انار بۇلت / شينجياڭ گازەتىنىڭ ءتىلشىسى ساۋ حۋا 1 - ايدىڭ 13 - كۇنى ۇرىمجىدەن حابارلايدى. تاياۋدا سۋ يگىلىگى مينيسترلىگى 2021 - جىلعى مەملەكەتتىك سۋ مەن توپىراقتى ساقتاۋدان ۇلگى كورسەتۋ تىزىمدىگىن جاريالادى، بۇعان شينجياڭنان ءبىر اۋدان، ءبىر باقشا، ءبىر نىسان تاڭدالدى. بۇل شينجياڭنىڭ سۋ مەن توپىراقتى ساقتاۋدان ۇلگى كورسەتەتىن مەملەكەت دارەجەلى اۋداندى، عىلىم - تەحنيكالىق ۇلگى كورسەتۋ باقشاسىن جانە ۇلگى كورسەتۋ ينجەنەرياسىن تۇڭعىش رەت ءساتتى قۇرۋى بولىپ تابىلادى.
ۇلگى كورسەتۋ تىزىمدىگىنە جەكە - جەكە ونسۋ اۋدانى، ءۇرىمجى قالاسى باتىس تەرەكتى سايى سۋ مەن توپىراقتى ساقتاۋ عىلىم - تەحنيكاسىنان ۇلگى كورسەتۋ باقشاسى، ىلە شينتيان كومىر حيميا ونەركاسىپ شەكتى جاۋاپكەرشىلىك سەرىكتەستىگىنىڭ جىلىنا 2 ميلليارد تەكشەمەتر كومىردەن تابيعي گاز ءوندىرۋ نىسانى ەنگىزىلدى.
ۇعىسۋعا قاراعاندا، ونسۋ اۋدانى سۋ مەن توپىراقتى ساقتاۋ ەكولوگيالىق قۇرىلىسىن كەدەيلىكتەن ارىلتۋدان قامال الۋمەن، قالا - قالاشىق قۇرىلىسىمەن، ەكولوگيالىق ساياحاتپەن، ەرەكشە كاسىپ سالالارىنىڭ دامۋىمەن تىعىز ۇشتاستىرىپ، ”سۋ مەن توپىراقتىڭ زايا بولۋىن جونگە سالۋ ارقىلى ەكولوگيانى جاقسارتۋ، ەكولوگيانى جاقسارتۋ ارقىلى ەكونوميكالىق، قوعامدىق دامۋدى جەبەۋ، ەكونوميكالىق، قوعامدىق دامۋ ارقىلى قونىستانۋعا، شارۋاشىلىققا، ساياحاتقا، باعىمشىلىققا قولايلى بولۋدى جەبەۋ“ سىندى تاماشا دامۋ جولىن اشتى. سوڭعى 3 جىلدان بەرى اۋدان بويىنشا سۋ مەن توپىراقتىڭ زايا بولۋى بويىنشا جونگە سالىنعان اۋماق 116.33 شارشى كيلومەتر بولىپ، جاڭعاق، شىلان، الما سياقتى اۋىل - قىستاق ەرەكشە اۋىل شارۋاشىلىق ونىمدەرى مەن ەكولوگيالىق ساياحاتتىڭ دامۋىن ىلگەرىلەتىپ، جونگە سالۋ اۋماعىنداعى بۇقارانىڭ 2015 - جىلدان 2020 - جىلعا دەيىنگى جىلدىق ورتاشا كىرىسىن ％8 اسىردى.
ءۇرىمجى قالاسى باتىس تەرەكتى سايى سۋ مەن توپىراقتى ساقتاۋ عىلىم - تەحنيكالىق ۇلگى كورسەتۋ باقشاسى ينجەنەريالىق شارالاردى وسىمدىك ەگۋ شارالارىمەن ۇشتاستىرىپ، ءبىر قىدىرۋ ۋاكىلدىك سيپاتقا، قولدانىلمالىلىققا يە سۋ مەن توپىراق ساقتاۋ شارالارىن ورىنداپ، سۋ قاينارىن مولايتىپ، جاڭبىرلى ماۋسىمدا جىرا - جىلعالاردىڭ وپىرىلۋ قۇبىلىسىن ازايتىپ، باقشا ءوڭىرىنىڭ حاۋىپسىز اينالىمىنا كەپىلدىك ەتتى. قازىر باقشا رايونىندا اۋا رايى باقشاسى، جەلدىڭ جەمىرۋىن باقىلاۋ - ولشەۋ كورمەسى شاعىن اۋماعى، تاجىريبە زالى، كورمە زالى، ەكولوگيالىق عىلىم - تەحنيكا جالپىلاستىرۋ ۇگىت ءدالىزى سياقتىلار قۇرىلىپ، 20 نەشە باقىلاۋ - تەكسەرۋ قۇرىلعى - جابدىقتارى ەنگىزىلىپ، عىلمي زەرتتەۋ تاجىريبەسى، ۇلگى كورسەتۋ وقىتۋى، ۇگىت تاربيە، سۋ مەن توپىراقتى ساقتاۋ جاڭا تەحنيكاسىن ايگىلەۋ سياقتى يقۋاتتار نەگىزىنەن ازىرلەنىپ، رايونىمىزدىڭ سۋ مەن توپىراقتى ساقتاۋ ەكولوگيالىق ورتا قۇرىلىسىنا امالياتتىق تۇعىر ازىرلەدى.
ىلە شينتيان كومىر حيميا ونەركاسىبى شەكتى جاۋاپكەرشىلىك سەرىكتەستىگىنىڭ جىلىنا 2 ميلليارد تەكشەمەتر كومىردەن جاسالعان تابيعي گاز نىسانى قاتىستى كاسىپ سالالارىنىڭ دامۋىن جەتەكتەۋمەن جانە جەبەۋمەن بىرگە، قۇلاما بەتكەيلەردىڭ ەكولوگياسىن قورعاۋ، سۋ ۇنەمدەپ سۋارۋ سياقتى وزىق تەحنيكالاردى ەنگىزىپ جانە جالپىلاستىرىپ قولدانىپ، تەحنيكالىق جاڭالىق اشۋ جانە جالپىلاستىرۋ ارقىلى سۋ مەن توپىراقتى ساقتاۋ ينجەنەرياسىنىڭ دەڭگەيى مەن ساپاسىن جوعارىلاتىپ، جەتەكشىلىك ەتۋ، ۇلگى كورسەتۋ يقۋاتى مەن ونىمدىلىگىن جوعارىلاتتى.
