− باس شۋجي شي جينپيڭنىڭ وليمپيادا جونىندەگى ماڭىزدى بايىمداۋلارىنداعى جۇڭگو امالياتى
□ شينحۋا اگەنتتىگىنىڭ تىلشىلەرى جوۋ جيە، سۋ بين، ۋاڭ يۇڭ، ياڭ فان
جۇڭحۋانىڭ بايتاق دالاسى وليمپيادانىڭ باس الاۋىن تۇتاندىراتىن قاسيەتتى ءساتتى تاعى قارسى الماق، بۇكىل دۇنيە جۇزىندەگى سپورتشىلار بەس ساقينالى تۋدىڭ استىندا باس قوسىپ، ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋداي“ وليمپيادا ناقىلىنىڭ ۇندەۋىندە ەرەن شۇعىلاعا تالپىنىپ، سپورتتىڭ كوركەمدىگىن ايگىلەيدى. بەيجيڭ دۇنيە جۇزىندەگى جازعى وليمپيادا سپورت جارىسىن دا، قىسقى وليمپيادا سپورت جارىسىن دا وتكىزگەن تۇڭعىش ”قوس وليمپيادا قالاسىنا“ اينالىپ، وليمپيادا تاريحىندا بوياۋى قانىق ءبىر پاراق جازادى.
تەرەڭ ويلاساڭ پايداسى باياندى بولادى، جاقسى جوسپارلاساڭ ارەكەتىڭ ءونىمدى بولادى.
بەيجيڭ 2022 - جىلعى قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىنىڭ نەگىزگى تاقىرىپتىق ۇرانى ”بولاشاققا بىرگە اتتانايىق“ جۇڭگونىڭ دۇنيە جۇزىنە جولداعان قول ۇستاسا بولاشاقتى بىرگە جاراتۋدىڭ ءداۋىر ءۇنى، ونان دا ماڭىزدىسى، ادامزاتتىڭ تاعدىرلاس ورتاق تۇلعاسىن قۇرۋ ۇستانىمىنىڭ وليمپيادا سپورت سالاسىنداعى جاندى تۇسىندىرمەسى.
باتىرلىقتى جەڭىس - جەڭىلىسپەن ولشەمەيمىز، سونىمەن قاتار باتىر دا باتىلدىقپەن جۇرتتان وزۋى، باتىلدىقپەن بىرىنشىلىككە تالپىنۋى كەرەك −
وليمپيادا رۋحىن ارقاۋ ەتىپ، باس شۋجي شي جينپيڭنىڭ باتىر كوزقاراسى، جەڭىس - جەڭىلىس كوزقاراسى جۇڭگو دەنە تاربيە ساڭلاقتارىن تاماشا ناتيجە جاراتۋعا، وبراز ايگىلەۋگە جەتەكتەدى جانە شابىتتاندىردى
1 - ايدىڭ 4 - كۇنى باس شۋجي شي جينپيڭ بەيجيڭدە 2022 - جىلعى قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ قىزمەتىن تەكسەردى.
”ومىردە قانشا رەت شايقاس ورايى كەلەدى دەيسىڭ، ايانباي شايقاسۋعا تاتيدى. قاتتى ايازعا سۇيەك قارىر شىداماسا، توزبەسە، مەيحۋا گۇلى اڭقىتا الماس، جۇپار ءيىسىن وزگەشە؟“. 7 - اقپان زاۆودى قار - مۇز ويىن تۇرلەرى بويىنشا جاتتىعۋ بازاسىنىڭ ارناۋلى دەنە قۋاتتىق جاتتىعۋ سارايىندا باس شۋجيدىڭ تەبىرەنىسكە تولى ءسوزى كوپشىلىكتىڭ كوڭىلىن كولدەي تولقىتتى.
2013 - جىلى 11 - ايدىڭ 19 - كۇنى ءتوراعا شي جينپيڭ حالىقارالىق وليمپيادا كوميتەتىنىڭ ءتوراعاسى باحپەن كەزدەسكەندە: دەنە تاربيە حالىقتىڭ سالاماتتىق ورەسىن جوعارىلاتىپ قانا قالماستان، ءار ەل حالىقتارىنىڭ ءوزارا ءتۇسىنىسۋى مەن دوستىعىن دا جەبەيدى. ىنتىماقتى، دوس، بەيبىت وليمپيادا رۋحى جۇڭگودا جۇرت جۇرەگىنە تەرەڭ ۇيالادى، - دەپ اتاپ كورسەتتى.
2014 - جىلى 2 - ايدىڭ 7 - كۇنى باس شۋجي شي جينپيڭ رەسەيدىڭ سوچيىندا 22 - كەزەكتى قىسقى وليمپيادا سپورت جارىسىنا قاتىناسىپ جاتقان جۇڭگو دەنە تاربيە ۋاكىلدەر ۇيىرمەسىمەن ىقىلاستى امانداسقاندا مىنالاردى ءبىلدىردى: ناتيجە تەك قانا مەدال الۋدا نەمەسە قانشا مەدال الۋدا ەمەس، ونان دا ماڭىزدىسى، وليمپيادا رۋحىن ايگىلەپ، ءوزىن تىنباي قۇدىرەتتەندىرىپ، ءوز شەكتەمەلەرىن جەڭىپ، بۇرىنعى دەڭگەيىنەن اسىپ تۇسۋدە.
”اسكەردى مىڭ كۇن باپتاپ، ءبىر كۇن ىسكە سالادى. وسى كەزدە شايقاسپاي، قاشان شايقاسپاقپىز“. باس شۋجيدىڭ ءسوزى الاڭداعى ءار ادامدى جىگەرلەندىردى.
2014 - جىلى 8 - ايدىڭ 15 - كۇنى باس شۋجي شي جينپيڭ نانجيڭ جاستار وليمپياداسى سپورت جارىسىنا قاتىناسقان جۇڭگو دەنە تاربيە ۋاكىلدەر ۇيىرمەسىمەن ىقىلاستى امانداسقاندا بىلاي دەپ باسا دارىپتەدى: سىزدەردىڭ وليمپيادا رۋحىن جانە جۇڭحۋا دەنە تاربيە رۋحىن اسقاقتاتىپ، كوڭىل كۇيدى تىنىشتاندىرىپ، قىسىمنان ارىلىپ، جەڭگەندە اسقاقتاماي، جەڭىلگەندە جاسىماي، جاستار وليمپيادا سپورت جارىسى كەزىندەگى جارىسۋ، ۇيرەنۋ، اۋىس - كۇيىس جاساۋدىڭ ءاربىر بارىسىنان بارىنشا ءلاززاتتانۋلارىڭىزدى ءۇمىت ەتەمىن. كوپشىلىك دۇنيە جۇزىندەگى ءار ەل، ءار ءوڭىر جاستارىمەن ءوزارا اڭگىمەلەسىپ، تۇسىنىستىك پەن دوستىقتى ارتتىرۋ كەرەك.
2016 - جىلى 8 - ايدىڭ 25 - كۇنى باس شۋجي شي جينپيڭ 31 - كەزەكتى وليمپيادا سپورت جارىسىنا قاتىناسىپ جاتقان جۇڭگو دەنە تاربيە ۋاكىلدەر ۇيىرمەسىمەن كەزدەسكەندە تەرەڭ ىقىلاسپەن بىلاي دەدى: ”ءبىز باتىرلىقتى جەڭىس - جەڭىلىسپەن ولشەمەيمىز، سونىمەن بىرگە باتىر دا باتىلدىقپەن جۇرتتان وزۋى، باتىلدىقپەن بىرىنشىلىككە تالپىنۋى كەرەك“.
”وليمپيادا سپورت جارىسى سىندى مۇنداي جوعارى دەڭگەيدەگى باسەكە ورنىندا بىرىنشىلىككە تالپىنۋ، التىن مەدال، مەدال الۋ وتە قيىن ءىس، التىن مەدال، مەدال العاندار قۇرمەتتەۋگە جانە ماداقتاۋعا تاتيدى. سونىمەن بىرگە ءوز شەكتەمەلەرىن جەڭىپ، بۇرىنعى دەڭگەيىنەن اسىپ تۇسكەندە، التىن مەدال، مەدال الا الماسا دا، بىردەي قۇرمەتتەۋگە جانە ماداقتاۋعا تاتيدى“.
”ەلىمىزدىڭ دەنە تاربيە ساڭلاقتارىنىڭ ريودە - جانەيرو وليمپيادا سپورت جارىسىنداعى بەينەسى قۋاتتى وڭ ەنەرگيا كورسەتىپ، ’ومىردە قانشا رەت شايقاس ورايى كەلەدى دەيسىڭ‘ دەگەن كۇرەس رۋحىن كورسەتتى. ’قوس 100 جىلدىق‘ كۇرەس نىساناسىن جۇزەگە اسىرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ وسىنداي رۋحتى قاجەت ەتەدى“.
باتىرلىقتى جەڭىس - جەڭىلىسپەن ولشەمەيمىز، باتىر دا باتىلدىقپەن جۇرتتان وزۋى كەرەك. باس شۋجيدىڭ وليمپيادا رۋحى جونىندەگى ماڭىزدى بايىمداۋلارى جەڭىس پەن جەڭىلىستىڭ، ساتتىلىك پەن ساتسىزدىكتىڭ ديالەكتيكالى قاتىناسىن تەرەڭ ءتۇسىندىردى ءارى وليمپيادا ناقىلى ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋ“ مەن ”ماڭىزدىسى قاتىناسۋدا“ دەگەنگە كەمەلدى تۇسىنىك بەردى.
باس شۋجيدىڭ ”بورىش مەنىڭ ارقامدا، كۇرەستە مەن بارمىن“ دەگەن ىقىلاستى ءتالىمىن ەستەرىندە بەرىك ساقتاعان دەنە تاربيە ساڭلاقتارى جاتتىعۋ الاڭدارىندا تەرلەرىن توگىپ، باسەكە الاڭدارىندا ەرلىكپەن ەلدەن وزۋعا تالپىنىپ، ءوز شەكتەمەلەرىن جەڭۋدىڭ، بۇرىنعى دەڭگەيىنەن اسىپ ءتۇسۋدىڭ تالاي - تالاي تاماشا تاراۋلارىن جازىپ، وليمپيادا سپورتىنىڭ ەرەندىككە تالپىنۋ اقيقاتىن، سونداي - اق ”اسكەردى مىڭ كۇن باپتاپ، ءبىر كۇن ىسكە سالادى. وسى كەزدە شايقاسپاي، قاشان شايقاسپاقپىز“ دەگەن ءسوزدىڭ ىشكى ءمانىن ءتۇسىندىردى.
38 التىن مەدال، 32 كۇمىس مەدال، 18 قولا مەدال، بۇل جۇڭگو دەنە تاربيە ۋاكىلدەر ۇيىرمەسىنىڭ توكيو وليمپيادا سپورت جارىسىندا تاپسىرعان ناتيجە كەستەسى. وليمپيادا ساڭلاقتارى جۇڭگولىقتاردىڭ كوڭىلىندەگى ۇلگىگە اينالىپ، قوعامداعى جۇرتتى سپورت كوركەمدىگى جونىندە تەرەڭ ويلانۋعا جەتەكتەدى.
9 سەكۋند 83 تاقىل! ازيا رەكوردى جاڭالاندى! سۋ بيڭتيان وليمپيادا سپورت جارىسىنداعى جۇرتتىڭ نازارى ەڭ كوپ تۇسەتىن ەرلەردىڭ 100 مەترگە جۇگىرۋ شەشۋشى جارىسى الاڭىندا جۇڭگولىقتاردىڭ بەينەسىن ءبىرىنشى رەت كورسەتتى. وليمپيادا سپورت جارىسىنا 3 رەت قاتىناسىپ، مەدال الا الماسا دا، ونىڭ ناتيجەسى التىن مەدالدان دا قۇندى، ونىڭ ارمان جولىندا تىنباي تالپىنعانى ادامدى اسەرلەندىرەدى.
توكيو وليمپيادا سپورت جارىسى اياقتالعانىنا جارتى جىل بولماي، بەيجيڭ قىسقى وليمپيادا سپورت جارىسى وليمپيادا سپورتىنىڭ ۇتىلامالى تاياقشاسىن وتكىزىپ الدى، الەمنىڭ نازارى ازياعا تاعى شوعىرلاندى.
پيوڭچاڭ قىسقى وليمپيادا سپورت جارىسىنىڭ ەرلەردىڭ قىسقا ارالىقتا تەز سىرعاناۋ 500 مەترلىك شەشۋشى جارىسىندا، ۋ داجيڭ اعالاپ الدا ءجۇرىپ، ارىپتەستەرىنە قاراسىن كورسەتپەي كەتتى. سيلىق الۋ ساحناسىنا شىققاندا، ول ساۋساقتارىن سول جاق كوكىرەگىنە قويىپ تۇردى، وندا بەس جۇلدىزدى نارت قىزىل تۋ باسىلعان.
قىسقى وليمپيادا سپورت جارىسىنىڭ باستالۋىنا ۋاقىتتى شەگەرىپ ساناعاندا ءبىر اي قالعان ساتتە، الاڭدا باس شۋجيدىڭ ىقىلاستى تاپسىرماسىن زەر سالا تىڭداعان ۋ داجيڭ الداعى قىسقى وليمپيادا سپورت جارىسىنداعى بەلدەسۋگە دەگەن سەنىمى نىعايا ءتۇستى. ”باس شۋجيدىڭ وسى ۋاقىتتا كەلىپ ءبىزدى جىگەرلەندىرۋى ماعان زور شابىت سيلادى، مەنى ءتىپتى قۇلشىنا تالپىنۋعا، ءبىزدى ’ەلىمىزدىڭ قىسقى وليمپيادا سپورت جارىسىنا قاتىناسۋ تاريحىنداعى ەڭ جاقسى ناتيجەگە قول جەتكىزۋدەي‘ نىسانانى بەتكە الىپ ەڭ سوڭعى اتوي سالۋعا جەبەدى“.
وليمپيادا سپورت جارىسىنىڭ جارىس مايدانى ناتيجەگە ءمان بەرەدى، دەسە دە كەيدە بارىس كوبىندە ناتيجەدەن ءتىپتى دە ماڭىزدى. جۇڭگو سپورتشىلارى باس شۋجيدىڭ ءسوزىن كوڭىل تورىندە ساقتاپ، قايسارلىقپەن شايقاسىپ، ءوزىنىڭ ەڭ جاقسى بەينەسىن كورسەتۋگە قۇلشىنباق.
دەنە تاربيە قۋاتتى بولسا، جۇڭگو قۋاتتى بولادى، ەل تاعدىرى كوركەيسە، دەنە تاربيە كوركەيەدى −
دەنە تاربيەدە قۋاتتى ەل بولۋ قۇرىلىسىن ارقاۋ ەتىپ، باس شۋجيدىڭ ”ءىرى دەنە تاربيە كوزقاراسى“ دەنە تاربيەنىڭ جۇڭحۋا ۇلتىنىڭ ۇلى گۇلدەنۋ ۇردىسىندەگى ماڭىزدى ورنى مەن ماڭىزدى رولىن بەكەمدەپ، جۇرتتى جەلپىندىرىپ، ەكپىندەي ىلگەرىلەۋگە جەبەدى
”دەنە تاربيە سپورتىن دامىتىپ، حالىقتىڭ دەنە ساپاسىن كۇشەيتەيىك“. بۇل 1952 - جىلى 6 - ايدىڭ 10 - كۇنى جۇڭحۋا مەملەكەتتىك دەنە تاربيە باس قوعامى قۇرىلعان كەزدە ماۋ زىدۇڭ جولداس جازعان ارناۋ ءسوز. 70 جىلدان بەرى دەنە تاربيەنىڭ ءمانى مەن كولەمى ۇزدىكسىز كەڭەيىپ، مەملەكەتتىڭ قۋاتتى بولۋ، گۇلدەنۋ، ۇلتتىڭ كوركەيۋ ارمانىنا تىرەۋ بولدى.
2013 - جىلى 8 - ايدىڭ 31 - كۇنى باس شۋجي شي جينپيڭ شىنياڭدا مەملەكەتتىك بۇقارالىق دەنە تاربيەدەگى وزات ورىندار مەن وزات جەكەلەردى ماداقتاۋ، سيلاۋ جينالىسىنا، مەملەكەتتىك دەنە تاربيە جۇيەسىندەگى وزات كوللەكتيۆتەر مەن وزات قىزمەتكەرلەردى ماداقتاۋ، سيلاۋ جينالسىنا قاتىناسقان ۋاكىلدەرمەن كەزدەسكەندە بىلاي دەپ اتاپ كورسەتتى: دەنە تاربيە قوعامنىڭ دامۋى مەن ادامزاتتىڭ العا باسۋىنىڭ ماڭىزدى بەلگىسى، جالپىلىق مەملەكەت قۋاتى مەن قوعامنىڭ وركەنيەت دەڭگەيىنىڭ ماڭىزدى بەينەسى. دەنە تاربيە حالىقتىڭ دەنە ساپاسى مەن سالاماتتىق ورەسىن جوعارىلاتۋ، ادامنىڭ جان - جاقتى دامۋىن جەبەۋ، حالىقتىڭ رۋحاني مادەنيەت تۇرمىسىن بايىتۋ، ەكونوميكانىڭ، قوعامنىڭ دامۋىن ىلگەرىلەتۋ، بۇكىل ەلدەگى ءار ۇلت حالقىن ەرەندىككە تالپىنۋ، ءوز شەكتەمەسىن جەڭۋ رۋحىن اسقاقتاتۋعا ىنتالاندىرۋ جاقتارىندا تۇگەلدەي ورنىن باسۋعا بولمايتىن ماڭىزدى رولعا يە.
4 جىلدان كەيىن تيانجيندە مەملەكەتتىك دەنە تاربيە جارىسى باستالۋدان بۇرىن، باس شۋجي شي جينپيڭ مەملەكەتتىك بۇقارالىق دەنە تاربيەدەگى وزات ورىنداردىڭ، وزات جەكەلەردىڭ ۋاكىلدەرىمەن جانە مەملەكەتتىك دەنە تاربيە جۇيەسىندەگى وزات كوللەكتيۆتەردىڭ، وزات قىزمەتكەرلەردىڭ ۋاكىلدەرىمەن، سونداي - اق وسى كەزەكتى مەملەكەتتىك دەنە تاربيە جارىسىنىڭ بۇقارالىق جارىس تۇرلەرىندە سيلىققا يە بولعان سپورتشىلاردىڭ ۋاكىلدەرىمەن كەزدەسكەندە بىلاي دەپ باسا دارىپتەدى: دەنە تاربيە مەملەكەتتىڭ قۋاتتى بولۋ، گۇلدەنۋ، ۇلتتىڭ كوركەيۋ ارمانىنا تىرەك بولۋدا. دەنە تاربيە قۋاتتى بولسا، جۇڭگو قۋاتتى بولادى، ەل تاعدىرى كوركەيسە، دەنە تاربيە كوركەيەدى. دەنە تاربيەنى دامىتۋ قىزمەتىن ماڭىزدى كۇن تارتىپكە قويىپ، زەيىن قويا جوسپارلاپ، تياناقتاندىرۋدى مىقتاپ يگەرىپ، ەلىمىزدىڭ دەنە تاربيە ىستەرى دامۋىنىڭ جاڭا جاعدايىن ۇزدىكسىز اشىپ، ەلىمىزدى دەنە تاربيەدە قۋاتتى ەل ەتىپ جەدەل قۇرىپ شىعۋ كەرەك.
باس شۋجي بىلاي دەپ باسا دارىپتەدى: دەنە تاربيەدە قۋاتتى ەل قۇرۋدى جەدەلدەتۋدە حالىقتى وزەك ەتۋ يدەياسىنا تاباندى بولىپ، حالىقتىڭ دەنە تاربيە ىستەرىن دامىتۋداعى تۇلعالىق ورنىن، حالىقتىڭ دەنە شىنىقتىرۋ قاجەتىن قاناعاتتاندىرۋدى، ادامنىڭ جان - جاقتى دامۋىن جەبەۋدى دەنە تاربيە قىزمەتىنىڭ شىعار ءتۇيىنى مەن تابان تىرەر تياناعى ەتىپ، جالپى حالىق دەنە شىنىقتىرۋداي مەملەكەت ستراتەگياسىن تياناقتاندىرىپ، حالىقتىڭ سالاماتتىق دەڭگەيىن ۇزدىكسىز جوعارىلاتۋ كەرەك.
2021 - جىلى 13 - كەزەكتى مەملەكەتتىك حالىق قۇرىلتايىنىڭ 4 - ءماجىلىسى ماقۇلداعان «جۇڭحۋا حالىق رەسپۋبليكاسىنىڭ حالىق شارۋاشىلىعى مەن قوعامدىق دامۋدىڭ 14 - بەسجىلدىق جوباسى جانە 2035 - جىلعا دەيىنگى بولاشاقتىق نىسانا باعدارناماسىندا»: 2035 - جىلعا جەتكەندە دەنە تاربيەدەگى قۋاتتى ەلدى، سالاماتتى جۇڭگونى قۇرىپ شىعۋ كەرەك، - دەپ ايقىن ورتاعا قويىلدى.
جالپى حالىقتىڭ سالاماتتىعى بولماسا، جاپپاي دوڭگەلەك داۋلەتتىلىك تە بولماق ەمەس. پارتيا 18 - قۇرىلتايىنان بەرى، جالپى حالىق دەنە شىنىقتىرۋ سالاسىندا كەلەلى حۇجاتتار ىركەس - تىركەس شىعارىلىپ، جۇڭحۋا ۇلتىنىڭ سالاماتتىق ساپاسىن جالپى بەتتىك جوعارىلاتۋدى ىلگەرىلەتىپ، حالىقتىڭ سالاماتتىعى مەن ەكونوميكانىڭ، قوعامنىڭ سايكەستى دامۋىن جۇزەگە اسىردى.
2014 - جىلى 10 - ايدا مەملەكەتتىك كەڭەس «دەنە تاربيە كاسىپ سالاسىن جەدەل دامىتىپ، دەنە تاربيە تۇتىنۋىن جەبەۋ جونىندەگى ءبىرقانشا پىكىردى» باسىپ تاراتىپ، جالپى حالىقتىڭ دەنە شىنىقتىرۋىن مەملەكەتتىك ستراتەگياعا كوتەردى.
2016 - جىلى جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس «”سالاماتتى جۇڭگو 2030“ جوبا باعدارناماسىن» باسىپ تاراتتى. 2019 - جىلى مەملەكەتتىك كەڭەس كەڭسەسى «دەنە تاربيەدە قۋاتتى ەل قۇرىلىسى باعدارناماسىن» باسىپ تاراتتى. 2021 - جىلى 8 - ايدا مەملەكەتتىك كەڭەس «جالپى حالىق دەنە شىنىقتىرۋ جوسپارىن (2021 − 2025 - جىل)» باسىپ تاراتتى، مەملەكەتتىڭ حالىقتىڭ دەنساۋلىعىنا ءمان بەرۋ دەڭگەيى بۇرىن بولىپ كورمەگەن دارەجەدە جوعارىلادى.
دەنە تاربيەدە قۋاتتى ەل قۇرۋ ارمانى جۇڭگو ارمانىمەن تىكە بايلانىستى، تىعىز قاتىستى. دەنە تاربيە مەملەكەتتىڭ قۋاتتى بولۋ، گۇلدەنۋ، ۇلتتىڭ كوركەيۋ ارمانىنا تىرەۋ بولۋدا. دەنە تاربيە حالىقتىڭ سالاماتتىق ورەسىن جوعارىلاتۋداعى ماڭىزدى ءتاسىل ءارى جۇڭگو ارمانىن جۇزەگە اسىرۋدىڭ ماڭىزدى مازمۇنى، جۇڭحۋا ۇلتىنىڭ ۇلى گۇلدەنۋىنە زەيىن - زەردە، رۋح - جىگەر ۇيىستىراتىن قۋاتتى رۋحاني كۇش ازىرلەيدى.
جالپى حالىق دەنە شىنىقتىرۋ قيمىلدارى جۇڭگودا ەشقاشان جاقىنعى 10 جىلداعىداي كەڭ جالپىلاسىپ كورگەن جوق. مارافون سپورتى جەر - جەردە دابىرالى ورىستەتىلىپ، ماڭىزدى مارافون جارىستارىنا قاتىناسۋ تولىمدىلىعىنىڭ بەلەتىنە قول جەتكىزۋدىڭ ءوزى مۇڭ بولدى؛ ىندەت كەزىندە ادامدار ۇيدە دەنە شىنىقتىرۋدىڭ جاڭا ۇلگىلەرى جونىندە جابال ىزدەنىس جاسادى؛ قىسقى وليمپيادا سپورت جارىسىن وتكىزۋدىڭ شىعىس جەلىن دەمەۋ ەتكەن جۇرتشىلىق قار - مۇز سپورتىنا قاتىناسۋدىڭ قىزۋ ورلەۋىن كوتەردى...
ساندى مالىمەتتە كورسەتىلۋىنشە، ەلىمىزدەگى دەنە تاربيە شىنىعۋىنا ۇنەمى قاتىناساتىن ادامداردىڭ سانى 400 ميلليوننان اسىپ، قالا مەن اۋىل تۇرعىندارىنىڭ «حالىقتىڭ دەنە ساپاسىن ولشەۋ ولشەمى» بويىنشا تولىمدىدان جوعارى بولعاندارى ％90تەن استامعا جەتكەن. جاڭا جۇڭگو قۇرىلعان باستاپقى مەزگىلدە، بۇكىل ەلدىڭ جان باسىندىق مەجەلىك عۇمىرى نەبارى 35 جاس قانا بولاتىن. بيىل 1 - ايدىڭ 10 - كۇنى جاريالانعان «”14 - بەسجىلدىق“ الەۋمەتتىك قىزمەت وتەۋ جوباسىندا» 2025 - جىلعا بارعاندا، جان باسىندىق مەجەلىك عۇمىردىڭ 78.3 جاس بولاتىندىعى ايقىندالدى.
جۇڭگو دەنە تاربيە بۇيىمدارى شارۋاشىلىعى بىرلەسكەن قوعامى جاريالاعان «2021 - جىلعى جۇرتشىلىق دەنە شىنىقتىرۋ ارەكەتى مەن تۇتىنۋىن زەرتتەۋ مالىمەتىندە» كورسەتىلۋىنشە، ％87 الەۋمەتتىك دەنە شىنىقتىرۋعا قاتىناساتىن ادام ءار رەتكى دەنە شىنىقتىرۋعا 0.5 − 2 ساعات جۇمسايدى ەكەن، مۇنان جۇرتشىلىقتىڭ دەنە شىنىقتىرۋ تانىمىنىڭ بىرتىندەپ تەرەڭدەگەنىن كورۋگە بولادى.
جاسىل، بىرگە يگىلىكتەنۋ، اشىق، پاك بولۋ −
بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ قىزمەتى توڭىرەگىندە باس شۋجي قىسقى وليمپيادا سپورت جارىسىن وتكىزۋ دايىندىعىنا بەتالىس ايقىنداپ بەردى
6 جىلدان استام ۋاقىت دايىندىق كورۋ ارقىلى بەيجيڭ قىسقى وليمپيادا سپورت جارىسىنىڭ ءتۇرلى دايىندىق قىزمەتتەرى ورىندالىپ بولدى. قىسقى وليمپيادا سپورت جارىسىنا دايىندالۋ جولىنا قايىرىلا قاراساق، باس شۋجي شي جينپيڭ العا قويعان ”جاسىل، بىرگە يگىلىكتەنۋ، اشىق، پاك بولۋ“ سىندى وليمپيادا ۇستانىمى ءتۇبىرلى بويسۇنۋ ولشەمىنە اينالىپ، وتكىزۋگە دايىندىق كورۋ قىزمەتىنىڭ تۇتاس بارىسىنا دەيىن ءسىڭىرىلدى.
2017 - جىلدان 2022 - جىلعا دەيىن باس شۋجي شي جينپيڭ بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ قىزمەتىن 5 رەت ناقپا - ناق تەكسەردى. ءار رەت تەكسەرگەن كەزدە باس شۋجي وليمپيادانى وتكىزۋدىڭ 4 ۇلكەن ۇستانىمى توڭىرەگىندە ماڭىزدى نۇسقاۋ بەردى.
جاسىل وليمپيادا وتكىزۋدە ەكولوگيانى الدىڭعى ورىنعا قويۋعا، بايلىقتى ۇنەمدەۋگە، ورتانىڭ تاتۋ - ءتاتتى بولۋىنا تاباندى بولىپ، قىسقى وليمپيادا سپورت جارىسىنا كوركەم جۇڭگو ەرەكشەلىگىن قالاۋ كەرەك. بىرگە يگىلىكتەنەتىن وليمپيادا وتكىزۋدە بىرگە قاتىناسۋعا، بىرگە كۇش شىعارۋعا، بىرگە يگىلىكتەنۋگە تاباندى بولىپ، قىسقى وليمپيادا سپورت جارىسىنىڭ تاماشا قوعامدىق اسەر تۋدىرۋىنا مۇمكىندىك جاساۋ كەرەك. اشىق وليمپيادا وتكىزۋدە دۇنيە ءجۇزىن بەتكە الۋعا، بولاشاقتى بەتكە الۋعا، وسىزاماندانۋدى بەتكە الۋعا تاباندى بولىپ، قىسقى وليمپيادا سپورت جارىسىن سىرتقا ەسىك اشۋدىڭ دەمەۋشىسىنە اينالدىرۋ كەرەك. وليمپيادانى پاك وتكىزۋدە ۇقىپتى دا ۇنەمشىل بولىپ، شىرىكتەسۋدى تيىپ، ونىمدىلىكتى جوعارىلاتۋ كەرەك، قوزدىرعىش دارىلەر ماسەلەسىندە مۇلدە جول بەرمەۋدەن جازباي، قىسقى وليمپيادا سپورت جارىسىن قار - مۇز سياقتى كىرشىكسىز وتكىزۋ كەرەك.
جاسىل دامۋ ۇستانىمى باستان - اياق ساباقتاستىرىلدى. بەيجيڭ قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىنا جيىنى 39 الاڭ - ساراي پايدالانىلادى، مۇنىڭ 10ى بۇرىن بار الاڭ - ساراي مۇراسىنان، 4ى جەر مۇراسىنان پايدالانىلعان. ۋكىسۇڭ دەنە تاربيە ورتالىعى 6 ساعات ىشىندە مۇز الاڭى مەن باسكەتبول الاڭىنىڭ ءوزارا وزگەرۋىن ورىنداي الادى؛ ”سۋدان مۇزعا وزگەرگەننەن كەيىن“ مەملەكەتتىك سۋعا ءجۇزۋ ورتالىعى ”سۋ تەكشەسىنەن“ ”مۇز تەكشەسىنە“ وزگەردى.
مەملەكەتتىك تەز سىرعاناۋ سارايى − ”مۇز جىبەك باۋ“ دۇنيە جۇزىندە ءبىرىنشى بولىپ كومىرتەگى قوس توتىعىن كريتيكالىق شەگىنەن اسىرىپ تىكە مۇزداتۋ جۇيەسى ارقىلى مۇز جاساعان قىسقى وليمپيادا سپورت جارىسىنىڭ تەز سىرعاناۋ الاڭ سارايى، ول كومىر قىشقىل گازىنىڭ شىعارىلۋىن نولگە جۋىقتاتتى.
بەيجيڭ قىسقى وليمپيادا سپورت جارىسى وتكىزۋگە ءوتىنىش ەتۋدەن، وتكىزۋگە دايىندىق كورۋدەن وتكىزۋگە دەيىن «وليمپيادا 2020 كەڭەستىك ءتارتىبىن» بۇكىل بارىستا ورىنداعان ءبىرىنشى كەزەكتى وليمپيادا سپورت جارىسى. بەيجيڭ وليمپيادا سپورتىنا جاڭالىق اشۋعا بەلسەندىلىكپەن ”بەيجيڭ جوباسىن“ ازىرلەپ، حالىقارالىق وليمپيادا جارىستارىن وتكىزۋ دايىندىعىنىڭ جاڭا ولشەمىنە اينالماقشى.
قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىنا جاڭادان سالىنعان بارلىق الاڭ - سارايلار تۇگەلدەي 3 جۇلدىزدى جاسىل قۇرىلىس جوبالاۋ بەلگىسىن العان؛ بەيجيڭ قىسقى وليمپيادا سپورت جارىسىنىڭ بارلىق باسەكەلىك الاڭ - سارايلارىنا جاسىل ەلەكتر كۇشى ％100 قولدانىلىپ، وليمپيادا تاريحىندا تۇڭعىش بولىپ وتىر؛ جارىس ىستەرىنە قاتىناس بويىنشا قىزمەت وتەۋگە پايدالانىلاتىن اۆتوكولىكتەردىڭ ىشىندە ەنەرگيا ۇنەمدەيتىن جانە تازا ەنەرگيالى اۆتوكولىكتىڭ شاعىن تۇرپاتتى جولاۋشىلار كولىگى بويىنشا يەلەگەن سالىستىرماسى ％100كە، بارلىق اۆتوكولىك بويىنشا يەلەگەن سالىستىرماسى ％85.84كە جەتىپ، وتكەن كەزەكتى قىسقى وليمپيادا سپورت جارىسىمەن سالىستىرعاندا ەڭ جوعارى بولدى...
قىسقى وليمپيادا سپورت جارىسى ءۇشىن قالانعان كوركەم جۇڭگو ەرەكشەلىگى جونىندە حالىقارالىق وليمپيادا كوميتەتى بەيجيڭ قىسقى وليمپيادا سپورت جارىسىن سايكەستىرۋ كوميتەتىنىڭ ءتوراعاسى كىشى سامارانيچ جوعارى باعا بەرىپ: ”بەيجيڭ قىسقى وليمپيادا سپورت جارىسى كومىر قىشقىل گازىن بەيتاراپتاندىرۋ بويىنشا جارىس وتكىزۋ ۋادەسىن ورىنداۋدا“، - دەدى.
2022 - جىلعى بەيجيڭ قىسقى وليمپيادا سپورت جارىسىن ويداعىداي وتكىزۋ جۇڭگونىڭ حالىقارالىق وليمپيادا ۇلكەن شاڭىراعىنا بەرگەن ايبىندى ۋادەسى بولىپ قانا قويماي، بەيجيڭ - تيانجين - حىبەيدى سايكەستىرە دامىتۋ ستراتەگياسىن اتقارۋدىڭ دا ماڭىزدى شاراسى بولىپ تابىلادى. جاڭجياكوۋدىڭ چۇڭليى 2015 - جىلدىڭ سوڭىندا ءالى كەدەي اۋدان بولاتىن، كەدەيلىكتىڭ تۋىلۋ سالىستىرماسى ％16.81كە جەتكەن. وسى شاعىن قالاشىق قىسقى وليمپيادا سپورت جارىسىنىڭ كەلۋىمەن ءبىر تۇندە اتاعى شىعىپ، مەملەكەتتىك كەدەيلىكتەن ارىلتۋدان قامال الۋ جانە قىسقى وليمپيادا سپورت جارىسىن وتكىزۋگە دايىندىق كورۋ سىندى ەكى جاعدايدا 2019 - جىلى 5 - ايدا كەدەي اۋدان قاتارىنان شەگىنىپ شىعىپ، كەدەيلىكتەن تۇبەگەيلى ارىلىپ، كەدەيلىك قالپاعىن لاقتىردى. بۇل باس شۋجيدىڭ ”قىسقى وليمپيادا سپورت جارىسىن وتكىزۋگە دايىندالۋ جانە جەرگىلىكتى دامۋ سىندى ەكى ۇزدىك جاۋاپنامانى تاپسىرۋعا قۇلشىنۋ“ ماڭىزدى نۇسقاۋىنىڭ ەڭ جاقسى جاۋابى بولدى.
بەيجيڭ - تيانجين - حىبەيدى سايكەستىرە دامىتۋ سىندى مەملەكەتتىك ستراتەگيانىڭ جەبەۋىندە بەيجيڭ - جاڭجياكوۋ جوعارى جىلدامدىقتى تەمىر جولى چۇڭليدى استانا ءبىر ساعاتتىق تاسىمال شەڭبەرىنە ەنگىزىپ، بەيجيڭ - جاڭجياكوۋ دەنە تاربيە، مادەنيەت، ساياحات بەلدەۋىن جەدەل قۇرىپ، بەيجيڭ - تيانجين - حىبەيدى سايكەستىرە دامىتۋ ستراتەگياسىنا تىڭ ءمان قوستى.
2015 - جىلدىڭ سوڭىندا قۇرىلعاننان بەرى، بەيجيڭ قىسقى وليمپيادا سپورت جارىسىن ۇيىمداستىرۋ كوميسسياسى باستان - اياق دارىندى كوزقاراسىندا جاڭالىق اشۋعا تاباندى بولىپ، الەمدەگى دارىندىلاردى جيىپ، ءوزىمىز ءۇشىن پايدالاندى. 2017 - جىلى قىسقى وليمپيادا سپورت جارىسىن ۇيىمداستىرۋ كوميسسياسى تۇڭعىش رەت بۇكىل الەم بويىنشا قىزمەتكەر قابىلدادى، 5 جىلدان بەرى 22 رەت قوعامنان، مەكتەپ اۋلاسىنان قىزمەتكەر قابىلداپ، شەتەلدە وقىپ جاتقان ءبىر توپ ادامدى وتانعا قايتىپ ۇلەس قوسۋعا باۋراپ، جۇڭگوعا كەلىپ ەڭبەك ەتۋگە ءبىر توپ شەتەلدىك قىزمەتكەردى ەنگىزدى.
قۇت نىشانى، الاۋ جانە مەدال سىرتقى كورىنىسىن جوبالاۋ سياقتىلار جونىنەن بەيجيڭ قىسقى وليمپيادا سپورت جارىسىن ۇيىمداستىرۋ كوميسسياسى قوعامدا اشىق جوبا جيناپ، الەمدىك كوز ايانى كەڭەيتىپ، بۇكىل الەمنىڭ اقىل - پاراساتىن جينادى.
”ۇنەمشىل، حاۋىپسىز، تارتىمدى“ جارىس وتكىزۋ تالابىنا ساي، بەيجيڭ قىسقى وليمپيادا سپورت جارىسىن ۇيىمداستىرۋ كوميسسياسى جارىس وتكىزۋ جوباسىن ىقشامداپ، تارتىمدى جارىس وتكىزۋ مەن ۇنەمشىلدىكپەن جارىس وتكىزۋدى بىرلىككە كەلتىرۋدى قۇلشىنا جۇزەگە اسىردى. ”جارىس وتكىزۋدى ىقشامداۋ“ دا «بەيجيڭ 2022 - جىلعى قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسى ىندەتتەن ساقتانۋ قولدانباسى» جالپىلىق پرينسيبىنىڭ ءبىرى. ءاربىر جارىس تۇرلەرىن جۇرگىزۋدە قازىنالىق باقىلاۋدى كۇشەيتىپ، وتكىزۋگە دايىندىق كورۋ قىزمەتىنىڭ پاك، جوعارى ءونىمدى بولۋىنا شىنايى كەپىلدىك ەتتى. بەيجيڭ قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسى كەزىندە نەگىزگى اقپارات ورتالىعى مەن حالىقارالىق راديو ورتالىعى سىندى وسى 2 ماڭىزدى باسەكەلىك ەمەس الاڭ نەگىزگى اقپارات قۇرالى ورتالىعى ەتىپ بىرىكتىرىلىپ، اينالىم وزىندىك قۇنىن بارىنشا تومەندەتتى.
300 ميلليون ادامدى قار - مۇز سپورتىنا قاتىناسۋعا باستاۋ −
قار - مۇز سپورتىن جالپىلاستىرۋدى ارقاۋ ەتە وتىرىپ، باس شۋجي بولاشاقتى بەتكە الىپ، دۇنيە ءجۇزىن بەتكە الىپ، جاستار مەن ورەندەردى بەتكە الىپ ستراتەگيالىق شەشىم جاساپ، وليمپيادا سپورتى مەن الەمدىك قار - مۇز سپورتىنىڭ جالپىلاسۋىنا جۇڭگو ۇلەسىن قوستى
وسى بىرنەشە جىلدا ءارقايسى جاقتىڭ ورتاق قۇلشىنىس جاساۋىنىڭ ارقاسىندا، قار - مۇز سپورتىنا قىزىعاتىن ادامدار بارعان سايىن مولايىپ، ”300 ميلليون ادامدى قار - مۇز سپورتىنا قاتىناسۋعا باستاۋ“ نىساناسى الدىن الا جۇزەگە استى. باس شۋجي شي جينپيڭنىڭ بيىل قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ قىزمەتىن تەكسەرگەندە سويلەگەن وسى ءسوزى سانسىز قار - مۇز اۋەسكەرلەرىن ايرىقشا جەلپىندىردى.
2014 - جىلى 2 - ايدا ۇسىنىس بويىنشا سوچي قىسقى وليمپيادا سپورت جارىسىنىڭ باستالۋ سالتىنا قاتىناسقان كەزدە، ءتوراعا شي جينپيڭ حالىقارالىق وليمپيادا كوميتەتىنىڭ ءتوراعاسى باحقا بىلاي دەگەن: ”جۇڭگودا قار - مۇز سپورتى شانحايگۋاننان ارى وتە المايدى. ەگەر قار - مۇز تۇرلەرىن ىشكى وڭىرلەرگە قاراي جالپىلاستىرا الساق، مەجەمەن 200 دە 300 ميلليون ادامدى قاتىناسۋعا جەتەكتەي الامىز، ءسويتىپ جۇڭگونىڭ قار - مۇز سپورتىنىڭ الاۋىن تۇتاندىرۋعا بولادى“.
2015 - جىلى 1 - ايدىڭ 14 - كۇنى ءتوراعا شي جينپيڭ حالىقارالىق وليمپيادا قوعامىنىڭ ءتوراعاسى، ازيا وليمپيادا القالار كەڭەسىنىڭ ءتوراعاسى احمەد حانزادامەن كەزدەسكەندە بىلاي دەپ باسا دارىپتەدى: بەيجيڭ قىسقى وليمپيادا سپورت جارىسىن وتكىزەتىن بولسا، جۇڭگودا 300 ميلليوننان استام ادامدى قار - مۇز سپورتىنا قاتىناسۋعا باستاي الادى، بۇل حالىقارالىق وليمپيادا سپورتىنىڭ دامۋىنا زور ۇلەس قوسقاندىق بولادى.
2015 - جىلى 8 - ايدىڭ 22 - كۇنى ءتوراعا شي جينپيڭ باحپەن كەزدەسكەندە بىلاي دەپ اتاپ كورسەتتى: 2022 - جىلعى قىسقى وليمپيادا سپورت جارىسى بەيجيڭدە وتكىزىلەدى، بۇل جۇڭگونىڭ دەنە تاربيەسى مەن ەكونوميكالىق، قوعامدىق دامۋىنىڭ دۇنيە ءجۇزى وليمپيادا سپورتىنىڭ دامۋىمەن قوس جەڭىسكە جەتۋ جاعدايىن اشۋدىڭ ماڭىزدى ورايى، سونداي - اق جۇڭگو بۇقاراسىنىڭ وليمپيادا سپورتىنا دەگەن قىزۋ ىنتاسىن اناعۇرلىم تاسقىنداتىپ، ءتىپتى دە كوپ جۇڭگولىقتى قار - مۇز سپورتىنا كوڭىل بولۋگە، قىزۋ سۇيۋگە، ات سالىسۋعا باستاپ، وليمپيادا سپورتىنىڭ دامۋىنا جانە وليمپيادا رۋحىنىڭ تارالۋىنا بەلسەندى ۇلەس قوسادى.
بەيجيڭ قىسقى وليمپيادا سپورت جارىسىنىڭ باستالۋىنا 10 كۇن قالعان كەزدە، ءتوراعا شي جينپيڭ باحپەن كەزدەسكەندە تاعى ءبىر رەت بىلاي دەپ باسا دارىپتەدى: ەرتەدە وتكىزۋدى ءوتىنىش ەتكەن كەزدە، مەن جۇڭگونىڭ وسى رەت وليمپيادا سپورت جارىسىن وتكىزۋدەگى ەڭ ۇلكەن ماقساتى 300 ميلليون ادامدى قار - مۇز سپورتىنا قاتىناسۋعا باستاۋ دەگەندى العا قويعان ەدىم.
346 ميلليون ادام، بۇل 2015 - جىلى بەيجيڭ جاڭجياكوۋمەن قول ۇستاسا وتىرىپ قىسقى وليمپيادا سپورت جارىسىن وتكىزۋدى ءساتتى ءوتىنىش ەتكەننەن 2021 - جىلى 10 - ايعا دەيىن بۇكىل ەل بويىنشا قار - مۇز سپورتىنا قاتىناسقان ادام سانى.
قىسقى وليمپيادا سپورت جارىسىن وتكىزۋ ءوتىنىشى ءساتتى قابىلدانعان بىرنەشە جىلدان بەرى، «قار - مۇز سپورتىن دامىتۋ جوسپارى (2016 − 2025 - جىل)»، «”300 ميلليون ادامدى قار - مۇز سپورتىنا قاتىناسۋعا باستاۋدىڭ“ اتقارۋ باعدارناماسى (2018 − 2022 - جىل)»، «2022 - جىلعى بەيجيڭ قىسقى وليمپيادا سپورت جارىسىن وراي ەتىپ قار - مۇز سپورتىن زور كۇشپەن دامىتۋ جونىندەگى پىكىر» سياقتى ماڭىزدى حۇجاتتار ارت - ارتىنان شىعارىلدى. «جالپى حالىق دەنە شىنىقتىرۋ جوسپارىندا (2021 − 2025 - جىل)» ”300 ميلليون ادامنىڭ قار - مۇز سپورتىنا قاتىناسۋ“ جەتىستىگىن بەكەمدەۋ، كەڭەيتۋ العا قويىلدى.
جۇڭگونىڭ بايتاق دالاسىندا، ۇلى قورعاننىڭ ءىشى - سىرتىندا قار - مۇز الاڭىنا شىعىپ، قىسقى سپورتتىڭ قىزىعىنا باتقان ادامدار بارعان سايىن كوبەيدى. «2020 جۇڭگو شاڭعى تەبۋ كاسىپ سالاسى اق تىستى كىتابىندا» 2020 - جىلدان 2021 - جىلعا دەيىن شاڭعى تەبۋشىلەردىڭ ەل ىشىندەگى شاڭعى الاڭىندا ورتاشا شاڭعى تەبۋ سانى 2019 - جىلداعى 1.6 رەتتەن 1.91 رەتكە جوعارىلاعاندىعى كورسەتىلدى.
2021 - جىلى 12 - ايدىڭ 19 - كۇنى 8 - كەزەكتى مەملەكەتتىك بۇقارالىق قار - مۇز ماۋسىمىن باستاۋ سالتى حۋبەيدا وتكىزىلدى. 2014 - جىلدان باستاپ وتكىزىلىپ كەلە جاتقان وسى بۇقارالىق قار - مۇز جارىسى قيمىلى باستالۋ سالتىن تۇڭعىش رەت ورتا بولىك وڭىرىندە وتكىزدى. 7 - كەزەكتى مەملەكەتتىك بۇقارالىق قار - مۇز ماۋسىمى كەزىندە، بۇكىل ەلدە وتكىزىلگەن بۇقارالىق سيپاتىنداعى قار - مۇز جارىسى قيمىلى 1200 الاڭدا اشىلىپ، قاتىناسۋ كولەمى 100 ميلليون ادام - رەتتەن استى.
باح بىلاي دەپ قارادى: 300 ميلليون ادامدى قار - مۇز سپورتىنا قاتىناسۋعا باستاۋ الەمدىك قىسقى دەنە تاربيە ويىن تۇرلەرىنىڭ بەلگىسىنە اينالادى. 10 - كەزەكتى وليمپيادا باسشىلار ءماجىلىسىنىڭ حابارلاندىرۋىندا دا بىلاي دەپ اتاپ كورسەتىلدى: بەيجيڭ قىسقى وليمپيادا سپورت جارىسىنىڭ وتكىزىلۋى الەمدىك قىس ماۋسىمى سپورتتىڭ جاڭا ءداۋىرىن اشادى. جۇڭگونىڭ 300 ميلليون ادامدى قار - مۇز سپورتىنا قاتىناسۋعا باستاۋدى العا قويۋى الەمدىك قىس ماۋسىمى سپورتتىڭ ورىستەتىلۋىن تىڭ بەلەسكە كوتەرەدى.
300 ميلليون ادامدى قار - مۇز سپورتىنا قاتىناسۋعا باستاۋ جۇڭگونىڭ بەرگەن ايبىندى ۋادەسى، 7 جىل قۇلشىنۋ ارقىلى ارماندى شىندىققا اينالدىردى. بۇل باس شۋجي شي جينپيڭنىڭ بالالاردىڭ جۇرەگىنە قار - مۇز سپورتىن قىزۋ ءسۇيۋدىڭ ۇشقىنىن تاستاعان ىقىلاستى سۇيىسپەنشىلىگىن جانە بولاشاقتى بەتكە الىپ جۇڭگونىڭ قار - مۇز سپورتىن جالپىلاستىرۋ دارەجەسىن جوعارىلاتۋداعى ستراتەگيالىق تولعامىن تولىق ايگىلەدى.
بولاشاققا بىرگە اتتانۋ −
100 - جىلدا بولماعان ۇلكەن وزگەرىستى ارقاۋ ەتە وتىرىپ، باس شۋجيدىڭ وليمپيادا جونىندەگى بايىمداۋلارى ادامزات تاعدىرلاس ورتاق تۇلعا ۇستانىمىنا مايەكتى مازمۇن ۇستەدى
”ءبىز شىن كوڭىلمەن دۇنيە جۇزىنە وليمپيادانىڭ سالتاناتتى جينالىسىن تارتۋ ەتەمىز. دۇنيە ءجۇزى جۇڭگودان ءۇمىت كۇتۋدە، جۇڭگو دايىندالىپ بولدى“. 2022 - جىلعى جاڭا جىلدى قۇتتىقتاۋ سوزىندە مەملەكەت ءتوراعاسى شي جينپيڭ دۇنيە جۇزىنە اشىق جاريالادى.
”ءبىز بولاشاققا بىرگە اتتانايىق!“. ءتوراعا شي جينپيڭ دۇنيە ءجۇزىن قول ۇستاسا وتىرىپ كوركەم بولاشاقتى بىرگە جاراتۋعا ۇندەدى ءارى بەيجيڭ 2022 - جىلعى قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىنىڭ نەگىزگى تاقىرىپتىق ۇرانى ”بولاشاققا بىرگە اتتانايىقتىڭ“ ەڭ جاقسى ”جارشىسىنا“ اينالدى.
قىسقى وليمپيادا سپورت جارىسىن وتكىزۋگە دايىندالۋ قىزمەتىن 5 - رەت ناقتى ورىندا تەكسەرۋ بارىسىندا باس شۋجي شي جينپيڭ اسەرلەنىپ تۇرىپ بىلاي دەدى: ”بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن ءساتتى وتكىزۋ ۇلتتىڭ ۇلى گۇلدەنۋىن جۇزەگە اسىرۋ سەنىمىن كۇشەيتىپ قالماستان، دۇنيە جۇزىنە جارقىن، باي - قۇدىرەتتى، اشىق، ۇمىتكە تولعان مەملەكەت وبرازىن دا ايگىلەيدى. بۇل تاريحقا ايقىن بەلگى قالدىرادى، دۇنيە ءجۇزى جۇڭگو جولى جونىندە شىت جاڭا تانىمعا يە بولادى“.
2022 - جىلعى دۇنيە جۇزىلىك ەكونوميكا تالقى مىنبەرى بەينە ەكران ماجىلىسىنە قاتىناسىپ ءارى لەكسيا سويلەگەن كەزدەگى سياقتى ءتوراعا شي جينپيڭ باحپەن كەزدەسكەندە تاعى دا ”كىشكەنە كەمە“ مەن ”ۇلكەن كەمەنىڭ“ جاندى مىسالى ارقىلى ءارقايسى ەلدىڭ تاعدىرلاس ەكەندىگىن، ادامزاتتىڭ تاعدىرلاس ورتاق تۇلعاسىن قۇرۋدىڭ ماڭىزدى تاقىرىبىن ىشكەرىلەي ءتۇسىندىردى.
”دۇنيە جۇزىندەگى ءار ەلدىڭ 190نان استام كىشكەنە كەمەدە تۇرعانىنان گورى، ءبىر ۇلكەن كەمەدە بىرگە تۇرىپ، اناعۇرلىم كوركەم بولاشاققا بىرگە يە بولعانى ابزال“.
”جۇڭگو جاق وليمپيادا سپورتى جانە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ ءۇشىن تىڭ دا اناعۇرلىم زور ۇلەس قوسادى“، - دەدى ءتوراعا شي جينپيڭ باحقا.
”بولاشاققا بىرگە اتتانايىق“ دەگەن قىسقى وليمپيادا سپورت جارىسىنىڭ نەگىزگى تاقىرىپتىق ۇرانى ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋداي“ وليمپيادا اقىلياسىنا جۇڭگو تۇسىندىرمەسىن ازىرلەپ، دۇنيە ءجۇزىنىڭ كوركەم بولاشاقتى بىرگە جاراتۋداعى ورتاق ارمانىن ايگىلەدى، سونداي - اق جۇڭگونىڭ ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدەگى ءىرى ەل جاۋاپكەرشىلىگىمەن ۋادەلەسكەندەي - اق ءبىر جەردەن شىقتى. ول ۇران، سونداي - اق پوزيتسيا، ونان دا ماڭىزدىسى، ارەكەت جوباسى.
”2022 - جىلعى بەيجيڭ قىسقى وليمپيادا سپورت جارىسى ءبىر ماڭىزدى ءسات بولماق، بەيبىتشىلىك، دوستىق جانە ىنتىماق رۋحىمەن دۇنيە ءجۇزىن ءبىر اراعا ۇيىستىرادى“، - دەدى باح «وليمپيادا شولۋ» جۋرنالىنا جازعان ماقالاسىندا.
”سەن ەكەۋىمىز تىلەكتەسپىز، جەر شارى قىستاعىندا بىرگە تۇرامىز. ارمان ءۇشىن ساپار شەگىپ، بەيجيڭدە باس قوستىق. كەل، دوسىم، قولىڭدى اكەل. سەن ەكەۋىمىز تىلەكتەسپىز، ماڭگى ءبىر وتباسىنىڭ ادامىمىز...“.
2008 - جىلى بەيجيڭ وليمپيادا سپورت جارىسىنىڭ باستالۋ سالتىنداعى «سەن ەكەۋىمىز» ءانى جەر شارى قىستاعى تۇرعىندارىنىڭ بەيبىتشىلىككە، دوستىققا بولعان ارمانىن جەتكىزدى.
”ءبىز تاعى كەزدەسەرىمىز دەپ، قول بۇلعاپ تىلەك ايتقانمىن، اسىعا كۇتكەن جۇرەك ءلۇپىلىمدى، قاشاندا ەستي الاسىڭ...“ قىسقى وليمپيادا سپورت جارىسى ءانى ”بەيجيڭدە كەزدەسەيىك“ ادامداردىڭ وليمپيادا سپورت جارىسىنا بولعان جىلى ەستەمەسىن قايتا وياتتى.
2022 - جىلى ”قوس وليمپيادا قالاسى“ بەيجيڭ قۇشاعىن ايقارا اشىپ، قىسقى وليمپيادا ۋادەسىنە كەلگەن دۇنيە جۇزىندەگى قار - مۇز ساڭلاقتارىن قارسى الماق.
بەيجيڭ ءسىزدى قارسى الادى، بەيجيڭدە كەزدەسەيىك!
(شينحۋا اگەنتتىگىنىڭ 2 - ايدىڭ 2 - كۇنى بەيجيڭنەن بەرگەن حابارى)
