تيانشان تورى
تيانشان تورى   ›   جاڭالىقتار   ›   شينجياڭ حابارلارى

اۆتونوميالى رايوندىق 13 - كەزەكتى حالىق قۇرىلتايىنىڭ 5 - ءماجىلىسى اشىلدى

  اۆتونوميالى رايوندىق 13 - كەزەكتى حالىق قۇرىلتايىنىڭ 5 - ءماجىلىسى اشىلدى

  ما شيڭرۇي، نۇرلان ءابىلماجىن، لي يفي، شوكىرات زاكىر، نايىم ياسىن، جاڭ چۇنلين، حى جۇڭيوۋ ءتوراعالار مىنبەسىنەن ورىن الدى

  ەركىن تۇنياز ۇكىمەت قىزمەتىنەن بايانداما جاسادى، شاۋكەت يمىن باسقاردى

  1 - ايدىڭ 23 - كۇنى اۆتونوميالى رايوندىق 13 - كەزەكتى حالىق قۇرىلتايىنىڭ 5 - ءماجىلىسى شينجياڭ حالىق سارايىندا اشىلدى. سۋرەتتە: ءماجىلىس زالى.

     □ سۋرەتتى انار بۇلت / شينجياڭ گازەتىنىڭ ءتىلشىسى سۇي جىجيان تۇسىرگەن

  انار بۇلت / شينجياڭ گازەتىنىڭ تىلشىلەرى ياۋ تۇڭ، ۋاڭ شيڭرۇي 1 - ايدىڭ 23 - كۇنى ۇرىمجىدەن حابارلايدى. اۆتونوميالى رايوندىق 13 - كەزەكتى حالىق قۇرىلتايىنىڭ 5 - ءماجىلىسى 1 - ايدىڭ 23 - كۇنى تۇستەن بۇرىن شينجياڭ حالىق سارايىندا اشىلدى. اۆتونوميالى رايوندىق حالىق قۇرىلتايىنىڭ 500دەن استام ۋاكىلى 25 ميلليون ءار ۇلت حالقىنىڭ ماڭىزدى تاپسىرماسىن ارقالاپ ماجىلىسكە قاتىناسىپ، نەگىزگى زاڭ مەن زاڭدار جۇكتەگەن قاسيەتتى قىزمەت جاۋاپكەرشىلىكتەرىن مۇقيات وتەدى.

  شينجياڭ حالىق سارايى سالتاناتتى دا قىزۋ مەرەيگە شومدى، مەملەكەت گەربى ءتوراعالار مىنبەسىندەگى شىمىلدىقتىڭ ورتاسىنا ءىلىنىپ، ونىڭ ەكى جاعىنا بەس - بەستەن 10 قىزىل تۋ قويىلدى.

  ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى ما شيڭرۇي، شاۋكەت يمىن، لي يفي، جاڭ چۇنلين، حى جۇڭيوۋ، جاڭ جۋ، لي شۋەجۇن، سارقىت اقان، دۇڭ شينگۋاڭ، باداي، سو يۋە، لي نيڭپيڭ، توحتى ياقۇپ، مۇقيات جارمۇقامەت، ءمۇتالىپ روزى ءتوراعالار مىنبەسىنىڭ الدىڭعى قاتارىنان ورىن الدى.

  ەركىن تۇنياز، نۇرلان ءابىلماجىن، شوكىرات زاكىر، نايىم ياسىن، ليۋ لين، ياڭ چىڭ، تيان شياڭلي، چىن ۋيجۇن، ءزۇمىرات وبۇل، ياڭ فاسىن، ءيۇسۇپجان مامەت، ەلزات احمەتجان، قادەن كابەن جانە ءماجىلىس ءتوراعالار القاسىنىڭ قۇرامىنداعىلار ءتوراعالار مىنبەسىنەن ورىن الدى.

  اۆتونوميالى رايوندىق 13 - كەزەكتى حالىق قۇرىلتايىنىڭ 5 - ماجىلىسىنە قاتىناسۋعا ءتيىستى ۋاكىل 546 ادام. بۇگىنگى ماجىلىسكە 502 ادام قاتىناستى، بۇل زاڭدا بەلگىلەنگەن ادام سانىنا ۇيلەسەدى.

  تۇستەن بۇرىن ساعات 10دا اشىلۋ جينالىسىن باسقارۋشى شاۋكەت يمىن شينجياڭ ۇيعۇر اۆتونوميالى رايوندىق 13 - كەزەكتى حالىق قۇرىلتايى 5 - ءماجىلىسىنىڭ اشىلعاندىعىن جاريالادى. بارلىق ادام ورىندارىنان تۇرىپ، مەملەكەت ءانىن اسقاقتاتا شىرقادى.

  ءماجىلىستىڭ كەڭەستىك ءتارتىبى بويىنشا اۆتونوميالى رايوننىڭ ۋاقىتشا ءتوراعاسى ەركىن تۇنياز اۆتونوميالى رايوندىق حالىق ۇكىمەتى اتىنان ماجىلىسكە ۇكىمەت قىزمەتىنەن بايانداما جاسادى. بايانداما جيىنى 3 بولىمگە بولىنگەن: ءبىرىنشى، 2021 - جىلعى قىزمەتتەرگە كوز جىبەرگەندە؛ ەكىنشى، 2022 - جىلعى ءتۇيىندى قىزمەتتەر؛ ءۇشىنشى، ۇكىمەتتىڭ ءوز قۇرىلىسىن تاباندىلىقپەن كۇشەيتۋ.

  ەركىن تۇنياز باياندامادا بىلاي دەپ اتاپ كورسەتتى: جاڭا عانا وتكەن ءبىر جىلدا، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، شينجياڭ بۇكىل ەلمەن بىرگە جاپپاي دوڭگەلەك داۋلەتتى قوعام قۇرىپ شىقتى، ەكونوميكالىق، قوعامدىق دامۋدىڭ باستى كورسەتكىشتەرىندە بۇكىل جىلدىق نىسانا - مىندەتتەر ارتىعىمەن ورىندالىپ، ”14 - بەسجىلدىق“ ءساتتى باستالدى. ەركىن تۇنياز قوعامدىق ورتا اناعۇرلىم جاراسىمدى، ورنىقتى بولدى، ەكونوميكانىڭ جوعارى ساپالى دامۋىندا نىق قادام تاستادىق، ىشكە، سىرتقا ەسىك اشۋ دەڭگەيى ۇزدىكسىز جوعارىلادى، ءار ۇلت بۇقاراسىنىڭ تابىس سەزىمى، باقىت سەزىمى، حاۋىپسىزدىك سەزىمى ۇزدىكسىز كۇشەيدى، ەكولوگيالىق ورتانىڭ ساپاسى ايتارلىقتاي جاقساردى، قوعامدىق مادەنيەت ىستەرى قارىشتاپ دامىدى، ۇلتتار ىنتىماعى، ءدىن جاراسىمدىلىعى جاعدايى ونان ارى بەكەمدەلدى، ۇكىمەتتىڭ باسقارۋ قابىلەتى مەن قىزمەت وتەۋ دەڭگەيى ۇزدىكسىز جوعارىلادى دەگەن سياقتى 8 جاقتان 2021 - جىلعى قىزمەتتەردى قورىتىندىلادى.

  ەركىن تۇنياز بىلاي دەدى: 2022 - جىلعى ۇكىمەت قىزمەتىنىڭ جالپى تالابى: شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولۋ، پارتيا 19 - قۇرىلتايىنىڭ جانە 19 - كەزەكتى ورتالىق كوميتەتىنىڭ ءار رەتكى جالپى ماجىلىستەرىنىڭ رۋحىن جاپپاي دايەكتىلەندىرۋ، تياناقتاندىرۋ، ورتالىقتىڭ ەكونوميكالىق قىزمەت ءماجىلىسى مەن 3 - رەتكى ورتالىقتىڭ شينجياڭ قىزمەتى جونىندەگى اڭگىمە ءماجىلىسىنىڭ رۋحىن دايەكتىلەندىرۋ، تياناقتاندىرۋ، جاڭا داۋىردەگى پارتيانىڭ شينجياڭدى جونگە سالۋ جالپى جوباسىن تولىق، دالمە - ءدال دايەكتىلەندىرۋ، قوعام ورنىقتىلىعى مەن باياندى تىنىشتىق باس نىساناسىن مىقتاپ يگەرۋ، پارتيا قۇرۋ ۇلى رۋحىن ساۋلەلەندىرۋ، ورنىقتىلىق بارىسىندا ىلگەرىلەۋ قىزمەت جالپى ارناسىنا تاباندى بولۋ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرۋ، جاڭا دامۋ ارناسىنا جەدەل قىزمەت ەتۋ جانە توعىسۋ، رەفورما جاساۋدى، ەسىك اشۋدى جاپپاي تەرەڭدەتۋ، جاڭالىق اشۋ ارقىلى دامۋعا دەم بەرۋگە تاباندى بولۋ، حالىقتى وزەك ەتۋگە تاباندى بولا وتىرىپ جوعارى ساپالى دامۋدى ىلگەرىلەتۋ، قامداۋ جاعىنداعى قۇرىلىمدىق رەفورمانى نەگىزگى جەلى ەتۋگە تاباندى بولۋ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى ءبىر تۇتاس جوسپارلاۋ، دامۋ مەن حاۋىپسىزدىكتى ءبىر تۇتاس جوسپارلاۋ، ”التىنى ورنىقتىرۋ“، ”التىنى قامتاماسىز ەتۋ“ قىزمەتىن ۇزدىكسىز جاقسى ىستەۋ، ەكونوميكالىق اينالىمدى ۇيلەسىمدى ارالىقتا ساقتاۋعا كۇش سالۋ، قوعامدىق كەلەلى جاعدايدىڭ ۇزدىكسىز ورنىقتى بولۋىنا، ۇزاق ۋاقىت ورنىقتى بولۋىنا شىنايى كەپىلدىك ەتۋ، ورنىقتى، اقاۋسىز ەكونوميكالىق ورتانى، ەل امان، جۇرت تىنىش قوعامدىق ورتانى، ستيلى پاك، سالتى دۇرىس ساياسي ورتانى ساقتاپ، پارتيا 20 - قۇرىلتايىنىڭ جەڭىسپەن اشىلۋىن ۇزدىك ناتيجەلەرمەن قارسى الۋ.

  ەركىن تۇنياز بىلاي دەدى: 2022 - جىلعى ەكونوميكالىق، قوعامدىق دامۋدىڭ باستى مەجەلى نىساناسى: بۇكىل رايوننىڭ وڭىرلىك ءوندىرىس جالپى ءونىم قۇنى %6 شاماسىندا، كولەمنەن جوعارى ونەركاسىپتىڭ ارتقان قۇنى %6.5 شاماسىندا، قالا، اۋىل تۇرعىندارىنىڭ جان باسىندىق قولداعى تابىسى جەكە - جەكە %7 شاماسىندا، %8 شاماسىندا ارتۋ، قالا - قالاشىقتاردا تەكسەرىلگەن جۇمىسسىزدىق مولشەرى %5.5 كولەمىندە تىزگىندەلۋ، استىقتىڭ جالپى ءتۇسىمى 16 ميلليون 500 مىڭ توننادان از بولماۋ، ت.ب. وسى اتالعان نىسانالاردى جۇزەگە اسىرۋ ءۇشىن، 10 جاقتاعى قىزمەتتى كورنەكتىلەندىرە وتىرىپ ويداعىداي يگەرۋىمىز كەرەك: ءبىرىنشى، باسىمدىققا يە كاسىپتەردى جەتىلدىرىپ، ۇلعايتىپ، شينجياڭ ەرەكشەلىگىنە يە، ءار ۇلت بۇقاراسىنا تيىمدىلىك جەتكىزەتىن، جوعارى ساپالى دامۋعا تىرەك بولاتىن وسى زامانعى كاسىپ سالاسى جۇيەسىن جەدەل ورناتۋ؛ ەكىنشى، ىشكى سۇرانىستى كەڭەيتۋ ستراتەگياسىن اتقارىپ، قارجى قوسۋدى كۇش سالا كەڭەيتىپ، تۇتىنۋدى جەبەۋ؛ ءۇشىنشى، كەدەيلىكتەن ارىلتۋدان قامال الۋدىڭ جەتىستىكتەرىن ۇزدىكسىز بەكەمدەپ، كەڭەيتىپ، اۋىل - قىستاقتى گۇلدەندىرۋدى جاپپاي ىلگەرىلەتۋ؛ ءتورتىنشى، ”تومەنگە بەرۋ، باسقارۋ، قىزمەت وتەۋ“ رەفورماسىن تەرەڭدەتىپ، بازارلانعان، زاڭمەن باسقارىلاتىن، حالىقارالانعان شارۋاشىلىق - ساۋدا ورتاسىن جەدەل ورناتۋ؛ بەسىنشى، جىبەك جولى ەكونوميكالىق بەلدەۋى وزەكتى رايون قۇرىلىسىن جەدەل ىلگەرىلەتىپ، ەلىمىزدىڭ ىشكى قۇرلىقتىق ەسىك اشۋى مەن شەكارالىق ەسىك اشۋىنىڭ جاڭا بيىگىن قالىپتاستىرۋ؛ التىنشى، لاستانۋدىڭ الدىن الۋدى جانە ونى تىزگىندەۋدى، ەكولوگيالىق قۇرىلىستى كۇش سالا ويداعىداي يگەرىپ، جاسىل، تومەن كومىر قىشقىل گازدى دامۋدى ىلگەرىلەتۋ؛ جەتىنشى، حالىق تۇرمىسىن جاقسارتۋدى ءتۇيىن ەتكەن قوعامدىق قۇرىلىستى جەدەلدەتىپ، حالىقتىڭ تۇرمىس ساپاسىن ۇزدىكسىز جوعارىلاتۋ؛ سەگىزىنشى، شينجياڭدى مادەنيەتپەن نارلەندىرۋدى ىلگەرىلەتىپ، جۇڭحۋا ۇلتى ورتاق تۇلعا تانىمىن ۇزدىكسىز بەكەمدەۋ؛ توعىزىنشى، بيڭتۋان مەن جەرگىلىكتى ورىننىڭ توعىسا دامۋىن كۇش سالا تەرەڭدەتىپ، بيڭتۋاننىڭ ەرەكشە رولىن اناعۇرلىم ويداعىداي ساۋلەلەندىرۋ؛ ونىنشى، دامۋ مەن حاۋىپسىزدىكتى ءبىر تۇتاس جوسپارلاپ، ءتۇرلى حاۋىپ - قاتەرگە، سىن - سايىسقا ءونىمدى توتەپ بەرۋ.

  ەركىن تۇنياز شينجياڭعا باعىتتامالى كومەكتەسۋ، مەملەكەت قورعانىسى مەن ارميا قۇرىلىسىن قولداۋ، ۇكىمەتتىڭ ءوز قۇرىلىسىن كۇشەيتۋ جونىندە دە بايىمداۋ جاسادى.

  اۆتونوميالى رايوندىق حالىق قۇرىلتايى تۇراقتى كوميتەتىنىڭ تاپسىرۋىمەن اۆتونوميالى رايوندىق حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى، اۆتونوميالى رايوندىق حالىق قۇرىلتايى زاڭ - ءتۇزىم كوميتەتىنىڭ مەڭگەرۋشى مۇشەسى لي شۋەجۇن اۆتونوميالى رايوننىڭ اۋىل - قىستاقتى گۇلدەندىرۋدى جەبەۋ ەرەجەسى (جوبا) جونىندە تۇسىنىك جاسادى. تۇسىنىكتە مىنالار اتاپ كورسەتىلدى: اۆتونوميالى رايوندىق پارتكوم پارتيا ورتالىق كوميتەتىنىڭ شەشىمدەرىن، ورنالاستىرۋلارىن ىشكەرىلەي دايەكتىلەندىرىپ، تياناقتاندىرىپ، ءبىر قىدىرۋ ساياسات - شارالار شىعارىپ، اۋىل - قىستاقتى گۇلدەندىرۋ ستراتەگياسىنىڭ ءونىمدى اتقارىلۋىن ىلگەرىلەتتى. اۆتونوميالى رايوننىڭ اۋىل - قىستاقتى گۇلدەندىرۋدى جەبەۋ ەرەجەسىن اقىلداسىپ جاساۋى اتقارىمدى دا ءونىمدى ساياساتتىق شارالاردى زاڭدىق ەرەجە - ءتۇزىم دەڭگەيىنە كوتەرۋگە ءتيىمدى، كەدەيلىكتەن ارىلتۋدان قامال الۋ جەتىستىكتەرىن بەكەمدەۋدى، كەڭەيتۋدى اۋىل - قىستاقتى گۇلدەندىرۋمەن ءونىمدى ۇشتاستىرۋعا ءتيىمدى، جەرگىلىكتى زاڭ ەرەجە شىعارۋدىڭ اۋىل - قىستاقتى گۇلدەندىرۋدى ۇزدىكسىز جاپپاي ىلگەرىلەتۋدەگى جەتەكشىلىك، تۇرتكىلىك جانە قامتاماسىز ەتۋ رولىن ساۋلەلەندىرۋگە ءتيىمدى. ەرەجە جوباسى جالپى 11 تاراۋ، 62 تارماقتان قۇرالدى.

  ءماجىلىستىڭ كەڭەستىك تارتىبىنە ساي، ءماجىلىس اۆتونوميالى رايوننىڭ 2021 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ احۋالى جانە اۆتونوميالى رايوننىڭ 2022 - جىلعى حالىق شارۋاشىلىعى مەن قوعامدىق دامۋ جوسپار جوباسى جونىندەگى باياندامانى، اۆتونوميالى رايوننىڭ 2021 - جىلعى مەجە ەسەبىنىڭ اتقارىلۋ احۋالى مەن اۆتونوميالى رايوننىڭ 2022 - جىلعى مەجە ەسەپ جوباسى جونىندەگى باياندامانى قاراپ تەكسەردى.

  اۆتونوميالى رايوندىق ساياسي كەڭەس 12 - كەزەكتى كوميتەتىنىڭ 5 - ماجىلىسىنە قاتىناسىپ جاتقان ساياسي كەڭەس مۇشەلەرى ماجىلىسكە سىرتتاي قاتىناستى.

  اۆتونوميالى رايوندىق ۇكىمەتتەگى، ساياسي كەڭەستەگى، شينجياڭ اسكەري رايونىنداعى، بيڭتۋانداعى باسشى جولداستار، اۆتونوميالى رايوندىق جوعارى حالىق سوتى مەكەمەسىندەگى، اۆتونوميالى رايوندىق حالىق پروكۋراتۋراسىنداعى نەگىزگى جاۋاپتى جولداستار دا ءتوراعالار مىنبەسىنەن ورىن الدى.

جاۋاپتى رەداكتور : الىمبەك نۇرالين

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.