“ قارلى القاپ، بيىك ۇستىرتكە جول تارتتى. جاڭادان سالىناتىن باس جەلىنىڭ ۇزىندىعى 1011 كيلومەتر، 30 كيلومەتردەن اساتىن 6 تۋنەل، 100 مەتردەن اساتىن 9 بيىك كوپىر بار، بۇل جولدى سالۋدىڭ قيىندىعى دۇنيە جۇزىندە سيرەك كەزدەسەدى.

  ”90 - جىلداردىڭ تۇلەگى“ بولعان بالاڭ جىگىت جاۋ ۋيشيڭ سىچۋان - شيزاڭ تەمىر جولىنىڭ لحاسا - لينجى بولىگىندەگى زاڭمۋ ەرەكشە ۇلكەن كوپىرىن سالۋعا قاتىسقان، كەلەسى قادامدا ول سىچۋان - شيزاڭ تەمىر جولىنىڭ يا - ان - لينجى بولىگىنىڭ قۇرىلىسىنا اۋىسپاق. ”اعا بۋىنداردىڭ رۋحى ءبىزدى باستان - اياق ىنتالاندىرىپ، ۇستىرتتەگى تەمىر جول قۇرىلىسىنا ءبىر كىسىلىك ۇلەسىمىزدى قوسۋ سەنىمىمىز بەن بەكىمىمىزدى ونان ارى نىعايتا ءتۇستى“، - دەيدى ول.

  ەجەلگى ۇستىرتتە جۇلدىزدار تەمىر جول قۇرىلىسشىلارىنىڭ ەرلىكپەن العا باسقان قادامىنا تاعى ءبىر مارتە كۋا بولىپ جامىراي جىمىڭداۋدا. جاڭا داۋىردە، جاڭا جورىقتا، ولار، ءسوز جوق، جاڭا كەرەمەت جازۋدى جالعاستىرادى.

  (شينحۋا اگەنتتىگىنىڭ 11 - ايدىڭ 30 - كۇنى بەيجيڭنەن بەرگەن حابارى)

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.