انار بۇلت / شينجياڭ گازەتىنىڭ تىلشىلەرى جاڭ تيڭ، حۋاڭ شيڭ، جاينار نۇرلانبەك، شينجياڭ جاساندى سەرىك تەلەۆيزياسىنىڭ ءتىلشىسى دۇڭ چيجيە 2 - ايدىڭ 4 - كۇنى التايدان حابارلايدى. كۇللى جۇرت كوز تىككەن قىسقى وليمپيادا سپورت جارىسىنىڭ الاۋى قار گۇلىنە ۇقساس كىرشىكسىز، جايناعان وت ۇشقىنىنا اينالىپ، بۇكىل دۇنيە جۇزىندەگى سان ميلليونداعان ادامنىڭ كوز تىگۋىندە، ۇلكەن ءبىر قار گۇلىنىڭ ورتاسىنان باياۋ لاپىلداي كوتەرىلدى. نەگىزگى الاۋدى ”تۇتاندىرعان“ الاۋگەرلەر ادامزات قار شاڭعىسىنىڭ باستالعان جەرى شينجياڭنىڭ التايىنان كەلگەن دىلنيگار يىلھامجان مەن سانشيدىڭ تاييۋانىنان كەلگەن جاۋ جيا - ۋىن ەدى.
2 - ايدىڭ 4 - كۇنى ساعات 22دەن 15 مينۋت وتكەن كەز، بەيجيڭ، مەملەكەتتىك دەنە تاربيە الاڭى، 24 - كەزەكتى قىسقى وليمپيادا سپورت جارىسىنىڭ باستالۋ سالتىنىڭ ناق مايدانى. نەگىزگى الاۋ قالاي تۇتاندىرىلار ەكەن؟ بارلىق ادام جۇمباقتىڭ شەشىلۋىن كۇتۋدە. جارىسقا قاتىناساتىن ءارقايسى مەملەكەت پەن رايوننىڭ قار گۇلى پىشىنىندەگى جول باستاۋ تاقتايشاسىنان الىپ قار گۇلى قۇراستىرىلدى. ەڭ سوڭعى الاۋگەرلەر دالالىق قار شاڭعى سپورتشىسى دىلنيگار مەن سولتۇستىك ەۆروپا ەكى ءتۇرىنىڭ سپورتشىسى جاۋ جيا - ۋىن الاۋدى نەگىزگى الاۋ تۇعىرىنداعى ”قار گۇلىنىڭ“ ورتاسىنا اپارىپ، ”تۇتاندىرمايتىن“، قورشاعان ورتانى قورعاۋ ءتاسىلى ارقىلى ادامدار جۇرەگىندەگى ەڭ شۇعىلالى وليمپيادانىڭ قاسيەتتى الاۋىن تۇتاندىردى.
ءدال وسى ساتتە بەيجيڭنەن 3000 كيلومەتردەن استام شالعايدا جاتقان التاي قالاسىندا دىلنيگاردىڭ جانۇياسى شاتتىققا شومدى. ”قار گۇلىنىڭ“ كوتەرىلگەندىگىن كورگەن دىلنيگاردىڭ اناسى روشەن حاتيپۋاجى اسەرلەنگەنىنەن كوز جاسى ءجۇزىن جۋىپ: ”مەملەكەتتىڭ وسىنشاما ماڭىزدى مىندەتتى وعان تاپسىرعاندىعىنا العىس ايتامىن، قىزىمنىڭ مەملەكەتكە داڭق اپەرۋىن ءۇمىت ەتەمىن“، - دەدى.
دىلنيگاردىڭ بەيجيڭ قىسقى وليمپيادا سپورت جارىسىنا قاتىناساتىندىعىن بىلگەن سوڭ، ەكى كۇننىڭ الدىندا تۋىس - تۋعان، دوس - جاراندارى جان - جاقتان وسىندا جينالىپ، وسى ءبىر جان تەبىرەنتەرلىك اسەرلى ساتكە بىرگە كۋا بولدى. ”دىلنيگاردىڭ نەگىزگى الاۋگەر مىندەتىن ارقالايتىندىعىن ويلاماپپىن، ايرىقشا قۋاندىم، ول ءبىزدىڭ ماقتانىشىمىز! ءبىز وسىنداي ءسىڭلىمىزدىڭ بولعاندىعىن ماقتانىش سەزىنەمىز ءارى ونىڭ ەندىگى جارىستا تاماشا ناتيجە جاراتۋىن ءۇمىت ەتەمىز“، - دەدى دىلنيگاردىڭ نەمەرە اپەكەسى شيرىن تۇرعۇنجان تەبىرەنە.
2001 - جىلى دىلنيگار التاي قالاسىنداعى ءبىر سپورتشى وتباسىندا دۇنيەگە كەلدى. اكەسى يىلھامجان بۇرىن شينجياڭنىڭ دالالىق قار شاڭعى سپورتشىسى بولاتىن، قازىر جۇڭگو دالالىق قار شاڭعى قۇراماسىنىڭ جاتتىقتىرۋشىسى.
”قۋانىپ تۇرمىن، تەبىرەنگەندىگىمنەن اۋزىما ءسوز تۇسپەي قالدى، قىزىم مەنىڭ بارلىق ارمانىمدى جۇزەگە اسىردى“، - دەدى يىلھامجان تەلەفوندا تىلشىگە.
مەملەكەتتىك دالالىق قار شاڭعى قۇراماسىنىڭ مۇشەسى بايان جالىن دا التاي ايماعىنان كەلگەن، ونىڭ اكەسى جالىن اۋباكىر تىكە تاراتىلىمنان وسى ءبىر جان تەبىرەنتەرلىك كورىنىستى كورگەننەن كەيىن: ”دىلنيگاردىڭ مۇنداي داڭققا بولەنۋى بارلىعىمىزدىڭ ماقتانىشىمىز! قىزدارىمىزدىڭ تاماشا ناتيجە جاراتىپ، وتانعا، مەكەنگە داڭق اپەرۋىن ءۇمىت ەتەمىن!“، - دەدى.
”ول جۇڭگونىڭ ماقتانىشى، شينجياڭنىڭ ماقتانىشى، اسىرەسە، ’جۇڭگونىڭ قار قالاسى‘ التايدىڭ ماقتانىشى. العا، التايدىڭ قىزدارى!“، - دەدى التاي ايماقتىق مادەنيەت - دەنە تاربيە، راديو - تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى ليۋ كىچۋان.
