«شينجياڭنىڭ ەلەكتروندى ساۋدا ىستەرىنىڭ دامۋىن زەرتتەۋ بايانداماسى (2021)» جاريالاندى
شينجياڭنىڭ ەلەكتروندى ساۋدا سوماسى ％17.1 ارتتى
انار بۇلت / شينجياڭ گازەتىنىڭ ءتىلشىسى حي حۇڭۋي 2 - ايدىڭ 8 - كۇنى ۇرىمجىدەن حابارلايدى. 1 - ايدىڭ 28 - كۇنى شينجياڭ داشۋەسىنىڭ ەكونوميكا جانە باسقارۋ شۋەيۋانى، شينجياڭ سيفرلى ەكونوميكانى زەرتتەۋ ورنى، چىڭدۋ يىڭچاۋ عىلىم - تەحنيكا جارنا شەكتى سەرىكتەستىگى بىرلەسىپ جازعان «شينجياڭنىڭ ەلەكتروندى ساۋدا ىستەرىنىڭ دامۋىن زەرتتەۋ بايانداماسى (2021)» جاريالاندى.
«باياندامادا» كورسەتىلۋىنشە، 2021 - جىلى شينجياڭنىڭ ەلەكتروندى ساۋدا سوماسى 260 ميلليارد 460 ميلليون يۋانعا جەتىپ، سايكەس مەزگىلدەگىدەن ％17.1 ارتقان؛ ينتەرنەتتە بولشەك ساتۋ سوماسى 50 ميلليارد 960 ميلليون يۋانعا جەتىپ، سايكەس مەزگىلدەگىدەن ％22.3 ارتىپ، بۇكىل ەلدەن 6.6 پايىز جوعارى بولعان.
«باياندامانى» جازعان نەگىزگى ادام شينجياڭ داشۋەسى ەكونوميكا جانە باسقارۋ شۋەيۋانىنىڭ پروفەسسورى چىن بيڭ مىنالاردى ءبىلدىردى: 2021 - جىلى شينجياڭ ەرەكشە اۋىل شارۋاشىلىعى ونىمدەرى بايلىعى ابزالدىلىعىن تياناق ەتىپ، ەرەكشە، ابزال كاسىپ سالالارىن ءۇرتىس زورايتىپ، كۇشەيتىپ، اۋىل - قىستاقتاردىڭ كاسىپ سالاسى كۇيىن ۇزدىكسىز بايىتتى، سونىمەن بىرگە، ونەركاسىپ ونىمدەرىن اۋىلعا ءتۇسىرۋ، قىستاقتارعا جەتكىزۋ، اۋىل شارۋاشىلىعى ونىمدەرىن توراپقا شىعارۋ ارقىلى قالاعا ەنگىزۋ سىندى دامۋ اياق الىسىن جەدەلدەتىپ، اۋىل - قىستاقتاردا ينتەرنەتتە بولشەك ساتۋ سوماسىنىڭ وڭىرلىك ۇلەس قوسۋ قۋاتىن ءۇرتىس كەڭەيتتى. بىلتىر شينجياڭنىڭ اۋىل - قىستاقتارىندا ينتەرنەتتە بولشەك ساتۋ سوماسى 24 ميلليارد 140 ميلليون يۋانعا جەتىپ، سايكەس مەزگىلدەگىدەن ％41.6 ارتتى.
اۋدان كولەمىندەگى ەلەكتروندى ساۋدا ىستەرى ءۇرتىس ىشكەرىلەي دامىدى. 2021 - جىلى موڭعۇلكۇرە اۋدانى، قوبىقسارى موڭعۇل اۆتونوميالى اۋدانى، اۋات اۋدانى سياقتى اۋدان - قالا 8 - توپتاعى مەملەكەت دارەجەلى ەلەكتروندى ساۋدا ىستەرىن اۋىل - قىستاققا جەتكىزۋدەن جالپىلىق ۇلگى كورسەتۋ اۋدانى قاتارىنا ءساتتى قوسىلدى. 2021 - جىلى 12 - ايدىڭ سوڭىنا دەيىن شينجياڭدا جالپى 57 اۋدان - قالا ۇلگى كورسەتۋ اۋدانى بولىپ بەكىتىلدى.
ەلەكتروندى ساۋدانىڭ جۇمىستانۋعا دەم بەرۋ ونىمدىلىگى كورنەكتى بولدى. بىلتىر جىل سوڭىنا دەيىن شينجياڭدا ينتەرنەت دۇكەندەرىنىڭ جالپى سانى 244 مىڭعا جەتتى، مۇنىڭ ىشىندە كاسىپورىندار اشقان ينتەرنەت دۇكەنى 138 مىڭ، جەكەلەر اشقان ينتەرنەت دۇكەنى 107 مىڭ. شينجياڭ ەلەكتروندى ساۋداسى 669 مىڭ ادامدى جۇمىستانۋعا جەتەكتەدى، مۇنىڭ ىشىندە 332 مىڭ ادامدى تىكەلەي جەتەكتەدى، 337 مىڭ ادامدى جانامالاي جەتەكتەدى.
«باياندامادا» كورسەتىلۋىنشە، ۇلگى كورسەتەتىن اۋدان قۇرىلىسى، ينتەرنەت قۇرىلىسى، زات اينالىمى ورتاسى سياقتى كورسەتكىشتەر ارقىلى ەلەكتروندى ساۋدا ىستەرىن دامىتۋدىڭ دايىندىق دەڭگەيى ساراپقا سالىنادى ەكەن، شينجياڭنىڭ ەلەكتروندى ساۋدا ىستەرىنىڭ دامۋ ورتاسى ۇزدىكسىز ساپالىلانۋدا؛ قولدانىلۋ دەڭگەيىنەن الىپ قاراعاندا، ەلەكتروندى ساۋدانىڭ قولدانىلۋ دەڭگەيى بىرتىندەپ كەڭەيىپ، تەرەڭدەپ، باسىم كوپ وڭىرلەردە ەلەكتروندى ساۋدانىڭ قولدانىلۋ دەڭگەيى تۇگەلدەي قاتاردان ورىن العان؛ ىقپال دەڭگەيىنەن الىپ قاراعاندا، ەلەكتروندى ساۋدا ىستەرىن دامىتۋدىڭ ەكونوميكا مەن تۇتىنۋعا بولعان ىقپالى ۇزدىكسىز تەرەڭدەپ، ەلەكتروندى ساۋدا ىستەرىنىڭ ىقپال دەڭگەيى ءۇرىمجىنى سەنتر ەتىپ بىرتىندەپ شوعىرلانىپ، ۇزدىكسىز تۇراقتانۋ كۇيى جارىققا شىققان.
چىن بيڭ مىنالاردى ءبىلدىردى: 2020 - جىلمەن سالىستىرعاندا، 2021 - جىلعى دامۋ كورسەتكىشى ورتاشا ماننەن اسقان ايماق، وبلىس، قالالاردىڭ سانى كوبەيىپ، شينجياڭنىڭ ەلەكتروندى ساۋدا ىستەرىن دامىتۋىنىڭ وڭىرلىك پارقى ازايۋ كۇيىن ساقتادى. الايدا، جالپى تۇلعالىق جاقتان العاندا، شينجياڭنىڭ ەلەكتروندى ساۋدا ىستەرىنىڭ دامۋى وڭىرلەردە بىركەلكى ەمەس، ەلەكتروندى ساۋدا ىستەرىنىڭ بىركەلكى دامۋىن جەبەۋ بولاشاقتاعى نەگىزگى بەتالىس بولىپ تابىلادى.
چىن بيڭ مىناداي ۇسىنىس بەردى: شينجياڭنىڭ ەلەكتروندى ساۋدا ىستەرىنىڭ دامۋىن جەدەلدەتۋدە ەلەكتروندى ساۋدا ىستەرىنىڭ ەكونوميكانىڭ، قوعامنىڭ جوعارى ساپالى دامۋىن جەبەۋدەگى سەركەلىك رولىن ساۋلەلەندىرىپ، ەلەكتروندى ساۋدانىڭ ساندى مالىمەت قۇنىن ونان ارى جارىققا شىعارىپ، اۋىل - قىستاقتىڭ ەلەكتروندى ساۋداسىن سيفرلى اۋىل - قىستاقپەن ۇشتاستىرۋدى ءۇرتىس ىلگەرىلەتىپ، تىكە تاراتۋ بازاسىنىڭ شينجياڭ تىكە تاراتۋ بىرلەستىگىن بىرلەسىپ قۇرۋىنا قولداۋ كورسەتىپ، ينتەرنەت جەلىسىندە، ينتەرنەت جەلىسىنەن تىسقارى سايكەستى دامۋدى ءۇرتىس ىلگەرىلەتىپ، نازاردى ەلەكتروندى ساۋدا ونىمدەرىنىڭ ”ماركا ساپاسى ينجەنەرياسى“ قۇرىلىسىنا شوعىرلاندىرىپ، ەلەكتروندى ساۋدا بازارىن باسقارۋدى كۇشەيتىپ، ساپالى ماركانىڭ اقاۋسىز دامۋىنا تاماشا ورتا جاراتۋ كەرەك.
