ەلەكتر قۋاتى قىزمەتكەرلەرى ءبىر جىلداعى ەڭ قاربالاس مەزگىلگە ءوتتى

□ انار بۇلت / شينجياڭ گازەتىنىڭ ءتىلشىسى جاڭ دۇڭمەي

　　1 - ايدىڭ 25 - كۇنى ءۇرىمجى قالاسى سايباق رايونى مۋشۇيگوۋ سولتۇستىك جولىندا مەملەكەت ەلەكتر تورى ءۇرىمجى ەلەكترمەن قامداۋ سەرىكتەستىگى قالا رايونى 1 - ەلەكترمەن قامداۋ ورتالىعى شيشان ەلەكترمەن قامداۋ بولىمشەسىنىڭ جۇمىس جۇرگىزۋ بويىنشا باپتاۋ قىزمەتكەرى ادىل مەن ۋ پىڭبو ءدال وسى ارادا ەلەكتر جەلىسىن تەكسەرىپ ءجۇردى، ولار ينفرا قىزىل ساۋلەلى تەمپەراتۋرا ولشەۋ اسپابىن الىپ شىعىپ، ەلەكتر جەلىسى جوعارى كەرنەۋىندە ءتۇسىپ قالعان ساقتىق سىمداردىڭ تەمپەراتۋراسىن ولشەپ، بۇل ارادا قىزۋ نۇكتەسىنىڭ بار - جوقتىعىن، وتكىزگىش سىمداردىڭ سىدىرىلىپ قالعان - قالماعاندىعىن تەكسەردى.

　　اياق استىنداعى كۇرتىك قار باسقان سايىن ”سىقىر - سىقىر“ ەتەدى، تەمپەراتۋرانى ولشەپ بولىپ، ويداعىداي ەستەلىك العاننان كەيىن، ۋ پىڭبو بەتىن ىسقىلاي بەردى، ءتورت قاباتتى قالىڭ كيىم، قالىڭ قولعاپ، يزوتسيالاۋ اياق كيىمىن كيىپ السا دا، سۋىق ىزعارعا پانا بولمادى.

     ”ءبىز ەگجەي - تەگجەيلى تەكسەرۋىمىز كەرەك، جاڭا جىل تاياپ قالدى، تيتتەي دە توسىن جاعداي تۋىلماۋى كەرەك“. ادىل مەن ۋ پىڭبو جۇرە سويلەدى، قادامدارى دا جەدەلدەي ءتۇستى.

　　كوكتەم مەرەكەسى تاياپ قالدى، تۇرعىندار مەن كاسىپورىنداردىڭ ەلەكتردەن پايدالانۋ مولشەرى بىرتىندەپ جوعارىلادى، قالا تۇرعىندارىنىڭ جاپ - جارىق ورتادا كوكتەم مەرەكەسىن وتكىزۋى ءۇشىن، ءۇرىمجى ەلەكتر قۋاتى قىزمەتكەرلەرى ءبىر جىلداعى ەڭ قاربالاس مەزگىلگە ءوتتى.

　　وسى وڭىردەگى ەلەكتر جەلىسىن تەكسەرىپ بولعاننان كەيىن، ولار شينجياڭ جيۋديڭ اۋىل شارۋاشىلىق ونىمدەرىن تولايىم ساتۋ بازارىنا جەدەل جەتتى، بۇل اراداعى ايىرىپ - قوسقىش ورنى بۇكىل بازارداعى ساۋداگەرلەر مەن ماڭايىنداعى شاعىن اۋماقتارداعى 1500دەن استام تۇرعىندى ەلەكترمەن قامدايدى.

　　”سىزدەردىڭ بۇل اراداعى ەلەكتر كوزى، ەلەكترمەن قامداۋ، ەلەكتردەن پايدالانۋ جاعدايى تۇگەلدەي قالىپتى شىعار“؟ - دەپ سۇرادى ايىرىپ - قوسقىش ورنىنا كىرگەن ادىل شينجياڭ جيۋديڭ اۋىل شارۋاشىلىق ونىمدەرىن تولايىم ساتۋ بازارى جالپىلىق جوندەۋ بانىنىڭ بانجاڭى حۋ يۇڭنان. ”ماسەلە جوق، سەندەر تەكسەرسەڭدەر، ءبىز ءتىپتى دە الاڭسىز بولار ەدىك“. حۋ يۇڭنىڭ جاۋابىن ەستىگەن سوڭ، ادىل مەن ۋ پىڭبو ەلەكتردەن پايدالانۋ جاعدايىن جان - جاقتىلى تەكسەرىپ ەدى، ساندى مالىمەتتەر تۇگەلدەي قالىپتى ەكەن. ”بۇل ارا بۇكىل شينجياڭداعى ەڭ ءىرى كوكونىس تولايىم ساتۋ بازارى، ەلەكتر كۇشىن قامتاماسىز ەتۋ وتە ماڭىزدى“، - دەدى ادىل.

　　سوڭعى جىلدارى ءۇرىمجى شيشان شاعىن رايونى بىرتە - بىرتە ەكى جاعى بيىك، ورتاسى الاسا تار دا ۇزىن ارنا قالىپتاستىردى، ءىشىنارا جەرلەرىندە ءجيى ۇيتقىما جەل سوعىپ، وسى ءوڭىردىڭ ەلەكترمەن قامداۋداعى تۇراقتىلىعىنا ىقپال كورسەتتى. ”بوراندى اۋا رايىنا جولىققاندا، ەلەكتر قۋاتى تاراۋلارى ەلەكتر سىمدارىنىڭ ءۇزىلىپ ءتۇسۋ احۋالىن بايقاعان سوڭ، دەر كەزىندە بىزگە بارىپ ءبىر جاقتى ەتۋدى ۇقتىرادى، بىزگە كومەگى وتە زور“، - دەدى حۋ يۇڭ.

　　قاقاعان سۋىق مەزگىلدەردە جىلۋمەن قامداۋ كاسىپورىندارىنىڭ ەلەكتردەن پايدالانۋىن قامتاماسىز ەتۋ دە ەلەكتر قۋاتى تاراۋلارىنىڭ ماڭىزدى قىزمەتتەرىنىڭ ءبىرى. ىلە - شالا ادىل مەن ۋ پىڭبو تاعى دا شيشان جولىنا ورنالاسقان ءۇرىمجى شيچىڭ جىلۋ شەكتى سەرىكتەستىگىنە باردى، توڭىرەگىندە شاعىن رايوندار تىعىز ورنالاسقاندىقتان، شيچىڭ جىلۋ سەرىكتەستىگى شيشان شاعىن رايونىنداعى تۇرعىنداردى جىلۋمەن قامداۋدى مىندەتىنە الىپتى.

　　وسى كەزدە ەلەكتر جۇمىسشىلارى بانىنىڭ بانجاڭى ازات دالايحان ەلەكتر تاراتۋ بولمەسىندە كەزەكشى ەكەن، قاسىنداعى پارقازان ۇيىنەن گۇرىلدەگەن ءۇن ەستىلەدى.

　　”جۋىقتان بەرى ەلەكتردەن پايدالانۋ قالاي بولىپ جاتىر، جابدىقتاردىڭ جۇمىس جۇرگىزۋى قالىپتى شىعار...“. ادىل احۋال ۇعىسا باستادى، ونان سوڭ ينفرا قىزىل ساۋلەلى تەمپەراتۋرا ولشەۋ اسپابىن الىپ شىعىپ، ەلەكتر تاراتۋ بولمەسىندەگى جوعارى كەرنەۋلى ساندىقشانىڭ كابەلدەرىنىڭ تەمپەراتۋراسىن ولشەپ، ”11 سەلتسي گرادۋس، قالىپتى ەكەن“، - دەدى. سونان سوڭ ولار تاعى ەلەكتر جابدىقتارىنىڭ جۇمىس جۇرگىزۋى سياقتى جاعدايلاردى مۇقيات تەكسەردى.

　　ادىل مەن ۋ پىڭبو ەلەكتر جەلىسىن تەكسەرگەن كەزدە قىزمەتتەستەرى جۋ شين شيشان ەلەكترمەن قامداۋ ورنىنىڭ كەزەكشىلىك كەڭسەسىندەگى كومپيۋتەردىڭ الدىندا وتىرىپ، ساتۋ جۇيەسىندەگى الىس ارالىقتى اقشا تولەۋدى تەكسەرۋ - باقىلاۋ بەتىن تەكسەرىپ، مەرزىمدى ۋاقىتتا تۇرعىنداردىڭ الىس ارالىقتان اقشا تولەۋى ءساتسىز بولعان انىقتامانى جاڭالاپ وتىردى، ءساتسىز بولعان تاپسىرىس بايقالسا بولعانى، ول ەڭ الدىمەن شۇعىل جوندەۋ گرۋپپاسىنىڭ باستىعى ما حاۋتيانمەن حابارلاسىپ، ما حاۋتيان مەن قىزمەتتەستەرىن دەرەۋ تۇرعىنداردىڭ ۇيىنە جىبەرىپ، سول جەردىڭ وزىندە الاقانشا اسپاپ ارقىلى تۇرعىنداردىڭ ەلەكتر ساتىپ العان اقشاسىن ەلەكتر ساعاتىنا جۇكتەيدى.

　　وسى كەزدە ءۇرىمجى قالاسى سايباق رايونى حۋامەي بو - اۋ شاعىن رايونىنىڭ تۇرعىنى دۋ فاڭفي مەن جۇبايى ەلەكترمەن قامداۋ ورنىنا كەلدى، ولاردىڭ ۇيىنە بيىل 1 - ايدىڭ 8 - كۇنى زەردەلى ەلەكتر ساعات اۋىستىرىلعان ەكەن، جاڭادان اۋىستىرىلعان ەلەكتر ساعاتتان تەك ەلەكتر مولشەرى عانا كورىنىپ، اقشا سوماسى كورىنبەيدى ەكەن، 2 قارت سودان الاڭداپ كەلگەنى ەكەن.

　　”جاڭا جىل تاياپ قالدى، ەلەكتر ساعاتىندا تاعى قانشا ەلەكتر قاراجاتى قالعاندىعىن بىلەيىك دەپ ەدىك، جاڭا جىل مەرەكەسى كەزىندە ەلەكتر بولماي قالۋدان ساقتانايىق دەگەنىمىز عوي“، - دەدى دۋ فاڭفي ابىرجىپ. جۋ شين قول تەلەفونىن الىپ شىعىپ، ولاردىڭ قول تەلەفونىنا ”ينتەرنەتتىك مەملەكەت ەلەكتر تورى APP“ىن قولما - قول ءتۇسىرىپ بەردى. ”بۇدان كەيىن ۇيدە وتىرىپ ءار كۇنگى ەلەكتر تۇتىنۋ مولشەرىن تەكسەرىپ وتىرۋىمىزعا بولاتىن بولدى، بۇلاي ىستەۋ وتە قولايلى ەكەن، كوپ راقىمەت“! - دەدى دۋ فاڭفي مەن جۇبايى ەلەكترمەن قامداۋ ورنىنىڭ قاقپاسىنان كۇلىمدەي شىعىپ بارا جاتىپ.