رايونىمىزداعى ءار ۇلت بۇقاراسى اسىعا كۇتكەن −
بەيجيڭ قىسقى وليمپيادا سپورت جارىسى كەلىپ جەتتى!
□ انار بۇلت / شينجياڭ گازەتىنىڭ تىلشىلەرى
2 - ايدىڭ 2 - كۇنى شينجياڭ ۇلكەن تەاترحاناسىنىڭ جانىنداعى قار - مۇز الەمىندە ساياحاتشىلار مۇز ءۇستى قاقتىعىسپالى ارباشاسىن ويناۋدا. سول كۇنى ساياحاتشىلار وسى ارادا قار - مۇزدىڭ قىزىعىنا باتىپ، كوكتەم مەرەكەسىنىڭ قۋانىشىنا بولەنۋمەن بىرگە، بەيجيڭ قىسقى وليمپيادا سپورت جارىسىنا دەم بەردى.
□ سۋرەتتى انار بۇلت / شينجياڭ گازەتىنىڭ ءتىلشىسى چين پىڭ تۇسىرگەن
2 - ايدىڭ 4 - كۇنى، كوكتەم باستالعان كۇن، بەيجيڭ قىسقى وليمپيادا سپورت جارىسى شىمىلدىعىن اشادى. وليمپيادا الاۋى ”قۇس ۇياسىندا“ قايتالاي تۇتاندىرىلادى. بىرنەشە كۇننەن بەرى رايونىمىزداعى ءار ۇلت بۇقاراسى جاپا - تارماعاي قار - مۇز الاڭدارىنا بارىپ، جارىسىپ، ونەر كورسەتىپ، سالت - سانا قيمىلدارىن ورىستەتىپ، ءتۇرلى فورمالارمەن بەيجيڭ قىسقى وليمپيادا سپورت جارىسىنا تىلەكتەرىن ءبىلدىردى.
”بەيجيڭ قىسقى وليمپيادا سپورت جارىسى كەلىپ جەتتى!“ 2 - ايدىڭ 3 - كۇنى باي اۋدانى تەرەك قالاشىعىنداعى باي اراسان قار - مۇز الاڭىندا شاڭعى تەبۋگە جاتتىقتىرۋشى ەرپان ءالي بىرنەشە وقۋشىسىن ەرتىپ شاڭعى تەبۋگە جاتتىقتىرىپ جۇرگەن ارەدىكتە تاۋلارعا قاراپ: ”قىسقى وليمپيادا سپورت جارىسىنا دەم بەرەمىز! وتانىمىزعا ماداق ايتامىز! بولاشاققا بىرگە اتتانايىق!“، - دەپ جۇرەك سوزدەرىن اسەرلەنە ايعايلاپ قويادى.
2020 - جىلى ەرپان قۇمىل قالالىق دەنە تاربيە سپورت مەكتەبىنەن وقۋ تاۋىسىپ اۋىلىنا قايتقان. ول بىلاي دەدى: ”مەن دەنە تاربيە مەكتەبىندە وقىپ جۇرگەن كەزىمدە - اق قار شاڭعى سپورتىنا اۋەستەندىم، سودان بەرى بەيجيڭ قىسقى وليمپيادا سپورت جارىسىنىڭ ەرتەرەك كەلىپ جەتۋىن اڭساپ كەلەمىن. قازىر جان تەبىرەنتەتىن ءسات اقىرى كەلىپ جەتتى. ەڭ ماڭىزدىسى، شاڭعى تەبۋگە جاتتىقتىرۋشى رەتىندە، مەن ءبىر توپ قار شاڭعى سپورتىنا اۋەس وقۋشىلاردى باستاپ وسى جان تەبىرەنتەرلىك ساتكە كۋا بولىپ وتىرمىن“.
تەرەك قالاشىعىنىڭ ورىنباسار باستىعى چاڭ جيانشين تانىستىرىپ بىلاي دەدى: تەرەك قىستاعى نەبارى 6000 نەشە ادامى بار تاۋلى رايونداعى شاعىن قالاشىق بولعانىمەن، بۇكىل قالاشىقتاعى جۇرتشىلىقتىڭ بەيجيڭ قىسقى وليمپيادا سپورت جارىسىنا دەگەن قىزعىندىلىعى ايرىقشا جوعارى. وڭتۇستىك شينجياڭدا قار وتە سيرەك جاۋادى، تەرەك قالاشىعى جەرگىلىكتى ورىنداعى تابيعي اراسان، كوبەلەك سايى سىندى ساياحات بايلىق قاينارىنا ۇشتاستىرا وتىرىپ، ساۋداگەر شاقىرىپ قارجى ەنگىزۋ ارقىلى كوپ يقۋاتقا يە قار شاڭعى الاڭىن سالىپ، باي اۋدانى جانە ماڭايداعى اۋداندارداعى، قالالارداعى جۇرتشىلىقتىڭ قار شاڭعى سپورتىن سەزىنۋىنە تۇعىر ازىرلەپ بەردى. سونىمەن قاتار قىسقى وليمپيادا سپورت جارىسىن قارسى الۋ ءۇشىن، قالاشىق تاعى قار شاڭعى جارىسى، قار - مۇز ساياحاتى مەرەكەسى سياقتى ءبىر قىدىرۋ قيمىلداردى وتكىزىپ، جەرگىلىكتى ورىنداعى بۇقارانىڭ قار - مۇز سپورتىنا دەگەن ىنتاسىن تاسقىنداتتى.
2 - ايدىڭ 1 - كۇنى قوم (جىكبەلەڭ) حالىقارالىق شاڭعى دەمالىس وڭىرىندە ءداستۇرلى قار - مۇز سپورتى جارىسىنىڭ شىمىلدىعى اشىلدى. ات بايگە، ساداق اتۋ، قىزقۋار سىندى سالت - سانالىق ونەر كورسەتۋدى گۋاڭجوۋلىق قار - مۇز اۋەسكەرى لياڭ لياڭ كورىپ ۇلگىرە الماي جاتىر.
”قوم ايتسا ايتقانداي جۇڭگوداعى ەڭ كوركەم قىستاق ەكەن، قالىڭ تاۋدىڭ قۇشاعىندا اپپاق كورپە جامىلىپ جاتىر، شاڭعى تەبۋ، كورىنىستى تاماشالاۋدىڭ ەشقايسىسىنان قاعىس قالمايدى ەكەنبىز. بيىل مەن بۇل ارادا وزگەشە ءبىر كوكتەم مەرەكەسىن وتكىزدىم. مەن وتانىمىزدىڭ گۇلدەنىپ - كوركەيۋىن شىن جۇرەكتەن تىلەيمىن! بەيجيڭ قىسقى وليمپيادا سپورت جارىسىنىڭ تابىستى بولۋىن، جۇڭگونىڭ سپورت ساڭلاقتارىنان جەڭىس حابارلارىنىڭ تولاسسىز تارالۋىن تىلەيمىن“، - دەدى لياڭ لياڭ اسەرلەنە.
قىسقى وليمپيادا سپورت جارىسى اشىلۋ قارساڭىندا بۇراتالا قالاسى شينگىگى مۇزدا سىرعاناۋ الاڭى دۋمانعا بولەندى. بىرنەشە كۇننەن بەرى ءار كۇنى كوپتەگەن مۇزدا سىرعاناۋ اۋەسكەرلەرى بۇل اراعا كەلىپ ونەرلەرىن كورسەتۋدە.
”بۇراتالا قالاسىنىڭ قار - مۇز بايلىق قاينارى مول، ءار جىلى قىستا كوپشىلىك تۇگەلدەي مۇزدا سىرعاناۋ الاڭىنا كەلىپ، سىرعاناپ قايتۋدى ۇناتادى. بەيجيڭ قىسقى وليمپيادا سپورت جارىسى اشىلۋ الدىندا ءبىز ايرىقشا تەبىرەنىپ تۇرمىز“. بۇراتالا قالالىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى دەنە تاربيە كەڭسەسىنىڭ مەڭگەرۋشىسى ي لۇڭ تانىستىرىپ بىلاي دەدى: بيىل قىستا بۇراتالا قالاسى ”زىمىرا، جاس ۇلان!“ اتىنداعى مانەرلەپ سىرعاناۋ جارىسى سياقتى جەلىلەس قيمىلداردى وتكىزدى، حالىقتىق ۇيىمدارداعى ورتا جاستاعىلار مەن قارتتاردىڭ قار - مۇز كلۋبتارى دا ەرەكشە جاندانا ءتۇستى. كوكتەم مەرەكەسى كەزىندە بۇراتالا قالاسى كوكتەم مەرەكەسى مادەنيەتى مەن قار - مۇز مادەنيەتىن ءوزارا توعىستىرىپ، كۇللى جۇرت تۇگەل تويلاپ، شاتتىققا شومعان قىسقى وليمپيادا سپورتى رايىن قالىپتاستىردى.
بىرنەشە كۇننەن بەرى تيانشان الابىندا بالالار دا قار - مۇز سپورتىنا بەلسەنە ات سالىسىپ، وزدەرىنىڭ قىسقى وليمپياداعا دەگەن تىلەكتەرىن جەتكىزدى.
التاي قالاسىنداعى اق قايىڭ باقشاسىندا التاي قالاسى ”ءبىز التايدا تۇرىپ قىسقى وليمپياداعا دەم بەرەمىز“ اتىنداعى جاستار مەن ورەندەردىڭ قالاداعى دالالىق قار شاڭعى جارىسىن وتكىزدى. قىزىققا شومعان بالالار اياقتارىنا دالالىق قار شاڭعىنى بايلاپ الىپ، جارىس مايدانىندا قۇيعىتىپ، بىرىمەن ءبىرى قۇيرىق تىستەسىپ، ”قارقىن مەن شابىتتىڭ“ جاراستىعىن ايگىلەدى.
”وتكەن ماۋسىمداعى قار شاڭعى ساباعىندا مەن شاڭعى تەبۋدىڭ كوپتەگەن شەبەرلىكتەرىن يگەرىپ الدىم. وسى رەتكى جارىستا وزىمە ەرەكشە ريزامىن. مەن قۇلشىنا ءتۇسىپ، تاباندىلىقپەن جاتتىعىپ، شاڭعى تەبۋ دەڭگەيىمدى بارعان سايىن جوعارىلاتىپ، ءتىپتى دە جاقسى ناتيجە جاراتۋعا ۇمتىلامىن“، - دەدى التاي قالالىق 2 - ورتا مەكتەپ 7 - جىلدىعىنىڭ وقۋشىسى دينارا زامانبەك.
1 - ايدىڭ 31 - كۇنى اۋات اۋداندىق 4 - ورتا مەكتەپتىڭ تولىق ورتا 1 - جىلدىق (13) كلاسىنىڭ وقۋشىسى ابدىسامەت ياسىن ساباقتاستارىمەن بىرگە اۋات اۋدانى جاڭارىق قالاشىعى چاچى قىستاعىنداعى جاستار مەن ورەندەر قيمىل ورتالىعىنداعى باسكەتبول الاڭىندا باسكەتبول وينادى. ابدىسامەت بىلاي دەدى: ءبىز بەيجيڭنەن وتە الىستا بولىپ، سول مايداننىڭ وزىندە جارىستى تاماشالاي الماعانىمىزبەن، ءبىراق ءار كۇنى مەن تەلەۆيزور جانە توراپ ارقىلى بەيجيڭ قىسقى وليمپيادا سپورت جارىسىنىڭ ەڭ جاڭا احۋالىن ءبىلىپ وتىرامىن. بيىل قىسقى دەمالىستا مەن اۆتونوميالى رايوندىق مادەنيەت جانە ساياحات مەڭگەرمەسىندەگى اعاي - اپايلاردىڭ باستاۋىمەن ۇرىمجىگە بارىپ كولەمدى قار شاڭعى الاڭىندا شاڭعى تەبۋدىڭ قىزىعىن سەزىندىم، كەرەمەت تاماشا بولادى ەكەن! مەن، ءتىپتى، شاڭعى تەبۋدى ۇناتىپ قالدىم“.
(ءتىلشى جاڭ تيڭ، قاتىناسقان تىلشىلەر جاڭ جىلي، جاڭ رۇيلين، چىن جياڭلين)
