انار بۇلت / شينجياڭ گازەتىنىڭ ءتىلشىسى چىن چياڭۋي 2 - ايدىڭ 8 - كۇنى ۇرىمجىدەن حابارلايدى. ءۇرىمجى كەدەنىنەن ۇعىسۋعا قاراعاندا، 2 - ايدىڭ 1 - كۇنىنە دەيىن بيىل قورعاس تەمىر جول شەكارا وتكەلى ارقىلى قاتىناعان جۇڭگو - ەۆروپا كەزەكشى پويەزى 600دەن اسىپ، سايكەس مەزگىلدەگىدەن ％31.9 ارتقان.
سوڭعى جىلدارى جۇڭگو - ەۆروپا كەزەكشى پويەزى ەۆروپا - ازيا قۇرلىعى اراسىندا زاتتىق ماتەريالداردى تاسىمالدايتىن ماڭىزدى تاسىلگە اينالدى. جۇڭگو - ەۆروپا كەزەكشى پويەزى كاسىپتىك ىستەرىندە دە جاڭا دامۋ بەتالىسى جارىققا شىعىپ، ءتىپتى دە كوپ زات ”بىرىكتىرىلگەن پويەز“ ارقىلى تاسىمالدانۋدان ”ارناۋلى پويەزبەن“ تاسىمالدانۋعا وزگەردى، شينجياڭنىڭ جەر - جەرىنەن جولعا شىعاتىن كەزەكشى پويەزدار لەنياسى دا ىركەس - تىركەس كوبەيدى.
قورعاس كەدەنىنىڭ ساناعىنا قاراعاندا، 2021 - جىلى قورعاس شەكارا وتكەلىندە 1536 كەزەكشى پويەز شەكارادان كىرىپ - شىعىپ، سايكەس مەزگىلدەگىدەن ％120 ارتقان، نەگىزىنەن رەسەيدىڭ ازىق - تۇلىكتەرى، گەرمانيانىڭ ماشينا جابدىقتارى، ورتا ازيا ءوڭىرىنىڭ كەن ونىمدەرى جانە اۋىل شارۋاشىلىعى ماتەريالدارى، توقىماشىلىق شيكىزاتى سياقتى 140 نەشە ءتۇرلى تاۋار تيەلگەن. سونىمەن بىرگە، بىلتىر بۇكىل شينجياڭدا قورعاس شەكارا وتكەلى ارقىلى شەكارادان كىرىپ - شىققان جەرگىلىكتى كەزەكشى پويەز 897 كەزەككە جەتىپ، تاريحتاعى ەڭ جوعارى دەڭگەيگە جەتكەن.
تاۋار قۇرىلىمىنىڭ وزگەرىسىنەن قاراعاندا، بىلتىر قورعاس شەكارا وتكەلىنەن جۇڭگو - ەۆروپا كەزەكشى پويەزىنا تيەلىپ ورتا ازياعا جانە ەۆروپاعا ەكسپورت ەتىلگەن تاۋار تۇرلەرى نەگىزىنەن ماشينا - ەلەكتر ونىمدەرى، جوعارى، جاڭا تەحنيكا ونىمدەرى سياقتىلار بولعان، بۇل سۇيىق كريستالدى ەكران، ۇستەلدىك كومپيۋتەر، ەلەكتروندى بولشەك، اۆتوموبيل بولشەكتەرى جانە وتباسى ەلەكتر جابدىقتارى سياقتىلاردى قامتيدى، مۇنان سىرت، قىزىل اراق، ازىق - تۇلىك، ەڭلىك بۇيىمدار سياقتى سوڭعى تۇتىنۋ بۇيىمدارىنىڭ ەكسپورت ەتىلۋ قارقىنى ءبىرشاما تەز بولعان.
قورعاس كەدەنى باقىلاۋ - باسقارۋ 3 - ءبولىمىنىڭ ورىنباسار باستىعى لۇي ۋاڭشىڭ بىلاي دەدى: قازىر كەدەن ”ولشەمدى رەليستى كەڭ رەليسكە وزگەرتۋ“ مەن ”تەمىر جول جەدەل قاتىناسى“ سىندى كەدەننەن ءوتۋدىڭ ەكى ءتۇرلى جاڭاشا جۇمىس ۇلگىسىن بەلسەنە جالپىلاستىرىپ وتىر، بۇل ەكى ءتۇرلى ۇلگى كەدەننىڭ كەدەننەن ءوتۋ راسمياتىن ءونىمدى ىقشامداپ، تەمىر جول الاڭ - بەكەتتەرىنىڭ اۋىستىرىپ تيەۋ بايلىق باسىمدىعىن بارىنشا ساۋلەلەندىرىپ، شەكارادان كىرىپ - شىعاتىن كەزەكشى پويەزداردىڭ كەدەن اۋىستىرىپ تاسىمالداۋ ونىمدىلىگى مەن قولايلىلانۋ دەڭگەيىن جوعارىلاتىپ، جۇڭگو - ەۆروپا كەزەكشى پويەزدارىنىڭ جوعارى ساپالى دامۋىن ىلگەرىلەتەدى.
