− 2021 - جىلعى مەملەكەتتىك ”سەنىمدىلىك جۇلدىزى“ شينجياڭ ۋاڭيۋان بيولوگيالىق عىلىم - تەحنيكا توبى جونىندە ەستەلىك
□ انار بۇلت / شينجياڭ گازەتىنىڭ ءتىلشىسى جاڭ تيڭ
”باسقالار ساعان سەنىم ارتىپ، ىستەردى بىتىرۋىڭە تاپسىرسا، يىعىڭداعى جاۋاپكەرشىلىگىڭ ارتا تۇسەدى ەكەن“، - دەيدى شينجياڭ ۋاڭيۋان بيولوگيالىق عىلىم - تەحنيكا توبىنىڭ القا باستىعى چىن گاڭلياڭ.
تۇيە ءسۇتى كاسىپ سالاسىندا 15 جىل بويى تالاي ىستىق - سۋىقتى باستان كەشىرگەن چىن گاڭلياڭ شينجياڭ ۋاڭيۋان بيولوگيالىق عىلىم - تەحنيكا توبىن (تومەندە ”ۋاڭيۋان توبى“ دەلىنەدى) باستاپ، سەنىمدىلىكتى نەگىز ەتىپ، كاسىپورىن ەرەكشەلىگىنە يە دامۋ جولىندا ىزدەنىس جاسادى.
ءسۇت قاينارىنىڭ ساپا وتكەلىن قاتاڭ يگەردى
1 - ايدىڭ 10 - كۇنى ساعات 7 مولشەرى، تاڭ ءالى اتا قويماعان شاق، بۋرىلتوعاي اۋدانى جەتارال قالاشىعى جەتارال قىستاعىنىڭ مالشىسى ايكەش كاكەن تۇيە باعىمشىلىعى شاعىن اۋماعىنا قاراي بەتتەدى. ساۋىنشىلىقتى قوسىمشا ىستەيتىن ايكەش ءسۇت تاسۋشى كەلۋدەن بۇرىن ساۋىن ءسۇتتى دايىنداپ قويۋى كەرەك.
”تۇيە ساۋۋ ءۇشىن، ءسوز جوق، مەديتسينالىق سپيريت جانە 80 سەلتسي گرادۋستىق ىستىق سۋ دايىنداۋ قاجەت، ساۋۋ ماشيناسىن بىرنەشە رەت شايىپ، زارارسىزداندىرىپ، تاپ - تازا بولۋىنا شىنايى كەپىلدىك ەتۋ كەرەك“، - دەيدى ايكەش.
ءتىلشى ساۋۋ سەحىنان تۇيە ساۋۋداعى ”ولشەمدى زاتتاردى“ كوردى: ءبىر پار ساۋىنشى كيىمى، زارارسىزداندىرىلعان ءبىر ساۋۋ ماشيناسى، ءاربىر تۇيەگە ىستەتىلەتىن ارناۋلى ورامال دايىندالعان ەكەن. ساۋىن ءسۇت بۇكىلدەي جابىق تۇتىك ارقىلى كۇبىگە قۇيىلىپ، 3 − 4 سەلتسي گرادۋستىق شارت - جاعدايدا ساقتالادى.
وسى ساتتە ءسۇت تاسۋشى بىلىمبەك ايدىن سىرتتا كۇتىپ تۇردى، ونىڭ قىزمەتى بۇكىل قىستاقتاعى 33 مالشى وتباسىنىڭ تۇيە ءسۇتىن جيناپ الۋعا جاۋاپتى بولۋ. ساعات 8دەن 30 مينۋت اينالاسىندا، بىلىمبەك ءسۇت جيناۋ جۇمىسىن اياقتاتىپ، ءسۇت جەتكىزۋ اۆتوكولىگىن ايداپ، ۋاڭيۋان توبىنا قاراي بەت الدى.
ۋاڭيۋان توبىنىڭ 28 مىڭ شارشى مەترلىك باكتەرياسىز تازارتۋ سەحىندا 300دەن استام ءسۇت تالقان جاساۋ ماشيناسى زىرىلداپ اينالىپ تۇر. 2015 - جىلى ۋاڭيۋان توبى شەتەلدەن تۇيە ءسۇتى سالاسىنداعى العاشقى بيولوگيالىق ءدارى جاساۋ دارەجەسىندەگى تازارتۋ سەحى وزەكتى جابدىعىن ەنگىزىپ، ءونىمنىڭ باكتەرياسىز جاعدايدا وندىرىلۋىنە شىنايى كەپىلدىك ەتتى.
ءتىلشىنىڭ ۇعىسۋىنشا، تۇيە ءسۇتى ءوندىرىس سەحىنا كىرگىزىلۋدەن بۇرىن، بەلوك، سارىسۋ، سونداي - اق قورەكتىك قۇرامى، اۋىر مەتال ەلەمەنتتەرى، اۋرۋ تۋدىرعىش باكتەريا سياقتىلاردى تەكسەرۋدەن وتكىزۋى كەرەك، ول 128 ءتۇرلى تەكسەرۋ تارتىبىنە سايادى.
”ءبىز ءسۇت قاينارى وتكەلىن قاتاڭ يگەرىپ، ءاربىر تامشى ءسۇتتىڭ ساپاسىنا كەپىلدىك ەتتىك“. چىن گاڭلياڭ بىلاي دەدى: اسىرەسە، تەحنيكالىق جاسامپازدىق جاعىندا، ۋاڭيۋان توبى دەربەس وزەكتى تەحنيكا جانە پاتەنتتىك زەرتتەۋ - اشۋ ستراتەگياسىن اتقارۋ ارقىلى ۇزدىكسىز ورەلى، ىسىلعان، ۇزدىك جەلىلەس ونىمدەر تۇلعالادى.
2021 - جىلى 9 - ايدا ۋاڭيۋان توبىنىڭ تۇيە ءسۇتى جانە ونىڭ جەلىلەس ونىمدەرى جۇڭگو ساپا تەكسەرۋ قوعامى تاراتقان ”مەملەكەتتىك ساپا سەنىمدىلىگى قامتاماسىزداندىرىلعان ءونىم“، ”مەملەكەتتىك ساپا تەكسەرۋدەگى ورنىقتى، تولىمدى ءونىم“ سياقتى كۋالاندىرۋلارعا يە بولدى.
قوعامدىق جاۋاپكەرشىلىكتى ىرىقتىلىقپەن ارقالادى
2021 - جىلى 7 - ايدىڭ 13 - كۇنى 6 - كەزەكتى تۇيە باعاتىن مالشىلار ۋاكىلدەر جينالىسى جانە 10 ميلليون يۋاندىق سيلىق تاراتۋ سالتى بۋرىلتوعايدا وتكىزىلدى. ۋاڭيۋان توبى 190 تاڭداۋلى تۇيە باعاتىن مالشى ۋاكىلىنە 10 ميلليون يۋان سيلىق تاراتىپ، وسى ارقىلى سەنىمدىلىكپەن سەلبەسكەن تۇيە باعىمشى وتباسىلارىن جانە بايۋ شەبەرلەرىن شابىتتاندىردى.
بۋرىلتوعاي اۋدانى قاراماعاي قالاشىعى ويقورا قىستاعىنداعى مالشى مىرزابەك تابەيدىڭ قۋانىشى قويىنىنا سيمادى، ول وسى كەزەكتى جينالىستا ”سۇتپەن قامداۋداعى ءىرى وتباسى سيلىعىنا“ يە بولىپ، 110 مىڭ يۋان سيلىق الدى.
سوڭعى جىلداردان بەرى ۋاڭيۋان توبى ءار جىلى 10 ميلليون يۋان سيلىق اقشا شىعارىپ، سەنىمدىلىك دارەجەسى مەن ولشەمدىلىكتى كوزدە ۇستاي وتىرىپ، ءار جىلى جىل سوڭىندا زاكازدى ورىنداعان مالشىلاردى سيلاپ كەلەدى. سونىمەن بىرگە، ءار جىلى تاڭداۋلى تۇيە باعىمشىلارى ۋاكىلدەرىن بەيجيڭ، شي - ان، جۋحاي سياقتى جەرلەرگە بارىپ كوزدەن كەشىرۋگە، ۇيرەنۋگە تاڭداپ جىبەرەدى، سونداي - اق مالشىلاردىڭ پەرزەنتتەرىن كاسىپورىنعا قىزمەتكە الدىمەن تاڭداپ الادى.
”ۋاڭيۋان توبىنىڭ دامۋى بارىسىندا، مالشىلار باستان - اياق ماڭىزدى رول اتقارىپ كەلەدى، كاسىپورىن مەن مالشىلار اراسىنداعى سەنىمدىلىكپەن سەلبەسۋ ايرىقشا ماڭىزدى“، - دەدى چىن گاڭلياڭ.
بۋرىلتوعاي اۋدانىندا تۇيە ءسۇتى كاسىپ سالاسى دامۋىنىڭ باستاپقى مەزگىلىندە، كوپتەگەن مالشىلار تۇيە باعۋدان بايۋدىڭ ءۇمىت ۇشقىنىن كورگەندەرىمەن، قولدارىندا اقشا بولماعاندىقتان تۇيە ساتىپ الۋعا شاراسىز قالاتىن. چىن گاڭلياڭ مالشىلاردىڭ تۇيە ساتىپ الۋىنا نەسيە اقشا بەرۋ شەشىمىن جاسادى.
قاراماعاي قالاشىعىنداعى مالشى مانات نۇردانبەكتىڭ ۇيىندە قازىر 200 تۇيە بار، ايلىق تازا كىرىسى 40 مىڭ يۋان، مۇنى ول بۇرىن ويلاپ تا كورمەگەن ەدى. 2010 - جىلى مانات ۋاڭيۋان توبىنىڭ وزىنە نەسيەگە بەرگەن 200 مىڭ يۋان جۇمىس باستاۋ قارجىسىمەن ساۋىن تۇيە باعىمشىلىعىن باستادى. سول جىلى باسقا 20 مالشى ول سياقتى نەسيە اقشامەن تۇيە باقتى. كوپشىلىك ۋاڭيۋان توبىمەن تۇيە ءسۇتىن ساتقان اقشانىڭ ％40ىمەن نەسيە قايتارۋ، قالعانىن باعىمشى وتباسىنىڭ كىرىسى ەتۋ كەلىسىمىن جاسادى.
10 نەشە جىلدان بەرى ۋاڭيۋان توبى ”شىعىنسىز ۇسىنىلىم، حاۋىپ - قاتەرسىز شارۋاشىلىق، ءدال قاسىندا جۇمىستاندىرۋ“ كومەكتەسۋ - سۇيەمەلدەۋ ۇلگىسىن ورىستەتۋ ارقىلى ىلگەرىندى - كەيىندى 600دەن استام مالشىعا جالپى سوماسى 120 ميلليون يۋاننان استام ءوسىمسىز نەسيە بەردى.
سەنىمدىلىك ارقىلى ماركا اتاعىن اسپانداتتى
چىن گاڭلياڭ بىلاي دەدى: ”سەنىمدىلىكتى دارىپتەپ، ساپاعا ءمان بەرگەندە عانا كاسىپورىن ءتىپتى دە جاقسى داميدى، ءونىم ءتىپتى دە الىسقا ساتىلادى، كاسىپورىننىڭ ماركاسىنىڭ اتاعى ءتىپتى دە اسپاندايدى“.
ۋاڭيۋان توبى شينجياڭ تۇيەسى سىندى ەرەكشە باسىمدىققا يە بايلىقتى مىعىم تايانىش، وزىق تەحنيكانى تىرەك ەتىپ، تۇيە ءسۇتىن الىس ارالىققا تاسۋعا ۇيلەسەتىن تۇيە ءسۇتى ونىمدەرى ەتىپ وڭدەپ، الەمدىك بازارعا ساتتى.
2020 - جىلى 3 - ايدا ۋاڭيۋان توبىنىڭ بۋرىلتوعاي اۋدانىمەن بىرلەسىپ شامامەن 2 ميلليارد يۋان قارجىمەن سالعان ساياحات، كۇتىنۋ، مادەنيەت، سەيىلدەۋ، كوڭىل اشۋ، شارۋاشىلىق جۇرگىزۋ، تۇتىنۋ، قارجى قوسۋ، شارۋاشىلىق قۇرۋدى ءبىر تۇلعالاندىرعان جۇڭگو تۇيە قالاشىعى نىسانى قۇرىلىس باستادى. قالاشىق سالىنعاننان كەيىن 3000 نەشە مالشىنىڭ جۇمىستانۋ ماسەلەسىن شەشىپ، 1000 نەشە مالشى وتباسىنىڭ ورنىقتى كىرىس ارتتىرۋىن تىكەلەي جەبەيدى.
چىن گاڭلياڭ بىلاي دەدى: ۋاڭيۋان توبى جۇڭگو تۇيە قالاشىعى، جوڭعار قوس وركەشتى تۇيە باعىمشىلىق بازاسى، وسى زامانعى تۇيە كاسىپ سالاسى باقشاسى قۇرىلىستارىن بار كۇشپەن ىلگەرىلەتىپ، تۇيە باعىمشىلىعىن، تۇيە ونىمدەرىن وڭدەۋدى، مادەنيەت - ساياحات سەزىنۋدى، ەكولوگيالىق سەيىل - سەرۋەندى ءبىر تۇلعالاندىرعان تۇيە كاسىپ سالاسى كەشەنى مەن بۇكىل ەلدەگى تۇيە كاسىپ سالاسىنىڭ تيبىن وزگەرتىپ، دارەجەسىن جوعارىلاتۋدىڭ جاڭا بيىگىن تۇلعالايدى.
”ءبىز ساپا جانە سەنىمدىلىكتەن جازباي، كاسىپورىننىڭ جوعارى ساپالى دامۋىن ىلگەرىلەتىپ، اناعۇرلىم زور ىقپالعا يە تۇيە ءسۇتى ماركاسىن جەتىلدىرەمىز“، - دەدى چىن گاڭلياڭ.
