− 300 ميلليون ادام قار - مۇز سپورتىمەن اينالىستى، شينجياڭدا مەن بارمىن⑥
□ انار بۇلت / شينجياڭ گازەتىنىڭ ءتىلشىسى جىڭ ي - يۋان
قار - مۇز سپورتى ءسوز بولعاندا، ءسىز ەڭ الدىمەن نەنى ويلايسىز؟ كونكيمەن تەز سىرعاناۋ ما، كونكيمەن قىسقا ارالىقتا تەز سىرعاناۋ ما، الدە مۇز شاۋگىم بە، مۇز دوپ پا، دالالىق شاڭعى ما؟ قىسقى وليمپيادا سپورت جارىسى تۇرلەرىنەن باسقا، مۇزعا ورمەلەۋ، شاڭعىمەن تاۋعا شىعۋ، قار - مۇز مارافونى سياقتى شاعىن قاۋىمدىق، كاسىپتىك شەكتىك سپورت بىرتىندەپ ادامداردىڭ نازارىنا ىلىگىپ، قار - مۇز سپورتىنداعى وزگەشە ءبىر كورىنىسكە اينالدى.
شاڭعىمەن تاۋعا شىعۋ: جىلدامدىق پەن بيىكتىككە سايىس
2021 - جىلى 12 - ايدىڭ باسىندا شينجياڭ شاڭعىمەن تاۋعا شىعۋ قۇراماسى كوكتوعاي اۋدانىنىڭ كوكتوعاي قالاشىعىندا قۇرىلدى، بۇل اۆتونوميالى رايوندىق دەنە تاربيە مەكەمەسى مەملەكەتتىك دەنە تاربيە باس مەكەمەسى تاۋعا شىعۋ سپورتىن باسقارۋ ورتالىعىنىڭ، جۇڭگو تاۋعا شىعۋ قوعامىنىڭ قولداۋىندا قۇرعان شينجياڭداعى تۇڭعىش شاڭعىمەن تاۋعا شىعۋ قۇراماسى بولىپ، قۇرامانىڭ 14 مۇشەسى تەگىس التايدان كەلگەن، ەڭ ۇلكەنى 22 جاستا، ەڭ كىشىسى نەبارى 13 جاستا ەدى.
شاڭعىمەن تاۋعا شىعۋ سپورتى، باستىسى، قارلى تاۋ نەمەسە قار باسقان تاۋلى جەردەگى جەكەلىك نەمەسە توپتىق سپورت ءتۇرىن مەڭزەيدى. قارلى جەردە ءجۇرۋ، ورمەلەۋ، گرۋپپالاسۋ، تاۋعا شىعۋ سايماندارىن قولدانۋ، شاڭعى تەبۋ سياقتى فاكتورلاردان قۇرالعان جالپىلىق قىسقى تاۋلى جەر دالالىق سپورتىن قامتيدى. ول قارلى تاۋعا شىعۋ جالپىلىق شەبەرلىگىن نەگىز، شاڭعى تەبۋ تەحنيكاسىن قوسىمشا ەتەدى، قاتىناسۋشىنىڭ اسا تاماشا دەنە قۋاتى، اسا جوعارى قارلى تاۋعا شىعۋ شەبەرلىگى مەن شاڭعى تەبۋ نەگىزى بولۋىن تالاپ ەتەدى، ادام دەنەسى جونىنەن اسا زور سايىس سانالادى، سونداي - اق بەلگىلى حاۋىپ - قاتەرى دە جوق ەمەس.
شينجياڭ شاڭعىمەن تاۋعا شىعۋ قۇراماسىنىڭ جەتەكشىسى شيردان بىلاي دەپ تانىستىردى: شينجياڭ شاڭعىمەن تاۋعا شىعۋ قۇراماسى شيزاڭ، چيڭحاي، شاندۇڭداردان كەيىن، ەل ىشىندە قۇرىلعان ولكە (اۆتونوميالى رايون) دارەجەلى ءتورتىنشى شاڭعىمەن تاۋعا شىعۋ قۇراماسى بولىپ تابىلادى، قۇراما مۇشەلەرىنىڭ ءبارى دالالىق شاڭعى سياقتى تۇرلەردەن سالا اتتاپ تاڭدالعان.
شيردان وسى قۇرامانىڭ بولاشاعىنا تولىق سەنىمدە: ”شاڭعىمەن تاۋعا شىعۋ 2026 - جىلعى ميلان - كورتينا دامپەسسو قىسقى وليمپيادا سپورت جارىسىنىڭ رەسمي جارىس ءتۇرى تىزىمىنە ەندى، وسى ءتيىمدى ورايدى مىقتى يگەرىپ، شينجياڭنىڭ قىسقى قار - مۇز سپورتىنىڭ جوعارى ساپالى دامۋىنا كۇش قوسۋعا ۇمتىلىپ، اناعۇرلىم كوپ ادامدى قارلى تاۋعا بارۋعا، تابيعاتقا جاقىنداۋعا باستاۋدى ءۇمىت ەتەمىز“.
مۇزعا ورمەلەۋ: مۇزدى جالاماداعى ەرلىكتى سەزىنۋ
تىپتەن شاعىن قاۋىمدىق سپورت ”مۇزعا ورمەلەۋدى“ دە بىرتىندەپ اناعۇرلىم كوپ ادام ءتۇسىنىپ، سىناپ كورە باستادى. كەزىندە كاسىپتىك سپورتشىلار عانا شۇعىلداناتىن وسى شەكتىك سپورتى مۇز سارقىراما، مۇز جالاما سياقتىلاردىڭ اشىلۋىمەن، سونداي - اق مۇزعا ورمەلەۋ جابدىقتارىنىڭ ۇزدىكسىز جاقسارتىلۋىمەن ءبىرشاما وڭاي كىرىسۋگە بولاتىن بولىپ، كوپتەگەن دالالىق سپورت اۋەسكەرلەرى قۇمارتاتىن ەڭ جاڭا قىسقى زاماناۋي سپورتقا اينالدى. مۇزعا ورمەلەۋشىلەر قولدارىنا قايلا، شەڭگەل، ىستىك الىپ، اياقتارىنا مۇزدا جۇرەتىن ەتىك كيىپ، مۇز سارقىراماعا، مۇز جالاماعا ورمەلەپ، وزگەشە ايبىندارىن ايگىلەيدى.
1 - ايدىڭ 15 - كۇنى اۆتونوميالى رايوندىق دەنە تاربيە مەكەمەسى تاۋعا شىعۋ سپورتىن باسقارۋ ورتالىعىنىڭ قۇتقارۋ - كومەكتەسۋ اترەتى، ءۇرىمجى قالالىق جارتاسقا شىعۋ، مۇزعا ورمەلەۋ سپورتى قوعامى ءۇرىمجى ەكونوميكالىق، تەحنيكالىق اشۋ رايونىنداعى (توۋتۇنحى رايونى) تاۋلى اڭعاردا مۇزعا ورمەلەۋ جىلدامدىعى جارىسىن وتكىزدى. جارىسقا قاتىناسۋشى 8 مينۋت ىشىندە ورمەلەۋ قيىندىعى WI3، +WI3 (ورمەلەۋ بۇرىشى 70 − 80 گرادۋستىق مۇز جالاماعا ءۇرتىس ورمەلەۋ) بولعان جەلىگە ورمەلەۋدى اياقتاپ، سول جەردەگى كورەرمەندەردىڭ مۇزعا ورمەلەۋ سىندى سپورتتى ونان ارى تۇسىنۋىنە مۇمكىندىك جاسادى.
”مۇزعا ورمەلەۋ بارىسىندا، قاتىناسۋشى بار زەيىنىن شوعىرلاندىرىپ، قاتتى جۇرەك سوعىسىن سەزىنۋمەن بىرگە، ونان دا ماڭىزدىسى، سونشاما قىزعىلىقتى بارىستان ءلاززات الادى“. ۇرىمجىلىك مۇزعا ورمەلەۋشى لۋ حاي وسى سپورت جايلى ايتقاندا كوڭىلى كولدەي تولقىدى.
ءۇرىمجى قالالىق جارتاسقا شىعۋ، مۇزعا ورمەلەۋ سپورتى قوعامىنىڭ ءتوراعاسى ءدىلشات ابدۇرىشيت بىلاي دەپ تانىستىردى: مۇزعا ورمەلەۋ سپورتى 2003 - جىلى شينجياڭعا كىردى، باستابىندا ون نەشە ادام عانا قاتىناسقان ەدى، قازىر ءۇرىمجى مۇزعا ورمەلەۋ قۇراماسى 300دەن استام ادامعا دەيىن كوبەيىپ زورايدى، ”ادەتتەگىدەي ايتقاندا، ءار جىلى 11 - ايدان كەلەر جىلى 3 - ايعا دەيىن مۇزعا ورمەلەۋ ماۋسىمى سانالادى، ءۇرىمجى وڭىرىندەگى بايياڭگوۋ، حوۋشيا، شۇيشيگوۋ، بوعدا شىڭىنىڭ ماڭى سياقتىلاردىڭ ءبارى مۇزعا ورمەلەۋ ءۇشىن تابىلمايتىن تاماشا جەرلەر بولىپ تابىلادى.
”مۇزعا ورمەلەۋ قازىرگى كەز جونىنەن ايتقاندا، شاعىن قاۋىمدىق سپورت، ايتسە دە مەن ونىڭ دامۋ بولاشاعىنان ۇلكەن ءۇمىت كۇتەمىن. بۇرىن شاڭعى تەبەتىن ادامدار از بولاتىن، الايدا قازىر ادام سانى جىل سايىن ەسەلەپ ارتۋدا. مۇزعا ورمەلەۋ تاۋەكەلشىلدىك، قىزىقتى سپورت، كەيىن مۇزعا ورمەلەۋ الەۋمەت تۇگەل قابىلدايتىن، شەكتىك سپورتقا اينالاتىن بولادى“، - دەدى ءدىلشات ابدۇرىشيت.
قار - مۇزدا جۇگىرۋ: جۇگىرۋ بارىسىندا ءوزىنىڭ تاماشا بەينەسىن كورسەتۋ
1 - ايدىڭ 9 - كۇنى شينجياڭنىڭ جەر - جەرىنەن كەلگەن 200 نەشە جۇگىرۋ اۋەسكەرى بيڭتۋان 12 - شى توۋتۇنحى سايى ورمان باعىنىڭ ورتالىق الاڭىنا جينالدى − 2022 − جىلعى توۋتۇنحى سايى قار - مۇز مارافونىنىڭ باستالۋ مىلتىعى اتىلىپ، ساڭلاقتار اق قار، كوك مۇزدا شاتتانا جۇگىرىپ، بەيجيڭ قىسقى وليمپيادا سپورت جارىسىنىڭ كەلۋىن قارسى الدى.
قار - مۇز مارافون جارىسى ادام دەنەسىنىڭ دەنە قۋات شەگىن سىنايتىن سپورت. تومەن تەمپەراتۋرادا جۇگىرۋدە سىنالاتىنى شىنتۋايتىندا جۇگىرۋشىلەردىڭ دەنە قۋاتى عانا ەمەس، تاعى ەرىك - جىگەرى دە سىنعا تۇسەدى. شينجياڭدا كوپتەگەن ۇزاققا جۇگىرۋ اۋەسكەرلەرى بار، قاقاعان ايازدان قايمىقپاي، قار - مۇزدا تاباندىلىقپەن ۇزاققا جۇگىرىپ، جوعارى شەككە سايىس جاريالايدى.
ءار اپتانىڭ سوڭىندا ءۇرىمجىنىڭ حۇڭشان، يامالىق تاۋى سياقتى جەرلەرى جانە توۋتۇنحى سايى ورمان باعى كوپتەگەن جۇگىرۋ اۋەسكەرلەرىن قارسى الادى. ولار قاقاعان ايازدان يمەنبەي، تاباندىلىقپەن شىنىعىپ، قىس ماۋىسىمىندا كوپتەگەن قوزعالىستاعى كورىنىستەردى قالىپتاستىردى.
ءۇرىمجى قالالىق مارافون ۇزاققا جۇگىرۋ قوعامىنىڭ باستىعى جاڭ جيان بىلاي دەدى: ”قاقاعان اياز جۇگىرۋگە بوگەت بولا المايدى، جۇگىرۋشىلەر ۇزدىكسىز وزدەرىن جەڭىپ، ەرىك - جىگەرلەرىن شىڭداپ، ۇلى تابيعاتتان سالاماتتىق پەن شاتتىق ىزدەيدى“.
شەكتىك سپورت شىت جاڭا تۇرمىس تاسىلىنە اينالۋدا. اۆتونوميالى رايوندىق دەنە تاربيە مەكەمەسى تاۋعا شىعۋ سپورتىن باسقارۋ ورتالىعى پارتكومىنىڭ شۋجيى سىڭ بو بىلاي دەپ ەسكەرتتى: قانشالىق قاتەرلى شەكتىك سپورتى بولعان سايىن، كاسىپتىك سيپات تالابى سونشالىق جوعارى بولادى، شەكتىك سپورتىن جۇرگىزۋمەن بىرگە، ءسوز جوق، حاۋىپسىزدىكتى ماڭداي الدى ورىنعا قويۋ كەرەك“.
