انار بۇلت / شينجياڭ گازەتىنىڭ ءتىلشىسى سۋ لۋپيڭ 1 - ايدىڭ 15 - كۇنى ۇرىمجىدەن حابارلايدى. كوكتەم مەرەكەسى جاقىنداپ قالدى، ادامدار لەگى كوبەيدى. كوپشىلىك اۋىلعا قايتۋدان بۇرىن قانداي دايىندىقتار جاساۋى كەرەك؟ اۋىلعا قايتار جولدا قالاي ساقتانۋ - قورعانۋ كەرەك؟ ۇيگە جەتكەن سوڭ نەلەرگە كوڭىل ءبولۋ كەرەك؟ 1 - ايدىڭ 14 - كۇنى وسى جونىندە ءتىلشى اۆتونوميالى رايوندىق اۋرۋدىڭ الدىن الۋ جانە تىزگىندەۋ ورتالىعىنىڭ ەپيدەميولوگيالىق باس مامانى، اعا شيپاگەر لي فانگە تىلشىلىك جاسادى.
”اۋىلعا قايتۋدان بۇرىن ساپاردى جاقسى جوسپارلاپ، جولعا شىعاتىن جەر مەن نىسانالى جەردىڭ قازىرگى ۋاقىتتاعى حاۋىپ - قاتەر دارەجەسىن جانە ىندەتتەن ساقتانۋ - تىزگىندەۋ ساياساتىن ءبىلۋ كەرەك“. لي فان مىناداي ۇسىنىس جاسادى: الدىن الا بەلەت ساتىپ الىپ، قاۋىرت كەزگە شوعىرلانباي جولعا شىعۋ كەرەك. نىسانالى جەردىڭ سالاماتتىق كودى APPىن نەمەسە شاعىن باعدارناماسىن جۇكتەپ الىپ، قاجەت كەزدە الدىن الا مالىمدەۋ كەرەك. يممۋنيتەتتى كۇشەيتۋ بويىنشا ەكتىرۋگە ۇيلەسەتىندەر، ەڭ جاقسىسى، جولعا شىعۋدان بۇرىن ەكتىرىپ الۋ كەرەك.
جولعا شىعۋدان بۇرىن قىزۋى ورلەۋ نەمەسە باسقا دا تىنىس جولى سىرقاتتارى بولسا، تەزىرەك جەرگىلىكتى ورىنداعى شيپاحاناعا بارىپ كورىنۋ، جاڭا تيپتى ايدارشا ۆيرۋس وكپە قابىنۋ ىندەتىنە شالدىققان - شالدىقپاعاندىعىن ءبىر - بىرلەي تەكسەرتىپ، شۇعىل سىرقاتى تىزگىندەلگەن سوڭ جولعا شىعۋ كەرەك. جولعا شىققاندا قىزۋى ورلەۋ نەمەسە باسقا دا تىنىس جولى اۋرۋلارى بولماۋى كەرەك، قىزۋدى قايتارۋ دارىلەرىن ءوزى ءبىلىپ ءىشىپ، سىرقاتتى بۇركەمەلەپ، اۋرۋ جاعدايىن جاسىرىپ جولعا شىعۋعا ءتىپتى بولمايدى، جاسىرۋ سەبەبىنەن ىندەتتىڭ تارالۋىن تۋدىرسا سايكەستى زاڭدىق جاۋاپكەرشىلىك ارقالايدى. اۋىلعا قايتار جولدا قىزۋى ورلەۋ نەمەسە باسقا دا تىنىس جولى اۋرۋلارى بايقالسا، دەرەۋ وتىرعان قاتىناس قۇرالدارىنىڭ قىزمەتكەرلەرىنە ايتۋ، قاتىناس قۇرالىمەن تاسۋعا جاۋاپتى جاقتىڭ نەمەسە جەرگىلىكتى ىندەتتەن ساقتانۋ - تىزگىندەۋ تاراۋلارىنىڭ تالاپتارى بويىنشا ىستەۋ كەرەك، جاسىرۋعا بولمايدى.
”قاجەتتى بولعان جەكەلىك ساقتانۋ - قورعانۋ بۇيىمدارىن جاقسىلاپ دايىنداۋ كەرەك، بۇل ماسكى (مەديتسينالىق سىرتقى اۋرۋلار ماسكىسى نەمەسە N95 ماسكىسى)، دەزينفەكسيالايتىن سۋلانعان قاعاز سياقتىلاردى قامتيدى، سوزىلمالى اۋرۋى بارلار ۇنەمى قولدانىلاتىن دارىلەرىن الا جۇرۋىنە بولادى“. لي فان بىلاي دەدى: اۋىلعا قايتار جولدا ماسكىنى دۇرىستاپ تاعۋ، اۋزىن، مۇرنىن، يەگىن جاۋىپ تۇرۋىنا كوڭىل ءبولۋ كەرەك. ماسكىنى ۇنەمى اۋىستىرىپ تۇرۋ، تاققان ۋاقىتى 4 ساعاتتان اسىپ كەتپەۋ كەرەك. جوتەلگەندە، تۇشكىرگەندە اۋزىن باسىپ الۋعا كوڭىل ءبولۋ كەرەك. دەزينفەكسيالانباعان قولىمەن اۋزىن، مۇرنىن، كوز شىرىشتى قابىعىن سيپاماۋ كەرەك، قولىن ۇنەمى دەزينفەكسيالاۋ، ەڭ جاقسىسى، دەزينفەكسيالايتىن سۋلانعان قاعاز ىستەتۋ، بىلعانعان جەردى ۇستاعاندا، ءسوزسىز، دەر كەزىندە دەزينفەكسيالاۋ كەرەك.
ءوز اۆتوكولىگىمەن شىققاندا نەمەسە جەكە اۆتوكولىككە وتىرعاندا، جولعا شىعاردان بۇرىن جەكەلىك ساقتانۋ - قورعانۋ بۇيىمدارىن، ماسەلەن، ماسكى، دەزينفەكسيالايتىن سۋلى قاعاز، سۋ، ازىق جانە ۇنەمى قولدانىلاتىن دارىلەردى دايىنداپ الۋ كەرەك. جولدا ادام توپتاسقان جەرگە از بارۋ، امال بار جابىق الەۋمەتتىك ورىندارعا بارماۋ نەمەسە از بارۋ كەرەك.
”ءوز سالاماتتىعىنا جاۋاپتى بولىپ، نىسانالى جەردىڭ ساقتانۋ - تىزگىندەۋ تالاپتارىنا بويسۇنىپ، ەستەلىككە الدىرۋ قاجەت بولعاندا دەر كەزىندە الەۋمەتتىك اۋماقتا ەستەلىككە الدىرىپ، جەرگىلىكتى ورىننىڭ ۇدايىلاندىرىلعان حىسۋان تەكسەرۋىنە سانالىلىقپەن قاتىناسۋ كەرەك“. لي فان بىلاي دەدى: ۇيگە بارعان سوڭ ءبىر اپتا ىشىندە ءوز سالاماتتىعىن قاداعالاۋدى جاقسى ىستەپ، قىزۋى ورلەۋ نەمەسە باسقا دا جايسىزدانۋ جايتتەرى بار - جوقتىعىن باقىلاپ، جايسىزدانا قالسا دەر كەزىندە شيپاگەرگە كورىنۋ كەرەك.
