تيانشان تورى
تيانشان تورى   ›   جاڭالىقتار   ›   عىلىم جالپىلاستىرۋ

جۇمىس باستالدى! ەكپىندى ارىنمەن قايراتتانا ىستەدى

انار بۇلت / شينجياڭ گازەتىنىڭ تىلشىلەرى جاۋ يۋە، سۇن فاڭتيڭ

  2 - ايدىڭ 8 - كۇنى كوكتەم مەرەكەسىنىڭ دەمالىسى ەندى عانا وتكەندە ءۇرىمجى جوعارى، جاڭا تەحنيكا كاسىپتەرىن اشۋ رايونى (جاڭا قالا رايونى) سولتۇستىك اۋماق ونەركاسىپ باقشاسىنداعى كوپتەگەن كاسىپورىندار ءوندىرىستى بار قارقىنمەن قاۋىرت جۇرگىزدى.

  ءتىلشى وسى ونەركاسىپ باقشاسىنداعى شينجياڭ گاۋشين وسىمدىك زاۆودى عىلىم - تەحنيكالىق اشۋ جارنا شەكتى سەرىكتەستىگىنىڭ جوعارى عىلىم - تەحنيكالى زەردەلى جىلىجايىنا كىرگەندە الدىنان كوكتەم لەبى ەستى. بيىكتىگى 6 − 7 مەترگە جەتەتىن قاتار - قاتار جاسىل شىرماۋىقتى سورەلەردىڭ استىنداعى تولىق پىسقان قىزاناقتار كورگەن ادامنىڭ سىلەكەيىن شۇبىرتارداي. اق ءتۇستى جۇمىس كيىمىن كيگەن جۇمىسشىلار شىرماۋىقتى سورەلەر اراسىندا قىزاناق جيناپ قاربالاستاپ ءجۇر.

  30 نەشە مىڭ شارشى مەتر جەردەگى بۇل زەردەلى جىلىجايدا قىزاناق جوعارى، جاڭا تەحنيكامەن زاۆودتاندىرىلىپ ەگىلەدى، سۋ، تىڭايتقىش، تەمپەراتۋرا سياقتىلار تۇگەلدەي زەردەلى مەڭگەرىلىپ، قىزاناقتى ءبىر جىلدىڭ 4 ماۋسىمىندا تۇراقتى وندىرۋگە بولادى. ”قازىر سەرىكتەستىك كۇنىنە 3 − 4 توننا قىزاناقپەن قامداسا دا، بازارداعى قامداۋ قاجەتتى قاناعاتتاندىرا الماي وتىر“، - دەدى سەرىكتەستىكتىڭ بازاردا جالپىلاستىرۋ ءبولىمىنىڭ ورىنباسار باستىعى يۋان ميڭ تىلشىگە: ”بيىل سەرىكتەستىك 2 - مەزگىلدىك كەڭەيتىپ سالۋ قۇرىلىسىن جۇرگىزىپ، اۋماعىن 150 مىڭ شارشى مەترگە جەتكىزەدى. ول كەزدە قىزاناقتىڭ كۇندىك قامداۋ مولشەرى 20 توننادان اسىپ، تۇتىنۋشىلاردىڭ سۇرانىسىن ىشكەرىلەي قاناعاتتاندىرادى“.

  شينجياڭ سايحان بيولوگيا عىلىم - تەحنيكالىق اشۋ شەكتى سەرىكتەستىگىنىڭ جاڭعاق مايىن ءوندىرۋ سەحىندا جاڭعاقتىڭ حوش ءيىسى مۇرىن جارىپ تۇر. ”2 - ايدىڭ 7 - كۇنى جۇمىس باستالعاننان بەرى جۇمىسشىلار قىزمەت ورىندارىنا تەگىس كەلىپ بولدى. جاڭعاق مايىن ءوندىرۋ سەحى كۇنىنە 3 توننا شيكىزات قابىلداپ، 2 توننا جاڭعاق مايىن وندىرەدى. كوكتەم مەرەكەسىنىڭ الدىندا ءۇرىمجى جوعارى، جاڭا تەحنيكا كاسىپتەرىن اشۋ رايوندىق (جاڭا قالا رايونى) ونەركاسىپ جانە ينفورماتسيالاندىرۋ مەكەمەسى (ءىرى ساندى مالىمەتتى دامىتۋ مەكەمەسى)، ساۋدا ىستەرى مەكەمەسى (استىق مەكەمەسى) قاتارلى ورىنداردىڭ كومەگىندە ءبىز بەيجيڭ، شاڭحاي، شىنجىن قاتارلى ەل ءىشى بازارلارىنىڭ ساتۋ ارناسىمەن ۇلاستىق، قازىر ۋاقىتتى مىقتاپ يگەرىپ ءوندىرىپ، زاتپەن قامداۋعا شىنايى كەپىلدىك ەتۋدەمىز“، - دەدى سەرىكتەستىكتىڭ القا باستىعى امانگۇل سىمايىل.

  جاڭعاقتان الىنعان مايدىڭ قۇمىراعا قۇيىلىپ، ادەمىلەپ قوراپتالعاننان كەيىن جەدەل جەتكىزۋ سەرىكتەستىگىنىڭ بۋىپ - ءتۇيىپ تاسىپ كەتكەنىنە قاراپ تۇرىپ امانگۇلدىڭ جۇزىنەن قۋانىش لەبى ەستى. ول بىلاي دەدى: ”بيىل سەرىكتەستىك ەل ءىشى بازارىن اشىپ، العاشقى پايداعا كەنەلىپ، بۇكىل سەرىكتەستىك بويىنشا قاتتى قۋاندىق، بيىل قۇلاشتى كەڭىنەن سىلتەپ كەلىستىرە ىستەيمىز“.

  شينجياڭ امينا ەرەكشە اۋىل شارۋاشىلىعى جوعارى عىلىم - تەحنيكالىق اشۋ شەكتى سەرىكتەستىگىندە دە ءارقايسى ءوندىرىس سەحتارى قاربالاس جۇمىس ىستەۋدە. ءوندىرىس جەلىسىندە قۇمىرا - قۇمىرا قاراقات شىرىنى، انار شىرىنى ىركەس - تىركەس اينالىپ شىعىپ، قوراپتالۋدا. تاسۋشى جۇمىسشىلار جەمىس شىرىندارىن ساندىعىمەن جۇك اۆتوموبيلدەرىنە تيەپ، شينجياڭنىڭ جەر - جەرىنە جونەلتۋگە دايىنداۋدا.

  لي ليدىڭ بۇل سەرىكتەستىكتە جۇمىس ىستەگەنىنە 11 جىل بولدى، ول قازىر ءبىر ءوزى بۇكىلدەي اۆتوماتتاندىرىپ وندىرەتىن قۇمىرالاۋ سەحىنا جاۋاپتى. بيىل سەرىكتەستىكتىڭ ءوندىرىس قۋاتىنىڭ جوعارىلاۋى، تاپسىرىسىنىڭ مولايۋى ونىڭ تەبىنىن ارتتىرا ءتۇستى.

  ”بىلتىر سەرىكتەستىكتىڭ ءونىم قۇنى 80 ميلليون يۋاننان استى، بيىل %12 ارتتىرۋدى جوسپارلاپ وتىر. قازىر سەرىكتەستىك كوكتەم مەرەكەسىنەن كەيىنگى ساتۋدىڭ قاۋىرت مەزگىلىنە بەلسەندىلىكپەن زات دايىنداۋدا، سونىمەن بىرگە جاڭا سۋسىندى زەرتتەپ اشۋدا“. شينجياڭ امينا ەرەكشە اۋىل شارۋاشىلىعى جوعارى عىلىم - تەحنيكالىق اشۋ شەكتى سەرىكتەستىگىنىڭ القا باستىعى امەتجان نامەت بىلاي دەدى: بيىل سەرىكتەستىك جاڭا ورىنعا كوشىپ، زاۆود ءۇيىنىڭ اۋدانى ءبىر ەسەدەن استام ارتتى، ءتىپتى دە زەردەلىلەنگەن ءوندىرىس جابدىقتارى ىسكە قوسىلادى، سەرىكتەستىكتىڭ دامۋىندا تىڭ سەرپىلىس بولاتىندىعىنا سەنەمىن.

  وسىلارمەن بىردەي، بارىس جىلعى كوكتەم مەرەكەسى وتە سالىسىمەن، ءۇرىمجى ەكونوميكالىق، تەحنيكالىق اشۋ رايونى (توۋتۇنحى رايونى) قارجى قوسۋ نىساندارىنان قىزمەت وتەۋ ورتالىعى 3 - ايداعى جۇمىستى، ءوندىرىستى قالپىنا كەلتىرۋ قىزمەت جوسپارىن ەگجەي - تەگجەيلىلەندىرىپ، نىسانداردىڭ جۇمىسىن، ءوندىرىسىن باستاۋدان، قالپىنا كەلتىرۋدەن بۇرىنعى دايىندىقتاردى ىستەۋدە.

  ”ءبىز ءارقايسى تاراۋلارمەن ۇلاسىپ، بايلانىس جاساپ، ’ۇزدىكسىز مەيىرىممەن قىزمەت وتەپ‘ نىسانداردىڭ تياناقتانۋى مەن كاسىپورىنداردىڭ دامۋىنىڭ تۇتاس بارىس بويىنشا قامسىز بولۋىنا شىنايى كەپىلدىك ەتۋدەمىز“، - دەدى وسى ورتالىقتىڭ ورىنباسار مەڭگەرۋشىسى چىن حاۋ.

  ءونىمدى قارجى قوسۋدى جانە نىسان قۇرىلىستارىن شىن مانىندە ويداعىداي يگەرۋ ءۇشىن، ءۇرىمجى ەكونوميكالىق، تەحنيكالىق اشۋ رايوندىق (توۋتۇنحى رايونى) دامۋ جانە رەفورما كوميتەتى اۆتونوميالى رايوننىڭ ءتۇيىندى تۇردە جالعاستىرىلىپ سالىناتىن 6 نىسانى مەن ءبىر ءتۇيىندى زاپاس نىسانىن ەگجەي - تەگجەيلىلەندىرىپ، نىسانداردىڭ قورشاعان ورتا جونىندەگى باعالاۋىن بەكىتۋ، ينجەنەريا جوباسى رۇقسات كۋالىگى، قۇرىلىستىق جەر جوباسى رۇقسات كۋالىگى، قۇرىلىس جۇرگىزۋ رۇقسات كۋالىگى سياقتى تەكسەرۋدىڭ باستاپقى مەزگىلدىك قىزمەتتەرىن تىڭعىلىقتى يگەرىپ جاقسى ىستەدى.

  ”مەرەكەدەن كەيىنگى العاشقى قىزمەت كۇنىندە رايوندىق پارتكوم ’كوڭىلدە مۇرات بولۋ، ارەكەتتە قۋات بولۋ‘ ارناۋلى تاقىرىپتىق ۇيرەنۋ تاربيە قيمىلىن ۇيىمداستىرىپ، بارلىق پارتيا مۇشەلەرىن، كادرلاردى اعا بۋىن توڭكەرىسشىلەردىڭ كۇرەس رۋحىنان ۇيرەنۋگە ۇندەدى. ءبىز نازاردى نىسانا - مىندەتتەرگە شوعىرلاندىرىپ، قاجىرلىلىقپەن، تاباندىلىقپەن ىستەپ، تۇتاس جىلدىق ەكونوميكالىق، قوعامدىق دامۋ مىندەتتەرىن بار كۇشپەن ورىندايمىز“، - دەدى ءۇرىمجى ەكونوميكالىق، تەحنيكالىق اشۋ رايوندىق (توۋتۇنحى رايونى) دامۋ جانە رەفورما كوميتەتىنىڭ مەڭگەرۋشىسى لي جيڭ.

  2 - ايدىڭ 8 - كۇنى ءۇرىمجى ەكونوميكالىق، تەحنيكالىق اشۋ رايونىنداعى (توۋتۇنحى رايونى) شانچي شينجياڭ اۆتوموبيل شەكتى سەرىكتەستىگىنىڭ ءوندىرىس سەحىندا جۇمىسشىلار قاربالاس اۆتوموبيل قۇراستىرۋدا.

  ”كوكتەم مەرەكەسىنەن كەيىن قىزمەت باستالا سالا، ءبىز ۋاقىتتى مىقتاپ يگەرىپ ءوندىرىس جۇرگىزدىك“. وسى سەرىكتەستىكتىڭ ورىنباسار باس ديرەكتورى شى شينلي تانىستىرىپ بىلاي دەدى: بىلتىر سەرىكتەستىك وندىرىلگەن اۆتوموبيلدەردى زەردەلىلەندىرىپ وزگەرتىپ دارەجەسىن جوعارىلاتىپ، اۆتوموبيلدەردىڭ جايلىلىعىن زور دارەجەدە ارتتىردى، بىلتىر سەرىكتەستىك 5125 اۆتوموبيل ءوندىرىپ ساتتى.

  ”اۆتوموبيلدەردىڭ ساتىلۋ مولشەرىنىڭ جىل سايىن ارتۋىنا ىلەسە، بيىل سەرىكتەستىك 7414 اۆتوموبيل ءوندىرىپ ساتۋ نىساناسىن ورىنداۋدى، 3414 اۆتوموبيل ەكسپورتتاۋدى جوسپارلاپ وتىر. ’14 - بەسجىلدىق‘ مەزگىلىندە ءبىز كاسىپ سالاسى تىزبەگىن ۇزدىكسىز ۇزارتىپ، ۇساق جانە كەسەك بولشەكتەردى جەر قاراستىلىعى بويىنشا سەپتەۋ سەلبەستىگىن ۇزدىكسىز ىلگەرىلەتىپ، جاڭا ونىمدەردى زور كۇشپەن جالپىلاستىرىپ، شينجياڭداعى كاسىپورىندارمەن ىشكەرىلەي سەلبەستىك جاساپ، ءونىمنىڭ باسەكەلىك قۋاتىن ۇزدىكسىز جوعارىلاتامىز“، - دەدى شى شينلي.

جاۋاپتى رەداكتور : الىمبەك نۇرالين

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.