تيانشان تورى   ›   جاڭالىقتار   ›   شينجياڭ حابارلارى

مويىماس ساقشى رۋحىن سومدادى

پارحات عۇلام:

مويىماس ساقشى رۋحىن سومدادى

□ انار بۇلت / شينجياڭ گازەتىنىڭ ءتىلشىسى گو ليڭ

  20 نەشە رەت جارالانىپ، 4 رەت اجال اۋزىنان قالدى. جان اشىرلىق بىلدىرگەن وتباسىنداعىلار مەن دوستارىنا ول: ”قىزمەت جاۋاپكەرشىلىگىنەن باس تارتۋعا بولمايدى“! - دەيتىن. وسى قايىسپاس حالىق ساقشىسىنىڭ ەسىمى پارحات عۇلام ەدى.

  پارحات عۇلام قازىر بۇگىر اۋداندىق قوعام حاۋىپسىزدىگى مەكەمەسى پارتكومىنىڭ مۇشەسى، ورىنباسار مەكەمە باستىعى، قوسىمشا ياڭشيا ساقشى بولىمشەسى پارتيا ياچەيكاسىنىڭ شۋجيى مىندەتىن وتەيدى. ول 1997 - جىلى قوعام حاۋىپسىزدىگى قىزمەتىنە قاتىناسقاننان بەرى، باستان - اياق نەگىزگى ساتى الدىڭعى شەبىندە شايقاس جۇرگىزىپ كەلدى، حالىق ساقشىلارىن باستاپ ءتۇرلى دەلولاردان 130 نەشەسىن اشكەرەلەپ، 230دان استام قىلمىس كۇماندىسىن قولعا ءتۇسىرىپ، ءىس جۇزىندىك ارەكەتى ارقىلى قوعام ورنىقتىلىعىن قورعاۋعا بەلسەندى ۇلەس قوستى. ىلگەرىندى - كەيىندى ءبىر رەت جەكە 2 - دارەجەلى ەڭبەك، 3 رەت 3 - دارەجەلى ەڭبەك ءسىڭىرىپ، 2021 - جىلى ”مەملەكەتتىك تاڭداۋلى پارتيا ىستەرى قىزمەتكەرى“ اتاعىنا يە بولدى.

  اسەمونەر وقىتۋشىسىنان قوعام حاۋىپسىزدىگى حالىق ساقشىسىنا دەيىن

  پارحات عۇلام 1972 - جىلى كورلا قالاسىندا دۇنيەگە كەلگەن، كىشكەنتايىنان سۋرەت سىزۋعا اۋەستەنگەن ول 1987 - جىلى جەرگىلىكتى شىفان مەكتەبىنىڭ اسەمونەر كلاسىنا قابىلدانىپ، وقۋ تاۋىسقاننان كەيىن بۇگىر اۋدانىنداعى ءبىر باستاۋىش مەكتەپتە اسەمونەر وقىتۋشىسى بولادى.

  ”وقىتۋشىلىقتى جاقسى كورەمىن، ءبىراق ساقشىلارعا توتەنشە تابىنامىن“. 1997 - جىلى 5 - ايدا بۇگىر اۋدانىنىڭ حالىق ساقشىسىن قىزمەتكە قابىلداپ جاتقانىنان حابار تاپقان پارحات عۇلام دا تىزىمدەلەدى ءارى ساتىمەن جۇمىسقا قابىلدانىپ حالىق ساقشىسىنا اينالادى.

  ءبىر جولى توسۋ تۇيىنىندە مىندەت وتەپ جاتىپ، وتكەن - كەتكەن اۆتوكولىكتەردى تەكسەرۋ بارىسىندا، پارحات عۇلام ءبىر ەر ادامنىڭ جالتاقتاپ، ەرنىنىڭ دىرىلدەپ تۇرعانىن بايقايدى. ”ادامنىڭ كەسكىن سۋرەتىن سالۋدى ۇيرەنگەن كەزىمدە، جىڭىشكەلىكپەن باقىلاۋعا جاتىلعان ەدىم، الگى ەر ادامنىڭ بەينەسىنەن سەزىكتەنىپ قالدىم. سونىمەن تەكسەرە كەلىپ ونىڭ ەسىرتكى اتكەزشىلىگىمەن اينالىسقان كۇدىكتى ەكەندىگىن انىقتادىم“. بۇل پارحات عۇلامنىڭ حالىق ساقشىسى بولعاننان كەيىن اشكەرەلەگەن تۇڭعىش دەلوسى ەدى.

  سۋرەت سالۋ ونەرى پارحات عۇلامعا دەلو تەكسەرۋ بارىسىندا كوپتەگەن باسىمدىقتار اپەردى، ول قىلمىس كۇماندىسىن ءبىر - اق رەت كورسە دە كەسكىن سۋرەتتەرىن لەزدە سالىپ شىعاتىن. ناتيجەسى كورنەكتى بولعاندىقتان، 2015 - جىلى 3 - ايدا ول بۇگىر اۋداندىق قوعام حاۋىپسىزدىگى مەكەمەسى ياڭشيا ساقشى بولىمشەسىنىڭ باستىعى بولىپ تاعايىندالدى.

  تىرتىقتى وردەن دەپ ءبىلۋ

  كەۋدەسىندەگى پىشاق جاراسى، باسىنداعى 10 جىپپەن تىگىلگەن تىرتىق، ۇسىنگەن اياعى... دەنەسىندەگى جاراقاتتاردى پارحات عۇلام قالجىڭداپ ”بۇل مەنىڭ وردەندەرىم“ دەيتىن.

  قىزمەتتەستەرى پارحات عۇلامدى ”اسقان قارۋلى بولماسا دا، ەشتەڭەدەن تايىنبايدى“ دەپ باعالايدى.

  ”تەك بۇقارا حاۋىپسىز بولسا بولدى، قانشا جارالانىپ، قانشا قان توكسەم دە تاتيدى“. اپتا سوڭىنداعى ءبىر كۇنى قىزىن موتوتسيكلگە مىنگەستىرىپ الىپ بازار ارالاتپاقشى بولىپ شىققان پارحات عۇلام انادايداعى ساۋدا سارايىنىڭ الدىندا قاۋمالاپ تۇرعان قالىڭ ادامدى كورەدى. 2 ەر ادام ەرەگەسىپ تۇر ەكەن، بىرەۋىنىڭ قولىندا پىشاق بار، ەندى بىرەۋى جارالانىپتى. پارحات عۇلام ولاردى اراشالاماقشى بولعان كەزدە، پىشاق ۇستاعان ادام وعان دا پىشاق سالادى، پارحات جاراقاتىنىڭ اۋىرعانىنا قاراماي الگى ەر ادامدى اقىرى بويسۇندىرادى.

  ”شيپاگەردىڭ ايتۋىنشا پىشاق ءدال جۇرەگىمنىڭ تۇسىنان شانشىلىپتى، تۇيمە توسىپ قالماعاندا، سول جەردە قۇربان بولادى ەكەم“، - دەيدى پارحات عۇلام.

  بۇقارانى تۋىسىنداي كورۋ

  پارحات عۇلام ۇنەمى:”بۇقارانى تۋىسىڭداي كورسەڭ، بىتپەيتىن جۇمىس بولمايدى“، - دەيدى.

  ءبىر جولى پارحات عۇلام قىستاقتا توزىعى جەتكەن ءبىر كونە تراكتوردىڭ بارلىعىن بايقايدى، سونىمەن ول تراكتوردىڭ يەسىمەن اقىلداسىپ، ءوزى قارجى شىعارىپ تراكتوردى جوندەتىپ، قىستاقتاعى قيىنشىلىعى بار قۇربان مامەتكە پايدالانۋعا بەرەدى. سول جىلى كوكتەمگى ەگىس كەزىندە، قۇربان سول تراكتوردىڭ ارقاسىندا 40 مىڭ يۋان كىرىس كىرگىزەدى.

  2019 - جىلى 8 - ايدا 20 نەشە مالشى تاسقىندا تاۋدا قامالىپ، تۇرمىستىق كەرەك - جاراقتان قىسىلىپ قالادى. سول كەزدە پارحات عۇلام حالىق ساقشىلارىن باستاپ باستارىنا تونگەن قاتەرگە قاراماي، تاسقىندى جارىپ ءوتىپ كەرەك - جاراق جەتكىزىپ بەرەدى. تاۋ جولى كۇدىر، اۆتوكولىك مۇلدە جۇرە المايتىن، ول حالىق ساقشىلارىمەن بىرگە زاتتاردى ارقالاپ، 4 ساعاتتان ارتىق جول ءجۇرىپ، كەرەك - جاراقتاردى قامالىپ قالعان مالشىلارعا جەتكىزىپ بەرەدى.

  سوڭعى جىلدارى پارحات عۇلام جيىنى 6 وقۋشىنىڭ وقۋىن جالعاستىرۋىنا كومەكتەستى، بۇقارانىڭ 60تان استام قيىن ىستەرىن شەشىپ بەردى، بۇقارا ءۇشىن 190نان استام ناقتى ءىس، جاقسى ءىس ىستەدى.

  2015 - جىلى 8 - ايدا پارحات عۇلام ياڭشيا قالاشىعى چيگايبۇلاق قىستاعىنداعى ءبىر كەدەي وتباسىنىڭ بالاسى ءومارجان ابىلەتتىڭ ورتا مەكتەپكە قابىلدانعاندىعىن بىلگەننەن كەيىن، ءومارجانعا وقۋىن جالعاستىرىپ داشۋە بىتىرگەنىنە دەيىن قارجىلاي ىرىقتىلىقپەن كومەكتەسەدى.

  2021 - جىلى ءومارجان داشۋە ءبىتىرىپ اۋىلىنا قايتىپ كەلىپ، ەمتيحانعا قاتىناسىپ، حالىق ساقشىسىنا اينالدى. بىرەۋلەر ودان نە ءۇشىن ساقشى بولعاندىعىن سۇراعاندا، ول: ”مەن پارحات اعاي سياقتى جاقسى ساقشى بولعىم كەلەدى“، - دەپ جاۋاپ بەرەدى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.