شي جينپيڭ باستالۋ سالتىنا قاتىناستى ءارى وسى كەزەكتى قىسقى وليمپيادا سپورت جارىسىنىڭ باستالعاندىعىن جاريالادى
لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان، حالىقارالىق وليمپيادا كوميتەتىنىڭ ءتوراعاسى باح، دۇنيە ءجۇزىنىڭ جەر - جەرىنەن كەلگەن باسشىلار مەن سيلى قوناقتار، ت. ب قاتىناستى
2 - ايدىڭ 4 - كۇنى كەشتە بەيجيڭ 24 - كەزەكتى قىسقى وليمپيادا سپورت جارىسىنىڭ باستالۋ سالتى مەملەكەتتىك دەنە تاربيە الاڭىندا سالتاناتپەن وتكىزىلدى. سۋرەتتە: مەملەكەت ءتوراعاسى شي جينپيڭ ءتوراعالار مىنبەسىندە كوپشىلىككە قول بۇلعاپ قۇرمەت ءبىلدىردى.
□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
2 - ايدىڭ 4 - كۇنى كەشتە بەيجيڭ 24 - كەزەكتى قىسقى وليمپيادا سپورت جارىسىنىڭ باستالۋ سالتى مەملەكەتتىك دەنە تاربيە الاڭىندا سالتاناتپەن وتكىزىلدى. شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلى پارتيا مەن مەملەكەت باسشىلارى باستالۋ سالتىنا قاتىناستى.
□ سۋرەتتى شينحۋا اگەنتتىگىنىڭ ءتىلشىسى يۋە يۋەۋي تۇسىرگەن
2 - ايدىڭ 4 - كۇنى كەشتە 24 - كەزەكتى قىسقى وليمپيادا سپورت جارىسىنىڭ باستالۋ سالتى بەيجيڭدەگى مەملەكەتتىك دەنە تاربيە الاڭىندا سالتاناتپەن وتكىزىلدى. سۋرەتتە: ءتۇستى جارقىلداق ويىندارى.
□ سۋرەتتى شينحۋا اگەنتتىگىنىڭ ءتىلشىسى ۋ حۇي - ۋو تۇسىرگەن
شينحۋا اگەنتتىگىنىڭ 2 - ايدىڭ 4 - كۇنى بەيجيڭنەن بەرگەن حابارى. قار - مۇز ارمانىنا تالپىنىپ، بولاشاققا بىرگە اتتاندى. 2022 - جىلى 2 - ايدىڭ 4 - كۇنى كەشتە كۇللى دۇنيەنىڭ نازارىن اۋدارعان بەيجيڭ 24 - كەزەكتى قىسقى وليمپيادا سپورت جارىسىنىڭ باستالۋ سالتى مەملەكەتتىك دەنە تاربيە الاڭىندا سالتاناتپەن وتكىزىلدى. مەملەكەت ءتوراعاسى شي جينپيڭ باستالۋ سالتىنا قاتىناستى ءارى وسى كەزەكتى قىسقى وليمپيادا سپورت جارىسىنىڭ باستالعاندىعىن جاريالادى. جۇڭحۋا وركەنيەتى مەن وليمپيادا سپورتى تاعى دا قول ۇستاسىپ، كۇللى ادامزاتتىڭ ىنتىماق، بەيبىتشىلىك، دوستىق سىندى كورىكتى كۇي تاراۋىن شارىقتاتتى.
لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلى پارتيا مەن مەملەكەت باسشىلارى، حالىقارالىق وليمپيادا كوميتەتىنىڭ ءتوراعاسى باح، سونداي - اق دۇنيە ءجۇزىنىڭ جەر - جەرىنەن كەلگەن باسشىلار مەن سيلى قوناقتار باستالۋ سالتىنا قاتىناستى.
ءتۇن قۇشاعىنداعى مەملەكەتتىك دەنە تاربيە الاڭىندا اشەكەيلى شامدار جايناپ، كوركىنە كورىك قوستى، قۇس ۇياسى فورماسىمەن اتاعى الەمگە جايىلعان وسى قۇرىلىس كوپ وتپەي تاريح جاراتىپ، دۇنيە جۇزىندەگى قىسقى وليمپيادا سپورت جارىسى مەن جازعى وليمپيادا سپورت جارىسى سىندى ”قوس وليمپيادانىڭ“ باستالۋ سالتىن وتكىزگەن العاشقى دەنە تاربيە سارايىنا اينالادى.
ساعات 19دان 15 مينۋت مولشەرىندە دۇنيە ءجۇزىنىڭ جەر - جەرىنەن كەلگەن مەملەكەت باسشىلارى، ۇكىمەت باسشىلارى، پاتشا اۋلەتى مۇشەلەرى جانە حالىقارالىق ۇيىمداردىڭ جاۋاپتىلارى قاتارلى سيلى قوناقتار ىلگەرىندى - كەيىندى جەتتى. وسى ساتتەگى جينسى زالىنىڭ كوركى كوز تارتىپ، كوكتەم مەرەكەسىنىڭ شات مەرەيلى بەينەسى مەن قىسقى وليمپيادا سپورت جارىسىنىڭ اسقاق ومىرشەڭدىك لەبى ەستى.
باستالۋ سالتى رەسمي باستالاردان بۇرىن مەملەكەتتىك دەنە تاربيە الاڭى قىزۋ مەرەيگە شومدى. مەرەيلى مۋزيكا ىشىندە بەيجيڭ، حىبەي ەكى جەردەن كەلگەن بۇقارا الاڭ ىشىنە كىرىپ، قاراپايىم دا دۋماندى الاڭ ءبيى ويىندارى ارقىلى شار تاراپتان كەلگەن قوناقتاردى قۋانىشپەن قارسى الدى. الاڭداعى الىپ ”福“ ءارىبى جۇڭگونىڭ جاڭا جىل مەرەكەسىنىڭ شات - شادىمان بەينەسىن قالىپتاستىردى. ۇلكەن ەكراندا حىبەيدىڭ جاڭجياكوۋى، حيلۇڭجياڭنىڭ حاربينى، جياڭسۋدىڭ نانجيڭى سياقتى ەل ىشىندەگى 10 قالادان كەلگەن بۇقارا دۇنيە جۇزىنە جۇڭگوداعى ”300 ميلليون ادامنىڭ قار - مۇز سپورتىنا قاتىناسقان“ قىزۋ ىنتاسى مەن اسقاق سەزىمىن ايگىلەدى. بىرلەسكەن مەملەكەتتەر ۇيىمىنىڭ باس حاتشىسى گۋتەرەس بەينەجازبادا ءسوز سويلەدى. الاڭ ءىشى، الاڭ سىرتى، جۇڭگو، دۇنيە ءجۇزى ”بولاشاققا بىرگە اتتانايىق“ دەگەن قار - مۇز شاتتىق جىرىن بىرگە شىعانداتتى.
ساعات 19دان 57 مينۋت وتكەندە دەنە تاربيە الاڭىنىڭ ورتاسىنداعى 10 مىڭ شارشى مەتردەن اساتىن قار - مۇزداي مولدىرەگەن الىپ ەدەن ەكراننان ”جاڭا جىل قۇتتى بولسىن“ دەگەن حانزۋشا - اعىلشىنشا جازۋ شىقتى. «بەيبىتشىلىك − تاعدىرلاس ورتاق تۇلعا» دەگەن مۋزيكا اۋەنى ىشىندە شي جينپيڭ مەن حانىمى پىڭ لييۋان باح قاتارلىلارمەن بىرگە ءتوراعالار مىنبەسىنە شىعىپ، كورەرمەندەرگە قول بۇلعاپ قۇرمەت ءبىلدىردى. بۇكىل الاڭنان ۇزاققا سوزىلعان قىزۋ شاپالاق ءۇنى مەن سالتانات ءۇنى كوتەرىلدى.
2 - ايدىڭ 4 - كۇنى ءدال جۇڭگونىڭ ەگىنشىلىك كالەندارىنىڭ 24 امالىنداعى ءبىرىنشى امال ”كوكتەم باسى“. ساعات ءدال 20دا اشىلۋ سالتىنىڭ ۋاقىتتى شەگەرىپ ساناۋ ويىنى جۇڭگونىڭ ءداستۇرلى كالەندارىنداعى ۋاقىت اينالىمى ىشىندە باستالدى، ۇلكەن ەكراندا رەتىمەن 24 امال جارقىلداپ كورىنىپ، بۇكىل الاڭداعى كورەرمەندەر سيفردىڭ وزگەرۋىنە ىلەسە بىركەلكى داۋىسپەن سانادى: 10، 9، 8، 7، 6، 5، 4، 3، 2، 1... دۋماندى ءۇن ىشىندە دەنە تاربيە الاڭىنىڭ ورتاسىنداعى ەدەن ەكراننان ءبىر تولعان اي كوتەرىلىپ، قالىقتاعان تورە كوبەلەك بيگە باسىپ، باقباق تۇقىمى اسپانعا شاشىلىپ، جايناعان الاۋ قۇس ۇياسى كەڭىستىگىن نۇرلاندىرىپ، ”كوكتەم باسىنىڭ“ حانزۋشا - اعىلشىنشا فورماسىن كەسكىندەپ، قىس كۇنىندە كوكتەم حابارىن جەتكىزدى.
ديكتور كورەرمەندەرگە جۇڭگونىڭ مەملەكەت ءتوراعاسى شي جينپيڭدى، حالىقارالىق وليمپيادا كوميتەتىنىڭ ءتوراعاسى باحتى تانىستىردى، شي جينپيڭ مەن باح ورىندارىنان تۇرىپ، كوپشىلىككە قول بۇلعاپ قۇرمەت ءبىلدىردى، بۇكىل الاڭنان تاعى دا قىزۋ قول شاپالاق ءۇنى كوتەرىلدى.
ءبىر بالا كىشى كەرنايمەن «مەن جانە مەنىڭ وتانىمنىڭ» تامىلجىعان ريتىمىن شارىقتاتتى. جۇڭگونىڭ ءار سالا، ءار كاسىبىنىڭ، وزات، ۇلگىلى تۇلعالاردىڭ، 56 ۇلتتىڭ ۋاكىلدەرى قوس قولدارىمەن بەس جۇلدىزدى نارت قىزىل تۋدى باياۋ دەنە تاربيە الاڭىنداعى تۋ شىعارۋ اۋماعىنا جەتكىزىپ، قۇرمەت قاراۋىلىنىڭ قولىنا تاپسىردى. بارلىق ادام ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى. بەس جۇلدىزدى قىزىل تۋ باياۋ كوتەرىلىپ، جەلمەن جەلبىرەدى.
الاڭ ىشىندەگى شام نۇرى كۇڭگىرتتەنىپ، ءبىر تامشى كوگىلدىر ءتۇستى سيا الىپ تىك ەكراندى بويلاپ اسپاننان قۇلديلاپ، حۋاڭحى سۋىنا اينالىپ، مىڭ شاقىرىم جوڭكىلىپ، بۋىرقانعان تولقىندارى قاتىپ، قار - مۇزدى القاپقا اينالدى. ءبىر الىپ مۇز تەكشە قار - مۇزدى القاپتا قالىپتاسىپ، بۇرىنعى 23 كەزەك قىسقى وليمپيادا سپورت جارىسى وتكىزىلگەن قالالاردىڭ تاريحىن كورسەتىپ، 24 ”لازەرلى ويما پىشاقتىڭ“ ويۋى ونىڭ ۇستىندە جارقىلداي كورىنىپ، ەڭ سوڭىندا ”2022 جۇڭگو بەيجيڭ“ بولىپ تۇراقتادى. 6 مۇز دوپ سپورتشىسى ”سىرعاناپ“ الاڭعا كىرىپ، تاياق سەرمەپ دوپ سوققان ارەكەت جاساپ، ”لازەرلى ويما پىشاقتىڭ“ جەدەل ويۋىن جەتەكتەپ، ەڭ سوڭىندا مۇز تەكشەنى مولدىرەپ جارقىراعان قار - مۇز بەس ساقيناسى ەتىپ تۇلعالادى.
ساعات 20دان 17 مينۋت وتكەندە سپورتشىلاردىڭ الاڭعا كىرۋ سالتى باستالدى. قار - مۇز ورنەگى تۇسىرىلگەن ”جۇڭگو قاقپاسى“ اشىلعاندا، وليمپيادا سپورتىنىڭ باستالعان جەرى گرەتسيانىڭ ۋاكىلدەر ۇيىرمەسى ەڭ الدىمەن الاڭعا كىردى، كەلەسى كەزەكتى قىسقى وليمپيادا سپورت جارىسى وتەتىن جەر يتاليانىڭ ۋاكىلدەر ۇيىرمەسى مەن وسى كەزەكتى قىسقى وليمپيادا سپورت جارىسىنىڭ داياشى ەلى جۇڭگونىڭ ۋاكىلدەر ۇيىرمەسى ەڭ سوڭىنان الاڭعا كىردى، باسقا مەملەكەتتەر مەن رايونداردىڭ ۋاكىلدەر ۇيىرمەسى حانزۋ ءارىبىنىڭ ىقشامدالعان سىزىق رەتى بويىنشا ىلگەرىندى - كەيىندى الاڭعا كىردى. وسى كەزەكتى وليمپيادا سپورت جارىسىنا جيىنى 91 مەملەكەت پەن رايوننىڭ ۋاكىلدەر ۇيىرمەسى قاتىناسادى. الداعى 16 كۇندە 3000عا جۋىق سپورتشى بەس ساقينالى تۋدىڭ استىندا جارىس الاڭدارىندا ونەر باسەكەسىنە تۇسەدى. دۇنيەگە ايگىلى 19 مۋزيكانى تىزبەكتەپ قۇراستىرعان كورىنىستى مۋزيكانىڭ سۇيەمەلىندە سپورتشىلار دەنە تاربيە الاڭىنا قادام باسىپ، ءالسىن - ءالسىن كورەرمەندەرگە قول بۇلعاپ قۇرمەت ءبىلدىردى. الاڭداعى كورەرمەندەر قىزۋ قول شاپالاق ۇنىمەن جانە سالتانات ۇنىمەن ولاردىڭ كەلگەندىگىن قارسى الدى.
«وتاندى جىرلايمىز» ءانىنىڭ اسقاق اۋەنى ىشىندە داياشى ەل جۇڭگونىڭ ۋاكىلدەر ۇيىرمەسى ەڭ سوڭىنان الاڭعا كىردى، ەكى تۋ ۇستاۋشى − جۇڭگونىڭ بولات قۇرىلىمدى شانا جارىسىنا تۇسەتىن ايەل ساڭلاعى جاۋ دان مەن تەز سىرعاناۋدىڭ ايتۋلى ساڭلاعى گاۋ تيڭيۇي قاتاردىڭ ەڭ الدىندا ءجۇردى. الاڭدا شاپالاق ءۇنى جاڭعىرىپ، سالتانات ءۇنى اسقاقتاي ءتۇستى. وسى كەزەكتى قىسقى وليمپيادا سپورت جارىسىنا قاتىناساتىن جۇڭگو ۋاكىلدەر ۇيىرمەسىندە جيىنى 388 ادام بار، مۇنىڭ 177ى سپورتشى بولىپ، ءار كەزەكتى قىسقى وليمپيادا سپورت جارىستارى ىشىندە جۇڭگودان قاتىناسقان سپورتشى سانى ەڭ كوپ بولدى.
سپورتشىلاردىڭ الاڭعا كىرۋى اياقتاعان سوڭ، ءارقايسى ۋاكىلدەر ۇيىرمەسىنىڭ باستاۋشىلارى قار گۇلى پىشىنىندەگى جول باستاۋ تاقتايشاسىن بيىك كوتەرە بىرىكتىرىپ، ”ۇلكەن قار گۇلىن“ بىرگە قۇرادى، ۇلكەن ەكراندا «اناعۇرلىم قۋاتتى، اناعۇرلىم ىنتىماقتى بولامىز» اتتى قىسقا فيلم قويىلىپ، اشىلۋ سالتىنداعى ”دۇنيە ءجۇزىنىڭ ۇلى بىرلىگىن ورناتۋ، بارشا الەم ءبىر شاڭىراق“ سىندى نەگىزگى تاقىرىپتى تولىق بەينەلەدى.
ىلە - شالا بەيجيڭ قىسقى وليمپيادا سپورت جارىسىن ۇيىمداستىرۋ كوميسسياسىنىڭ ءتوراعاسى ساي چي ارناۋ ءسوز سويلەدى. ول بىلاي دەدى: ءدال جۇڭگونىڭ ەگىنشىلىك كالەندارى بويىنشا بارىس جىلىنىڭ كوكتەم مەرەكەسى كەزىندە دۇنيە ءجۇزىنىڭ جەر - جەرىنەن كەلگەن سپورتشىلار، جاتتىقتىرۋشىلار جانە سيلى قوناقتار بەيجيڭدە باس قوسىپ، قىسقى وليمپيادا سپورت جارىسىنىڭ سالتاناتىن بىرگە تاماشالاپ، بەيجيڭنىڭ بۇكىل جەر شارىنداعى تۇڭعىش ”قوس وليمپيادا قالاسىنا“ اينالعاندىعىنا كۋا بولدى، جۇڭگونىڭ وليمپيادا سپورتىندا ۇزدىكسىز جاڭا كەرەمەت جاراتۋىنا كۋا بولدى. ءتوراعا شي جينپيڭنىڭ تىكەلەي جەبەۋىندە جانە جۇڭگو ۇكىمەتىنىڭ پارمەندى باسشىلىعىندا، ءبىز جاسىل، بىرگە يگىلىكتەنۋ، اشىق، پاك بولۋ سىندى وليمپيادا سپورت جارىسىن وتكىزۋ ۇستانىمىن امالياتتا ايگىلەپ، حالىقارالىق وليمپيادا كوميتەتى سياقتى جاقتارمەن تىزە قوسا سەلبەسىپ، ىندەتتىڭ ىقپالىن جەڭىپ، بەيجيڭ قىسقى وليمپيادا سپورت جارىسىنىڭ ۋاعىندا باستالۋىن جۇزەگە اسىرىپ، بۇكىل دۇنيە جۇزىنە ادامزاتتىڭ قىسىلتاياڭ جاعدايدا سىن - سايىستاردى جەڭە الاتىن مۇقالماس بەينەسىن ايگىلەدىك. ءبىز قول ۇستاسا بىرگە ءجۇرىپ، بولاشاققا بىرگە اتتانىپ، ادامزاتتىڭ تاعدىرلاس ورتاق تۇلعاسىن قۇرۋدىڭ شىت جاڭا تاراۋىن جازامىز.
حالىقارالىق وليمپيادا كوميتەتىنىڭ ءتوراعاسى باح ارناۋ ءسوز سويلەدى. ول بەيجيڭ قىسقى وليمپيادا سپورت جارىسىن ۇيىمداستىرۋ كوميسسياسىنا، جۇڭگونىڭ ۇكىمەت تاراۋلارىنا جانە بۇكىل جۇڭگو حالقىنا راقىمەت ايتتى. باح بىلاي دەدى: جۇڭگونىڭ قىسقى سپورت جاعىندا قول جەتكىزگەن كەرەمەت تابىسى بۇكىل دۇنيە ءجۇزى قىسقى سپورتىنىڭ جاڭا ءداۋىرىن اشىپ، بۇكىل دۇنيە ءجۇزىنىڭ قىسقى سپورتقا قاتىناسۋ دەڭگەيىن جاڭا ءبىر بەلەسكە كوتەرەدى، جۇڭگو حالقى مەن بۇكىل دۇنيە ءجۇزىنىڭ جەر - جەرىندەگى قىسقى سپورت اۋەسكەرلەرى مۇنىڭ يگىلىگىن كورەتىن بولادى.
ساعات 21دەن 51 مينۋت وتكەندە باستالۋ سالتى جان تەبىرەنتەر ءساتتى قارسى الدى. مەملەكەت ءتوراعاسى شي جينپيڭ: بەيجيڭ 24 - كەزەكتى قىسقى وليمپيادا سپورت جارىسى باستالدى! - دەپ جاريالادى. سول ساتتە بۇكىل الاڭ دۋمانعا شومىپ، شۇعىلا شاشقان ءتۇستى جارقىلداقتار كوككە قاراي اتىلىپ، زەڭگىر كوكتە ”قوناق قابىلداۋ شىرشاسىنىڭ“ ءپىشىنى قالىپتاسىپ، بۇكىل دۇنيە جۇزىنەن كەلگەن قوناقتاردى قارسى الاتىندىعىن بەينەلەدى، شاپالاق ءۇنى، سالتانات ءۇنى كوپكە دەيىن تولاستامادى.
دۇنيە ءجۇزىنىڭ جەر - جەرىنەن كەلگەن 76 جاس دەنە تاربيە الاڭىنا كىرىپ، يىق تۇيىستىرە ءجۇردى. ولار ءجۇرىپ وتكەن جەرلەردە دۇنيە جۇزىندەگى ءار ەل حالقىنىڭ قۋانىش - جۇبانىشتى بىرگە وتكەرىپ، ىندەتتى بىرگە جەڭىپ، ارمان ءۇشىن جىگەرلەنە ەرلىكپەن سايىسقان سۋرەتتەرىنىڭ ۇزىنشاق سىزباسى باياۋ اشىلىپ، سۋرەت - كەسكىندەر بەينە كىلكىپ اققان وزەندەي باياۋ جىلجىدى. ۇزىن وزەننىڭ ەكى جاعاسىندا ىنتىماق پەن ىزگىلىكتى بەينەلەيتىن جۇڭگو تۇيىنشەگى ورنەگى، بىرتە - بىرتە قۇبىلىپ ”بولاشاققا بىرگە اتتانايىق“ دەگەن حانزۋشا - اعىلشىنشا ارىپتەرگە وزگەرىپ، قول ۇستاسا بىرگە ءجۇرىپ، بولاشاقتى بىرگە قۇرۋداي تاماشا تىلەكتى بەينەلەدى.
«ويلاۋ» اتتى ءاننىڭ تەربەۋىندە ۇستىلەرىنە قىزىل ءتۇستى سپورت كيىمىن كيگەن 24 كونكيشى 4 گرۋپپاعا ءبولىنىپ، شىمىر تۇلعاسىمەن مۇز ايدىندا سىرعاناپ، ۇزىننان - ۇزاق ءىز قالدىردى، ىزدەرىنەن وليمپيادانىڭ ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋداي“ جاڭا ناقىلى كورىنىپ، تۇتاس ادامزاتتىڭ ورتاق ارمانىن ايگىلەدى. كەڭىستىكتە بيىك تۇعىردان سەكىرە سىرعاناعان ادام بەينەسى شاشىراعان نۇرمەن ەلىكتەمەلى كورسەتىلىپ، قار - مۇز بەس ساقيناسىنان ۇشىپ ءوتتى. سونىمەن بىرگە تىك ەكرانداعى سىزبا كەسكىندە الۋان ءتۇرلى قار - مۇز سپورتى بەينەلەنىپ، قار - مۇز سپورتىنىڭ كوركەمدىگى بىرگە كورسەتىلدى.
6 تۋ ۇستاۋشى وليمپيادا تۋىن كوتەرىپ الاڭعا كىردى. ولار جۇڭگونىڭ تۇرلىشە كەزەڭدەردەگى قىسقى سپورت تۇرلەرىنىڭ ۇزدىك سپورتشىلار ۋاكىلدەرى − جاڭا جۇڭگونىڭ قىسقى سپورت تۇرىندەگى ءبىرىنشى دۇنيە جۇزىلىك اعا جۇلدەگەر لو جىحۋان، جۇڭگونىڭ قىسقى وليمپيادا سپورت جارىسىندا ەرلەر سپورت ءتۇرىنىڭ تۇڭعىش مەدالىن العان سپورتشى لي جياجۇن، جۇڭگونىڭ مانەرلەپ سىرعاناۋ تۇرىنەن قىسقى وليمپيادا سپورت جارىسىندا التىن مەدال الۋدان ”ءنول“ جارعان ەكى ادامدىق سىرعاناۋ ءتۇرى شەبەرى شىن شۋە، جۇڭگونىڭ قىسقى وليمپيادا سپورت جارىسىندا قار ۇستىندەگى ويىن تۇرىنەن تۇڭعىش التىن مەدال العان سپورتشى حان شياۋپىڭ، ۆانكوۋەر قىسقى وليمپيادا سپورت جارىسىندا قىسقا ارالىقتا تەز سىرعاناۋ قىزدار كۇش جالعاۋ جارىسىنىڭ التىن مەدال يەگەرى جاڭ حۇي، جۇڭگونىڭ تەز سىرعاناۋ تۇرىندە قىسقى وليمپيادا سپورت جارىسىنداعى التىن مەدال الۋدان ”ءنول“ جارعان سپورتشى جاڭ حۇڭ.
حىبەيدىڭ فۋپيڭ تاۋلى وڭىرىنەن كەلگەن 44 بالا وليمپيادا ءانىن گرەك تىلىندە اۋەلەتە شىرقادى. وليمپيادا تۋى ءان اۋەنىنە ىلەسە باياۋ كوتەرىلىپ، بەس جۇلدىزدى قىزىل تۋمەن بىرگە اسقاق جەلبىرەدى.
بەس ساقينالى تۋ الدىندا جۇڭگونىڭ دالالىق شاڭعى تەبۋ سپورتشىسى ۋاڭ چياڭ مەن سىڭار تاقتايمەن شاڭعى تەبۋ سپورتشىسى ليۋ جيايۇي، جۇڭگو ەركىن شاڭعى تەبۋ تورەشىسى تاۋ يۇڭچۇن، جۇڭگو سىڭار تاقتايمەن شاڭعى تەبۋ جاتتىقتىرۋشىسى جي شياۋ - وۋ جارىسقا قاتىناسقان بارشا سپورتشىلار، تورەشىلەر، جاتتىقتىرۋشىلار، سونداي - اق ءمانساپتىلار اتىنان جەكە - جەكە سەرت بەردى.
ۇلكەن ەكرانداعى «بولاشاق اعا جۇلدەگەر» اتتى قىسقا فيلم تۇتاس الاڭداعى كورەرمەندەردى وزىنە باۋرادى، قاز - قاز باسقان بۇلدىرشىندەر قار - مۇز سپورتىنىڭ اۋەسكەرىنە اينالدى، ولار ءبىر جىعىلىپ، ءبىر تۇرعانىمەن، ساتسىزدىككە باستان - اياق كۇلىمسىرەي قارادى، كوڭىلدى دە قىزىقتى كەسكىن كورەرمەندەردى ىقتيارسىز كۇلكىگە بولەدى. كۇلكى اۋەنى ىشىندە رياسىز دا سۇيكىمدى بالاقايلار سپورت الاڭىنان بوي كورسەتتى. ولار قولدارىنا جالت - جۇلت ەتكەن ”اق كوگەرشىندەردى“ كوتەرىپ، ەمىن - ەركىن شاتتىققا شوما اسىر سالىپ، سپورت الاڭىنىڭ ءدال ورتاسىنا تۇس - تۇستان جۇگىرىپ كەلىپ جۇرەك فورماسىندا توپتالىپ، ”ۇلكەن قار گۇلىنىڭ“ ماڭىنا قورالانىپ تۇرا قالدى.
ساعات 22 دەن 10 مينۋت وتكەندە وليمپيادا الاۋىنان الىنعان وت مەملەكەتتىك سپورت الاڭىنا جەتكىزىلدى. وسى رەتكى قىسقى وليمپيادا سپورت جارىسىنىڭ الاۋىن جالعاۋ 2 - ايدىڭ 2 - كۇنىنەن 4 - كۇنىنە دەيىن بەيجيڭ، يانچيڭ، جاڭجياكوۋ سىندى 3 جارىس وڭىرىندە ءوتتى. وليمپيادا ورمان باقشاسى، يحىيۋان، باداليڭ ۇلى قورعانى، دايۇنحى ورمان باقشاسى... وليمپيادا سپورت جارىسى الاۋى بايىرعى زامان مەن وسى زاماندى باسىپ ءوتىپ، تاريح پەن بولاشاقتى تۇتاستىرىپ، دۇنيە جۇزىنە سۇبەلى دە جاسامپاز ومىرشەڭدىك كۇشكە تولى جۇڭحۋا وركەنيەتىن ايگىلەدى.
7 الاۋگەر الاۋدى بيىك كوتەرىپ، 6 تاياقشاعا ءبولىنىپ، سپورت الاڭىنىڭ ىشىندە ەڭ سوڭعى الاۋدى جالعادى. تەز سىرعاناۋدىڭ بۇكىل مەملەكەتتىك اعا جۇلدەگەرلىگىن ءۇرتىس 11 رەت يەلەگەن ”50 - جىلداردىڭ تۇلەگى“ سپورتشى جاۋ ۋيچاڭ، كالگاري قىسقى وليمپيادا سپورت جارىسىنىڭ قىسقا ارالىققا تەز سىرعاناۋ جارىسىندا ءبىر التىن مەدال، 2 قولا مەدال يەلەگەن ”60 - جىلداردىڭ تۇلەگى“ سپورتشى لي يان، سولت - لەيك - سيتي قىسقى وليمپيادا سپورت جارىسىندا جۇڭگو دەنە تاربيە ۋاكىلدەر ۇيىرمەسىنىڭ قىسقى وليمپيادا سپورت جارىسىندا التىن مەدال الۋدان ”ءنول“ جارعان ”70 - جىلداردىڭ تۇلەگى“ سپورتشى ياڭ ياڭ، ەرلەردىڭ 100 مەترلىك ازيا رەكوردىن ساقتاۋشى ”80 - جىلداردىڭ تۇلەگى“ سپورتشى سۋ بيڭتيان، سوچي قىسقى وليمپيادا سپورت جارىسىندا ايەلدەردىڭ 1500 مەترلىك قىسقا ارالىققا تەز سىرعاناۋ اعا جۇلدەگەرلىگىن ءۇرتىس يەلەگەن ”90 - جىلداردىڭ تۇلەگى“ سپورتشى جوۋ ياڭ، كەزىندە شۇعىلالى ناتيجە جاراتقان جۇڭگونىڭ سپورت ساڭلاقتارى كۇش جالعاپ جۇگىرگەندە، تۇتاس الاڭنان قىزۋ قول شاپالاق ءۇنى كوتەرىلدى.
ەڭ سوڭعى تاياقشا 2 ”2000 - جىلداردىڭ تۇلەگى“، سپورتشىلار − دالالىق شاڭعى تەبۋ سپورتشىسى دىلنيگار يىلھامجاننىڭ، سولتۇستىك ەۆروپا ەكى ءتۇرىنىڭ سپورتشىسى جاۋ جيا - ۋىننىڭ قولىنا جەتكىزىلدى. كوپشىلىك كوز تىككەن ەكى الاۋگەر ”اق كوگەرشىندەر“ قورشاعان ”ۇلكەن قار گۇلىن“ بەتكە الىپ، الاۋدى ”ۇلكەن قار گۇلىنىڭ“ ءدال ورتاسىنا قاداپ، بارشا ۋاكىلدەر ۇيىرمەسىنىڭ قار گۇلى بەينەسىندەگى جەتەكشى تاقتايشاسىنان ۇيىمداسقان نەگىزگى الاۋدى تۇلعالادى. نەگىزگى الاۋ وليمپيادا سپورت جارىسى تاريحىندا تۇڭعىش رەت ”ميكرو الاۋ“ ۇلگىسىن قولدانىپ، جاسىل، ورتانى قورعاۋ ۇستانىمىن تولىق ايگىلەدى.
كوز تارتارلىق ءتۇستى جارقىلداق كوككە كوتەرىلىپ، تۇتاس دەنە تاربيە الاڭى لەزدە شاتتىقتىڭ شالقار تەڭىزىنە اينالدى.
بۇل ءبىر ميلليارد 400 ميلليوننان استام جۇڭگو حالقىنىڭ ماڭگى ەسىنەن كەتپەيتىن ەلەۋلى ءساتى، بۇل قىسقى وليمپيادا سپورتىنىڭ تاعى ءبىر رەتكى شۇعىلالى ءساتى. 6 جىلدان استام ۋاقىت زەيىن سالا دايىندالىپ، جاڭا تيپتى ايدارشا ۆيرۋس وكپە قابىنۋ ىندەتىنىڭ ءتيىمسىز ىقپالىن جەڭگەن جۇڭگو حالقى ەڭبەكشىلدىكپەن، قايسار دا پاراساتتىلىقپەن دۇنيە جۇزىنە ءبىر رەتكى ۇنەمشىل، حاۋىپسىز، تارتىمدى وليمپيادا سپورتىنىڭ سالتاناتتى جينالىسىن تارتۋ ەتەدى.
بۇل كەشتە بەيجيڭ دۇنيە جۇزىمەن قاۋىشتى!
بۇل ءتۇنى دۇنيە ءجۇزى بەيجيڭگە كوز تىكتى!
باستالۋ سالتىنا قاتىناسقان حالىقارالىق سيلى قوناقتار مىنالار: رەسەيدىڭ زۇڭتۇڭى پۋتين، كامبودجانىڭ پاتشاسى سيحاموني، سينگاپۋردىڭ زۇڭتۇڭى حاليما، قازاقستاننىڭ زۇڭتۇڭى توقايەۆ، قىرعىزستاننىڭ زۇڭتۇڭى جاپاروۆ، تاجىكستاننىڭ زۇڭتۇڭى راحمون، تۇركمەنستاننىڭ زۇڭتۇڭى بەردىمۇحامەتوۆ، وزبەكستاننىڭ زۇڭتۇڭى ميرزيويەۆ، ەگيپەتتىڭ زۇڭتۇڭى سيسي، كاتاردىڭ ءامىرى تاميم، اراب بىرىككەن امىرلىگى ابۋدابي پاتشا مۇراگەرى مۇحاممەد، پولشانىڭ زۇڭتۇڭى دۋدا، سەربيانىڭ زۇڭتۇڭى ۆۋچيچ، لۋكسەمبۋرگتىڭ ۇلى كىنازى حەڭري، موناكونىڭ حانزاداسى البەرەⅡ، ارگەنتينانىڭ زۇڭتۇڭى فەرناندەز، ەكۆادوردىڭ زۇڭتۇڭى لاسسو، موڭعۇليانىڭ زۇڭليى اۋيۇن ىردىن، پاكيستاننىڭ زۇڭليى يمىران حان، بوسنيا - گەرتسەگوۆينا مينيسترلەر كەڭەسىنىڭ ءتوراعاسى تەگەرتيا، پاپۋا - جاڭا گۆينەيانىڭ زۇڭليى مالاپەي، كورەيانىڭ پارلامەنت باستىعى پياۋ بيڭشي، تايلاندتىڭ حانىشاسى شىلينتۇڭ، بىرلەسكەن مەملەكەتتەر ۇيىمىنىڭ باس حاتشىسى گۋتەرەس، بىرلەسكەن مەملەكەتتەر ۇيىمى جينالىسىنىڭ ءتوراعاسى شاحيد، دۇنيە جۇزىلىك دەنساۋلىق ساقتاۋ ۇيىمىنىڭ باسالقاسى تان دىساي، دۇنيە جۇزىلىك ءبىلىم مەنشىك ۇقىعى ۇيىمىنىڭ باسالقاسى دىڭ حۇڭسىن، جاڭا وركەندەتۋ بانكەسىنىڭ باستىعى تروۆيللوت، شاڭحاي سەلبەستىك ۇيىمىنىڭ باس حاتشىسى جاڭ ميڭ قاتارلى حالىقارالىق ۇيىمداردىڭ جاۋاپتىلارى، جالپى 70كە جۋىق مەملەكەت، رايون جانە حالىقارالىق ۇيىمنىڭ ۇكىمەت ۋاكىلدەرى.
بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتارى، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ پروكۋرورى، بەيجيڭدەگى مەملەكەتتىك ساياسي كەڭەستىڭ ورىنباسار ءتوراعالارى، سونداي - اق ورتالىق اسكەري ىستەر كوميتەتىنىڭ مۇشەلەرى باستالۋ سالتىنا قاتىناستى.
اۋمىن ەرەكشە اكىمشىلىك رايونىنىڭ اكىمى حى يچىڭ، جۇڭگو گومينداڭ پارتياسىنىڭ بۇرىنعى ءتوراعاسى حۇڭ شيۋجۋ باستالۋ سالتىنا قاتىناستى.
حالىقارالىق وليمپيادا كوميتەتىنىڭ جاۋاپتىسى، ت.ب باستالۋ سالتىنا قاتىناستى.
