تيانشان تورى
تيانشان تورى   ›   جاڭالىقتار   ›   شينجياڭ حابارلارى

ءوزارا قارايلاسىپ، قول ۇستاسا ىلگەرىلەيمىز

رايونىمىزداعى ءار ۇلت كادر - بۇقاراسى شينجياڭدىق جۇك اۆتوموبيل شوفەرلەرىنىڭ ”ءوز اقشالارىمەن وكىلەتتى كولىك جۇرگىزۋشى بولعان“ ىزگى ءىسىن القادى، كوپشىلىك مىنالاردى ءبىلدىردى −

ءوزارا قارايلاسىپ، قول ۇستاسا ىلگەرىلەيمىز

انار بۇلت / شينجياڭ گازەتىنىڭ تىلشىلەرى جاڭ جىلي، دۋ جيانحۇي، چىن جياڭلين

  بىرنەشە كۇننەن بەرى، شينجياڭدىق ەكى جۇك اۆتوموبيل شوفەرىنىڭ 4700 كيلومەتر جول باسىپ، جياڭسۋلىق جارالانىپ قالعان جۇك اۆتوموبيل شوفەرى ءۇشىن ءوز اقشالارىمەن وكىلەتتى كولىك جۇرگىزۋشى بولعان حابارى ينتەرنەتتە كەڭ تارالدى، رايونىمىزداعى ءار ۇلت كادر - بۇقاراسى جۇك اۆتوموبيل شوفەرلەرى ءمانسۇر پاتتار مەن مامەت نۇردۇننىڭ ىزگى ءىسىن جابال القادى. كوپشىلىك مىنالاردى ءبىلدىردى: مەيىرىمگە تولعان ىزگى ىستەردى تاراتۋ قاجەت، ءوزارا كومەكتەسكەن دۇرىس سالتتى اسقاقتاتۋعا تاتيدى، ءار ۇلت باۋىرلاستار ىنتىماقتاسۋ بارىسىندا كۇش ۇيىستىرىپ، قول ۇستاسا ەكپىندەي ىلگەرىلەپ، شۇعىلالى ناتيجەنى بىرگە جاراتۋ كەرەك.

  1 - ايدىڭ 7 - كۇنى كەشتە كورلا قالاسى شارباق اۋىلى قازانشى قىستاعى ”4700 كيلومەتردى باسىپ وتكەن شىنايى سۇيىسپەنشىلىك حيكاياسى“ اتتى ۇگىت لەكسيا بايانداما ءماجىلىسىن وتكىزدى. حيكايانىڭ باس كەيىپكەرلەرى ءمانسۇر پاتتار مەن مامەت نۇردۇن وزدەرىنىڭ ”8 كۇن، 8 ءتۇن ءوز اقشالارىمەن وكىلەتتى كولىك جۇرگىزۋشى“ بولعان حيكايالارىن اڭگىمەلەدى. اتالعان اۋىل ولارعا ”جاڭا داۋىردەگى ۇلتتار ىنتىماعىنىڭ جاقسى ۇلگىسى“ سيلىعىن بەردى، قىستاق تۇرعىندارى ولارعا گۇل سيلادى جانە ولاردى شاپالاق سوعىپ القادى.

  ”ولار شينجياڭدىقتاردىڭ ماقتانىشى“. شارباق اۋىلى تومەنگى قوسباق قىستاعىنداعى جۇمىرتقالىق تاۋىق باعىمشىلىق الاڭىنىڭ قوجايىنى گو جينشيا باياندامانى تىڭداعاننان كەيىن: ”ولار مەنىڭ ۇيرەنۋ ۇلگىم، مۇنان كەيىن مەن باعىمشىلىق الاڭىنىڭ ساۋداسىن ءتىپتى دە جاقسى جۇرگىزىپ، ءار ۇلت قىستاق تۇرعىندارىمەن ىنتىماقتى بولىپ، ولارعا كومەكتەسىپ، كوپشىلىكتى كىرىستى بىرگە ارتتىرۋعا جەتەكتەيمىن“، - دەدى.

  مامەت نۇردۇننىڭ قازانشى قىستاعىنداعى اۋىلداسى اينيسا ياقۇپ قىستاقتارىنان وسىنداي جاقسى ۇلگى شىققاندىعىن ماقتانىش ەتتى. ول بىلاي دەدى: ”قازانشى قىستاعىنداعى ءار ۇلت تۇرعىندار بۇرىننان سەن، مەن دەمەي، ءوزارا كومەكتەسىپ، ءبىر ءۇيلى جانداي بەرەكەلى بولىپ كەلەدى. مۇنان كەيىن مەن دە مامەت نۇردۇن سياقتى جاقسى ىستەردى جان سالا ىستەپ، ۇلتتار ىنتىماعىنىڭ جاقسى ۇلگىسى بولۋعا تالپىنامىن“.

  ”ەكەۋى جايشىلىقتىڭ وزىندە مەيىرلى جاندار ەدى، كىمدە قيىنشىلىق بولسا سوعان ىرىقتىلىقپەن كومەكتەسەتىن. مەن ول ەكەۋىنەن ۇيرەنىپ، وسى ءبىر وڭ ەنەرگيانى جالعاستىرامىن“، - دەدى ۇنەمى ءمانسۇر پاتتارمەن جانە مامەت نۇردۇنمەن بىرگە تاسىمال جۇمىسىمەن اينالىساتىن جۇك اۆتوموبيل شوفەرى سۋ جيان.

  كورلا قالاسى شارباق اۋىلىنىڭ باستىعى ءدىلشات مۇقتار مىنالاردى ءبىلدىردى: جياڭسۋ پەيشيان اۋدانىنىڭ جۇك اۆتوموبيل شوفەرى جاۋ شۇيلەي مەن ”وكىلەتتى كولىك جۇرگىزۋشى اعاي“ ءمانسۇر پاتتار، مامەت نۇردۇن اراسىنداعى دوستىق ءار ۇلت باۋىرلاستارىنىڭ ءوزارا قارايلاسۋىنىڭ، قول ۇستاسا بىرگە ىلگەرىلەۋىنىڭ جاندى كارتيناسى، مەن ولاردى ۇلگى ەتىپ، سوتسياليستىك وزەكتى قۇن كوزقاراسىن امالياتتا ايگىلەپ، ءمورالدى قاستەرلەپ ىزگىلىككە تالپىناتىن، وزگەلەرگە كومەكتەسۋدى قۋانىش سانايتىن ادام بولامىن.

  كورلا قالالىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى حينىمگۇل ءامات بىلاي دەدى: ”ءمانسۇر پاتتار مەن مامەت نۇردۇن ىزگى ىستەرى ارقىلى ۇلتتار ىنتىماعىنىڭ تۇقىمىن سەپتى، سونداي - اق ءىس جۇزىندىك ارەكەتتەرى ارقىلى وركەنيەتتى ازاماتتاردىڭ تاماشا ساپاسىن ايگىلەدى، ولار ءبىزدىڭ ۇيرەنۋ ۇلگىمىز. ءبىز بۇكىل قالاداعى پارتيا مۇشەلەرىن، كادرلاردى، بۇقارانى ولاردان ۇيرەنۋگە جۇمىلدىرىپ، جۇڭحۋا ۇلتى ورتاق تۇلعا تانىمىن ونان ارى بەرىك ورناتامىز“.

  1 - ايدىڭ 7 - كۇنى ءۇرىمجى قالالىق 80 - ورتا مەكتەپ كوممۋنيستىك جاستار وداعى كوميتەتىنىڭ شۋجيى جاڭ لي وقۋشىلارعا ”4700 كيلومەتردى باسىپ وتكەن شىنايى سۇيىسپەنشىلىك حيكاياسى“ اتتى بەينەجازبانى قويىپ بەردى. ول بىلاي دەدى: ءمانسۇر پاتتار مەن مامەت نۇردۇننىڭ وزگەلەرگە كومەكتەسۋدى قۋانىش سانايتىن رۋحى وتە قاستەرلى، وقىتۋشى - وقۋشىلار تۇگەلدەي ولاردان ۇيرەنىپ، قاراپايىم ىزگى ىستەر ارقىلى مىعىم وڭ ەنەرگيا ۇيىستىرۋى كەرەك.

  ”سەرىكتەستىك بۇكىل قىزمەتكەرلەردى وسى ەكى ’وكىلەتتى كولىك جۇرگىزۋشى اعايدان‘ ۇيرەنۋگە ۇندەپ، ۇلتتار ىنتىماعىن سانالىلىقپەن قورعاپ، جۇڭحۋا ۇلتى ورتاق تۇلعا تانىمىن كوكەيىمىزدىڭ تەرەڭ تۇكپىرىنە ۇيالاتىپ، سول ارقىلى كورىكتى شينجياڭ قۇرۋ، وتان ارمانىن بىرگە ورىنداۋدىڭ تەلەگەي كۇشىن ۇيىستىرادى“، - دەدى قاشقار نان شارۋاشىلىعى ازىق - تۇلىك جارنا شەكتى سەرىكتەستىگىنىڭ باس القاسى يۇي جۇن.

مەيىر - ماحابباتپەن ”وكىلەتتى كولىك جۇرگىزۋ“ تەك باۋىرلاستىق سۇيىسپەنشىلىكتىڭ تەرەڭدىگىنەن بولدى

حوۋ حۇي

  شينجياڭدىق 2 جۇك اۆتوموبيل شوفەرىنىڭ 8 كۇن، 8 تۇندە 4700 كيلومەتر جول باسىپ، تانىسقاندارىنا 11 كۇن عانا بولعان، جارالانىپ قالعان جياڭسۋلىق جۇك اۆتوموبيل شوفەرىنىڭ كولىگىن ۇيىنە تەگىن جەتكىزىپ بەرگەن حيكاياسى نەشە كۇننەن بەرى ينتەرنەتتە قىزۋ كورىلىمگە يە بولدى. ولاردىڭ ءبىر - بىرىنە شىن ىقىلاس تانىتىپ، قيىندىقتى بىرگە كوتەرگەن اعا - ىنىلىك سۇيىسپەنشىلىكتەرى ادامداردى قاتتى اسەرلەندىردى، بەينە جياڭسۋ ولكەسى پەيشيان اۋداندىق پارتكوم مەن اۋداندىق ۇكىمەتىنىڭ العىس حاتىندا جازىلعانىنداي: وسى ءبىر قايىرىمدىلىق ارەكەتى، بۇكىل جۇڭگوعا جايىلىپ، ىزعارلى قىستا جىلۋ سيلاعانداي بولدى.

  ”ماعان مۇقتاج ساتتەرىڭدە، تابىلارمىن قاسىڭنان، جان باۋىرىم...“، اندە وسىلاي ايتىلۋشى ەدى، ءمانسۇر پاتتار مەن مامەت نۇردىن دا ءدال وسىلاي ىستەدى. ينتەرنەت قولدانۋشىلارى ”كەرەمەت!“ دەپ شۋلاعان وسى ءبىر مەيىر - ماحابباتپەن ”وكىلەتتى كولىك جۇرگىزۋ“ ءىسى ول ەكەۋى جونىنەن ”تىلگە الۋعا تاتىمايتىن بولماشى عانا ءىس“، ويتكەنى ”ءبىز ماڭگىلىك جاقسى باۋىرلاسپىز“ دەستى. بۇل ناعىز ”اعا - باۋىر ءبىر - بىرىڭە دايىم كوڭىل ءبولىپ ءجۇر، ويتكەنى ءبىر بايتەرەكتىڭ بۇتاعىنداي ءتۇبىڭ ءبىر“ دەگەندىك بولدى، ءتىپتى، تانىسقاندارىنا 11 كۇن عانا بولسا دا، سەن ءۇشىن دەپ كۇنى - ءتۇنى سۋىت ءجۇرىپ، 10 مىڭ شاقىرىمدىق ساپار شەكتى.

  ءمانسۇر مەن مامەتتىڭ جان دۇنيەسى ساپ التىنداي تاپ - تازا بولاتىن، جۇرتتى اسەرلەندىرۋى كەزدەيسوق ەمەس ەدى. وسى 1 − 2 كۇندە تاعى ءبىر بەينەجازبا ينتەرنەتتە قىزۋ تارالدى، گانسۋلىق ءبىر جۇك اۆتوموبيل شوفەرى بەينەجازبادا بىلاي دەدى: ”بۇكىل مەملەكەتتەگى ’جۇك اۆتوموبيل ايدايتىن شوفەر دوستاردىڭ‘ ەڭ جاقسى كورىپ باراتىن جەرى شينجياڭ، شينجياڭدا جۇرگەندە، اۆتوكولىگىڭنەن ماسەلە شىعا قالسا بولعانى، ءوتىپ بارا جاتقان شوفەرلەر سەنى تانىسىن - تانىماسىن، ىرىقتىلىقپەن توقتاي قالىپ كومەك قاجەت پە دەپ سۇرايدى. مىنە بۇلار شينجياڭدىق ’جۇك اۆتوموبيل ايدايتىن شوفەر دوستار‘“. شينجياڭداعى ءار ۇلت باۋىرلاستاردىڭ جۇرەگىندە جۇڭحۋا ۇلتى بەرەكەلى شاڭىراعىندا، مەيلى قاي جەردە جۇرسە دە، مەيلى تانىسىن - تانىماسىن، بارلىعى دا تەرەڭ تۋىسقاندىق سۇيىسپەنشىلىگى بار اعا - باۋىر، اپەكە - ءسىڭلى سانالادى، كىمدە قيىنشىلىق بولسا، سوعان كومەك قولدارىن سوزادى، ول دەگەنىڭىز بۇلجىماس جوسىن، بۇزىلماس سالت.

  ادال، تاتۋ - ءتاتتى بولۋ، ادامدارعا تۋىسىنداي مامىلە جاساۋ ەجەلدەن جۇڭحۋا ۇلتىنىڭ تاڭداۋلى ءداستۇرى ءارى شينجياڭداعى ءار ۇلت باۋىرلاستاردىڭ قانىندا بار رۋحاني گەن. جاڭا عانا ءوتىپ كەتكەن ءبىر جىلدا قاھارمان لاچين بايەكە سۋعا كەتكەن بالانى قۇتقارۋ جولىندا مۇز باسقان كولدە ماڭگىلىك ۇيقىعا كەتتى، مالشى ابدۇجاپپار مەڭدى قيىنشىلىقتا قالعان ساياحاتشىعا كومەك قولىن سوزۋمەن بىرگە، ماقتانىشپەن پارتيا زناگىن كورسەتتى، تەگىننەن مۇلدە تانىستىعى جوق كوپتەگەن ادامدار حوتانداعى ”بىلەگى ۇزىلگەن ۇل بالا“ ءۇشىن ءومىردىڭ ۇتىلامالى جولىن سالىپ بەردى... قىسىلتاياڭ ساتتە، شەشۋشى كەزەڭدە، وزەن بولسا بىرگە كەشەمىز، بوران - شاشىندى بىرگە كورەمىز، ويتكەنى ءبىز ءبىر - بىرىنە قول ۇشىن بەرەتىن، تامىرلاس، ءبىر وتباسىنىڭ ادامدارىمىز.

  جاڭا جۇڭگو قۇرىلعاننان بەرى وتان سىندى ۇلى وتباسىنىڭ مەيىر - شاپاعاتىنا بولەنىپ كەلگەن تيانشاننىڭ پەرزەنتتەرى العىسقا تولى جۇرەكتەرىن قيىندىقتى بىلەك بىرىكتىرە جەڭەتىن، قۋانىش - قايعىنى بىرگە كورەتىن تۋىسقاندىق تەرەڭ سۇيىسپەنشىلىككە تولتىردى. ءبىر جاعادان باس، ءبىر جەڭنەن قول شىعاردى؛ 10 مىڭ شاقىرىمدى الىسسىنباي، ”نانىن“ كومەككە اپاردى، مەيلى جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋدا بولسىن، الدە جەر سىلكىنۋ، تاسقىن اپاتى سياقتى تابيعي اپاتتاردا بولسىن، شينجياڭداعى ءار ۇلت باۋىرلاستار توڭىرەكتىڭ ءتورت بۇرىشىنداعى جۇڭحۋا پەرزەنتتەرىمەن تىزە قوسا قول ۇستاسىپ، تاۋقىمەتتى بىرگە كەشتى، جۇڭحۋا ۇلتى ورتاق تۇلعا تانىمى ءار ۇلت بۇقاراسىنىڭ جۇرەك تۇكپىرىندە تەرەڭ تامىر تارتتى، مىنە بۇل ءدال جۇڭحۋا ۇلتىنىڭ ىنتىماقتاسا ەكپىندەي ىلگەرىلەۋىنىڭ قۇندى وزەگى، اسىرەسە، بارلىق قيىنشىلىق اتاۋلى مەن سىن - سايىس اتاۋلىنى جەڭەتىن رۋحاني كۇش.

  (”لەپتى لەبىزگە“ ماقالا جولداۋ حات ساندىعى: xjrbplb@126.com)

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.