□ انار بۇلت / شينجياڭ زاڭ گازەتىنىڭ تىلشىلەرى ۋاڭ شياۋ - ۋي، ياڭ حان، ەرىكتى تىلشىلەر ياڭ جيا - ۋىن، يە شۋاي، جياڭ بوتاۋ
1 - ايدىڭ 18 - كۇنى كوكتەم مەرەكەسى تاسىمالىنىڭ ەكىنشى كۇنى، ءۇرىمجى تەمىر جولى قوعام حاۋىپسىزدىگى مەكەمەسى ءۇرىمجى قوعام حاۋىپسىزدىگى باسقارماسى باتىس بەكەت ساقشى بولىمشەسىنىڭ حالىق ساقشىسى جيا سىيۇي جاردەم بەرۋشى ساقشى رەتىندە، Z70 كەزەكشى پويەزىنا شىقتى. ۇرىمجىدەن شىققان بۇل پويەز 6 - بەكەت جيايۇيگۋانعا جەتكەنشە 10 ساعات كەتەدى. بەكەتكە كەلگەن سوڭ جيا سىيۇيدىڭ اتا - اناسىمەن باس قوسۋىنا بار - جوعى 8 مينۋت ۋاقىتى عانا بار ەدى.
ال، وسى 8 مينۋتتى ول تۇپ - تۋرا 2 جىل كۇتتى.
2019 - جىلى 8 - ايدا جيا سىيۇي تەمىر جول ساقشىسى بولدى. پويەزدا كەزەكشى بولۋدىڭ 2 - رەتكى ساپارىنان - اق ول جالعىز ءوزى بۇل جۇمىستى دەڭگەلەك اينالدىرىپ اكەتتى. پويەز ساقشىلارى اترەتىنىڭ باسشىلارى ونىڭ باتىل دا قۇنتتى ەكەندىگىن بايقاپ، ونى ادەيىلەپ ۇرىمجىدەن بەيجيڭگە قاتىنايتىن Z70 كەزەكشى پويەزىندا كەزەكشى بولۋعا ورنالاستىرادى.
ۇزاق جولدى پويەزدا كەزەكشى بولۋ جيا سىيۇيدى ايرىقشا جەلپىندىردى، Z70 كەزەكشى پويەزىنىڭ جيايۇيگۋاننان ءوتۋى ونىڭ بۇل جۇمىسقا ەرەكشە ىنتىزار بولۋىنىڭ تاعى ءبىر سەبەبى بولاتىن، ويتكەنى بۇل جەر ونىڭ اتا مەكەنى ەدى.
ايتسەدە وزگەرىستىڭ قادامىن جوسپار قۋىپ جەتە العان با. 2 جىلدان اسا ۋاقىتتان بەرى بەلگىلى سەبەپتەردەن Z70 كەزەكشى پويەزىندا كەزەكشى بولۋدىڭ ورايى وعان كەلمەي - اق قويدى، ارينە، سوندىقتان سول بويى ۇيىنە دە قايتا العان جوق.
بيىل كوكتەم مەرەكەسىنىڭ تاسىمال كەزىندە عانا، جيا سىيۇيگە كوپتەن كۇتكەن Z70 كەزەكشى پويەزىندا پويەز ساقشىسى بولۋ ورايى بۇيىردى.
سول كۇنى ساعات 12 مولشەرىندە، پويەز تۇراقتا تۇرعان پويەزدى شارلاي تەكسەرىپ بولعان سوڭ، جيا سىيۇي اكەسىنە تەلەفون جالعادى.
جيا سىيۇيدىڭ اكەسى، جيايۇيگۋان بەكەتى ساقشى بولىمشەسىنىڭ ورىنباسار باستىعى جيا حۋاشين وسى ساتتە جيايۇيگۋان بەكەتىندە كەزەكشىلىكتە بولاتىن. ”شەشەڭ ۇيدە ساعان قابىرعا قۋىرىپ جاتىر، كەشتە جيايۇيگۋانعا كەلگەندە مەن سەنىڭ پويەزىڭا اپارىپ بەرەيىن!“، - دەدى جيا حۋاشين قىزىن ەركەلەتە.
13 ساعات 30 مينۋتتا پويەز باستاپقى بەكەت ءۇرىمجى بەكەتىنىڭ تەكشەسىنە جەتتى، جيا سىيۇي مەن اعا ساقشى شى پىڭ بەكەت تەكشەسىندە جولاۋشىلاردىڭ پويەزعا شىعۋىنا جەتەكشىلىك ەتىپ، سۇراۋلارىنا جاۋاپ بەرىپ، ولارعا الىپ جۇرگەن جەكە مۇلىك - زاتتارىن جاقسى قاراۋدى، كيمەلەپ قىسىلىسپاۋدى تاپسىرىپ جاتتى.
14 ساعات 10 مينۋتتا پويەز ءۇرىمجى بەكەتىنەن باياۋ قوزعالدى، ”10 ساعاتتان كەيىن اكەمە جولىعا الاتىن بولدىم“، - دەدى جيا سىيۇي ۋاقىت ەسەپتەپ.
”مىنا قولفون كىمدىكى؟ ماڭىزدى زاتتارىڭىزدى كوزدەن تاسا قويماڭىزدار!“ ”بۇل كىمنىڭ بالاسى؟ بەتالدى جۇگىرمە، بىردەمەگە سوعىلىپ قالاسىڭ“. پويەزدا جولاۋشىلاردىڭ كوبى دەمالىپ قالدى، شى پىڭ مەن جيا سىيۇي ارلى - بەرلى شارلاپ، جولاۋشىلارعا زاتتارىن دۇرىستاپ جيناپ قويۋدى، بالالارىنا جاقسى قاراۋدى ەسكەرتىپ ءجۇردى.
ءبىر ساعاتتان كەيىن، جيا سىيۇي جولاۋشىلارعا لىق تولعان 18 ۆاگوندى ارالاپ شىققاندا، ماسكىسى مەن قولعابى تەردەن شىلقىپ كەتكەن ەدى.
قاراڭعى ءتۇستى، ەندى 35 مينۋتتا پويەز جيايۇيگۋان بەكەتىنە جەتەدى، جيا سىيۇي تەرەزە الدىندا تۇرىپ اينالاعا كوز تاستاپ، ءوز جادىنداعى جيايۇيگۋاننىڭ نىشاندىق بەلگىسى ”دەلفين مۇناراسىن“ ىزدەي باستادى.
”شەشەم قانتتى سىركە سۋىن قوسىپ قۋىرعان قابىرعانى جەگىم كەلىپ تۇرعانى - اي“، ”مەنىڭ مىنا وبرازىم قانداي ەكەن دەشى؟ اكەم مەنىڭ ساقشى كيىمىن كيگەن بەينەمدى تۇڭعىش كورگەلى وتىر“، ”بەكەتكە تەز - تەز جەتسەك ەكەن دەيمىن، تاعى ونشا تەز بولماسا ەكەن دەپ تە ارماندايمىن، كەلەسى جولى قاشان كەزىگەرىمىزدى كىم ءبىلسىن“... اتا مەكەنگە تاياعان سايىن كوڭىلى تىپتەن لوبلىققان جيا سىيۇي ءسوز تيەگىن اعىتتى.
”بالا كۇنىمدە شەشەمنەن اكەم كەزىندە مىندەت اتقارىپ جۇرگەندە، ابايسىزدا تاقتايعا قاعىلعان بولات شەگەنى باسىپ كەتىپ، تابانىن تەسىپ جاراقاتتاپ كەتكەنىن، اكەمنىڭ سوندا دا تاباندىلىقپەن مىندەتتى ورىنداپ بولعان سوڭ عانا شيپاحاناعا بارىپ ەمدەلگەنىن ەستىگەنمىن، اكەمنىڭ اياعىنىڭ ۇستىندە سونان قالعان تىرتىق ءالى بار“، - جيا سىيۇي تىلشىگە، - ”سول شاقتا مەن دە اكەم سياقتى جاقسى ساقشى بولسام دەپ ارمانداۋشى ەدىم“.
1 - ايدىڭ 19 - كۇنى 0 ساعات 16 مينۋتتا پويەز جيايۇيگۋان بەكەتىنە كەلىپ توقتادى.
جيا سىيۇي پويەزدان ءتۇستى، بەكەت تەكشەسىندە ەشكىم جوق ەكەن، ونىڭ كوڭىلىن بەيمازا ءبىر كوڭىلسىزدىك شارپىپ ءوتتى، ايتسە دە بويىن تەز جيناپ الا قويعان ول جولاۋشىلاردىڭ پويەزدان تۇسۋىنە جەتەكشىلىك ەتتى.
ول ەڭ سوڭعى ءبىر قارت جولاۋشىنى سۇيەپ پويەزدان تۇسىرگەن سوڭ، ارتىنا قاراعاندا اكەسىنىڭ سۇلباسىن بايقاپ، جۇگىرە باسىپ جەتىپ بارىپ، اكەسىمەن قاتتى قۇشاقتاسا كەتتى، تەبىرەنىستەن كوزىنەن ىستىق جاس پارلادى.
”مەنى ساعىندىڭىز با؟ مەن بۇگىن كەلىستى مە ەكەنمىن، ءوز بەينەڭىزدى كورگەندەي بولدىڭىز با“؟ جيا سىيۇي كوزىنىڭ جاسىن سىعىمداپ، سويلەي ءجۇرىپ ارتقا ءبىر قادام شەگىنىپ، ساقشى كيىمىن كيگەن اكەسىنە چاس بەرىپ تۇرا قالدى.
اكەسى كوزىنە جاس ىركىپ قايتارا چاس بەردى، ىلە - شالا كۇنى بۇرىن دايىنداپ قويعان تارتۋى − قىزىل ءشارپىنى الىپ شىعىپ، قىزىن قۇشاقتاپ، ونىڭ مويىنىنا ورادى، ونىمەن قويماي، بىلدىرمەي قىزىنا قالىڭداۋ ءبىر كونۆەرت ۇستاتتى.
0 ساعات 25 مينۋتتا گۋدوك شالىنىپ، پويەز قىزمەتكەرى جيا سىيۇيدى پويەزعا شىعۋعا قۋزادى، شەشەسى جالما - جان 2 ۇلكەن دورباعا سالىنعان ازىق - تۇلىكتى جيا سىيۇيگە ۇستاتىپ جاتىپ: ”ىشىندە سەن ەڭ جاقسى كورەتىن قانتتى سىركە سۋى قوسىلىپ قۋىرىلعان قابىرعا بار“، - دەدى سىبىرلاپ.
پويەز تەرەزەسىنىڭ ار جاعىندا تۇرىپ، جيا سىيۇي اكە - شەشەسىنە قول بۇلعاپ قوش ايتتى. پويەز باياۋ قوزعالدى، جيا حۋاشين كەرى بۇرىلىپ كوزىنىڭ جاسىن سىعىمداپ جاتتى، شەشەسى پويەزدىڭ كەتكەن باعىتىنا قيماستىقپەن ۇزاق قاراپ تۇردى...
جيا سىيۇي قالىڭداۋ كونۆەرتتى اشتى، بۇل اكەسىنىڭ وعان جازعان حاتى ەكەن، وندا قىزىنا دەگەن ساعىنىش پەن ءۇمىت - تىلەك بەينەلەنىپتى، حات سوڭىندا: ”سەن ءبىزدىڭ ماحابباتىمىزسىڭ، جىلۋىمىزسىڭ، ءۇمىتىمىزسىڭ، سەن مىناۋ دۇنيەدەگى شۋاقتى كوكتەمسىڭ“ دەپ جازىلعان ەكەن.
