ەلىمىزدىڭ قۇرلىقتا قۋاتى ەڭ زور 20 جەل كۇشى گەنەراتور اگراگاتى قۇمىلدا تابىس ەتىلدى
انار بۇلت / شينجياڭ گازەتىنىڭ ءتىلشىسى ۋي يۇڭگۇي 1 - ايدىڭ 24 - كۇنى قۇمىلدان حابارلايدى. 1 - ايدىڭ 22 - كۇنى ەلىمىزدىڭ قۇرلىقتا قولدانىلۋ قۋاتى ەڭ زور بولعان جوعارى جىلدامدىقتاعى قوزعالتۋعا تولىق قۋاتتى جيىلىك تۇرلەندىرگىش جەل ەلەكتر گەنەراتور اگراگاتتارى − 5 مەگاۆاتتىق جەل ەلەكتر گەنەراتور اگراگاتتارىنان 20 داناسى قۇمىلدا ءوندىرىس جەلىسىنەن شىعىپ قولدانىسقا بەرىلدى.
وسى توپتاعى گەنەراتور اگراگاتتارىن شينجياڭ حايجۋاڭ جەل ەلەكتر جابدىقتارى شەكتى سەرىكتەستىگى وندىرگەن، بۇل سەرىكتەستىك قۇمىل جوعارى، جاڭا تەحنيكالىق كاسىپ سالاسىن اشۋ رايونىنا ورنالاسقان، اۆتونوميالى رايونداعى ارنايىلانعان، كەمەلدەنگەن، ەرەكشە، جاڭا ”شاعىن الپاۋىت“ كاسپورىننىڭ ءبىرى.
1 - ايدىڭ 22 - كۇنى ءتىلشى وسى سەرىكتەستىكتىڭ باس قۇراستىرۋ سەحىنان 6 جۇمىس ورنىندا 5 مەگاۆاتتىق جەل ەلەكتر گەنەراتور اگراگاتتارىنىڭ ءبىر ۋاقىتتا قۇراستىرىلىپ جاتقاندىعىن كوردى؛ كوتەرۋ سالماعى 200 توننالىق پورتال كراننىڭ استىندا جۇمىسشىلار ءبىر قوزعالتۋ جۇيەسىنە اسپا ارقان ءىلىپ، كرانمەن كوتەرگەننەن كەيىن، ونى سونداعى تاعى ءبىر گەنەراتور اگراگاتىنا ورناتىپ جاتتى.
”2 مەگاۆاتتىق جەل ەلەكتر گەنەراتور اگراگاتتارىنان باستاپ، ءبىز اناعۇرلىم زور قۋاتتى جەل ەلەكتر گەنەراتور اگراگاتتارىن ءوندىرۋ نىساناسىنا قاراي قادام تاستادىق“، وسى سەرىكتەستىكتىڭ باس ديرەكتورى جي رۇييۋان بىلاي دەدى: ”2021 - جىلى 4 - ايدىڭ 16 - كۇنى سەرىكتەستىكتىڭ 3.4 مەگاۆاتتىق جەل ەلەكتر گەنەراتور اگراگاتتارى ءوندىرىس جەلىسىنەن شىقتى؛ 12 - ايدىڭ 14 - كۇنى سەرىكتەستىك وندىرگەن رايونىمىزداعى تۇڭعىش 5 مەگاۆاتتىق جەل ەلەكتر گەنەراتور اگراگاتتارى ءوندىرىس جەلىسىنەن شىقتى، ەگەر تاپسىرىس جەتكىلىكتى بولسا، 5 مەگاۆاتتىق جەل ەلەكتر گەنەراتور اگراگاتتارىنىڭ ايلىق ءوندىرىس قۋاتى 60 داناعا جەتەدى. مەجەمەن بيىل 5 - ايدا 6.25 مەگاۆاتتىق جەل ەلەكتر گەنەراتور اگراگاتتارىن قۇراستىرىپ ءوندىرۋ باستالادى“.
5 مەگاۆاتتىق جەل ەلەكتر گەنەراتور اگراگاتتارى كەزەكتە ەلىمىزدەگى قۇرلىقتا قولدانىلىم قۋاتى ەڭ ۇلكەن گەنەراتور اگراگاتتارى سانالادى. شينجياڭ - گۋاڭدۇڭ ەنەرگياسى قۇمىل 13 بولمەلى ءۇيىنىڭ 1 - مەرزىمدىك 50 مىڭ كيلوۆاتتىق جەل ەلەكتر نىسانىنىڭ جۇمىس باسى جاۋاپتىسى تاۋ شيانبو تانىستىرىپ: قازىر 5 مەگاۆاتتىق جەل ەلەكتر گەنەراتور اگراگاتتارىنان 3 داناسى كرانمەن قۇراستىرىلدى، 2 - ايدىڭ سوڭىندا قالعاندارى تۇگەلدەي كرانمەن قۇراستىرىلىپ بولادى، - دەدى.
”اگراگاتتارعا قالاقشا ورناتىلعاننان كەيىن، قالاقشانىڭ ۇشار باسىنا دەيىنگى بيىكتىگى 180 مەتر بولىپ، 60 قابات عيماراتتىڭ بيىكتىگىمەن بارابار، سالماعى 350 توننادان اسىپ، ونى ەرەكشە كرانمەن قۇراستىرۋعا تۋرا كەلەدى. بۇل قازىر شينجياڭنىڭ جەل ەلەكتر الاڭىنداعى ەڭ ۇلكەن ’جەل تيىرمەن‘ سانالادى“، - دەدى شينجياڭ حايجۋاڭ جەل ەلەكتر جابدىقتارى شەكتى سەرىكتەستىگى جاساۋ ءبولىمىنىڭ ءوندىرىس باسقارۋشىسى سۇڭ گۋاڭحۇي ماقتانىشپەن.
ۇعىسۋعا قاراعاندا، بۇل سەرىكتەستىك قۇراستىرىپ وندىرگەن 5 مەگاۆاتتىق جەل گەنەراتور اگراگاتتارى بولشەكتەرىنىڭ ىشىندە قالاقشا، مۇنارا تۇتىكتەردى جەكە - جەكە قۇمىل جوعارى، جاڭا تەحنيكالىق كاسىپ سالاسى اشۋ رايونىنداعى شينجياڭ شۋاڭرۇي جەل ەلەكتر قالاقشا شەكتى سەرىكتەستىگى، شينجياڭ تايشىڭ جەل ەنەرگياسى جابدىقتارى شەكتى سەرىكتەستىگى وندىرگەن، گەنەراتور اگراگاتتارىنىڭ ىشىندەگى باسقا نەگىزگى تۇلعالىق جابدىقتاردى جۇڭگو كەمە اۋىر ونەركاسىپ توبى حايجۋاڭ جەل ەلەكتر شەكتى جارنا سەرىكتەستىگى وندىرگەن.
10 نەشە جىلدىق دامۋ ارقىلى قۇمىل جوعارى، جاڭا تەحنيكالىق كاسىپ سالاسىن اشۋ رايونى جەل گەنەراتور اگراگاتتارىنىڭ مۇنارا تۇتىگى، قالاقشاسى، ماشينا بولمە جاپقىشى، فلانەتس، جەل كورىگى گەنەراتورى سياقتى نەگىزگى تۇلعالىق جابدىقتارىن جەرگىلىكتى ورىندا ءوندىرۋدى جۇزەگە اسىردى، نەگىزگى قۇراستىرۋ بولشەكتەرىن جەرگىلىكتى ورىندا ءوندىرۋ مولشەرى ％70تەن اسىپ، جىلىنا 3 ميلليون كيلوۆاتتىق جەل كورىگى، 1000 سايكەستى قالاقشا، 1000 مۇنارا تۇتىگى، 2400 جەل ەلەكتر فلانەتسىن وندىرەتىن ەلەكتر جابدىقتارىن ءوندىرۋ، مانەرلەۋ كولەمىن قالىپتاستىردى، بۇل باتىس سولتۇستىك وڭىردەگى تۇڭعىش جەل ەلەكتر كاسىپ سالاسى تىزبەگى شوعىرى بولىپ، اۆتونوميالى رايون جاعىنان وزىق جابدىق جاساۋ كاسىبى بازاسى بولىپ بەلگىلەندى.
