تيانشان تورى
تيانشان تورى   ›   جاڭالىقتار   ›   شينجياڭ حابارلارى

قارا ورىكتىڭ ءدامى ”ءتىل ۇيىرەدى“

□ انار بۇلت / شينجياڭ گازەتىنىڭ ءتىلشىسى ءرايدا

  قاقاعان قىس مەزگىلى، سىرتتا اياز بەت قاراتپاي تۇرعانىمەن، شاعانتوعاي اۋدانى حۇيحى اۋىل شارۋاشىلىعىن دامىتۋ شەكتى سەرىكتەستىگىنىڭ قارا ورىك سۋسىنىن ءوندىرۋ سەحىندا جۇمىس قىزۋ ءجۇرىلىپ جاتىر.

  جوعارى تەمپەراتۋرادا زارارسىزداندىرۋ، ءبولىپ قوراپتاۋ ماتەريالدارىن دايىنداۋ، سۋسىندى قۇمىرالارعا قۇيۋ، ماركا جاپسىرۋ... 1 - ايدىڭ 15 - كۇنى ءتىلشى سەرىكتەستىكتىڭ سەحىنا بارعاندا، 20 نەشە جۇمىسشىنىڭ ءوندىرىس جەلىسىندە قاربالاس ىستەپ جاتقانىن كوردى. سەحتىڭ ىشىندە قارا ورىكتىڭ قىشقىلتىم ءيىسى مۇرىن جارىپ، ادامنىڭ سىلەكەيىن ەرىكسىز شۇبىرتادى.

  ”كوپشىلىكتىڭ بارلىعى كوكتەم مەرەكەسىندەگى تاپسىرىسپەن قاربالاس، مەن ولارعا ايتۋعا دا ۇلگەرمەستەن تاعى ءبىر ۇلكەن تاپسىرىسقا قول قويدىم“، - دەدى شاعانتوعاي اۋدانى حۇيحى اۋىل شارۋاشىلىعىن دامىتۋ شەكتى سەرىكتەستىگىنىڭ باس ديرەكتورى ۋاڭ لينگۇڭ ەسىك الدىنداعى تاسىمال اۆتوموبيلىنە قارا ورىك سۋسىنىن تيەپ جاتىپ.

  ۋاڭ لينگۇڭ ايتىپ وتىرعان ۇلكەن تاپسىرىسقا تاياۋدا وتكەن تارباعاتاي ايماعىنىڭ تۇڭعىش كەزەكتى جەرگىلىكتى ونىمدەرى جارمەنكەسىندە قول قويىلعان. ”12 ميلليون يۋاندىق تاپسىرىس، بۇل 2021 - جىلعى ساتىلۋ مولشەرىنىڭ 4 ەسەسىندەي“، - دەدى ۋاڭ لينگۇڭ قاباعات قۋانىپ.

  ۋاڭ لينگۇڭ ءبىر قۇمىرا قارا ورىك سۋسىنىنىڭ اۋزىن اشىپ تىلشىگە ءدامىن تاتىپ كورۋگە ۇسىندى. قۇمىراعا جاڭا قۇيىلعان قارا ورىك سۋسىنى ءالى سۋىپ ۇلگىرمەپتى، ىشسەڭ جىپ - جىلى، قىشقىلتىم ءدامى سارايىڭدى اشادى. ”كەي ادامدار قارا ورىك سۋسىنىن قىشقىل دەيدى، ءبىراق بىزگە ەرەكشە ءتاتتى سەزىلەدى“، - دەدى ۋاڭ لينگۇڭ ءماز - ءمايرام بولىپ.

  ۋاڭ لينگۇڭ بىلاي دەدى: بۇرىن تارباعاتاي ايماعىنىڭ ءبىرتالاي اۋدان، قالاسى قارا ورىك ەگەتىن، شارۋالار دەرلىك وتباسىندا سۋسىن ەتىپ قايناتاتىندىقتان، كەيىن كەلە قارا ورىك سۋسىنى جەرگىلىكتى ونىمگە اينالىپ كەتتى. ”دەسەدە سۋسىن قايناتۋ تەحنولوگياسى مەشەۋ، قوراپتالۋى قاراپايىم بولعاندىقتان، سىرت جەرلەردەن كەلگەن دوستاردىڭ ءدامىن تاتىپ كورگەن سوڭ الىپ قايتۋى قيىنعا سوعاتىن“.

  2019 - جىلى ۋاڭ لينگۇڭ بازاردا تەكسەرۋ - زەرتتەۋ جۇرگىزگەننەن كەيىن، ارناۋلى قارا ورىك سۋسىنىن مانەرلەيتىن زاۆود اشىپ، بايلىق قاينارىن بىرىكتىرىپ، اۋىلىنىڭ جەرگىلىكتى ءونىمىن اناعۇرلىم قۇندى ەتۋ بەكىمىنە كەلدى.

  ”2020 - جىلى سەرىكتەستىك ءوندىرىستى باستادى، سول جىلى ساتىلۋ مولشەرى 700 مىڭ يۋان بولدى. بىرتىندەپ ءبىزدىڭ ونىمدەرىمىز بازاردا قارسى الۋعا يە بولدى، 2021 - جىلى ساتىلۋ مولشەرى 3 ميلليون يۋانعا جەتتى“، - دەدى ۋاڭ لينگۇڭ.

  ءار جىلى شاعانتوعاي اۋدانى حۇيحى اۋىل شارۋاشىلىعىن دامىتۋ شەكتى سەرىكتەستىگى شاعانتوعاي اۋدانى، شاۋەشەك قالاسى سياقتى جەرلەردەن قارا ورىك ساتىپ الادى، قازىر 300دەن استام شارۋا وتباسىمەن ساتىپ الۋ توقتامىنا قول قويىستى. شيكىزاتپەن جەتكىلىكتى قامداۋعا كەپىلدىك ەتۋ ءۇشىن، جەرگىلىكتى شارۋا وتباسىلارىن كىرىستى ارتتىرۋعا باستاپ، سەرىكتەستىك تاعى شارۋا وتباسىلارىن قالامشامەن تەگىن قامداپ، شارۋا وتباسىلارىن ءوز اۋلاسىندا قارا ورىك ەگۋگە جەتەكتەدى.

  بىلتىر سەرىكتەستىك شاعانتوعاي اۋدانىنىڭ جاڭا جەر اۋىلى مۇقىر قىستاعىنداعى 280نەن استام شارۋا وتباسىنا 3300 ءتۇپ قارا ورىك قالامشاسىن تاراتىپ بەردى. ”بىلتىر قالامشا ەكتىك، بيىل جەمىس بەردى، تولىق جەمىستەنۋ مەزگىلىندە ءار ءتۇبىنىڭ ءونىم مولشەرى 20 - 50 كيلوگرامعا جەتىپ، مەجەمەن ءار ءتۇپ اعاشتان 50 - 125 يۋان پايدا تاۋىپ، ءار وتباسىنىڭ پايداسى 600 - 1500 يۋان بولدى“، - دەدى ۋاڭ لينگۇڭ.

  تەك 300 شارشى مەتردەن استام ءوندىرىس سەحى جانە 20 نەشە جۇمىسشىسى بارىنا قاراماستان، 12 ميلليون يۋاندىق تاپسىرىستى قابىلدادى. ۋاڭ لينگۇڭ بۇدان ەش الاڭداپ وتىرعان جوق. ”قازىر زاۆودتى كەڭەيتۋدى ويلاستىرعان جوقپىن، بۇل شارۋاعا اسىعۋعا كەلمەيدى، تىڭعىلىقتى ىستەگەندە عانا، كاسىپورىندى اناعۇرلىم ويداعىداي دامىتۋعا بولادى. كەزەكتە ءبىز شيكىزاتتى جەتكىلىكتى دايىنداپ الدىق، كەيىنىرەك ءۇش كەزەك الماسىپ ىستەپ كورەمىز، قىزمەتكەرلەردى كوبەيتەمىز، ءوندىرىس جەلىسى توقتامايدى، تاپسىرىستى ورىنداۋدا ماسەلە جوق“، - دەدى ۋاڭ لينگۇڭ.

  تىلشىلىك بارىسىندا جۇمىسشىلار ۇلكەن تاپسىرىسقا قول قويىلعاندىعىن ءبىلدى. ”بۇل كەرەمەت جاقسى بولعان ەكەن! بۇرىن بارلىق وتباسى قارا ورىك ەگىپ، وزدەرى جەگەنىنەن قالعانىنىڭ كوپ ءبولىمى ىسىراپ بولۋشى ەدى، ەندى زاۆود قۇرىلىپ، قارا ورىكتەن توساپ، سۋسىن جاسالىپ، قۇنى جوعارىلادى، ءبىزدىڭ دە ءبىر تۇراقتى كىرىسىمىز بولدى. جاڭا جىلدا تاعى دا ۇلكەن تاپسىرىس الىپ، ەڭبەكاقىمىز دا كوبەيەتىن بولدى“، - دەدى وسى سەرىكتەستىكتىڭ جۇمىسشىسى چين شيۋفاڭ تەبىرەنىپ.

  ۋاڭ لينگۇڭ تىلشىگە جاڭادان جوبالانعان قوراپتى كورسەتتى. ”قازىر ءبىز ءوندىرىپ جاتقان قارا ورىك سۋسىنى قۇمىراعا قۇيىلادى، ءبىراز اۋىرلاۋ، بيىل بازار قاجەتىنە ساي سۋلياۋ دورباعا قۇيىپ شىعارۋدى جولعا قويامىز. سەرىكتەستىك بيىلعى ساتىلۋ مولشەرىن 15 ميلليون يۋاننان اسىرۋدى جوسپارلاپ وتىر. بۇلاي بولعاندا ءتىپتى دە كوپ شارۋا وتباسىنا قارا ورىك اعاشى قالامشاسىن تاراتىپ، كوپشىلىكتىڭ كىرىسىن اناعۇرلىم ارتتىرىپ، تۇرمىسىن بالداي ءتاتتى ەتۋگە مۇمكىندىك جاسايمىز“، - دەدى ۋاڭ لينگۇڭ.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.