دىلنيگار:
الاۋگەر بولعان كەزىم مەنى ءارقاشان ىنتالاندىرىپ وتىرادى
انار بۇلت / شينجياڭ گازەتىنىڭ ءتىلشىسى جيڭ بو 2 - ايدىڭ 7 - كۇنى جاڭجياكوۋدان حابارلايدى. 2 - ايدىڭ 6 - كۇنى تۇستەن كەيىن بەيجيڭ قىسقى وليمپيادا سپورت جارىسىنىڭ باستالۋ سالتىنداعى ەڭ سوڭعى الاۋگەر، جۇڭگو دالالىق شاڭعى سپورتشىسى دىلنيگار يىلھامجان جاڭجياكوۋ جارىس رايونىنىڭ اقپارات ورتالىعىندا سۇحباتىمىزدى قابىلدادى. ول تىلشىگە الاۋگەر بولعان كەزى ونى ءارقاشان ىنتالاندىرىپ وتىراتىندىعىن ايتتى.
”ءوزىمنىڭ ەڭ سوڭعى الاۋگەر بولاتىنىمدى بىلگەن كەزدە مەن ايرىقشا تەبىرەندىم ءارى قاتتى تاڭداندىم“. وسى ءساتتىڭ وزىندە دىلنيگار قۋانىشتى ءارى تەبىرەنىستى كوڭىلىن باسا المادى. مەملەكەت وسىناۋ ەرەكشە ماڭىزدى مىندەتتى ماعان تاپسىردى، مەن ونى وتە جاقسى ورىنداپ شىعۋىم كەرەك دەيدى ول.
نەگىزگى الاۋدى ”تۇتاندىرعان“ سول ساتتە دىلنيگار ابىروي ءارى ماقتانىش سەزىندى، ”بۇل بۇدان كەيىنگى ءار كۇنىمدە مەنى ىنتالاندىرىپ وتىرادى“.
دىلنيگاردىڭ اكەسى يىلھامجان دالالىق شاڭعى سپورتشىسى بولعان، سپورتتان شەگىنگەننەن قازىرگە دەيىن دالالىق شاڭعى دارىندىلارىن باۋلۋمەن اينالىسىپ كەلەدى. بيىل 20 جاستاعى دىلنيگار اكەسىنىڭ سوزبەن تاربيەلەپ، ونەگەسىمەن باۋلۋىنىڭ ارقاسىندا دالالىق شاڭعىنىڭ جۇيەلى جاتتىعۋىن ەرتە باستاپ كەتتى.
2017 - جىلى دىلنيگار تاڭداۋدان ءوتىپ، دالالىق شاڭعى بويىنشا مەملەكەتتىك شوعىرلى جاتتىعۋ قۇراماسىنا كىرەدى. 2018 - جىلى 1 - ايدا دالالىق شاڭعى بويىنشا مەملەكەتتىك شوعىرلى جاتتىعۋ قۇراماسىنىڭ شينجياڭ گرۋپپاسى نورۆەگياعا بارىپ، 3 جىلدىق مەرزىممەن شەتەلدە جاتتىعۋدى باستادى.
”ول كەزدە وتانىمىز بىزدەن تىم الىستا ەدى، سوندىقتان مەن وتانىمدى ساعىندىم، ءۇيىمدى ساعىندىم“، - دەيدى دىلنيگار.
شەتەلدەگى جاتتىعۋ كەزىندە يىلھامجان قىزىنا رۋحاني جاقتان كوپتەگەن شابىت بەرىپ، تەحنيكالىق جاقتان جەتەكشىلىك ەتىپ، ونى جاپالى جاتتىعۋ جاساۋعا ۇزدىكسىز ىنتالاندىرىپ وتىردى.
تالاپتى ەرگە نۇر جاۋار دەگەن. 2019 - جىلى حالىقارالىق شاڭعى بىرلەستىگىنىڭ دالالىق شاڭعى ۇپاي جيناۋ جارىسىنىڭ قۇس ۇياسى بەكەتىندە 18 جاستاعى دىلنيگار 4 مينۋت 26 سەكۋند 82 تاقىلدىق ناتيجەمەن ايەلدەر گرۋپپاسىنىڭ جۇلدەگەرى بولىپ، جۇڭگو قۇراماسىنىڭ وسى تۇردەگى تاريحتاعى ەڭ جاقسى ناتيجەسىن جاراتتى؛ 2021 - جىلى ول حالىقارالىق شاڭعى بىرلەستىگى دالالىق شاڭعى FlS ۇپاي جيناۋ جەلىلەس جارىسىنىڭ باشاڭ، اراسان جانە شاڭحاي بەكەتتەرىندەگى ۇپاي جيناۋ جارىسىنىڭ اعا جۇلدەگەرلىگىن ىركەس - تىركەس جەڭىپ الدى، سونداي - اق جۇڭگو قىسقى وليمپيادا سپورت جارىسى قۇراماسىنا تاڭدالدى.
2 - ايدىڭ 5 - كۇنى وتكىزىلگەن دالالىق شاڭعى ايەلدەردىڭ قوس قۋالاۋ جارىسىندا دىلنيگار 43 - ورىندى يەلەدى. ”جارىس الاڭىنان شىققان سوڭ، اكەم ەكەۋىمىز ءبىر - ءبىرىمىزدىڭ كوڭىلىمىزدى قاس - قاباعىمىزدان، قۇشاقتاسۋدان - اق تۇسىندىك“. اكەسى مەن قىزىنىڭ اراسىنداعى ءۇنسىز كەلىستىككە ەشقانداي ءسوزدىڭ قاجەتى جوق - تى.
”بۇل مەنىڭ وليمپيادا سپورت جارىسىنا ءبىرىنشى رەت قاتىناسقانداعى العاشقى جارىسىم، الەمنىڭ ماڭدايعا باسار مىقتى سپورتشىلارىمەن ءبىر الاڭدا ونەر سىناسۋدىڭ ءوزى مەن ءۇشىن ۇلكەن شابىت، مەن بۇدان كوپتەگەن نارسە ۇيرەنە الامىن، بۇل مەنىڭ اناعۇرلىم تەز جەتىلۋىمدى جەبەيدى“، - دەيدى دىلنيگار.
”جارىستى ءساتتى اياقتاۋدىڭ ءوزى ۇلكەن سەرپىلىس، قىسقى وليمپيادا سپورت جارىسىنىڭ ساحناسىنا كوتەرىلۋدىڭ ءوزى جەڭىس“، - دەيدى يىلھامجان، - ”مەن ونىڭ اناعۇرلىم جاقسى ناتيجەگە قول جەتكىزىپ، وتانعا داڭق اپەرىپ، شينجياڭنىڭ ابىرويىن اسقاقتاتۋىن كۇتەمىن“.
