تيانشان تورى   ›   جاڭالىقتار   ›   شينجياڭ حابارلارى

ءبىر ادام ءبىر قالانى تەبىرەندىردى

ءشىرالي ابەي:

ءبىر ادام ءبىر قالانى تەبىرەندىردى

انار بۇلت / شينجياڭ گازەتىنىڭ ءتىلشىسى گو ليڭ

  ”سول كۇنى 100دەن استام بۇقارا بىزبەن بىرگە كونچى وزەنىنە سەكىرىپ ءتۇسىپ، قولتىقتاسا قاتارلاسىپ ادام داۋالىن جاساپ، وزەن سۋىندا ءبىر قادام، ءبىر قادامنان ىلگەرىلەپ ونى ىزدەدىك، سول كەزدە ونىڭ كەنەت پايدا بولۋىنان قاتتى ۇمىتتەندىم“. 12 - ايدىڭ 15 - كۇنى كورلا قالالىق قوعام حاۋىپسىزدىگى مەكەمەسى پۋحۇي ساقشى بولىمشەسىنىڭ تاربيەشىسى جاڭ تاۋ ءشىرالي ابەي قۇربان بولعان كەزدەگى كورىنىستى قايتا ەسىنە ءتۇسىردى.

  ءشىرالي ابەي، قۇربان، ءتىرى كەزىندە كورلا قالالىق قوعام حاۋىپسىزدىگى مەكەمەسى شارلاۋ - تىزگىندەۋ ۇلكەن اترەتى 1 - ورتا اترەتىنىڭ كومەكشى ساقشىسى بولعان، قوعام حاۋىپسىزدىگى قىزمەتىنە قاتىناسقاننان بەرى ”مەملەكەتتىك تاڭداۋلى وداق مۇشەسى“، ”مەملەكەتتىك ۇلتتار ىنتىماعى، العاباسارلىعىنداعى وزات جەكە“ سياقتى كوپتەگەن داڭقتارعا يە بولعان. 2014 - جىلى 6 - ايدىڭ 11 - كۇنى ءشىرالي ابەي سۋعا ءتۇسىپ كەتكەن بۇقارانى قۇتقارۋ جولىندا، باقىتقا قارسى، سۋعا كەتىپ، نەبارى 24 جاسىندا قۇربان بولعان.

  2014 - جىلى 6 - ايدىڭ 11 - كۇنى ساعات 15 مولشەرىندە كورلا قالالىق قوعام حاۋىپسىزدىگى مەكەمەسى شارلاۋ - تىزگىندەۋ ۇلكەن اترەتى 1 - ورتا اترەتىنىڭ حالىق ساقشىلارى كونچى وزەنى جاعاسىندا مىندەت اتقارىپ ءجۇرىپ، قالالىق حاۋىپسىزدىك مەكەمەسى قولباسشىلىق ورتالىعىنىڭ بۇقارانىڭ سۋعا ءتۇسىپ كەتكەنى جونىندە بەرگەن بۇيرىعىن تاپسىرىپ الادى. ءشىرالي ابەي مەن جاۋىنگەر سەرىكتەرى دەرەۋ وقيعا تۋىلعان جەرگە تىزگىن ۇشىمەن جەتەدى.

  كونچى وزەنىنىڭ كەڭدىگى 100 نەشە مەتر، تەرەڭدىگى 2 مەترگە تاياۋ كەلەدى. وزەندە 2 ادامنىڭ جانتالاسىپ جاتقاندىعىن كورگەن ءشىرالي ابەي كيىمىن شەشۋگە دە ۇلگىرمەي سۋعا گۇمپ قويىپ، جاۋىنگەر سەرىكتەرىمەن بىرگە ءبىر ەر ادامدى جاعاعا يتەرىپ شىعارادى. ەندى ءبىر ايەل ادام سۋدا قالقىپ ارى قاراي اعىپ بارا جاتقاندا، ءشىرالي ابەي قايراتىن بويىنا جيىپ وعان قاراي مالتاي جونەلەدى.

  ”ادام قۇتقارۋعا قايتا كەتكەنىندە، جاس جىگىتتىڭ كۇشى نەداۋىر السىرەپ كەتكەن ەدى“. قالا تۇرعىنى سۇڭ دىيىن ءشىرالي ابەيدىڭ ادام قۇتقارۋ بارىسىن ءوز كوزىمەن كوردى. سۋعا تۇسكەن ايەل قۇتقارىلىپ جاعاعا شىعارىلعاندا بارىپ، كوپشىلىك ءشىرالي ابەيدىڭ كورىنبەي كەتكەنىن بايقايدى.

  ”جاعاعا شىقپاي قالعان ادام بارىن بىلگەن سوڭ، ساقشىلاردى سۋعا ءتۇسىپ ىزدەۋگە دەرەۋ ۇيىمداستىردىم، كوپتەگەن بۇقارا دا ىزدەۋشىلەر قاتارىنا قوسىلدى، كوپشىلىك قولتىقتاسا قاتارلاسىپ، تۇتاس وزەن ارناسىن كولدەنەڭىنەن كەسىپ، تولقىنعا قارسى ءبىر قادام، ءبىر قادامنان ءجۇرىپ وتىردىق“، - دەدى جاڭ تاۋ.

  ىزدەۋگە قولايلى بولۋ ءۇشىن، وقيعا تۋىلعان جەرگە بارعان قوعام حاۋىپسىزدىگى مەكەمەسىنىڭ باسشىلارى سايكەسىپ كونچى وزەنىنىڭ جوعارعى اعارىنداعى تيەكتى جاۋىپ، تومەنگى اعاردىڭ سۋىن توساتىن توسپانى اشىپ، سۋ دەڭگەيىن تومەندەتەدى. ساعات 18دەن 17 مينۋت وتكەندە، الدەقاشان تىنىسى توقتاپ، ەكى قولىن اۋەلگىسىندەي جوعارى كوتەرگەن قالپىندا سۋ ىشىندە قيمىلسىز جاتقان ءشىرالي ابەي تابىلدى.

  ءشىرالي ابەيدىڭ سۋعا تۇسكەن ادامدى قۇتقارۋ جولىندا قۇربان بولعانى تۋرالى حابار تاراعاننان كەيىن، كورلا قالاسىنىڭ كوپتەگەن تۇرعىندارى وزدىكتەرىنەن قولدارىنا گۇل، بالاۋىز شام الىپ كونچى وزەنىنىڭ جاعاسىنا كەلىپ، قاھارمانعا دەگەن قۇرمەت سەزىمى مەن ساعىنىشىن ءبىلدىردى.

  ”ول ەرەكشە اشىق - جارقىن جىگىت ەدى، ءسوزى از بولعانىمەن، كۇلدىرگى، قىزمەتتى ەرەكشە مۇقيات ىستەيتىن“، - دەدى جاڭ تاۋ. 2013 - جىلى ورتا اترەت قونىس جاڭالاعاندا، 3 قىزمەتتەسىن ءبىرىنشى قاباتتىڭ تازالىعىن ىستەۋگە ورنالاستىرعاندا، ءشىرالي ابەي اسا مۇقياتتىلىقپەن تاڭەرتەڭنەن كەشكە دەيىن ىستەدى. ءبىر جولى ادامدار ءجيى باراتىن تاعامجايعا ءورت كەتكەندە، ءشىرالي ابەي ەش ءارى - ءسارى بولماستان ءورت وشىرگىشتى الىپ اتىلىپ كىرگەن ەدى.

  ءشىرالي ابەي ءتىرى كەزىندە تۇرعان ورتا اترەت جاڭا مۇشە قابىلداعان سايىن، ونىڭ قاھارماندىق ىزگى ىستەرىنەن ۇيرەنەتىن بولدى. ونىڭ قاھارماندىق ىزگى ىستەرىنىڭ ىقپالىندا، 2014 - جىلدان بەرى ورتا اترەتتە ىلگەرىندى - كەيىندى 14 ادام كورلا قالاسى دارەجەلى وزات جەكە بولدى.

  ”ونىڭ بالا كەزىنەن ساقشى بولعىسى كەلەتىن، ءار رەت ۇيىنە قايتقاندا باسقالارعا كومەكتەسكەن ىستەرىن قۋانا اڭگىمەلەيتىن“. ءشىراليدىڭ شەشەسى گۇلنيسا ءسىلام: ءشىرالي ءبىزدىڭ ماقتانىشىمىز، - دەدى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.