انار بۇلت / شينجياڭ گازەتىنىڭ ءتىلشىسى گاۋ فىڭ
1 - ايدىڭ 25 - كۇنى ەسكىشە كالەندار بويىنشا كىشى جاڭا جىل مەرەكەسى، قىرباق قار جاۋعان ءسات، ءۇرىمجى قالاسى بەييۋانچۇن جاڭا بازارىندا ادامدار قايشالىسادى.
بەييۋانچۇن جاڭا بازارىندا ءار كۇنى تولايىم، بولشەك ساتىلاتىن، جەتكىزىلەتىن كوكونىس مولشەرى تۇتاس قالانىڭ تۇتىنۋ مولشەرىنىڭ ％60ىن يەلەيدى. كوكتەم مەرەكەسى قارساڭىندا مەملەكەتتىك ساناق مەكەمەسى ءۇرىمجى تەكسەرۋ اترەتىنىڭ باعا تەكسەرۋشىسى گىڭ چيڭيىڭ بەييۋانچۇن جاڭا بازارى ىشىندە مەملەكەتتىك ساناق مەكەمەسىنىڭ تۇرعىنداردىڭ تۇتىنۋ باعاسىن تەكسەرۋ جونىنەن بەلگىلەگەن باعا يەلەۋ تۇيىنىندە كوكونىس، ەت، جۇمىرتقا، جەمىس - جيدەك سىندى جاس كۇيىندەگى نەگىزگى ازىق - تۇلىكتەردىڭ سول كۇنگى باعاسىن يەلەدى.
پىڭچىڭ ساپالى كوكونىستەردى تولايىم ساتۋ، جەتكىزۋ دۇكەنىندە گىڭ چيڭيىڭ قولىنا باعا يەلەۋ اسپابىن الىپ، دۇكەن يەسى چىن جيڭنەن: ”بۇگىنگى كوكونىس باعاسى قانداي“، - دەپ سۇرادى.
”اشتى بۇرىشتىڭ ءار كيلوگرامى 12 يۋان، بايسايدىڭ ءار كيلوگرامى 2.5 يۋان، جەمجەمىلدىڭ ءار كيلوگرامى 11 يۋان...“، چىن جيڭ سول كۇنگى ولشەمدى زات باعاسىن مالىمدەگەننەن كەيىن، گىڭ چيڭيىڭ دەرەۋ وسى ساندى مالىمەتتى CPI (تۇرعىنداردىڭ تۇتىنۋ باعا كورسەتكىشى) ساندى مالىمەتتى جيناۋ جۇيەسىنە جولداپ ۇلگىردى.
بەييۋانچۇن جاڭا بازارىندا جالپى بەلگىلەنگەن 12 باعا تەكسەرۋ ءتۇيىنى بار، گىڭ چيڭيىڭ وسى باعا تەكسەرۋ تۇيىنىندە ءتۇرلى كوكونىستى، شوشقا، سيىر، قوي، تاۋىق ەتىن، جەمىس - جيدەك، جۇمىرتقا، سۋ ونىمدەرىن قامتىعان 72 ءتۇرلى تاۋاردىڭ باعاسىن ەستەلىككە الادى. بۇل تاۋارلاردى ساناققا الۋ تاراۋلارى تۇرعىندار كۇندەلىكتى ءبىرشاما مولىنان تۇتىناتىن تاۋارلار دەپ تۇراقتاندىرعان بولىپ، ”ولشەمدى تاۋارلار“ اتالعان.
باعانى ساعات 14تەن ىلگەرى مالىمدەپ بولۋ ءۇشىن، گىڭ چيڭيىڭ بازارعا تاڭ بوزىنان كەلدى. وسى ولشەمدى تاۋارلاردىڭ باعاسىن يەلەۋ ءۇشىن ول بازار ىشىندە ارلى - بەرلى 10 كيلومەتردەي جول باستى. ”باعانى يەلەۋ دەگەنىمىز جاپالى جۇمىس، الايدا مەن يەلەگەن باعا ۇكىمەت تاراۋلارىنىڭ زات باعاسىنداعى وزگەرىستەردى دالمە - ءدال يەلەۋىنە، قاتىستى قامداۋدى قامتاماسىز ەتۋ، باعانى ورنىقتىرۋ شارالارىن قولدانۋىنا مۇمكىندىك جاسايتىنىن ويلاعانىمدا شارشاعانىمدى ۇمىتىپ قالامىن“، - دەدى گىڭ چيڭيىڭ.
گىڭ چيڭيىڭ شۇعىلدانىپ وتىرعان تۇرعىنداردىڭ تۇتىنۋ باعاسىن تەكسەرۋ جۇمىسى − مەملەكەتتىك ساناق مەكەمەسىنىڭ تۇتاس مەملەكەت كولەمىندە ۇزاق جىل بويى ورىستەتكەن تەكسەرۋىنىڭ ءبىر ءتۇرى بولىپ، ازىق - تۇلىك، تەمەكى، اراق، كيىم - كەشەك، قونىستىق، تۇرمىستىق بۇيىمدار، سونداي - اق قىزمەت وتەۋ سىندى 8 ۇلكەن تۇردەگى تاۋار جانە باعا جونىنەن قىزمەت وتەۋگە ادام بەلگىلەپ، ءتۇيىن بەلگىلەپ، ۋاقىت بەلگىلەپ جۇرگىزگەن تەكسەرۋى سانالادى. بۇل تۇردەگى تەكسەرۋدە يەلەگەن باعا ساندى مالىمەتى جۇيەلى بارىستان وتكەن سوڭ، CPI ناتيجەسى شىعادى، بۇل باعا وزگەرىسىنىڭ قوعامعا، ەكونوميكاعا جانە تۇرعىنداردىڭ تۇرمىسىنا دەگەن ىقپالىنا تالداۋ جاساۋعا، زەرتتەۋگە قولدانىلىپ، ءار دارەجەلى ۇكىمەتتەردىڭ ساياسات جانە جوسپار بەلگىلەۋىن، ماكرولىق جاقتان مەڭگەرۋ قاجەتىن قاناعاتتاندىرادى، سونداي - اق حالىق شارۋاشىلىعىنىڭ ەسەبىن دايەكپەن قامدايدى.
كەزەكتە شينجياڭدا 18 اۋدان، قالا مەملەكەتتىك ساناق مەكەمەسى جاعىنان تۇرعىنداردىڭ تۇتىنۋ باعاسىن تەكسەرۋىن ورىستەتەتىن ورنى بولىپ تاڭدالدى، مۇنىڭ ىشىندە ءۇرىمجى قالاسى دا بار.
ءار ايدىڭ 5 - كۇنى، 10 - كۇندەرى گىڭ چيڭيىڭ بەييۋانچۇن جاڭا بازارىندا تاۋارلاردىڭ باعاسىن تەكسەرەدى، وسى جولىندا ءارقانداي قيىنشىلىقتان تايسالعان ەمەس. باعانى تەكسەرۋشى بولىپ ىستەگەن 2 جىلدان بەرى ول بەلگىلەنگەن باعا يەلەۋ تۇيىنىندەگى تيجاراتشىلارمەن ابدەن ۇيىرلەسىپ، ولاردىڭ قولداۋى مەن سايكەسۋىنە يە بولدى. يياڭ جەمىس - جيدەك ونىمدەرى دۇكەنىنىڭ تيجاراتشىسى ۋ شيۋيىڭ بىلاي دەدى: ”ءبىز بازار باعاسىن باعانى تەكسەرۋشىگە مالىمدەيمىز، بۇل باعانىڭ ورنىقتىلىعىن ساقتاۋعا پايدالى بولۋمەن بىرگە، ءبىزدىڭ شارۋاشىلىقپەن ورنىقتى اينالىسۋىمىزعا دا ءتيىمدى“.
ءتىلشى كوكتەم مەرەكەسى قارساڭىندا ءۇرىمجى قالاسىنداعى ءىشىنارا كوكونىستەردىڭ باعاسىنىڭ از مولشەردە جوعارىلاعاندىعىن، ەت، كوكونىس باعاسىنىڭ تۇتاس تۇلعالىق جاقتان ءبىرشاما ورنىقتى بولعاندىعىن ۇعىستى.
ءۇرىمجى بەييۋانچۇن جەمىس - جيدەك كاسىبى تيجاراتىن باسقارۋ شەكتى جاۋاپكەرشىلىك سەرىكتەستىگى ينفورماتسيا ورتالىعىنىڭ ديرەكتورى لي شۋەشان بىلاي دەدى: قازىر بازارداعى كوكونىس، ەت، جۇمىرتقا، جەمىس - جيدەكتىڭ قامداۋ مولشەرى بىلتىرعى سايكەس مەزگىلدەگىدەن كورنەكتى جوعارىلادى، ءار كۇنى 400 توننا اينالاسىندا كوكونىس، 60 توننا اينالاسىندا شوشقا، سيىر، قوي ەتى، 25 توننا اينالاسىندا جەمىس - جيدەك ساۋداسى جۇرىلەدى.
