شينحۋا اگەنتتىگىنىڭ 1 - ايدىڭ 10 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 1 - ايدىڭ 10 - كۇنى تۇستەن كەيىن بەلورۋسسيانىڭ زۇڭتۇڭى لۋكاشەنكومەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جاڭا جىلدىڭ باسىندا سىزبەن تەلەفوندا سويلەسكەندىگىمە توتەنشە قۋانىشتىمىن. وتكەن ءبىر جىل جۇڭگو مەن بەلورۋسسيا ەكى ەل جونىنەن دە كەلەلى ماڭىزعا يە. مەن كوپ ءتۇرلى فورمالار ارقىلى سىزبەن تىعىز بايلانىستا بولىپ، جۇڭگو - بەلورۋسسيا قارىم - قاتىناسىنىڭ ۇزدىكسىز العا قاراي دامۋىن ىلگەرىلەتۋدى قالايمىن.
شي جينپيڭ بىلاي دەپ باسا دارىپتەدى: بيىل جۇڭگو مەن بەلورۋسسيا ديپلوماتيالىق قارىم - قاتىناس ورناتقاندىعىنىڭ 30 جىلدىعى. 30 جىلدان بەرى، جۇڭگو مەن بەلورۋسسيا قارىم - قاتىناسىنىڭ دامۋى مول جەتىستىكتەرگە قول جەتكىزدى. ەكى جاق ءوزارا سەنەتىن، سەلبەسىپ تەڭ يگىلىككە كەنەلەتىن جان - جاقتى ستراتەگيالىق سەرىكتەرگە اينالدى. ەكى جاقتىڭ ”ءبىر بەلدەۋ، ءبىر جولدى“ بىرگە قۇرۋ سەلبەستىگى ورنىقتى قاداممەن ىلگەرىلەپ، ەكى جاقتى ساۋدا سوماسى 30 جىلدا 50 ەسە ارتتى، جۇڭگو - بەلورۋسسيا ونەركاسىپ باقشاسى، جۇڭگو - ەۆروپا كەزەكشى پويەزى سياقتى ءبىر توپ ءىرى نىساندار تياناقتانىپ كوركەيىپ، عىلىم - تەحنيكا، وقۋ - اعارتۋ، مادەنيەت، ساياحات، ەمدەۋ سياقتى سالالارداعى اۋىس - كۇيىس اناعۇرلىم تەرەڭدەپ، مەملەكەت پەن مەملەكەتتىڭ دوستىق بارىس - كەلىسىنىڭ، ءوزارا تيىمدىلىك جەتكىزىپ سەلبەسۋىنىڭ ۇلگىسىن ورناتتى. جۇڭگو جاق بەلورۋسسيا جاقپەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن جاڭا باستاما ەتىپ، ەكى جاقتىڭ ساياسي ءوزارا سەنىمدىلىگىن ارتتىرىپ، ەكى ەلدىڭ ءوزارا تيىمدىلىك جەتكىزەتىن سەلبەستىگىن تەرەڭدەتىپ، جۇڭگو مەن بەلورۋسسيانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ جەتىستىكتەرگە قول جەتكىزۋىن ىلگەرىلەتۋدى قالايدى. ەكى جاق ەكى جاقتى ساۋدانىڭ كولەمىن ۇلعايتىپ، جاڭالىق اشا دامۋ، جاسىل دامۋ، سيفرلى دامۋ سياقتى سالالارداعى سەلبەستىكتى كۇشەيتىپ، جۇڭگو - ەۆروپا كەزەكشى پويەزىنىڭ ورنىقتى اينالىمىنا جانە باياندى دامۋىنا شىنايى كەپىلدىك ەتۋ كەرەك. ەكى جاق ۆاكسينا سەلبەستىگىن ۇزدىكسىز كۇشەيتۋ كەرەك.
شي جينپيڭ بىلاي دەپ باسا دارىپتەدى: قازىر حالىقارالىق جانە وڭىرلىك جاعداي كۇردەلى دە قۇبىلمالى، جۇڭگو مەن بەلورۋسسيا بىرلەسكەن مەملەكەتتەر ۇيىمى سياقتى كوپ جاقتى ورىنداردا ءونىمدى ىستەستىك جاساپ، ارىپتەس جاقتىڭ ءوز ەلىنىڭ وزەكتى مۇددەسىن قورعاۋىن باتىل قولداپ، جۇڭگو - بەلورۋسسيا سەلبەستىگىنىڭ ستراتەگيالىق قۇنىن ايگىلەدى. جاڭا جاعدايدا ەكى جاق ۇزدىكسىز تىعىز سايكەسىپ، شىن مانىندەگى كوپ جاقتىلىقتى امالياتتا ايگىلەپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى جانە حالىقارالىق زاڭدى نەگىز ەتكەن حالىقارالىق ءتارتىپتى قورعاۋ، حالىقارانىڭ ادىلدىگىن، تۋراشىلدىعىن قورعاۋ كەرەك. جۇڭگو جاق سىرتقى كۇشتەردىڭ بەلورۋسسيانىڭ ىشكى ىسىنە كيلىگۋىنە قارسى تۇرادى، بەلورۋسسيا جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن بۇرىنعىداي قولدايدى. ەكى جاق تۇتاس ادامزاتتىڭ ورتاق قۇندىلىعىن دارىپتەپ، حالىقارالىق قوعامدى دۇرىس دەموكراتيا كوزقاراسى مەن ادامدىق ۇقىق كوزقاراسىن ورناتۋعا جەتەكتەپ، الەمدىك دامۋ باستاماسى مەن بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن تياناقتاندىرۋدى ىلگەرىلەتۋ ءتيىس.
لۋكاشەنكو جۇڭگو كوممۋنيستىك پارتياسىنىڭ 100 جىلدىق مەرەيتويىن تاعى دا قۇتتىقتادى. لۋكاشەنكو مىنالاردى ءبىلدىردى: بەلورۋسسيا حالقىنىڭ جۇڭگو حالقىنا شىنايى دوستىق سۇيىسپەنشىلىگى بار، جۇڭگو جاقتىڭ باستان - اياق بەلورۋسسيا جاققا تاباندىلىقپەن ساياسي جانە ادامگەرشىلىك قولداۋ كورسەتىپ كەلگەندىگىنە العىس ايتادى. قازىرگى حالىقارالىق، وڭىرلىك جاعدايدا تەرەڭ دە كۇردەلى وزگەرىستەر بولىپ جاتقان كۇندە بەلورۋسسيا جاق جۇڭگو جاقپەن تىعىز بايلانىستى، سايكەسۋدى ساقتاۋدى ءۇمىت ەتەدى. بەلورۋسسيا جاق بيىلعى بەلورۋسسيا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن وراي ەتىپ، بەلورۋسسيا مەن جۇڭگونىڭ قارىم - قاتىناسىن تىڭ ورەگە كوتەرۋدى قالايدى، جۇڭگو جاقپەن بىرگە قۇلشىنىپ، بەلورۋسسيا - جۇڭگو ونەركاسىپ باقشاسىن ويداعىداي دامىتۋدى، ىندەتكە قارسى اتتانۋ، جۇڭي شيپاگەرلىگى، دارىگەرلىگى سەلبەستىگىن، سونداي - اق ساۋدا، قارجى قوسۋ، وقۋ - اعارتۋ سياقتى سالالارداعى سەلبەستىكتى تەرەڭدەتۋدى ءۇمىت ەتەدى. بەلورۋسسيا قاي - قاشان دا جۇڭگونىڭ مىزعىماس سەلبەستىك سەرىگى بولادى. جۇڭگو حالقىنىڭ كوكتەم مەرەكەسىنىڭ كوڭىلدى بولۋىن تىلەيمىز!
شينحۋا اگەنتتىگىنىڭ 1 - ايدىڭ 10 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 1 - ايدىڭ 10 - كۇنى تۇستەن كەيىن مالتانىڭ زۇڭتۇڭى ۆەللامەن تەلەفوندا سويلەستى. ەكى ەلدىڭ مەملەكەت باسشىلارى ءبىر - بىرىنە جاڭا جىلدىق سالەم جولدادى.
شي جينپيڭ بىلاي دەپ اتاپ كورسەتتى: جۇڭگو مەن مالتا ۋاقىتتىڭ سىنىنان وتكەن بايىرعى دوستار، جاقسى دوستار. جارتى عاسىردىڭ الدىندا ەكى ەلدىڭ اعا بۋىن باسشىلارى بيىكتە تۇرىپ، الىستى كوزدەپ، جۇڭگو مەن مالتانىڭ دوستىق قارىم - قاتىناسىن بىرگە تۇلعالادى. 50 جىلدان بەرى حالىقارالىق جاعداي مەيلى قالاي وزگەرسە دە، جۇڭگو مەن مالتانىڭ قارىم - قاتىناسى باستان - اياق اقاۋسىز، ورنىقتى دامىپ، ەكى ەلدىڭ دوستىعى ۇزدىكسىز تەرەڭدەپ، ءار سالاداعى سەلبەستىك تە قوماقتى جەتىستىكتەرگە قول جەتكىزدى. حالىقارالىق فينانس داعدارىسى جانە جاڭا تيپتى ايدارشا ۆيرۋس وكپە قابىنۋ ىندەتى سياقتى سىن - سايىستار الدىندا، ەكى جاق باستان - اياق ءوزارا قارايلاسىپ، ءبىرىن - ءبىرى قولدادى. جۇڭگو مەن مالتانىڭ قارىم - قاتىناسى ۇلكەن - كىشىلىگى تۇرلىشە، قوعامدىق ءتۇزىمى تۇرلىشە، تاريحي مادەنيەتى تۇرلىشە ەلدەر قارىم - قاتىناسىنىڭ ونەگەسىنە اينالدى.
شي جينپيڭ بىلاي دەپ باسا دارىپتەدى: جۇڭگو مەن مالتا ديپلوماتيالىق قارىم - قاتىناس ورناتقاندىعىنىڭ 50 جىلدىعىن قارسى الماقشى. جۇڭگو جاق مالتا جاقپەن بىرگە قۇلشىنىپ، جۇڭگو - مالتا قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى. ەكى جاق ءوزارا قۇرمەتتەۋگە، ءوزارا سەنىم ارتۋعا تاباندى بولىپ، ءارقايسىسىنىڭ ءوزى تاڭداعان دامۋ جولىنا ۇزدىكسىز قۇرمەت ەتىپ جانە ونى قولداپ، ءبىر - ءبىرىنىڭ ءجىتى قاداعالاپ وتىرعان ماسەلەلەرى جونىندە بايلانىستى، سايكەسۋدى ساقتاۋ كەرەك. ناقتى سەلبەستىكتى تەرەڭدەتىپ، ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتىپ، ەكونوميكا - ساۋداعا قارجى قوسۋ، ەمدەۋ، دەنساۋلىق ساقتاۋ، تازا ەنەرگيا، قاتىناس، زات اينالىمى سياقتى ءتۇيىندى سالالارداعى سەلبەستىكتى كەڭەيتۋ كەرەك. مادەنيەت اۋىس - كۇيىسى جانە جۇڭي شيپاگەرلىگى، دارىگەرلىگى سەلبەستىگىن نىعايتىپ، وقۋ - اعارتۋ، جاستار، ساياحات سياقتى سالالارداعى اۋىس - كۇيىستى، سەلبەستىكتى كەڭەيتىپ، جۇڭگو مەن مالتانىڭ دوستىعىنىڭ ءتىپتى دە كوپ جالىندى كۇشىن جەتىلدىرۋ كەرەك. مالتا ەجەلدەن جۇڭگو - ەۆروپا قارىم - قاتىناسىن ىلگەرىلەتۋدەگى بەلسەندى كۇش بولىپ كەلەدى. جۇڭگو جاق مالتا جاقپەن بىرگە جۇڭگو - ەۆروپا سەلبەستىگىنىڭ ۇلكەن بەتالىسىن قورعاپ، جۇڭگو - ەۆروپا قارىم - قاتىناسىنىڭ اقاۋسىز، ورنىقتى دامۋىن جەبەۋدى قالايدى.
شي جينپيڭ بىلاي دەپ باسا دارىپتەدى: كەلەسى ايدا جۇڭگو بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزەدى، قازىر دايىندىق قىزمەتتەرى نەگىزىنەن ورىندالىپ بولدى. جۇڭگو حالىقارالىق قوعامنىڭ قولداۋىندا، ءبىر رەتكى ۇنەمشىل، حاۋىپسىز، تارتىمدى قىسقى وليمپيادا سپورت جارىسىن وتكىزىپ، وليمپيادا رۋحىن اسقاقتاتىپ، ءار ەلدى قول ۇستاسا تىلەك بىرىكتىرىپ، بولاشاققا بىرگە اتتانۋعا جىگەرلەندىرەدى. جۇڭگو جاق مالتانى قامتىعان حالىقارالىق قوعاممەن بىرگە قۇلشىنىپ، شىن مانىندەگى كوپ جاقتىلىقتى امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى قول ۇستاسا ىلگەرىلەتۋدى قالايدى.
ۆەللا مىنالاردى ءبىلدىردى: مالتا مەن جۇڭگو ەكى ەل ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتاۋ ساتىندە، ءتوراعا مىرزامەن تەلەفوندا سويلەسكەندىگىمە وتە قۋانىشتامىن. مەن ءسىزدىڭ مالتا مەن جۇڭگونىڭ قارىم - قاتىناسىنا بەرگەن بەلسەندى باعاڭىزدى، سونداي - اق ەكى جاقتىڭ قارىم - قاتىناسىن دامىتۋ جونىندەگى پىكىرىڭىزدى بۇكىلدەي قۇپتايمىن. مالتا مەن جۇڭگو ديپلوماتيالىق قارىم - قاتىناس ورناتقاننان بەرى، ەكى ەلدىڭ سەلبەستىگى اسا ناتيجەلى بولدى، ەكى جاقتىڭ دوستىعى جاڭا تيپتى ايدارشا ۆيرۋس وكپە قابىنۋ ىندەتى سياقتى ءتۇرلى سىن - سايىستاردىڭ سىنىنان ءوتتى، ەكى جاقتى قارىم - قاتىناس كۇن سايىن كەمەلدەنىپ، ەرەكشە تابىستارعا قول جەتكىزدى، مۇنى مەملەكەتتەر ارا قارىم - قاتىناستىڭ ۇلگىسى دەۋگە بولادى. مالتا جاق مالتا مەن جۇڭگونىڭ دوستىق قارىم - قاتىناسىن ىشكەرىلەي دامىتۋعا بۇلجىماي كۇش سالادى، جۇڭگو جاقپەن جوعارى جىكتەگىلەردىڭ بارىس - كەلىسىن كۇشەيتۋدى، ءار سالاداعى ناقتى سەلبەستىكتەردى تەرەڭدەتۋدى قالايدى. مالتا جاق ”ءبىر بەلدەۋ، ءبىر جولدى“ بىرگە قۇرۋ الا كەلگەن قىمباتتى ورايلاردى قاستەرلەيدى، جۇڭگو جاقپەن قاتىستى سەلبەستىكتەردى ۇزدىكسىز ىلگەرىلەتۋدى قالايدى. مالتا مەن جۇڭگونىڭ قارىم - قاتىناسىنىڭ بولاشاقتاعى 50 جىلدا ءتىپتى دە جاقسى دامىپ، ەكى ەل حالىقتارىنا ءتىپتى دە كوپ قۇت - ىرىس اكەلۋىن ءۇمىت ەتەمىن. مالتا جاق ءبىر جۇڭگو ساياساتىن باتىل اتقارادى، كوپ جاقتىلىقتى مىزعىماي قولدايدى. مالتا جاق ەۆروپا - جۇڭگو قارىم - قاتىناسىنىڭ دامۋىن ىلگەرىلەتۋدە بەلسەندى رول اتقارۋدى قالايدى. مالتا جاق جۇڭگو جاقتىڭ حالىقارالىق قوعامنىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋىنا ۆاكسينامەن كومەك كورسەتكەندىگىن، الەمنىڭ كليمات وزگەرىسىنە توتەپ بەرۋىنە بەلسەندى ۇلەس قوسقاندىعىن ايرىقشا القايدى، جۇڭگو جاقپەن سەلبەستىكتى كۇشەيتۋدى كۇتەدى. بەيجيڭ قىسقى وليمپيادا سپورت جارىسىنىڭ ءساتتى، تابىستى بولۋىن تىلەيمىن!
