بۇل بىرلەسكەن مەملەكەتتەر ۇيىمىنىڭ 2022 - جىلعى بەيجيڭ قىسقى وليمپياداسىنا ارناپ تاراتقان پوچتا ماركاسى. شينحۋا اگەنتتىگى جاريالادى (سۋرەتتى بىرلەسكەن مەملەكەتتەر ۇيىمى پوچتا باسقارۋ مەكەمەسى ازىرلەگەن)
شينحۋا اگەنتتىگىنىڭ 1 - ايدىڭ 14 - كۇنى بىرلەسكەن مەملەكەتتەر ۇيىمىنان بەرگەن حابارى (تىلشىلەر ۋاڭ جيانگاڭ، شە ى) بىرلەسكەن مەملەكەتتەر ۇيىمى بوچتا باسقارۋ مەكەمەسى 1 - ايدىڭ 14 - كۇنى، بىرلەسكەن مەملەكەتتەر ۇيىمىنىڭ 2022 - جىلعى بەيجيڭ قىسقى وليمپياداسىنىڭ اشىلۋىن قۇتتىقتاۋ ءۇشىن، ”دەنە تاربيە بەيبىتشىلىكتى جەبەيدى“ باس تاقىرىبىنداعى پوچتا ماركاسىن تاراتاتىنىن جاريالادى. بۇل بىرلەسكەن مەملەكەتتەر ۇيىمىنىڭ تۇڭعىش رەت قىسقى وليمپياداعا ارناپ پوچتا ماركاسىن تاراتۋى ەدى.
بىرلەسكەن مەملەكەتتەر ۇيىمى پوچتا باسقارۋ مەكەمەسى بىلاي دەدى: بۇل رەت تاراتقان پوچتا ماركاسىنىڭ قۇنى جەكە - جەكە 0.58 دوللار، 1.30 دوللار، 1.10 شۆەتساريا فرانكى، 2.00 شۆەتساريا فرانكى، 0.85 ەۆرو، 1.80 ەۆرو، بەتىنە جەكە - جەكە حوككەي سپورتشىسى، جالعىز تاقتالى شاڭعى تەبۋ سپورتشىسى، مانەرلەپ سىرعاناۋ سپورتشىسى، قار شانا سپورتشىسى، مۇز شاۋگىم سپورتشىسى جانە اسقار تاۋدا قار شاڭعى تەبۋ سپورتشىسى سىندى سپورتشىلاردىڭ بەينەلەرى بەدەرلەنگەن. بۇل پوچتا ماركالارىن جۇڭگونىڭ قىستىرما سۋرەت شەبەرى رۋان فيفي سىزعان.
بىرلەسكەن مەملەكەتتەر ۇيىمى پوچتا باسقارۋ مەكەمەسى بىلاي دەدى: اتالعان ورگاننىڭ رەسمي تورىنان ”دەنە تاربيە بەيبىتشىلىكتى جەبەيدى“ پوچتا ماركاسىن ساتىپ الۋعا بولادى نەمەسە بىرلەسكەن مەملەكەتتەر ۇيىمى پوچتا باسقارۋ مەكەمەسىنىڭ نيۋيوركتا، جەنەۆادا، ۆەنادا قۇرعان ناقتى دۇكەندەرىنەن ساتىپ الۋعا بولادى. ادەتتەگى پوچتا ماركاسىمەن ۇقساس، ”دەنە تاربيە بەيبىتشىلىكتى جەبەيدى“ پوچتا ماركاسىن ءارقانداي حاتتاردى جولداۋعا ىستەتۋگە بولادى.
