تيانشان تورى
تيانشان تورى   ›   جاڭالىقتار   ›   ماڭىزدى حابارلار

بۇكىل ەلدەگى ءار ۇلت حالقىنا كوكتەم مەرەكەسى بايلانىسىمەن ىزگى تىلەك جولدادى ءار ۇلت حالقىنا باقىت، سالاماتتىق تىلەدى، ۇلى وتاننىڭ گۇلدەنىپ - قۇدىرەتتەنۋىن تىلەدى

شي جينپيڭ كوكتەم مەرەكەسى قارساڭىندا سانشيگە بارىپ، نەگىزگى ساتىداعى كادرلارعا، بۇقاراعا امانداستى، ولاردان حال سۇرادى

بۇكىل ەلدەگى ءار ۇلت حالقىنا كوكتەم مەرەكەسى بايلانىسىمەن ىزگى تىلەك جولدادى

ءار ۇلت حالقىنا باقىت، سالاماتتىق تىلەدى، ۇلى وتاننىڭ گۇلدەنىپ - قۇدىرەتتەنۋىن تىلەدى

  1 - ايدىڭ 26 - كۇنىنەن 27 - كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ سانشيگە بارىپ، نەگىزگى ساتىداعى كادرلارعا، بۇقاراعا امانداستى، ولاردان حال سۇرادى. سۋرەتتە: 1 - ايدىڭ 26 - كۇنى تۇستەن كەيىن شي جينپيڭ لينفىن قالاسى فىنشي اۋدانى سىڭنيان قالاشىعى دۋانسۇن قىستاعىنىڭ مادەنيەت الاڭىندا اۋىلداستاردىڭ مەرەكەلەرىن قۇتتىقتاپ، بۇكىل ەلدەگى ءار ۇلت حالقىنا، شياڭگاڭدىق، اۋمىندىق، تايۋاندىق باۋىرلاستارعا جانە شەتەلدەگى چياۋمين باۋىرلاستارعا كوكتەم مەرەكەسى بايلانىسىمەن ىزگى تىلەك جولدادى.

□ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

  1 - ايدىڭ 26 - كۇنىنەن 27 - كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ سانشيگە بارىپ، نەگىزگى ساتىداعى كادرلارعا، بۇقاراعا امانداستى، ولاردان حال سۇرادى. سۋرەتتە: 1 - ايدىڭ 27 - كۇنى تۇستەن كەيىن شي جينپيڭ سانشي رۇيگۋاڭ جىلۋ ەلەكتر شەكتى جاۋاپكەرشىلىك سەرىكتەستىگىنىڭ كومىر ساقتاۋ الاڭىندا كومىر الاڭىنىڭ كومىر ساقتاۋ جاعدايلارىن تەكسەرىپ كوردى.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

  شينحۋا اگەنتتىگىنىڭ 1 - ايدىڭ 27 - كۇنى تاييۋاننان بەرگەن حابارى. جۇڭحۋا ۇلتىنىڭ ءداستۇرلى مەرەكەسى كوكتەم مەرەكەسى كەلۋ قارساڭىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ سانشيگە بارىپ، نەگىزگى ساتىداعى كادرلارعا، بۇقاراعا امانداستى، ولاردان حال سۇرادى، بۇكىل ەلدەگى ءار ۇلت حالقىنا، شياڭگاڭدىق، اۋمىندىق، تايۋاندىق باۋىرلاستارعا جانە شەتەلدەگى چياۋمين باۋىرلاستارعا كوكتەم مەرەكەسى بايلانىسىمەن ىزگى تىلەك جولداپ، كوپشىلىكتىڭ دەنساۋلىعىنىڭ مىقتى، قىزمەتتەرىنىڭ تابىستى، وتباسىلارىنىڭ باقىتتى، بارىس جىلدارىنىڭ قۇتتى بولۋىن تىلەدى! ۇلى وتاننىڭ تاۋ - وزەندەرىنىڭ كوركەم بولۋىن، مولشىلىققا كەنەلۋىن، ەل امان، جۇرت تىنىش بولۋىن، گۇلدەنىپ - قۇدىرەتتەنۋىن تىلەدى!

     1 - ايدىڭ 26 - ، 27 - كۇندەرى شي جينپيڭ سانشي ولكەلىك پارتكومنىڭ شۋجيى لين ۋ مەن ولكە باستىعى لان فو - اننىڭ سەرىك بولۋىندا لينفىن، جينجۇڭ قاتارلى جەرلەرگە كەلىپ، اۋىل - قىستاق، مادەني ەسكەرتكىشتەردى قورعاۋشى ورىن، كاسىپورىن سياقتىلاردى ارالاپ قىزمەت تەكسەرىپ، تەكسەرۋ - زەرتتەۋ جۇرگىزىپ، نەگىزگى ساتىداعى كادرلارعا، بۇقاراعا پارتيا ورتالىق كوميتەتىنىڭ قامقورلىعىن جانە حال سۇراۋ سالەمىن جەتكىزدى.

  1 - ايدىڭ 26 - كۇنى تۇستەن كەيىن شي جينپيڭ جاۋىپ تۇرعان قارعا قاراماي لينفىن قالاسىنا كەلىپ قىزمەت تەكسەردى، تەكسەرۋ - زەرتتەۋ جۇرگىزدى. بىلتىر 10 - ايدا سانشيدە اۋا رايى ەستەلىككە الىنا باستاعاننان بەرگى ەڭ كۇشتى كۇزگى تاسقىن تۋىلىپ، بۇكىل ولكەدە 11 قالا اپاتقا ۇشىرادى. حوجوۋ قالاسى شىجۋاڭ اۋىلى فىڭنانيۋان قىستاعى لينفىن قالاسى بويىنشا شارۋالار ءۇيىنىڭ زاقىمدالۋى ەڭ اۋىر بولعان قىستاقتاردىڭ ءبىرى بولدى، شي جينپيڭ وسى جەرگە ارنايى كەلىپ اپاتقا ۇشىراعان بۇقاراعا امانداستى، ولاردان حال سۇرادى. ول سانشيدىڭ اپاتتان كەيىنگى قالپىنا كەلتىرۋ، قايتا قۇرۋ، كۇز، قىس ماۋسىمدارىندا تولىقتاپ تۇقىم سەبۋ، بۇقارانىڭ قىستان حاۋىپسىز، جىلى وتۋىنە شىنايى كەپىلدىك ەتۋ، اپاتتان ساقتانۋ، اپات زيانىن ازايتۋ جانە شۇعىل جاعدايعا توتەپ بەرۋ جۇيەسى قۇرىلىسىن كۇشەيتۋ سياقتى جاعدايلاردان مالىمەتتى تىڭدادى، ونان سوڭ اپاتقا ۇشىراعان قىستاق تۇرعىنى شى حۇڭبيڭنىڭ ۇيىنە امانداسا باردى.

  شى حۇڭبيڭ وتباسىنىڭ 4 بولمەلى جەر كەپەسى بىلتىرعى قاتتى نوسەردە تۇگەل قۇلاپ كەتكەن بولاتىن، ۇكىمەتتىڭ جاردەماقىسى مەن ءار جاقتىڭ كومەگىندە قايتادان 2 بولمەلى قۇراستىرىلمالى ءۇي سالىپ الدى، وتباسىمەن تۇگەل وسى ۇيگە كوشىپ كىردى. شي جينپيڭ اۋلانى، ءۇيدى تاپتەشتەي كورىپ شىقتى. شى حۇڭبيڭ وتباسىنىڭ مەرەكەلىك بۋنان دايىنداپ جاتقانىن كورگەن شي جينپيڭ ولارعا قوسىلىپ، قامىردان شىلان گۇلىن جاساپ، ۇستىنە شىلان جەمىسىن قويدى. شادىمان ءۇن، شات كۇلكىلەر ىشىندە ءار ءتۇرلى مەرەكەلىك بۋناندار جاسالىپ شىعىپ، مەرەكەنىڭ مەرەيىن اسىردى.

  شي جينپيڭ شى حۇڭبيڭ وتباسىنداعى ۇلكەن - كىشىمەن بىرگە وتىرىپ شارۋا جايىن، ءۇي قامىن ايتىسىپ، ولاردان قايتا سالىنعان ءۇيدىڭ ساپاسىنىڭ جاقسى - جامان ەكەندىگىن، مەرەكەلىك زاتتاردى ساتىپ العان - الماعاندارىن، تاعى قانداي قيىنشىلىقتارىنىڭ بار ەكەنىن ىقىلاسپەن سۇراپ ۇعىستى. شى حۇڭبيڭ باس شۋجيگە بۇل ءۇيدىڭ بەرىك تە جىلى ەكەندىگىن، وتباسىنداعىلاردىڭ مەرەكەنى الاڭسىز وتكىزە الاتىن بولعانىن، پارتيا مەن ۇكىمەتكە شىن جۇرەكتەن العىس بىلدىرەتىندىگىن ايتتى. شي جينپيڭ بىلاي دەپ اتاپ كورسەتتى: مەن ءارقاشان اپات رايونىنداعى بۇقارانىڭ قامىن ويلاپ كەلەمىن، بۇگىن سانشيدەگى ساپارىمنىڭ العاشقى قادامىن وسى ارادان باستادىم، اپاتتان كەيىنگى قالپىنا كەلتىرۋ، قايتا قۇرۋ جاعدايىن باسى - قاسىندا كورمەكشىمىن. قىستاق كەلبەتىنىڭ تازا، رەتتى ەكەندىگىن، ءوندىرىس، تۇرمىس ءتارتىبىنىڭ قالپىنا كەلگەندىگىن، قايتا سالىنعان، جوندەلگەن ۇيلەردىڭ حاۋىپسىز، جىلى ەكەندىگىن، ءۇي - ءۇيدىڭ بارلىعى كوكتەم مەرەكەسى ءۇشىن قاربالاستاپ، مەرەكەلىك زاتتاردى دا تولىق دايىنداپ قويعاندىعىن، ەگىنجايلاردا تىرشىلىك تىنىسى قاۋلاپ كەلە جاتقاندىعىن كورىپ توتەنشە ءسۇيىندىم. اۋىلداستارىمىزدىڭ ءوندىرىس، تۇرمىسىندا تاعى قانداي قيىنشىلىقتار بولسا، پارتيا مەن ۇكىمەت ۇزدىكسىز كومەكتەسىپ شەشەدى. اپاتتان كەيىنگى قالپىنا كەلتىرۋ، قايتا قۇرۋ مەن اۋىل - قىستاقتى گۇلدەندىرۋدى ءبىر تۇتاس جوسپارلاپ، سۋ الابىن كەشەندى جونگە سالۋدى كۇشەيتىپ، اپاتتان ساقتانۋداعى نەگىزدىك قۇرىلعىلاردىڭ ولقىلىعىن تولىقتاپ، اپاتتان ساقتانۋ، اپات زيانىن ازايتۋ، اپاتتان قۇتقارۋ قابىلەتىن جوعارىلاتىپ، حالىق بۇقاراسىن ەڭبەكشىل قوس قولدارىمەن كورىكتى مەكەندەرىن قايتا قۇرۋعا، قاجىماي - تالماي كۇرەس جۇرگىزۋ ارقىلى باقىتتى تۇرمىس جاراتۋعا جەتەكتەۋ كەرەك.

  قىستاقتان اتتاناردا قىستاق تۇرعىندارى اسقاق داۋىسپەن باس شۋجيگە سالامات بولىڭىز دەستى. شي جينپيڭ اۋىلداستاردىڭ مەرەكەلەرىن قۇتتىقتاپ، كوپشىلىكتىڭ ايداعارداي ايباتتى، جولبارىستاي قايراتتى بولاتىن، ايداعارداي سامعاپ، جولبارىستاي ۇمتىلاتىن ىسكەر ارىنمەن تۇرمىستارىن كۇن سايىن جاقسارتۋىن ءۇمىت ەتتى.

  وسىدان سوڭ، شي جينپيڭ اۆتوكولىكپەن فىنشي اۋدانى سىڭنيان قالاشىعى دۋانسۇن قىستاعىنا كەلىپ، سول جەردىڭ كەدەيلىكتەن ارىلتۋدان قامال الۋ جەتىستىكتەرىن بەكەمدەۋ، كەڭەيتۋ، وعان جالعاستىرا اۋىل - قىستاقتى گۇلدەندىرۋدى ىلگەرىلەتۋ، نەگىزگى ساتىداعى پارتيا قۇرىلىسىن كۇشەيتۋ سياقتى جاعدايلار جونىندە قىزمەت تەكسەردى. حالىققا قولايلى قىزمەت وتەۋ ورتالىعىندا قىستاق كادرى شي جينپيڭگە وزدەرىنىڭ حالىق ءۇشىن قىزمەت ىستەۋ، نەگىزگى ساتىنىڭ باسقارۋ دەڭگەيىن جوعارىلاتۋ، قايتا كەدەيلەسۋدەن ساقتانۋدى يكەمدى قاداعالاۋ جانە كومەكتەسۋ - سۇيەمەلدەۋ سياقتى ادىستەرىن تانىستىردى. قىستاق تۇرعىنى ساي ۋىنميڭنىڭ وتباسىندا شي جينپيڭ اس ءۇي، جاتىن بولمە جانە قوي قورانى ءبىر - بىردەن قاداعالاي كورىپ، وتباسى كىرىستەرىنىڭ قانشا، تۇرمىستارىنىڭ قانداي ەكەندىگىن ەگجەي - تەگجەيلى سۇراپ ۇعىستى. بۇل وتباسىنىڭ 2016 - جىلدىڭ سوڭىندا كەدەيلىكتەن ارىلعاننان كەيىن قوي باعۋعا، سىرتقا شىعىپ جۇمىس ىستەۋگە سۇيەنىپ تۇرمىستارىن بارعان سايىن شالقىتا تۇسكەندىگىن ەستىپ شي جينپيڭ ايرىقشا قۋاندى. ول بىلاي دەپ اتاپ كورسەتتى: حالىق بۇقاراسىن باقىتتى تۇرمىسقا كەنەلدىرۋ − پارتيامىزدىڭ 100 جىلدان بەرگى تاباندى تالپىنىسى، ءبىز اۋەلگى ماقساتتى ۇمىتپاي، بورىشتى ەستە بەرىك ساقتاپ، ۇرپاقتان - ۇرپاققا جالعاستىرىپ ىستەي بەرۋىمىز كەرەك.

  قىستاقتىڭ مادەنيەت الاڭى ايرىقشا دۋمانعا بولەنىپ، قىستاق تۇرعىندارى شاتتانا بارابان سوعىپ، ياڭگى بيىنە باسىپ، مەرەيلى مەرەكەنى قۋانىشپەن تويلاپ جاتىر ەكەن. باس شۋجيدىڭ كەلگەندىگىن كورگەن جۇرت اسقاق داۋىسپەن قۋانا الاقايلادى. شي جينپيڭ اۋىلداستارعا بىلاي دەدى: پارتيامىزدىڭ ءتۇبىرلى باس ماقساتى − حالىق بۇقاراسى ءۇشىن جاقسى ءىس ىستەۋ، حالىق بۇقاراسىنىڭ باقىتتى تۇرمىسى ءۇشىن ايانباي كۇرەسۋ، ۇلەس قوسۋ، قىزمەت ەتۋ. ءبىز كەدەيلىكتەن ارىلتۋدان قامال الۋ شايقاسىنىڭ جەڭىسىنە ۋاعىندا قول جەتكىزىپ، جاپپاي دوڭگەلەك داۋلەتتى قوعام ورناتۋ نىساناسىن ۋاعىندا جۇزەگە اسىردىق، مىنە ەندى جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىنا قادام تاستادىق. وسىزاماندانعان مەملەكەت قۇرۋ اۋىل شارۋاشىلىعىن، اۋىل - قىستاقتى وسىزامانداندىرۋدان ايرىلا المايدى، كەدەيلىكتەن ارىلتۋدان قامال الۋ جەتىستىكتەرىن ۇزدىكسىز بەكەمدەپ، اۋىل - قىستاقتى گۇلدەندىرۋدى تىڭعىلىقتى ىلگەرىلەتىپ، بۇقارانىڭ تۇرمىسىن اناعۇرلىم بيىك ساتىعا كوتەرىپ، اۋىل شارۋاشىلىعىن، اۋىل - قىستاقتى وسىزامانداندىرۋدى ىلگەرىلەتۋ بارىسىندا بولاشاققا ۇمتىلا ءتۇسۋ كەرەك.

  شي جينپيڭ 1 - ايدىڭ 27 - كۇنى جينجۇڭ قالاسىندا قىزمەت تەكسەردى، تەكسەرۋ - زەرتتەۋ جۇرگىزدى. سول كۇنى تۇستەن بۇرىن ول پيڭياۋ بايىرعى قالاسىنا كەلىپ، يىڭشۇن قاقپاسىنان جاياۋلاپ قالاعا كىرىپ، قالا قورعانىنا شىعىپ، قالانىڭ تۇتاس كەلبەتىنە بيىكتەن كوز جۇگىرتتى، ونان سوڭ اۆتوكولىكپەن پيڭياۋ اۋداندىق باسقارماعا كەلىپ، بايىرعى قالانىڭ تاريحي وزگەرىسى، قۇرىلىستارىنىڭ ورنالاسىمى، مادەنيەت مۇرالارىن قورعاۋ، جالعاستىرۋ سياقتى جاعدايلاردان مالىمەت تىڭدادى. پيڭياۋ بايىرعى قالاسى دۇنيە جۇزىلىك مادەنيەت مۇرالارى تىزىمىنە ەنگەن، جۇڭگونىڭ ەڭ تولىق ساقتالعان بايىرعى قالالارىنىڭ ءبىرى سانالادى. شي جينپيڭ بىلاي دەپ اتاپ كورسەتتى: تاريحي - مادەني مۇرالاردا جۇڭحۋا ۇلتىنىڭ گەنى مەن قان تامىرى ساقتالعان، ول ءبىزدىڭ بۋىنعا عانا ءتان ەمەس، بىزدەن كەيىنگى سان عاسىر ۇرپاقتارعا دا تاۋەلدى. تاريحتى قادىرلەپ، مادەنيەتتى قادىرلەپ، ەكولوگيانى قادىرلەپ، تاريحي - مادەني مۇرالاردى جاپپاي ويداعىداي قورعاپ، ساياحاتتى دامىتۋدى، ەرەكشەلىككە يە شارۋاشىلىق جۇرگىزۋدى، بايىرعى قالانى قورعاۋدى ءبىر تۇتاس ويداعىداي جوسپارلاپ، مادەني ەسكەرتكىشتەردىڭ حاۋىپسىزدىك تومەنگى شەگىن بەكەمدەپ، بۇرىنعىلاردان بىزگە قالعان باعالى بايلىقتى ويداعىداي قورعاۋىمىز كەرەك.

  پيڭياۋ سانشي ساۋداگەرلەرىنىڭ تۇلەگەن جەرى، مادەنيەتى قوردالى، رىشىڭچاڭ اقشا ايىرباس ورنى ەلىمىز فينانس كاسىبى دامۋىنىڭ باستاماسىن اشقان. رىشىڭچاڭ اقشا ايىرباس ورنى مۇراجايىندا شي جينپيڭ سانشي ساۋداگەرلەرى مادەنيەتىنىڭ جانە سانشي ساۋداگەرلەرى رۋحىنىڭ تۇلەۋى، دامۋى سياقتى جاعدايلارمەن تانىستى. ول بىلاي دەپ باسا دارىپتەدى: مادەنيەت سەنىمىن بەكەمدەپ، سانشي ساۋداگەرلەرى مادەنيەتىنىڭ ىشكى ءمانىن ىشكەرىلەي اشىپ، جۇڭحۋانىڭ تاڭداۋلى ءداستۇرلى مادەنيەتىن اناعۇرلىم ويداعىداي اسقاقتاتىپ، ەكونوميكالىق، قوعامدىق دامۋعا جانە حالىقتىڭ جوعارى ساپالى تۇرمىسىنا اناعۇرلىم ويداعىداي قىزمەت ەتۋ كەرەك.

     بايىرعى قالانىڭ وڭتۇستىك ۇلكەن كوشەسىنەن شات مەرەيلى مەرەكە لەبى ەسىپ تۇردى. شي جينپيڭ كوشەنى بويلاپ بايىرعى قالانىڭ كەلبەتىن تەكسەرىپ كورىپ، پيڭياۋ سيىر ەتى دۇكەنىنە، قولمەن سىرلانعان ىدىستار دۇكەنىنە، دۇڭحۋ ۇزاق ساقتالعان سىركە سۋى دۇكەنىنە كىرىپ، سول جەردىڭ مادەنيەت مۇرالارىن قورعاۋ، پايدالانۋ جانە ەرەكشەلىككە يە شارۋاشىلىق جۇرگىزۋ جاعدايىن ۇعىستى، سونداي - اق پيڭياۋ سيىر ەتى، تۇشپاراعا ارنالعان سىركە سۋى سياقتى مەرەكەلىك زاتتار ساتىپ الدى، ساقتامالى سىركە اشىتۋدىڭ تىرما سالۋ جۇمىسىنا دا ارالاستى. ول بىلاي دەپ اتاپ كورسەتتى: تاڭداۋلى ءداستۇرلى مادەنيەتتى جالعاستىرۋشىلاردان بولىپ، قولمەن سىرلانعان ىدىستار سەكىلدى مادەنيەت اسىلدارىن ويداعىداي قورعاپ، ۇلتتىق ەرەكشەلىككە باي ءداستۇرلى مادەنيەت شارۋاشىلىعىن ساۋلەلەندىرە ءتۇسىپ، دۇنيە جۇزىنە بەتتەتۋ كەرەك. سول ارادا تۇرعان بۇقارا باس شۋجيگە جاپا - تارماعاي سالەمدەستى، شي جينپيڭ كوپشىلىككە قول بۇلعاپ قۇرمەت ءبىلدىرىپ، مەرەكەلەرىنە قۇتتى بولسىن ايتتى.

  شي جينپيڭ بىلاي دەپ باسا دارىپتەدى: قازىر الەمدە ىندەت ءالى دە تارالۋدا ءارى جاڭا ەرەكشەلىكتەر دە بايقالدى، جاڭا تيپتى قۇبىلمالى ۆيرۋس تاياقشاسىنىڭ تارالۋى تەز، جۇعىمدالۋ قۋاتى كۇشتى بولىپ وتىر، وعان قىس ماۋسىمىندا ءتۇرلى جۇقپالى اۋرۋلاردىڭ ءجيى تۋىلۋ جايتى قوسىلىپ، ساقتانۋ - تىزگىندەۋدىڭ حاۋىپ - قاتەرىن ارتتىردى. ءار دارەجەلى پارتكومدار مەن ۇكىمەتتەر ىندەتتەن ساقتانۋ - تىزگىندەۋ سىندى ارقاۋدى قاشاندا مىقتاپ شيراتىپ، الدىن الۋدى نەگىز ەتۋگە تاباندى بولىپ، سىرتتان كىرۋدەن ساقتانۋ، ىشتە بەلەڭ بەرۋدەن ساقتانۋ قىزمەتىن ۇزدىكسىز تۇردە مىقتى، ناقتى، ەگجەي - تەگجەيلى يگەرىپ، ساقتانۋ - تىزگىندەۋدىڭ عىلميلىعىن، دالدىگىن جوعارىلاتۋ كەرەك. بۇقارانىڭ اۋرۋ كورسەتۋى، قامداۋ، جول قاتىناسى سياقتى جاقتاردا دا جۇمىستى جالپى بەتتىك ىلگەرى باستىرىپ، حالىقتىڭ ءومىرىنىڭ حاۋىپسىزدىگىن جانە نەگىزگى تۇرمىستىق قاجەتىن ويداعىداي قامتاماسىز ەتۋ كەرەك.

  شي جينپيڭ قىس ماۋسىمىنداعى ەلەكترمەن، جىلۋمەن قامداۋ قىزمەتىنە ايرىقشا كوڭىل ءبولدى. 1 - ايدىڭ 27 - كۇنى تۇستەن كەيىن ول سانشي رۇيگۋاڭ جىلۋ ەلەكتر شەكتى جاۋاپكەرشىلىك سەرىكتەستىگىنە كەلىپ قىزمەت تەكسەرىپ، تەكسەرۋ - زەرتتەۋ جۇرگىزدى. جاقىنعى جىلداردان بەرى بۇل كاسىپورىن عىلىم - تەحنيكادا جاڭالىق اشۋ ارقىلى كاسىپورىننىڭ دامۋىنا دەم بەرۋگە تاباندى بولىپ، كومىر جاعاتىن گەنەراتور اگراگاتتارىن اسا تومەن دەڭگەيدە لاس زات شىعارۋ بويىنشا وزگەرتۋ، قالدىق جىلۋدى ساتى - ساتى بويىنشا پايدالانىپ، قاتتى قوقىستاردى كەشەندى پايدالانۋ، كومىر قىشقىل گازىن جيىپ الۋ سياقتى جاقتاردا بەلسەندى ناتيجەگە قول جەتكىزدى. شي جينپيڭ الدىمەن سانشي ولكەسىنىڭ ەنەرگيا توڭكەرىسى كەشەندى رەفورماسىن تۇيىندە سىناق ەتۋ جانە كاسىپورىنداردىڭ كومىردەن تازا، جوعارى ءونىمدى پايدالانۋدى ىلگەرىلەتۋ، ءداستۇرلى كاسىپ سالالارىنىڭ تيبىن وزگەرتۋدى، دارەجەسىن جوعارىلاتۋدى جەدەلدەتۋ سياقتى قىزمەتتەر تۋرالى تانىستىرۋدى تىڭدادى. كاسىپورىننىڭ جىلۋ ەلەكتر گەنەراتور اگراگاتتارى ءوندىرىسىن شوعىرلى مەڭگەرۋ بولمەسىندە، جانارزاتتى زەردەلى باسقارۋ - مەڭگەرۋ ورتالىعىندا، قۇلتەمىرمەن اۆتوماتتى حيميالىق سارالاۋ جۇرگىزۋ بولمەسىندە شي جينپيڭ ءوندىرىس اينالىمى ساندى مالىمەتتەرىن تەكسەرىپ كورىپ، سول اراداعى تەحنيكتەردەن كاسىپورىننىڭ ەنەرگيا ۇنەمدەۋدى، لاس زاتتاردىڭ شىعارىلۋىن ازايتۋدى كۇشەيتۋ، ءوندىرىس ونىمدىلىگىن ارتتىرۋ جانە ءوندىرىس حاۋىپسىزدىگىن قامتاماسىز ەتۋ سياقتى جاعدايلاردى ۇعىستى. شي جينپيڭ وسىدان سوڭ كاسىپورىننىڭ كومىر ساقتاۋ الاڭىنا كىرىپ ايالداپ، كومىر الاڭىنىڭ كومىر ساقتاۋ سياقتى جاعدايلارىن تەكسەرىپ كوردى. ول بىلاي دەپ باسا دارىپتەدى: سانشي بۇكىل مەملەكەتتىڭ ەنەرگيا سالاسىنداعى اۋىر حيميا ونەركاسىپ بازاسى رەتىندە مەملەكەتتىڭ دامۋىنا ماڭىزدى ۇلەس قوستى. كومىر قىشقىل گازىنىڭ شىعارىلۋىن ەڭ جوعارى ماننەن اسىرماۋدى، كومىر قىشقىل گازىن بەيتاراپتاندىرۋدى ىلگەرىلەتۋدى بىزگە باسقالار مىندەتتەپ وتىرعان جوق، قايتا ءوزىمىز، ءسوز جوق، ىستەۋگە ءتيىستى ءىسىمىز، دەسە دە بۇل جەڭىل - جەلپى، وڭاي - وسپاق جۇزەگە اسىرا سالاتىن ءىس ەمەس، كۇتىپ وتىرۋعا كەلمەيدى، اسىعۋعا دا بولمايدى. ءسوز جوق، وبيەكتيۆ زاڭدىلىققا قۇرمەت ەتىپ، قادام ءتارتىبىن، ريتىمدى يگەرىپ، الدىمەن جاڭاسىن ورناتىپ، سوڭىنان ەسكىسىن جويىپ، ورنىقتىلىق بارىسىندا ىلگەرىلەتۋ كەرەك. كومىر مول، مۇناي تاپشى، گاز از بولۋ ەلىمىزدىڭ مەملەكەت جاعدايى، ەل ىشىندەگى ەنەرگيا ءوندىرىسىنىڭ نەگىزىن بەكەمدەپ، كومىرمەن قامداۋ حاۋىپسىزدىگىن قامتاماسىز ەتىپ، كومىردىڭ تازا، تومەن كومىر قىشقىل گازدى دامۋى، ودان كوپ نەگىزدى پايدالانۋ، كەشەندى ساقتاۋ - تاسىمالداۋ سىندى اۋقىمدى جۇمىستى ءبىر تۇتاس جوسپارلاپ ويداعىداي يگەرىپ، جاسىل، تومەن كومىر قىشقىل گازدى تەحنيكالاردان قامال الۋدى جەدەلدەتىپ، كاسىپ سالاسى قۇرىلىمىن ساپالىلاندىرۋدى، دارەجەسىن جوعارىلاتۋدى ۇزدىكسىز ىلگەرىلەتۋ كەرەك. كومىر قىشقىل گازىنىڭ شىعارىلۋىن ەڭ جوعارى ماننەن اسىرماۋ، كومىر قىشقىل گازىن بەيتاراپتاندىرۋ نىساناسىن جۇزەگە اسىرۋدى بەلسەندى، ورنىقتى تۇردە ىلگەرىلەتىپ، ەكىنشى 100 جىلدىق كۇرەس نىساناسىن جۇزەگە اسىرۋ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە ءتيىستى ۇلەس قوسۋ كەرەك.

     كاسىپورىننىڭ جۇمىسشى - قىزمەتكەرلەرى باس شۋجيگە ىستىق ىقىلاسپەن سالەمدەستى، شي جينپيڭ كوكتەم مەرەكەسى بايلانىسىمەن كوپشىلىكتەن حال سۇرادى. ول بىلاي دەپ اتاپ كورسەتتى: ەلەكترمەن، جىلۋمەن قامداۋ ەكونوميكالىق دامۋدىڭ جالپى جاعدايىنا جانە قوعام ورنىقتىلىعىنىڭ كەلەلى جاعدايىنا ساياتىن، حالىق تۇرمىسىنا قاتىستى ءىرى ءىس. پارتيا ورتالىق كوميتەتىنىڭ ەنەرگيامەن قامداۋدى قامتاماسىز ەتۋ جونىندەگى ورنالاستىرۋلارىن، تالاپتارىن دايەكتىلەندىرىپ، تياناقتاندىرىپ، كوپ شارانى قاتار قولدانىپ قامداۋ مەن قاجەتسىنۋدى رەتتەۋدى كۇشەيتىپ، ەنەرگيامەن قامداۋدى قامتاماسىز ەتۋ قابىلەتىن جوعارىلاتۋ كەرەك، ءىرى كاسىپورىندار، اسىرەسە، مەملەكەت مەنشىگىندەگى كاسىپورىندار باستاماشى بولا وتىرىپ قامداۋدى قامتاماسىز ەتىپ، باعانى ورنىقتىرىپ، حالىق تۇرمىسىنا قاجەتتى ەنەرگيامەن قامداۋدى قامتاماسىز ەتۋ جاۋاپكەرشىلىگىن كۇشەيتىپ، حالىق بۇقاراسىنىڭ قىستان حاۋىپسىز، جىلى وتۋىنە شىنايى كەپىلدىك ەتۋ كەرەك.

  شي جينپيڭ پارتيا 19 - قۇرىلتايىنان بەرى سانشيدىڭ ءتۇرلى قىزمەتتەردە قول جەتكىزگەن ناتيجەلەرىن تولىق تۇراقتاندىرىپ، سانشيدەن پارتيا ورتالىق كوميتەتىنىڭ شەشىمدەرىن، ورنالاستىرۋلارىن جاپپاي دايەكتىلەندىرىپ، تياناقتاندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنا تاباندى بولىپ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىنا بەلسەنە قىزمەت ەتىپ جانە توعىسىپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى ءبىر تۇتاس جوسپارلاپ، دامۋ مەن حاۋىپسىزدىكتى ءبىر تۇتاس جوسپارلاپ، ”التىنى ورنىقتىرۋ“، ”التىنى قامتاماسىز ەتۋ“ قىزمەتىن ۇزدىكسىز ويداعىداي ىستەپ، حالىق تۇرمىسىن ۇزدىكسىز جاقسارتىپ، جوعارى ساپالى دامۋدا ۇزدىكسىز تىڭ سەرپىلىستەرگە قول جەتكىزىپ، ءىس جۇزىندىك ارەكەتىمەن پارتيا 20 - قۇرىلتايىنىڭ جەڭىسپەن اشىلۋىن قارسى الىپ، سانشيدىڭ جاڭا ءداۋىر جۇڭگوشا سوتسياليزمدى امالياتتا ايگىلەۋىنىڭ جاڭا تاراۋىن جالعاستى جازۋدى ءۇمىت ەتتى.

  ديڭ شۋەشياڭ، ليۋ حى، چىن شي، حى ليفىڭ جانە ورتالىقتىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە سەرىك بولدى.

جاۋاپتى رەداكتور : الىمبەك نۇرالين

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.