− بەيجيڭ قىسقى وليمپيادا سپورت جارىسىنىڭ باستالۋ سالتىنان ەستەلىك
□ شينحۋا اگەنتتىگىنىڭ تىلشىلەرى
2 - ايدىڭ 4 - كۇنى كوزدىڭ جاۋىن العان وت شاشۋ ”قۇس ۇياسى“ اسپانىن جارقىراتىپ، مەملەكەتتىك دەنە تاربيە الاڭى تاعى ءبىر مارتە دۇنيە ءجۇزى كوز تىككەن تۇيىنگە اينالدى؛ كوكتەم باسى كۇنىندە ”قوس وليمپيادا قالاسى“ بەيجيڭ تاريحي ءساتتى قارسى الىپ، وليمپيادا ارمانى جۇڭحۋانىڭ بايتاق دالاسىندا تاعى دا جايقالا گۇل اشتى.
قار - مۇز جىرى شىعانداپ، بەس ساقينا نۇرعا بولەنگەن بەيجيڭ قىسقى وليمپيادا سپورت جارىسىنىڭ باستالۋ سالتى ءبىر كەزەك ”ۇنەمشىل، حاۋىپسىز، تارتىمدى“ قىسقى وليمپيادا سالتاناتىنىڭ شىمىلدىعىن اشتى. بەس ساقينالى تۋ استىندا ”كىشكەنە قار ۇشقىنى“ ۇيىسا كەلىپ ”ءبىر شوق ۇلكەن قار گۇلىنە اينالعان“ رومانتيكالى حيكايا شار تاراپتىڭ ”كوركەمدىكتەن بىرگە يگىلىكتەنگەن“ ماڭگىلىك مۋزيكا سيمفونياسىنا اينالدى.
قار - مۇزدى دانەكەر ەتىپ، دۇنيە جۇزىمەن بىرگە العا ىلگەرىلەدى. العا، بولاشاققا بىرگە اتتانايىق!
وسى ءبىر شوق قار گۇلى 100 جىلدىق كۇرەس ساپارىنىڭ شاعىن كورىنىسى ەسەپتى، 100 جىلدىق ارمانعا قۇلاش سەرمەۋ بۇگىنگى جۇڭگونى سومدادى، بۇل قىسقى وليمپيادا ارمانى مەن جۇڭگو ارمانىنىڭ تاريحي توعىسۋى
بايتاق دالاعا كوكتەم كەلىپ، بار تىرشىلىك جاندانا باستادى، كوكتەم قاشاندا ادامدارعا شەكسىز قيال سيلايدى. ”24 امال“ بويىنشا جاسالعان كەرى شەگەرىپ ساناۋ نولگە جەتكەندە قىسقا فيلمدەگى قالىقتاي ۇشقان قار گۇلى ”قۇس ۇياسىنا“ قالقىپ كىرىپ، رومانتيكالى ساپارىن باستاعانداي سەزىلدى. تەڭدەسسىز بەيجيڭ وليمپيادا سپورت جارىسىنا كۋا بولعان ”قۇس ۇياسى“ جاقىندا زەردەلىلەندىرىپ دارەجەسىن جوعارىلاتىپ وزگەرتىپ سالۋ جۇمىسىن ورىنداعان ەدى، ەندى مىنە جاڭا ءبىر پاراقتى اشىپ، ”قوس وليمپيادا قالاسى“ داڭقىن جىر ەتۋدە.
اسپاندا جارقىلداي اشىلعان حانزۋشا، اعىلشىنشا ”立春“ جانە ”SPRING“ دەگەن جالىن جازۋ جۇڭگولىقتاردىڭ قىسقى وليمپيادا ارمانىن وسى ساتتە رەالدىققا اينالدىردى.
6 جىلدان استام ۋاقىت زەر سالا دايىندالۋ بارىسىندا سان - ساناقسىز جاپا - ماشاقاتتى وتكەرىپ، قىسقى وليمپيادا ۋادەسىن ورىنداۋدا قات - قابات قيىنشىلىقتاردى جەڭدى. ۋاقىت وسى ۇمىتىلعىسىز قاس قاعىم ساتكە ۇيىپ قالعانداي، تاريح وسى بوياۋى قانىق رەڭدى كەستەلەپ العانداي بولدى − ” قوس وليمپيادا قالاسىنا“ الەمنىڭ جەر - جەرىنەن كەلگەن سيلى قوناقتار باس قوسىپ، ۇمىتكە تولى كوكتەمدى قارسى الدى.
كىشكەنتاي ۇل بالا كىشى كەرنايمەن «مەن جانە مەنىڭ وتانىم» ءانىنىڭ اۋەنىن اۋەلەتتى. تامىلجىعان كەرناي ءۇنى اسپاندا جاڭعىرىپ، اسەرلى اۋەن جۇرەكتەرگە بويلادى. الاڭنىڭ ورتاسىندا 12 بالاقاي بەس جۇلدىزدى قىزىل تۋدى باياۋ جازدى، ءار ۇلت، ءار سالاداعى بۇقارانىڭ 100 نەشە ۋاكىلى مەملەكەت تۋىن قولدان - قولعا جەتكىزدى، ولار مەملەكەت تۋىنا كوز جازباي قاراپ، شىن جۇرەكتەن قۇرمەت سەزىمىن ءبىلدىردى. ادامدى سان ويعا سالعان وسى ساتتەردە قالايشا كوزگە ىستىق جاس الماي تۇرا الاسىز.
”حالىق تاريحتىڭ جاراتۋشىسى، ناعىز قاھارمان“. سىلدىراعان بۇلاقتار جينالا كەلىپ دارياعا، تەڭىزگە اينالادى، حالىقتىڭ ۇلى كۇشى − سان مىڭ باتپان. ميلليارد جۇڭحۋا پەرزەنتتەرى قوس قولدارىمەن قارىشتاي العا ۇمتىلعان، ەرلىكپەن العا ىلگەرىلەگەن جۇڭگونى بيىك كوتەردى، جالپى جۇرت ءبىر نيەتتە بولىپ، ەل بىرلىگىنەن قامال ورناتقان جۇڭگونى بيىك كوتەردى.
ءبىر تامشى كوك سيا اسپاننان سورعالاي قۇيىلىپ كەلىپ، حۋاڭحى وزەنىنىڭ سارقىراعان اعىنىنا اينالىپ بارىپ، اپپاق كىرشىكسىز قار - مۇز قۇرسانعان ەرتەگى الەمىنە اينالدى. بۇرىنعى 23 كەزەك قىسقى وليمپيادا سپورت جارىسىن وتكىزگەن قالالاردىڭ تاريحي سۋرەتتەرى باياۋ كوتەرىلگەن ”مۇز تەكشەنىڭ“ ۇستىندە جارقىلداپ، سۋرەتتەر اقىرىندا ”2022 جۇڭگو بەيجيڭ“ بولىپ توقتادى. ءموپ - ءمولدىر قار - مۇز بەس ساقينا ”مۇز تەكشەنى“ ”جارىپ“ شىقتى. بۇكىل الاڭدا قول شاپالاق ءۇنى نايزاعايداي شاتىرلاپ، ادامداردىڭ الاقايلاعان ءۇنى الاڭدى كەرنەدى.
ءموپ - ءمولدىر بەس ساقينا ۋاقىتتى ۇيىتىپ، قار - مۇز سالتاناتىنىڭ قار گۇلدەرى ادامنىڭ قيالىن قيىرعا شارلاتتى.
100 نەشە جىلدىڭ الدىنداعى ”وليمپيادا سپورت جارىسىنىڭ 3 سۇراۋىنان“ 2008 - جىلعى ”100 جىلدىق ارماننىڭ ورىندالۋىنا“ دەيىن، ونان بۇگىنگى ”قوس وليمپيادا قالاسىنا“ دەيىن؛ جاڭا جۇڭگونىڭ العاش رەت وليمپيادا سپورت جارىسى الاڭىنا قادام تاستاۋىنان، جازعى وليمپيادا سپورت جارىسى مەن قىسقى وليمپيادا سپورت جارىسىندا التىن مەدالدان ”ءنولدى جارۋعا“ دەيىن، ونان دەنە تاربيەدەگى ءىرى ەلدەن دەنە تاربيەدەگى قۋاتتى ەلگە قادام تاستاۋعا دەيىن... جۇڭگو حالقىنىڭ وليمپيادا سپورت جارىسىنا قاتىناسۋ، وليمپيادا سپورت جارىسىن وتكىزۋگە ءوتىنىش بەرۋ، وليمپيادا سپورت جارىسىن وتكىزۋگە دايىندالۋ تاريحى − جۇڭحۋا ۇلتىنىڭ ەڭسە كوتەرۋدەن، بايۋدان قۇدىرەتتەنۋگە دەيىنگى ۇلى شارىقتاۋىن قارسى الۋىنىڭ جاندى بەينەسى بولىپ، جۇڭگو كوممۋنيستىك پارتياسىنىڭ قۇلاشىن كەڭ جايعان 100 جىلدىق جورىعى بولىپ ۇيىسىپ، ”دەنە تاربيە قۋاتتى بولسا، جۇڭگو قۋاتتى بولادى، ەل تاعدىرى گۇلدەنسە، دەنە تاربيە گۇلدەنەدى“ دەگەننىڭ تەرەڭ ءمانىن ءتۇسىندىردى.
ەستەن كەتكىسىز 2008 - جىلعى وليمپيادا سپورت جارىسىنىڭ باستالۋ سالتىنداعى كلاسسيكا، شۇعىلالى جۇڭحۋا مادەنيەتى، مايەكتى جۇڭگو تاريحى دۇنيە جۇزىنە وركەنيەتتى بايىرعى ەلدىڭ جايقىن تىنىسىن كورسەتتى. بەيجيڭ قىسقى وليمپيادا سپورت جارىسىنىڭ باستالۋ سالتىندا كوز جاۋىن العان عىلىم - تەحنيكالىق اسەر، ”بولاشاق سەزىمگە“ تولى ويىن نومىرلەرى ادامدارعا سوتسياليستىك وسىزاماندانعان قۇدىرەتتى مەملەكەتتى بەتكە الىپ ىلگەرىلەگەن ەلدىڭ جاستىق كوكتەم ومىرشەڭدىك كۇشىن سەزىندىردى.
”بۇگىنگى جۇڭگو 2008 - جىلعى جۇڭگودان دا وزگەشە، رەفورما جاساۋ، ەسىك اشۋدى تەرەڭدەتۋ جۇڭگونىڭ وراسان زور جەتىستىكتەرگە قول جەتكىزۋىنە مۇمكىندىك جاسادى، كەدەيلىكتەن ارىلتۋدان قامال الۋ جەڭىسىنە قول جەتكىزگەننەن كەيىن حالىقتىڭ رۋحاني بەت - بەينەسى شىت جاڭا كۇيگە ەندى“. بەيجيڭ قىسقى وليمپيادا سپورت جارىسى باستالۋ سالتىنىڭ باس رەجيسسەرى جاڭ يموۋ بىلاي دەدى: باستالۋ سالتى ارقىلى ”سەن بۇكىل دۇنيە جۇزىنە جۇڭگو حيكاياسىن زور داۋىسپەن ايتۋ ورايىنا يە بولاسىڭ“.
بەيجيڭ قىسقى وليمپيادا سپورت جارىسىنىڭ باستالۋ سالتىنداعى اكتەرلەر شوعىرىنىڭ قۇرامى − سالتقا قاتىناسقان بارلىق اكتەرلەر جوعارى، ورتا، باستاۋىش مەكتەپ وقۋشىلارى مەن جاي قالا تۇرعىندارى بولدى. سالتتىڭ الدىندا «بولاشاققا بىرگە اتتانايىق» ورىندالعان كەزدە 70 جاستاعى قارتتان، اۋزىنان انا ءسۇتىنىڭ ءدامى ارىلماعان جاس بالاعا دەيىن الاڭنىڭ جان - جاعىنا تەگىس اينالىپ تۇرىپ، ستيلى وزگەشە ”جۇڭگو ۇلگىسىندەگى جىلجىمالى الاڭ ءبيىن“ ورىندادى.
”باستالۋ سالتى تاماشا ءساتتى كوپشىلىكپەن بىرگە ءبولىسىپ، ادامزاتتىڭ ءتىپتى دە كوپ ورتاق تانىمىن جەتكىزۋ كەرەك“، - دەدى جاڭ يموۋ.
وسى ءبىر شوق قار گۇلى دۇنيە ءجۇزى وركەنيەتىنىڭ نۇر - شۇعىلاسىن شاشتى، جۇڭحۋا وركەنيەتى دۇنيە ءجۇزى وركەنيەتتەرىمەن اۋىس - كۇيىس جاساپ، ءوزارا ۇلگى الدى، بۇل بۇكىل دۇنيە ءجۇزىنىڭ كەلەلى ءىستى ءبىر نيەتپەن تىندىراتىن ساحناسى
بەيجيڭ قىسقى وليمپيادا سپورت جارىسىنىڭ الاۋى گرەتسيانىڭ پەلوپونيسوس تۇبەگىندەگى بايىرعى وليمپيا جۇرتىنان الىنعان، ول بەينە دۇنيە ءجۇزى وركەنيەت نۇرى سياقتى شار تاراپقا جارىق شاشتى. الەمنىڭ جەر - جەرىندەگى دەنە تاربيە ساڭلاقتارى بەس ساقينالى تۋدىڭ استىندا باس قوسقاندا وليمپيادا سپورت جارىسى شىعىس پەن باتىس وركەنيەتتەرىنىڭ ءبىر - بىرىنەن ۇلگى الاتىن تۇعىرىنا اينالدى. بەيجيڭ قىسقى وليمپيادا سپورت جارىسى جۇڭگونىڭ كوكتەم مەرەكەسىمەن تۇسپا - تۇس كەلدى، وليمپيادا ”جۇڭگو جاڭا جىلىمەن“ تۇسپا - تۇس كەلگەندە قانداي جاڭا كەرەمەتتەر جازىلار ەكەن دەسەڭىزشى؟
«بەيبىتشىلىك − تاعدىرلاس ورتاق تۇلعا» مۋزيكا اۋەنىنە ىلەسە، سيلى قوناقتار الاڭعا كىردى. الاڭنىڭ ورتاسىنداعى الۋان رەڭدى نۇر توگىلگەن مۇز بەتىندە، ”过年好“ دەگەن 3 حانزۋشا ءارىپ پەن اعىلشىنشا ”HAPPY CHINESE NEW YEAR“ دەگەن ءسوز جازىلىپ، جۇڭگو حالقىنىڭ ءار ەل دوستارىنا دەگەن تەرەڭ سەزىمدى اق تىلەگىن جەتكىزدى.
كوكتەم مەرەكەسى كەزىندە كوپتەگەن شەتەلدىك ۇكىمەت قايراتكەرلەرى دە جاڭا جىلدىق تىلەكتەرىن جابال ءبىلدىردى.
رەسەي فەدەراتسياسىنىڭ زۇڭتۇڭى پۋتين شينحۋا اگەنتتىگى ارقىلى «رەسەي مەن جۇڭگو: بولاشاقتى كوزدە ۇستاعان ستراتەگيالىق سەرىكتەر» دەگەن تاقىرىپتا اۆتورلى ماقالا جاريالاپ: ”وسى بارىس جىلىنداعى ’كوكتەم مەرەكەسى‘ كەلىپ جەتكەن ساتتە مەن دوس جۇڭگو حالقىنا ەڭ ىستىق ىقىلاستى تىلەك بىلدىرەمىن. سىزدەردىڭ دەندەرىڭىزدىڭ ساۋ، ىستەرىڭىزدىڭ ىلگەرى بولۋىن تىلەيمىن!“، - دەپ جازدى.
بىرلەسكەن مەملەكەتتەر ۇيىمىنىڭ باس حاتشىسى گۋتەرەس بەينە ەكراندا ءسوز سويلەۋ فورماسىمەن الەمدەگى حۋارىندارعا ەڭ تاماشا تىلەگىن ءبىلدىردى. ”بارىس قۋاتتى كۇشتىڭ، جالىندى جىگەردىڭ، تاسقىنداعان ەرلىكتىڭ، قاجىماس قايسارلىقتىڭ، مويىماس باتىلدىقتىڭ سيمۆولى. وسىلاردىڭ بارلىعى بۇگىن بۇرىن بولماعان سىن - سايىستار الدىندا بىزگە قاجەتتى قاسيەتتەر“.
وركەنيەتتىڭ گۇلدەنۋى، ادامزاتتىڭ العا باسۋى پارىقتاردى ساقتاپ ۇقساستىقتارعا ۇمتىلۋدان، اشىق، سيىسىمدىلىقتان ايرىلا المايدى، وركەنيەتتەر اراسىنداعى اۋىس - كۇيىستەن، ءوزارا ۇيرەنىپ، ۇلگى الۋدان ايرىلا المايدى. بەيجيڭ قىسقى وليمپيادا سپورت جارىسى بۇكىل دۇنيە جۇزىنە كەلەلى ءىستى ءبىر نيەتپەن تىندىرۋدىڭ ساحناسىن ازىرلەدى.
سپورتشىلاردىڭ الاڭعا كىرۋ سالتى جۇڭحۋا وركەنيەتىنىڭ دۇنيە جۇزىندەگى ءار ەل وركەنيەتىمەن بولعان اۋىس - كۇيىسىنىڭ، توعىسۋىنىڭ ”ۇشقىر قيالىنا“ تولى بولدى. بۇكىل ادامزاتقا ءتان دۇنيە جۇزىنە ايگىلى 19 كۇي كوتەرىلگەندە باستارىنا كوك جانە اق ءتۇس ارالاسقان ”بارىس باس كيىمىن“ كيگەن جول باستاۋشىلار قولدارىنا ”جۇڭگو تۇيىنشەگى“ بولىپ ورىلگەن قار گۇلى فورماسىنداعى جەتەك تاقتاسىن جوعارى ۇستاپ، سپورتشىلاردى باستاپ قار - مۇزدان ويىلعان ”جۇڭگو قاقپاسىنان“ ءوتىپ، الۋان تۇسكە بولەنگەن ”جۇڭگو تەرەزسىنەن“ ءجۇرىپ ءوتتى.
مۇنىڭ ىشىندە العاش رەت قىسقى وليمپيادا سپورت جارىسىنا قاتىناسىپ وتىرعان ساۋد ارابياسى مەن گايتي بار... ءارقايسى ۋاكىلدەر ۇيىرمەسىنىڭ الىپ كەرمە تۋى ارتقى كورىنىس ەتىلگەن، باس جاعىندا وليمپيادانىڭ قار - مۇزدان جاسالعان بەس ساقيناسى قويىلعان، الاڭنان ءالسىن - ءالسىن كورەرمەندەردىڭ دۋ قول شاپالاق ءۇنى كوتەرىلەدى.
”دۇنيەدە ءبىر - بىرىنە ۇقسايتىن 2 قار گۇلى بولمايدى“. وسى قار گۇلدەرىنەن قۇرالعان ”جىلجىمالى“ كورىنىس ادامدى اسەرلەندىرمەي قويمايدى − ”ادامزاتتا تەك ناسىلدىك، تىلدىك ايىرماشىلىق قانا بار، وركەنيەتتىڭ ءارقايسىسىنىڭ وزىندىك ايىرماشىلىعى بولعانىمەن، استە جوعارى - تومەن، وزىق - ناشار دەپ بولىنبەيدى“. ”بولاشاقتاعى جۇڭگو، ءسوز جوق، اناعۇرلىم اشىق بەينەمەن دۇنيەگە قۇشاق اشىپ، اناعۇرلىم ومىرشەڭدىككە يە وركەنيەت تابىستارىمەن دۇنيەگە ۇلەس قوسادى“.
”جۇڭگو قاقپاسىنىڭ“ ەسىك اشۋ جانە بىرگە يگىلىكتەنۋ ءمانى بار. 1978 - جىلدان 2008 - جىلعا، ودان 2022 - جىلعا دەيىن جۇڭگونىڭ سىرتقا اشقان ەسىگى بارعان سايىن ايقارا اشىلا ءتۇستى، جۇڭگو كۇن سايىن دۇنيە ساحناسىنىڭ تورىنە تاياپ كەلەدى. باستالۋ سالتى الاڭىندا قىزمەت وتەپ جۇرگەن ەرىكتى تەبىرەنىپ بىلاي دەدى: ”APEC، ’ءبىر بەلدەۋ، ءبىر جول‘ حالىقارالىق سەلبەستىك جوعارى دارەجەلىلەر تالقى مىنبەرى، بەيجيڭ الەمدىك باۋ - باقشا كورمەسى سىندى الەمدىك سالتاناتتى جينالىستار ىركەس - تىركەس جۇڭگودا وتكىزىلىپ، ءبىز كوپتەگەن جان تەبىرەنتەرلىك تاريحي ساتتەرگە كۋا بولدىق“.
”جۇڭگو تەرەزەسى“ وركەنيەت پەن تابىسقا ۋاكىلدىك ەتەدى. جۇڭگو كوممۋنيستىك پارتياسى جۇڭگو حالقىن ىنتىماقتاستىرا باستاپ كۇرەس جۇرگىزگەن 100 جىلدا جۇڭحۋانىڭ كەڭ - بايتاق دالاسىندا عالامات وزگەرىستەر جارىققا شىقتى. ”2 رەتكى وليمپيادا سپورت جارىسى“ اراسىنداعى 14 جىلدا استانامىز بەيجيڭ كۇن سايىن جاڭارىپ تۇرلەندى.
حالىق اراسىنا كەڭ تارالعان ”وتاندى جىرلايمىن“ مۋزيكا اۋەنى كوتەرىلىسىمەن، وتاعاسى ەل جۇڭگونىڭ ۋاكىلدەر ۇيىرمەسى بەس جۇلدىزدى قىزىل تۋدى بيىك كوتەرىپ الاڭعا كىردى. سپورت ساڭلاقتارى قول بۇلعاپ قۇرمەت ءبىلدىرىپ، الاڭداعى كورەرمەندەر دەرەۋ ورىندارىنان تۇرىپ شاپالاق سوقتى. وسى رەتكى قىسقى وليمپيادا سپورت جارىسىندا جۇڭگو ۋاكىلدەر ۇيىرمەسى بارلىق جارىس تۇرىنە تولىق قاتىناسىپ تاريحي تىڭ سەرپىلىستى ىسكە اسىرىپ، ”ەلىمىزدىڭ قىسقى وليمپيادا سپورت جارىسىنا قاتىناسۋ تاريحىنداعى ەڭ جاقسى ناتيجەگە جەتۋ“ نىساناسىنا قاراي بار قايراتىمەن ۇمتىلادى.
وسى ءبىر كوز تارتارلىق تارتىمدى ساتتەر ءۇشىن، قۇرىلىسشىلار قاقاعان سۋىققا، شىلىڭگىر ىستىققا قاراماي، ينجەنەريالىق قۇرىلىستاعى ”ماشاقاتتى تۇيىندەردى“ ءبىر - بىرلەپ شەشتى؛ قار - مۇز ساڭلاقتارى قاجىرلىلىقپەن جاتتىعۋ جاساپ، اششى تەر توگىپ، وليمپيادا جارىس الاڭىنا شىعۋعا تولىق دايىندىق جاسادى؛ بارلىق قىزمەتكەرلەر كۇن - ءتۇن دەمەي، زەر سالا دايىندىق ىستەپ، ەستەن كەتپەس، كەرەمەت وليمپيادا سالتاناتىن ارناۋ ءۇشىن بارىن سالدى...
الدىن الا جۇڭگوعا كەلىپ جارىس الدىنداعى جاتتىعۋعا كىرىسكەن نيدەرلاندتىڭ ايگىلى مۇزدا تەز سىرعاناۋ شەبەرى كرول بىلاي دەدى: ەگەر ءبىر مەملەكەت قانا (قازىرگىدەي جاعدايدا) قىسقى وليمپيادا سپورت جارىسىن وتكىزەتىن بولسا، وندا ول، ءسوز جوق، جۇڭگو بولماق. ”ءبىز قىسقى وليمپيادا سپورت جارىسىنىڭ وسى ارادا وتكىزىلگەندىگىنە قۋانۋعا ءتيىسپىز“.
وسى ءبىر شوق قار گۇلى قول ۇستاسا العا باسۋ جولىن نۇرلاندىرادى، ”دۇنيە ءجۇزى جالپىعا ورتاق، الەم اياسى ءبىر شاڭىراق“، بۇل ”بولاشاققا بىرگە اتتانۋدىڭ“ ايبىندى جارناماسى
قار گۇلدەرى باياۋ قالىقتاپ بارىپ بىرتىندەپ كوتەرىلدى. جارىسقا قاتىناسۋشى ەلدەر مەن رايونداردىڭ اتى جازىلعان ”كىشكەنتاي قار گۇلى“ جەتەك تاقتاسى قار - مۇزدان جاسالعان بەس ساقينانىڭ استىنا جينالىپ، الىپ قار گۇلىن قالىپتاستىردى. باستالۋ سالتى باستالعان كەزدە كورىنگەن قار گۇلى سوڭىندا ەڭ سوڭعى بەينەسىن قالىپتاستىردى.
”كۇللى تىرشىلىك بىرگە وركەندەسىن، ءبىر - بىرىنە زيان جەتكىزبەسىن، اركىم ءوز جولىمەن جۇرە بەرسىن، ءبىر - بىرىنە بوگەت بولماسىن“. دۇنيە جۇزىندەگى ەلدەر (رايوندار) سپورت ارقىلى باس قوسىپ، سپورت ساڭلاقتارى قىسقى وليمپيادا سپورت جارىسىندا قاۋىشتى، وسى ءسات مەملەكەتكە، ناسىلگە بولىنبەيدى، توننىڭ ىشكى باۋىنداي بوپ كەتەدى. ”دۇنيە ءجۇزى جالپىعا ورتاق، الەم اياسى ءبىر شاڭىراق“ ماڭگىلىك نەگىزگى تاقىرىپقا اينالادى.
«حالىققا قۇرمەتتە» دۇنيەنىڭ جەر - جەرىنەن كەلگەن 76 جاس «دۇنيەنى ماحابباتقا بولەيىك» ءانىنىڭ ىرعاعىمەن يىق تىرەسە العا ىلگەرىلەدى. ولار ءجۇرىپ وتكەن جەر سۋرەتتەردەن قۇرالعان كەسكىندى وزەنگە اينالدى. سۋرەتتەر اراسىندا دۇنيە جۇزىندەگى ءار ەل حالىقتارىنىڭ ەڭ قاراپايىم تۇرمىس بولمىسى، حالىقتىڭ قۋانىشتا دا، جۇبانىشتا دا بىرگە بولىپ، ىندەتتى بىرگە جەڭگەن اسەرلى كورىنىستەرى، سونداي - اق ءار ەل سپورتشىلارىنىڭ ارمان ءۇشىن ايانباي سايىسقان ەرەكشە كوزايىم ساتتەرى كورسەتىلدى.
”ءاربىر سۇرىنگەن، ءاربىر قايتا ۇمتىلعان ساتتەردە، ءار رەتكى جەڭىستە ءبىز بارلىعىمىز بىرگەمىز“. بۇكىل دۇنيە ءجۇزىن جاڭا تيپتى ايدارشا ۆيرۋس وكپە قابىنۋ ىندەتى جايلاعان قاتاڭ جاعدايدا بەيجيڭ قىسقى وليمپيادا سپورت جارىسى ءوز ۋاعىندا وتكىزىلىپ، جۇڭگو حالىقارالىق قوعامعا بەرگەن ايبىندى ۋادەسىن ورىندادى. ”بەيجيڭ قىسقى وليمپيادا سپورت جارىسىن ۇيىمداستىرۋ كوميسسياسىنىڭ بەيجيڭ قىسقى وليمپيادا سپورت جارىسىن وتكىزۋ جولىندا جاساعان قاجىماس قۇلشىنىستارىنا العىس ايتامىن، جۇڭگو حالقىنىڭ بەيجيڭ قىسقى وليمپيادا سپورت جارىسىن باتىل قولداعاندىعىنا العىس ايتامىن“، - دەدى حالىقارالىق وليمپيادا سپورت كوميتەتىنىڭ ءتوراعاسى باح.
”300 ميلليون ادامدى قار - مۇز سپورتىنا قاتىناسۋعا باستاۋ“ جۇڭگونىڭ قىسقى وليمپيادا سپورت جارىسىن وتكىزۋگە ءوتىنىش بەرگەندە العا قويعان جوباسى بولاتىن، بۇل كۇندە شىندىققا اينالدى. بۇل دۇنيە ءجۇزىنىڭ بولاشاقتاعى قىسقى سپورت اۋقىمىن وزگەرتەدى، ونان دا ماڭىزدىسى، وليمپيادا سپورتىنا سۇبەلى ۇلەس قوسادى. باح بىلاي دەپ باعا بەردى: بەيجيڭ قىسقى وليمپيادا سپورت جارىسى دۇنيە ءجۇزى قىسقى سپورتىنىڭ جاڭا ءداۋىرىن اشىپ قانا قويماي، جۇڭگوداعى ميلليارد بۇقاراعا يگىلىك جەتكىزەدى.
كلاسسيك ءان «ويلاۋ» ادامداردى بارلىق الاۋىزدىقتى تاستاپ، ىنتىماقتاسىپ، سوعىستان اۋلاق بولىپ، بەرەكە - بىرلىكتە بولۋعا شابىتتاندىرادى. بۇگىنگى كۇنى وسى ءبىر ءمانى تەرەڭ ءان وليمپيادا سپورت جارىس الاڭىندا قايتالاي شىعاندادى. تۇرلىشە وڭىردەن كەلگەن، تۇرلىشە ناسىلدەگى ادامدار جەر شارى مەكەنىن بىرگە قورعاپ، ”كوركەمدىكتەن بىرگە يگىلىكتەنۋ“ ماڭگىلىك سيمفونياسىن شارىقتاتتى.
لو جىحۋان، لي جياجۇن، شىن شۋە، حان شياۋپىڭ، جاڭ حۇي، جاڭ حۇڭ سىندى 6 تۋ ۇستاۋشى قولدارىنا جارىس تۋىن ۇستاپ، ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋداي“ وليمپيادا ناقىلى ورنەگىندە الاڭنان ءوتتى.
”قازىرگى دۇنيە جۇزىندە، اسىرەسە، ىندەت جاعدايىندا تەك اناعۇرلىم ىنتىماقتاسقاندا عانا ماسەلەلەردى بىرگە جەڭۋگە بولادى“. بەيجيڭ قىسقى وليمپيادا سپورت جارىسى وليمپيادا ناقىلىنا ”اناعۇرلىم ىنتىماقتى بولۋ“ قوسىلعاننان كەيىن وتكىزىلگەن تۇڭعىش كەزەكتى قىسقى وليمپيادا سپورت جارىسى. بەيجيڭ قىسقى وليمپيادا سپورت جارىسىنىڭ ”بولاشاققا بىرگە اتتانايىق“ تاقىرىپتىق ۇرانى ”اناعۇرلىم ىنتىماقتى بولۋمەن“ قابىسىپ، ادامزاتتىڭ تاعدىرلاس ورتاق تۇلعاسىن قۇرۋ ۇستانىمىنىڭ وليمپيادا سالاسىنداعى جاندى تۇسىندىرمەسىنە اينالدى.
حىبەيدىڭ فۋپيڭ تاۋلى رايونىنان كەلگەن بالالار وليمپيادا ءانىن شىرقادى.
سپورتشى، تورەشى، جاتتىقتىرۋشى جانە ءمانساپتىلار ۋاكىلدەرى سەرت بەرگەننەن كەيىن، بالالار حورى وسى كەزەكتى قىسقى وليمپيادا سپورت جارىسى باستالۋ سالتىنىڭ تاقىرىپتىق ءانى «قار گۇلى» ”قۇس ۇياسىنىڭ“ كوگىندە قالىقتادى: ” قار گۇلى، قار گۇلى، كۇن نۇرىندا جارقىراپ...“
”ۇلكەن قار گۇلى“ فورماسىنداعى الاۋ تۇعىرى كورەرمەندەردىڭ كوز الدىندا ايقىن ايگىلەنىپ، كىشكەنتاي قار گۇلدەرى جارقىرادى، وليمپيادا سپورت جارىسى تاريحىندا جارىسقا قاتىناسقان بارلىق ەلدەر مەن رايونداردىڭ اتىنان قۇرالعان الاۋ تۇعىرى تۇڭعىش رەت ايگىلەنىپ، ”بولاشاققا بىرگە اتتانايىق“ ايبىندى جارناماسى اسقاق كوتەرىلدى.
وليمپيادا سپورت جارىسىنىڭ الاۋگەرلەرى الاڭعا كىرگەندە بۇكىل الاڭداعى كورەرمەندەر الاقايلاستى. ” 50 - جىلداردىڭ تۇلەگى“ جاۋ ۋيچاڭ، ”60 - جىلداردىڭ تۇلەگى“ لي يان، ”70 - جىلداردىڭ تۇلەگى“ ياڭ ياڭ، ”80 - جىلداردىڭ تۇلەگى“ سۋ بيڭتيان، ”90 - جىلداردىڭ تۇلەگى“ جوۋ ياڭ، ”2000 - جىلداردىڭ تۇلەگى“ دىلنيگار يىلھامجان مەن جاۋ جيا - ۋىن... ولار قولدارىنا وليمپيادا الاۋىن بيىك ۇستاپ، وليمپيادا ارمانىن جالعاپ، كوكىرەك كەرنەگەن ”بولاشاققا بىرگە اتتانايىق“ ارمانىنا قۇلاش ۇرىپ، ۇمىتكە تولى بولاشاققا بەتتەدى.
”2000 - جىلداردىڭ تۇلەگى“ بولعان ەكى سپورتشى قولدارىنداعى الاۋدى ”ۇلكەن قار گۇلى“ الاۋ تۇعىرىنىڭ ورتاسىنا قادادى، لاۋلاعان جالىننىڭ ورنىن قار گۇلىندەي كىرشىكسىز دە جايناعان ۇشقىن باسىپ، وليمپيادا تاريحىنىڭ شىت جاڭا پاراعىن تاعى اشتى.
باياۋ كوتەرىلگەن ”ۇلكەن قار گۇلى“ اۋەلگىدەي كوز ۇيالتاتىن شۇعىلا شاشىپ، ءاربىر ادامنىڭ قۇلشىنا ۇمتىلعان، ارمانعا قۇلاش سەرمەگەن ءومىر جولىن نۇرلاندىرىپ، بۇكىل ادامزاتتىڭ قول ۇستاسا العا باسقان، قيىندىقتاردى بىرگە جەڭگەن تاماشا بولاشاعىن جارقىراتتى.
(جازعان ءتىلشى: كۇڭ شياڭشين؛ قاتىناسقان تىلشىلەر: يۋە رانران، ۋاڭ زىميڭ، جاۋ شۋەتۇڭ، جي يە، ۋاڭ جيڭيۇي، حۋاڭ ياۋ، جاۋ شۇي)
(شينحۋا اگەنتتىگىنىڭ 2 - ايدىڭ 4 - كۇنى بەيجيڭنەن بەرگەن حابارى)
