□ انار بۇلت / شينجياڭ گازەتىنىڭ ءتىلشىسى ءرايدا، ەرىكتى ءتىلشى ياڭ جىچىڭ
1 - ايدىڭ 30 - كۇنى ساۋان قالاسى دۇڭۋان قالاشىعى شيادۇڭدي قىستاعى شيياڭحۇڭ باقىت ايالداماسىندا ەرىكتىلەر مەن قارتتار بىرلىكتە جەتىم - جەسىر قارتتار جانە ۇيدە قالعان قارتتارعا تاۋەلدى باقىت ءۇيىن اشەكەيلەدى.
تاڭەرتەڭ ەرتەمەن ەمدەۋ قىزمەت وتەۋ ەرىكتىلەرى شيياڭحۇڭ باقىت ايالداماسىنا كەلىپ، قارتتاردى تەگىن ەمدەدى. ەرىكتى ما چين 87 جاستاعى گۋ يۇڭان قارتقا: ”اتاي، قان قىسىمىڭىز تىم جوعارى ەكەن، تاماقتانۋعا جانە دەمالىسقا كوڭىل ءبولىڭىز، قان قىسىمىن تومەندەتۋ ءدارىسىن ۋاقىتىندا ءىشۋدى ۇمىتپاڭىز...“، - دەپ قاداعالادى.
مىنا جاقتا تەگىن ەمدەۋ جۇرگىزىلسە، انا جاقتا تەرەزە ورنەگىن سالۋ، تۇشپارا ءتۇيۋ جانە شاش الۋ بولىپ جاتتى... كۇن سۋىق بولعانىمەن، باقىت ايالداماسى جىلۋلىققا شومىپ، قۋانىش پەن شاتتىققا بولەندى...
84 جاستاعى ۇيدە قالعان قارت جاڭ جىيۋان الدىمەن شاشىن جاساتىپ بولىپ، تۇشپارا ءتۇيۋ اترەتىنە قوسىلدى، قارتتىڭ تۇشپارا تۇيۋدەگى ەپتىلىگى مەن شەبەرلىگى كوپشىلىكتىڭ اۋىز جاپپاي ماقتاۋىنا يە بولدى. ”باقىت ايالداماسى ىسكە قوسىلعانىنا كوپ ۋاقىت بولمادى، الايدا ءبىز مۇندا كەلۋدى ۇناتامىز، بۇل ارانىڭ تاماعى ءدامدى بولىپ قانا قويماي، بارىنەن دە ماڭىزدىسى، قارتتارمەن بىرگە اڭگىمە دۇكەنىن قۇرامىز، وتە جايلى!“، - دەدى جاڭ جىيۋان.
70 جاستاعى ليۋ فىڭچين قارتتىڭ بالالارىنىڭ بارلىعى سىرت جەرلەردە، باقىت ايالداماسى ىسكە قوسىلعاننان بەرى ول ءار كۇنى دەرلىك وسىندا كەلەدى.
بۇگىن ليۋ فىڭچين تەرەزە ورنەگىن سالۋ ونەرىن كەلىستىرىپ وتىرىپ ءبىر كورسەتتى. 70 جاسقا كەلسە دە رۋحى كوتەرىڭكى ەكەن، كەسكەن تەرەزە ورنەگىن ءوز قولىمەن اپارىپ جاپسىردى. ”جاڭا عانا وسى ارادا قانداعى قانت قۇرامىن، قان قىسىمىن ولشەتتىم، بارلىعى دا قالىپتى ەكەن، شاشىمدى دا جاساتىپ الدىم، ءبىز بىرگە تۇشپارا تۇيدىك، تەرەزە ورنەگىن جاپسىردىق، قاقپاعا تۇمشالى شام اسىپ، كوكتەم مەرەكەسى بوساعالىعىن دا جاپسىردىق، بۇل ارا ءبىزدىڭ ءۇيىمىز، جاڭا جىلعا قاراعان ءتۇنى ءبىز وسىندا مارە - سارە بولىپ، جاڭا جىلعا قاراعان ءتۇن تاعامىن جەۋدى ويلاستىرۋدامىز“، - دەدى ليۋ فىڭچين تەرەزە ورنەگىن جاپسىرا ءجۇرىپ.
بيىل 50 نەشە جاستاعى گو مەيحۋا بۇرىن شاشتارازحانا اشقان، قىستاقتا باقىت ايالداماسى اشىلعانىن ەستىگەن ول ەرىكتى بولۋعا ءبىرىنشى بولىپ تىزىمدەلەدى. ول بىلاي دەدى: ”ونەرىم ارقىلى قىستاقتاعى قارتتارعا قىزمەت وتەي الۋىم مەن ءۇشىن قۋانىش، قارتتاردى قۇرمەتتەۋ تاماشا ءمورال“.
اۋىل - قىستاق ەڭبەككۇشتەرىنىڭ باسقا كاسىپكە ويىسۋىمەن، كوپتەگەن جاستار قالاعا بارىپ ەڭبەك ىستەگەندىكتەن، ۇيدە قالعان قارتتار قوعام كوڭىل بولەتىن تاقىرىپقا اينالدى. اۋىل - قىستاقتاعى ۇيدە قالعان قارتتاردىڭ تۇرمىس ماسەلەسىن تۇبەگەيلى شەشۋ ءۇشىن، 1 - ايدىڭ 25 - كۇنى ساۋان قالاسى دۇڭۋان قالاشىعى شيادۇڭدي قىستاعىندا شيياڭحۇڭ باقىت ايالداماسىن قۇرۋدى الدىمەن اتقارىپ، قىستاقتاعى 60 جاستان اسقان قارتتار ءۇشىن كۇندىز قارايلاسۋ جانە تاماقتانۋ قىزمەت وتەۋىن ازىرلەدى. ىسكە قوسىلعانىنا ءبىر اپتا بولماي جاتىپ، بۇل ارا قىستاقتاعى قارتتاردىڭ كۇندە كەلىپ ات بايلايتىن جەرىنە اينالدى.
دۇڭۋان قالاشىعى پارتكومىنىڭ ورىنباسار شۋجيى، قالاشىق باستىعى دۋمان شەريزات بىلاي دەدى: ”ءبىز سىناق ءتۇيىنى كولەمىن اناعۇرلىم كەڭەيتىپ، شارت - جاعدايى كەمەلدى قىستاقتاردا الدىمەن اتقارىپ، الدىمەن سىناپ كورىپ، ەڭ سوڭىندا بارلىق قالاشىقتى تۇتاسىمەن قامتۋعا مۇمكىندىك جاساپ، قارتتاردىڭ تاماقتانۋىنا قىزمەت وتەۋ، سالاماتتىق جونىنەن جەتەكشىلىك ەتۋ، تىنىعۋ، كوڭىل اشۋ مۇمكىندىگىن ازىرلەپ، ولاردىڭ كۇندىزگى تۇرمىسىنىڭ باي مازمۇندى بولۋىنا مۇمكىندىك جاساپ، قارتايعاندا كۇتىمدە بولۋدى شىنايى جۇزەگە اسىرامىز“.
