□ انار بۇلت / شينجياڭ گازەتىنىڭ ءتىلشىسى جاڭ رۇيلين
1 - ايدىڭ 27 - كۇنى تۇسكى استان كەيىن، بۇراتالا قالاسىنىڭ بيىل 64 جاستاعى تۇرعىنى شى چيۋفا ”جابدىقتارىن“ جيناستىرىپ، اۆتوكولىگىمەن ۇيىنەن 3 كيلومەتر جەردەگى مۇزدا سىرعاناۋ الاڭىنا قاراي جول الدى، بۇل ونىڭ كۇن سايىن تۇراقتى باساتىن جولى بولاتىن.
بۇل كەزدە مۇزدا سىرعاناۋ الاڭى ايرىقشا دۋمانعا بولەنىپ، تەز سىرعاناۋ اۋەسكەرلەرىنىڭ ارەكەتتەرى وتە جاتىق، مانەرلەپ سىرعاناۋ اۋەسكەرلەرىنىڭ بىتىمدەرى سىمباتتى، مۇز دوپ اۋەسكەرلەرى قۇيعىتىپ، بىرىمەن - ءبىرى قۇيرىق تىستەسىپ كەلىپ جاتتى... وسى سىمباتتى ادامدار دەمالىس زالىنا كىرگەن كەزدە بارىپ، ولاردىڭ ءبىر توپ ”اتا - اپالارىمىزبەن قارايلاس“ مۇز الاڭىنداعى شەبەرلەر ەكەنىن بايقايسىز.
”مەن مۇزدا سىرعانايمىن، كوڭىلدىمىن، سپورتپەن اينالىسامىن، دەنساۋلىعىم جاقسى. بۇل ’مۇز ۇستىندە‘ كلۋبىمىزدىڭ ۇرانى“، - دەدى شى چيۋفا ءوزى تۇرعان كلۋبتى قۋانىشپەن تانىستىرىپ. ”مۇز ۇستىندە“ كلۋبى 2020 - جىلى قۇرىلعان، حالىق اراسىنداعى مۇزدا سىرعاناۋ اۋەسكەرلەرى توپتالعان جەر. بۇل كلۋب مۇشەلەرىنىڭ ورتاشا جاسى 60 جاس اينالاسىندا، ەڭ العاشىندا بىرنەشە كونە كوز دوستار ۋادەلەسىپ وسىندا كەلىپ مۇزدا سىرعانايتىن، ولار جاس كەزدەرىندە مۇزدا سىرعاناۋ الاڭىندا ”قارقىن مەن شابىتتىڭ“ قىزىعىنا شوماتىن، قازىر زەينەتكە شىعىپ، مۇرساسى ءتيىپ، قايتادان مۇزدا سىرعاناۋ الاڭىنا ورالدى.
”مۇز ۇستىندەگى سپورتتى بۇراتالا قالاسىنىڭ ءداستۇرلى سپورت ءتۇرى دەۋگە بولادى، مەن جاس كەزىمدە بۇراتالا موڭعۇل اۆتونوميالى وبلىستىق مۇز دوپ اترەتىمەن بىرگە چاڭچۇنگە بارىپ، مەملەكەتتىك جاستار مەن وسپىرىمدەردىڭ مۇز دوپ جارىسىنا قاتىناسقانمىن“، - دەي كەلىپ شى چيۋفا: ”الدىڭعى بىرنەشە جىلدا كوپشىلىكتىڭ قىزمەتى قاربالاس بولسا دا، ۇنەمى ۋاقىت شىعارىپ، مۇزدا سىرعاناپ قايتاتىنبىز. قازىر زەينەتكە شىقتىق، وسى سپورت ءتۇرىن قايتادان قولعا الۋدى ءۇمىت ەتەمىن“، - دەدى.
جەرگىلىكتى ورىننىڭ قار - مۇز سپورتىنىڭ دامۋىنا دەم بەرۋ ءارى مۇزدا سىرعاناۋ اۋەسكەرلەرىنە اناعۇرلىم تاماشا مۇزدا سىرعاناۋ ورتاسىن جاراتۋ ءۇشىن، ”مۇز ۇستىندە“ كلۋبىنىڭ نەگىزگى مۇشەلەرى ءار كۇنى تۇستەن كەيىن سانالى تۇردە مۇزدا سىرعاناۋ الاڭىن تازالايدى، تاعى وزدەرى مۇز قاتىرۋ اسپابىن جاساپ، مۇزدا سىرعاناۋ الاڭىنا كۇندەلىكتى قورعاۋ جۇرگىزەدى.
”مۇز ۇستىندە“ كلۋبى مۇشەلەرىنىڭ مۇزدا سىرعاناۋ الاڭىنداعى سىمباتتى تۇلعالارى قىرۋار بۇقارانى كەلىپ قىزىقتاۋعا باۋراپ، اناعۇرلىم كوپ ورتا جاستاعىلاردى، قارتتاردى مۇزدا سىرعاناۋ الاڭىنا كەلۋگە باستادى. قازىر كلۋبتىڭ ۋيچات توبىندا 100گە جۋىق ادام بار، مۇنىڭ ىشىندە جاسى ەڭ ۇلكەنى 70تەن اسقان.
”مۇزدا سىرعاناۋ ءبىزدىڭ زەينەت تۇرمىسىمىزدى ونان ارى ءماندى ەتىپ، دەنساۋلىعىمىز دا اناعۇرلىم جاقساردى، مۇزدا سىرعاناۋ الاڭىندا ۇزدىكسىز بەلسەندىلىك كورسەتەمىز. بەيجيڭ قىسقى وليمپيادا سپورت جارىسى تاياپ قالدى، قالا تۇرعىندارىنىڭ مۇزدا سىرعاناۋ ىنتاسى دا جوعارىلادى، كلۋبىمىزدا ارناۋلى مۇزدا سىرعاناۋدى ۇيرەتەتىن زەينەتكەرلەر بار، ولار قازىر مۇزدا سىرعاناۋ الاڭىندا بالالاردىڭ جاتتىقتىرۋشىسىنا اينالدى، بارلىعىمىز مۇز ۇستىندەگى سپورت ءداستۇرىن جالعاستىرۋدى ءۇمىت ەتەمىز“، - دەدى شى چيۋفا.
