□ انار بۇلت / شينجياڭ گازەتىنىڭ ءتىلشىسى ياڭ شۋحان
”تاعى 2000 يۋان ارزانداتساڭ، اۆتوكولىكتى توتە الىپ كەتەمىن!“، ”ەڭ كوپ بولعاندا 1000 يۋان ارزانداتامىن، الساڭىز كولىكتىڭ كىلتىن دەرەۋ قولىڭىزعا ۇستاتامىن“. 1 - ايدىڭ 23 - كۇنى حوتان قالاسىنا ورنالاسقان شينجياڭ جۇڭكۇن (حالىقارالىق) ەكولوگيالىق زات تاسىمالى پورتى جۇڭسان اۆتوكولىك ورتالىعى ياجۇڭ وتكەرمەلى اۆتوكولىك بازارىندا 44 جاستاعى ابدۇراحمان ابدۇحاۋار الارمانمەن باعا تالاسىپ جاتقان ەدى.
ابدۇراحمان شەريا اۋدانىنىڭ ديقانى، بۇل ونىڭ وسى ءبىر كۇندە ساتقان ەكىنشى اۆتوكولىگى، ءتۇرلى اقىلاردى شىعارىپ تاستاعاندا وزىنە كەم دەگەندە 3000 يۋان اقشا قالادى. ”اۆتوكولىك ساۋداسىن ىستەپ اقشا تاپتىم، باقىتتى تۇرمىستىڭ بال ءدامىن تاتتىم، قۋانىشىمدا شەك جوق!“، - دەدى جۇزىنەن قۋانىش لەبى ەسكەن ابدۇراحمان.
ابدۇراحمان وسى وتكەرمەلى اۆتوكولىك بازارىندا قوسالقى جۇمىس ىستەپ، ساۋدامەن اينالىسىپ جۇرگەندەردىڭ ءبىرى. وسى بازار سالىنعاننان بەرى شەريا اۋدانى، قاراقاش اۋدانى سياقتى جەرلەردەن ديقاندار توڭىرەكتىڭ ءتورت بۇرىشىنان وسى اراعا جينالىپ، اپتا سوڭىنداعى 2 كۇندىك اۆتوكولىك بازارىنان پايدالانىپ وتكەرمەلى كولىك ساتۋ دەلدالى، جايما جايۋ، اس - سۋ تيجاراتىمەن اينالىسۋ ارقىلى كىرىس كىرگىزەدى.
سول كۇنى ساپىرىلىسقان جۇڭسان اۆتوكولىك ورتالىعى ياجۇڭ وتكەرمەلى كولىك بازارىنان ءتىلشى ءتۇرلى ماركاداعى اۆتوكولىكتەردىڭ وسى اراعا جينالعاندىعىن، بازارعا كىرىپ - شىعاتىن اۆتوكولىكتەردىڭ قايشالىسىپ جاتقاندىعىن، جۇرتشىلىق باعا تالاسىپ، ارا - تۇرا شاتتانعان داۋىستار مەن قول شاپالاق ءۇنى شىعىپ، ساۋدانىڭ ءساتتى بولعاندىعىن قۇتتىقتاپ جاتقاندىعىن كوردى.
وتكەندەگى شەتسىز دە شەكسىز قۇمدى القاپ بۇگىنگى شالقىعان دۋماندى اۆتوكولىك بازارى. قۇمدى ءشولدىڭ ورتاسىنان بوي سوزعان اۆتوكولىك قالاسى جەرگىلىكتى ورىننىڭ بەت - بەينەسىن وزگەرتىپ قانا قالماستان، بۇقاراعا كىرىستى ارتتىرىپ، بايۋدىڭ ساۋدا ورايىن دا اكەلدى. اس - سۋ اۋماعىندا كاۋاپ، قاقتالعان ۇيرەك، قاقتالعان قاز جۇمىرتقاسى سياقتى جەرگىلىكتى ورىننىڭ ءدامدى تاعامدارىن كەز كەلگەن جەردەن كەزىكتىرەسىز، ايعايلاعان، ماقتاپ ساتقان داۋىستار تولاستار ەمەس، جەمىس - جيدەك، سۋسىن ساتاتىن جايما قوجايىندارى قاربالاستىقتان مۇرىندارىنا سۋ جەتپەي ءجۇر، بارلىق جەردەن دەرلىك وسىنداي دىر - دۋمانعا تولى كورىنىستى كورەسىز.
وتكەرمەلى اۆتوكولىك ساۋداسى فينانس قارىز اقشا سالاسىنىڭ دا قارىشتاپ دامۋىنا دەم بەردى. بىلتىر 12 - ايدا جۇڭسان اۆتوكولىك ورتالىعى ياجۇڭ وتكەرمەلى اۆتوكولىك بازارىندا فينانستىق قىزمەت وتەۋمەن شۇعىلداناتىن ايگۇل ءماتتۇرسۇن 8000 يۋان ەڭبەكاقى الىپتى.
حوتان قالاسى بايجۇنما اۆتوكولىك قىزمەت وتەۋ شەكتى سەرىكتەستىگىنىڭ جاۋاپتىسى روزىتوحتى مامەتتوحتىنىڭ اسەرى وتە تەرەڭ.
روزىتوحتى قاراقاش اۋدانىنىڭ ديقانى، بىرنەشە جىلدىڭ الدىندا موتوتسيكل رەمونتحاناسىن اشقان، سوڭىنان وتكەرمەلى اۆتوكولىك ساۋداسىمەن اينالىسىپ، جۇڭسان اۆتوكولىك ورتالىعى ياجۇڭ وتكەرمەلى اۆتوكولىك بازارىنان ول حوتان قالاسى بايجۇنما اۆتوكولىك قىزمەت وتەۋ شەكتى سەرىكتەستىگىن قۇرىپ، اۆتوكولىك ساراپتاۋ، كەپىلدى قارىز اقشا الىپ بەرۋ، اۆتوكولىك قامسىزداندىرۋىن ءبىتىرۋ سياقتى كاسىپتەرمەن شۇعىلدانادى. بىرنەشە جىلدان بەرى ونىڭ ساۋداسى بارعان سايىن كۇسەت بولىپ، 35 جاسىندا - اق 3 سەرىكتەستىك قۇرىپ، 30عا جۋىق ادامدى جۇمىستانۋعا باستادى.
2017 - جىلى حوتان ايماعى ساۋداگەر شاقىرىپ قارجى ەنگىزۋ ارقىلى شينجياڭ جۇڭكۇن (حالىقارالىق) ەكولوگيالىق زات تاسىمالى پورتىنىڭ نىساندارىن حوتان قالاسىنا ەنگىزەدى. اۆتونوميالى رايوننىڭ ءتۇيىندى نىسانى رەتىندە، وسى نىسانعا شامامەن جالپى 26 ميلليارد 900 ميلليون يۋان قارجى قوسىلعان بولىپ، 27 قوسالقى نىساننان قۇرالعان، جۇڭسان اۆتوكولىك ورتالىعى ياجۇڭ وتكەرمەلى اۆتوكولىك ساۋدا بازارى وسىنىڭ ىشىندەگى ءبىر قوسالقى نىسان سانالادى.
باقشا رايونىنىڭ جاڭادان سالىنا باستاعان كەزىندەگى كورىنىستەردى ەسكە العاندا، جۇڭسان اۆتوكولىك ورتالىعى ياجۇڭ وتكەرمەلى اۆتوكولىك ساۋدا بازارىنىڭ جاۋاپتىسى شي حۇييا تەبىرەنىسىن باسا الماي بىلاي دەدى: ”28 مىڭ مۋعا جۋىق قۇم توبەشىكتەردى قازىپ تەگىستەدىك، 7 ميلليون 500 مىڭ تۇپتەن استام وسىمدىك، اعاش ەگىپ ورمان وتىرعىزىپ، باقشا رايونىنىڭ تۇتاس تۇلعالىق جاسىلدانۋ سالىستىرماسىن ％45كە جەتكىزدىك“. شي حۇييا الىستى نۇسقاپ تۇرىپ تىلشىگە: ”300 نەشە مۋ جەردى يەلەيتىن كولەمدى اۆتوتۇراق، 500 مۋلىق بولات ماتەريالدارى ساۋدا بازارى، 420 مۋلىق جابدىق جالداۋ بازارى، 480 مۋلىق كەرەكسىز - ەسكى بۇيىمداردى شوعىرلى جيناپ ءبىر جاقتى ەتۋ اۋماعى دەرلىك سالىنىپ بولدى، باسقا نىساندار بىرتە - بىرتە سالىنۋ ۇستىندە. سول كەزدە ءتىپتى دە كوپ بۇقارانى ءۇي ماڭىندا ورنىقتى جۇمىستاندىرۋعا باستايتىن بولادى“، - دەدى.
