— 300 ميلليون ادام قار - مۇز سپورتىمەن اينالىستى، شينجياڭدا مەن بارمىن ⑦
□ انار بۇلت / شينجياڭ گازەتىنىڭ ءتىلشىسى يىن لۋ
قاردان كەيىنگى قالىڭ تاۋلاردىڭ اشىق اسپانى ۇنايدى، قاراعايلارى كۇمىس قىراۋمەن كومكەرىلىپ، شىڭدارى بۇلتقا ورانىپ جاتادى.
قار - مۇز شينجياڭعا مول ساياحات بايلىعىن اكەلۋمەن بىرگە، كوركەمونەرشىلەرگە دە تاماشا جاسامپازدىق تۇعىرىن ازىرلەدى، ءبىر سىزبا، ءبىر سۋرەت، ءبىر قىسقا فيلم، بارلىعى دا كورىكتى شينجياڭنىڭ كوركەم كورىنىستەرىنىڭ تاماشا ەستەلىگى دەۋگە بولادى.
اسپاپتى سىناقتان وتكىزىپ، قار كوزىلدىرىك تاعىپ، شاڭعى بايلاپ، دەنەسى مەن ىقىلاسىن اياعىنىڭ استىنداعى ۇزىننان - ۇزاققا سوزىلعان قار جولىنا ارناپ، يدەياسى مەن زەيىنىن فوتو اپپاراتقا شوعىرلاندىردى ... التايدان تيانشانعا دەيىن ءار جىلعى 4 ايدان استام ۋاقىتقا سوزىلاتىن شاڭعى ماۋسىمى جاڭ جىنيۋاندى قار - مۇزدى سۋرەتكە ءتۇسىرۋشى جانە شاڭعى اۋەسكەرى بولۋدىڭ قۋانىشىنا شومدىردى.
”قار - مۇز سپورتى بارىسىندا عانا قار - مۇزدا سۋرەتكە ءتۇسىرۋدىڭ راقاتىن سەزىنۋگە بولادى“. جاڭ جىنيۋاننىڭ ايتۋىنشا، ونىڭ كوڭىلىندەگى قار - مۇزدا سۋرەتكە تۇسىرۋدەگى ەڭ تاپتىرماس جەر التاي، شاڭعى الاڭىنىڭ جاراتىلىستىق شارت - جاعدايى جاقسى، قۇرىلعىلارى كەمەلدى، وسىمدىك جامىلعىسىنىڭ ءتۇرى مول، تابيعي كورىنىسى الۋان ءتۇرلى، سوندىقتان تۇسىرىلگەن سپورتتىق فيلم مەن كورىنىستىك فيلمنىڭ ءبارى تاماشا شىعادى.
جاڭ جىنيۋاننىڭ اپپارات كوزىنەن شاڭعى اۋەسكەرلەرىنىڭ ءتۇرلى قار جولداردا جۇيتكىگەن بەينەسىن كورۋگە بولادى، سەكىرۋ، ايلانۋ، كەڭىستىكتە توڭقالاڭ اسۋ، سپورتقا دەگەن ىستىق ىنتانى قالاعانىنشا ايگىلەيدى؛ قارلى تاۋ، قاراعايلى ورمان، قاردان كەيىنگى ءشول دالا، جۇيتكىگەن تۇلپارلار، مول اعاش تۇرلەرى كەڭ كوسىلگەن اق دالادا سيا سۋرەتتەي كوركەم كورىنىستەردى سۇلبالايدى، سارى قۇمنىڭ ”تولقىنى“ اراسىنان اق ءتۇستى ”كوبىك“ ايشىقتالىپ، تۇلپارلاردىڭ قوس جانارى جىپىلىقتاعان كىرپىكتەرى جانە بۇرقىراعان بۋىمەن ونان ارى وتتى كورىنەدى.
”قار - مۇزدا سۋرەتكە ءتۇسىرۋ قوزعالىس پەن تىنىشتىق اراسىندا اۋىسۋدى قاجەت ەتەدى، سۋرەتكە ءتۇسىرۋشى رەتىندە قوزعالساڭىز عانا تۇسىرگەن سۋرەتىڭىزگە جان بىتەدى، سوندىقتان، مەنىڭشە، قار - مۇز سپورتى فوتو سۋرەت تۋىندىلارىن جاقسى ءتۇسىرۋ ءۇشىن سۋرەتكە ءتۇسىرۋشى، ءسوز جوق، وسى سپورت ونەرىن يگەرۋى كەرەك، سۋرەتكە تۇسىرگەن نىشانىڭىزدىڭ قوزعالىسىنا ىلەسە بىرگە جۇرگەندەي اسەردە بولاسىز، وسىنداي بولعاندا عانا جوعارى ساپالى، تارتىمدى تۋىندى جارىققا شىعادى“. جاڭ جىنيۋاننىڭ ايتۋىنشا، سۋرەتكە ءتۇسىرۋ بارىسى دا ءتۇسىرۋشىنىڭ جەكەلىك سەزىنۋىن تۇتاس كورىنىسپەن توعىستىرۋ بارىسى بولىپ تابىلادى.
جاڭ جىنيۋان قار - مۇزدا سۋرەتكە ءتۇسىرۋدىڭ شينجياڭنىڭ قار - مۇز ساياحاتىن جالپىلاستىرۋ جونىنەن بەلگىلى رولى بولادى دەپ قارايدى. ”ءبىز بۇدان بۇرىن شاڭعى تەبۋگە قاتىستى كوپتەگەن بەينەجازبا ءتۇسىرىپ ينتەرنەت جەلىسىنە شىعاردىق، كورىلىمى وتە جوعارى بولدى، لەبىز قالدىرعاندار دا كوپ. ەلدىڭ ءبارى وسىنشاما كوركەم جەردىڭ، وسىنشاما تاماشا شاڭعى الاڭىنىڭ قاي جەردە ەكەندىگىن بىلگىسى كەلدى، اسىرەسە، ءبىزدىڭ كوبىرەك بەينەجازبا ءتۇسىرىپ جاريالاۋىمىزدى ەرەكشە ءۇمىت ەتتى“. جاڭ جىنيۋاننىڭ تۇلا بويىن سول ساتتە ايرىقشا ماقتانىش سەزىمى كەرنەپتى.
قار - مۇزدى تاقىرىپ ەتكەن تاۋ - وزەن سۋرەتىن سىزۋ سۋرەتشى ۋاڭ جۇنبيڭنىڭ جاسامپازدىق ومىرىندەگى قالاۋلى ءىسى. ول تالاي رەت تيانشان، كۇنلۇن تاۋلارىن ارالاعان، ول جەرلەردىڭ مۇزدىقتارى، شىرشالارى، جاسىرىن اعىندارى، مۇزدى بۇلاقتارى، سونداي - اق جان - جانۋارلارى تۇگەلدەي كوكەيىندە سايراپ تۇر.”قار - مۇز سۋرەتىن سالۋدا تابيعي كورىنىس ايگىلەنەدى، ادام رۋحى، قارلى دالا، مۇزدى القاپتاعى تاپجىلماس تاباندىلىق پەن ءورىس اشۋ رۋحى، كورىكتى شينجياڭدى كوركەيتۋ ءۇشىن ايانباي ايقاسۋ رۋحى جىرلانادى“، - دەدى ۋاڭ جۇنبيڭ.
تاۋ، ورمان، قار، مۇز، اسپان، ادام، حايۋانات اتاۋلىنىڭ ءبار - ءبارى قار - مۇز سۋرەتىن سالعاندا، كوبىنەسە قارا، سۇرى، اق تۇستەرمەن عانا ايشىقتالادى. ۋاڭ جۇنبيڭ باستان - اياق شينجياڭنىڭ ايبىندى، تەبىندى بەينەسىن سۋرەتتەرىنىڭ استارى ەتىپ، مۇز قۇرسانىپ، قار قالىقتاعان سان قيلى بەينەمەن شينجياڭ قىسىنىڭ كەڭ تىنىستى بەينەسىن، سونداي - اق ”جەتكەندەي بوپ جالعىز تۇندە جەلى ايمالاپ كوكتەمنىڭ، اپپاق گۇلگە ورانعانداي المۇرت اعاش تۇمەن، مىڭ“ دەيتىن ادەمى كورىنىستى كەسكىندەدى.
”ۋاڭ جۇنبيڭنىڭ سۋرەتتەرى دەن قويا ورنالاستىرىلعان، تىپتەن، بۇگە - شىگەسىنە دەيىن سىزىلعان، الىستان كوز سالساڭىز، ۇعىنىقتى لەپ ەسەدى، ونان دا ماڭىزدىسى، ادامعا ايازدا جۇرگەندەي سەزىم بەرەدى، ال جاقىننان تاماشالاساڭىز، سۋرەتتەگى تۇيە، سارلىق، تۇلپارلار ادامعا وزگەشە وي سالادى“. شينجياڭ جۇڭگوشا سۋرەت اكادەمياسىنىڭ ورىنباسار باستىعى ۋي باۋ بىلاي دەدى: سۋرەتتەگى ايبىندى، اشىق، جىم - جىلاس قار - مۇز كورىنىسى اياسىنان جان - جانۋاردىڭ جاراسىمدى بىرگە جاساسقان جىلى لەبى ەسەدى.
شينجياڭنىڭ قار - مۇزى تابيعي دا كوركەم، قاتپارى باي، سۋرەتشىلەرگە شەكسىز جاسامپازدىق كەڭىستىگىن ازىرلەيدى. ”مەن قارداعى وسىمدىكتەردى، ماسەلەن، توراڭعى، قارلى شىڭداعى شىرشا، جىڭعىلدى سىزۋدى قاتتى ۇناتامىن، كوركەمونەر تۇرعىسىنان العاندا، ولاردىڭ بەينەسى مەن تۇلعاسى مىڭ قۇبىلىپ تۇرادى، شىرايلى دا شىتىرمان، اسىرەسە، قار - مۇزدى ورتادا ءمان - مازمۇنى مولايا تۇسەدى؛ ءىس جۇزىندىك مانىنەن الىپ قاراعاندا، ولار شينجياڭنىڭ ۋاكىلدىك اعاش تۇرلەرى، ولاردا ءبىر رۋح، ياعني ۇلەس قوسۋ جانە تامىر تارتۋ رۋحى بەينەلەنەدى“. سۋرەتشى سۇن بيڭچىننىڭ ايتۋىنشا، ول قار - مۇز سۋرەتىن سىزۋ بارىسىندا اناعۇرلىم كوپ قار - مۇز سۋرەتى شەبەرلىگىن قوسىپ، قارا مەن اقتىڭ ءتۇس اۋىسۋى بارىسىندا اناعۇرلىم ادەمى كورۋ تۇيسىگى اسەرىن تۋىنداتادى ەكەن.
