□ انار بۇلت / شينجياڭ گازەتىنىڭ ارناۋلى ءتىلشىسى تاڭ كاندۇڭ
2 - ايدىڭ 10 - كۇنى ساياحاتشىلار جۇڭگو تەحنولوگيا - اسەمونەر سارايىندا، جۇڭگو بەيزاتتىق مادەنيەت مۇرالارى سارايىندا مەملەكەت دارەجەلى بەيزاتتىق مادەنيەت مۇرالارىن جالعاستىرۋشى چولۇڭبات الشاننىڭ چور تارتقانىن تاماشالاۋدا.
□ سۋرەتتى انار بۇلت/ شينجياڭ گازەتىنىڭ ارناۋلى ءتىلشىسى شيە لۇڭ تۇسىرگەن
بۇل ءبىر جولعى ۋاقىت - كەڭىستىكتى ەندەي وتكەن استاناداعى باس قوسۋ، بۇل ءبىر رەتكى قار - مۇز مادەنيەتىنىڭ جالعاسىم تابۋى، بۇل ءبىر مايدان جۇڭگو شينجياڭىنىڭ قىسقى وليمپيادامەن تىلدەسۋى.
2 - ايدىڭ 10 - كۇنى انار بۇلت شينجياڭ گازەتىنىڭ ارناۋلى ءتىلشىسى بەيجيڭ وليمپيادا باقشاسى ورتالىعى رايونىنا بارىپ، جۇڭگو تەحنولوگيا - اسەمونەر سارايىنىڭ، جۇڭگو بەيزاتتىق مادەنيەت مۇرالارى سارايىنىڭ العاشقى تۋىندىسى ”جۇڭحۋا اسىلى − جۇڭگو بەيزاتتىق مادەنيەت مۇرالارى جانە تەحنولوگيا - اسەمونەر كورمەسىن“ ەكسكۋرسيالادى.
جۇڭگو كوركەمونەر زەرتتەۋ ورنىنىڭ باستىعى، جۇڭگو تەحنولوگيا - اسەمونەر سارايىنىڭ، جۇڭگو بەيزاتتىق مادەنيەت مۇرالارى سارايىنىڭ باستىعى حان زىيۇڭ بىلايشا تانىستىردى: ”جۇڭحۋا اسىلى“ كورمەسى بەيجيڭ قىسقى وليمپيادا سپورت جارىسىنىڭ جارىس مايدان، سارايلارىمەن قۇپ جاراسىپ، سايكەسىم تاپتى، ول بەيجيڭ قىسقى وليمپيادا سپورت جارىسى كەزىندەگى ماڭىزدى مادەنيەت قيمىلى بولدى.
كورمە سارايىنىڭ ورتالىعىنداعى زالدىڭ كىرەر اۋزىندا، قىسقى وليمپيادانىڭ نەگىزگى تاقىرىبى اينا بەتىنە تۇسىرىلگەن تات باسپايتىن بولاتپەن قۇراستىرىلعان «التايدان بەيجيڭگە دەيىن» اتتى كورىنىس زالدىڭ قاق ورتاسىنان ويىپ ورىن الدى.
وسى قوندىرمالى كورىنىس جاسامپازدىعىنا جەكە - جەكە شينجياڭ مەن بەيجيڭنىڭ − التاي قالاسى ءدوڭدىبۇلاق ۇڭگىرىنىڭ ناقىشتى جارتاس سۋرەتى، بەيحاي باقشاسىنىڭ ءداستۇرلى مۇز ءۇستى سپورتى نىسانى ارقاۋ بولدى، ول ادامزات شاڭعىسىنىڭ باستالعان جەرىن وسى زامانعى قار - مۇز سپورتىمەن، قار - مۇز مادەنيەتىمەن شەبەرلىكپەن بايلانىستىرىپ، 2022 - جىلعى بەيجيڭ قىسقى وليمپيادا سپورت جارىسىنا بىرگە ىززەت ءبىلدىردى.
حان زىيۇڭ بىلاي دەدى: ”ءبىز كورمە سارايىنىڭ ەسىك الدىنداعى ورىنعا «التايدان بەيجيڭگە دەيىن» دەگەندى جوبالادىق، بۇل ءبىزدىڭ العاشقى كورمە تۋىندىمىز، وسى ورايدا بەيجيڭ قىسقى وليمپيادا سپورت جارىسىنا ماداق جاۋدىرۋدى ءۇمىت ەتەمىز“.
2005 - جىلى شينجياڭ التاي قالاسى قاندىعاتى موڭعۇل ۇلتتىق اۋىلى ءدوڭدىبۇلاق ۇڭگىرىنەن وتە تاماشا ساقتالعان ناقىشتى جارتاس سۋرەتى بايقالدى، مۇندا ارعى زامان ادامدارىنىڭ شاڭعى تەۋىپ، قولدارىنا جالعىز سىرىق ۇستاپ، اڭ اۋلاعان كورىنىسى ايقىن ەستەلىككە الىنعان، بۇل ادامزاتتىڭ شاڭعى تەبۋ تاريحىنىڭ تىڭ دالەل - سىپات دايەگى بولدى. 2015 - جىلى ەرتە زامانداعى شاڭعى تەبۋگە ۇزاق ۋاقىت زەرتتەۋ جۇرگىزۋ ارقىلى جۇڭگو، نورۆەگيا، شۆەتسيا، فينلانديا سياقتى 18 مەملەكەتتىڭ شاڭعى تاريحىن زەرتتەيتىن 30 نەشە مامانى «التاي جارناماسىن» بىرلەسىپ جاريالادى، التاي ”ادامزات شاڭعىسىنىڭ باستالعان جەرى“ رەتىندە قارالعان وسى ءبىر كوزقاراس كەڭ كولەمدى حالىقارانىڭ جاپپاي مويىنداۋىنا تاعى ءبىر رەت يە بولدى.
كورىنىس قوندىرعىسىنىڭ سول جاعىنا التايدان اكەلىنگەن بەيزاتتىق كورمە بۇيىمى − بايىرعى تەرى شاڭعى قويىلدى، ول ادامزاتتىڭ ەڭ ەرتەدەگى شاڭعى قيمىلدارىن قايتالاي بەينەلەگەن جاندى فاكت. ول قاراعايدان نەمەسە تەرەكتەن، سونداي - اق جىلقىنىڭ سان تەرىسىنەن جاسالادى، بۇرىن التاي تاۋلى رايونىندا قىسقى نەگىزگى قاتىناس قۇرالى بولعان. شاڭعىنىڭ اعاش تاقتايى مەن جىلقى تەرىسى سيىر تەرىسىنەن جاسالعان قايىس تارتپامەن تىعىز قابىستىرىلادى، قايىس تارتپانى جىلقى تەرىسىنىڭ جيەگىنەن وتكىزىپ، تەرىنى تاقتايعا ايقىش - ۇيقىش بەكىتىپ، كۇشتەپ تارتىپ، بايلاعاندا عانا شاڭعى بەرىك بولادى.
سوناۋ 1300 نەشە جىلدىڭ الدىندا، «سۇيناما. شىۋي شەجىرەسىندە» ”جەر ءجۇزى قالىڭ قارمەن قاپتالعان، شۇڭقىر، ورعا ءتۇسىپ كەتۋدەن الاڭداپ، اعاشقا ءمىنىپ جۇرۋگە تۋرا كەلەدى...“ دەپ جازىلعان. بۇل جەردەگى ”اعاش“ شاڭعى تەكتەس سايمان، بۇل ەلىمىزدىڭ ەرتە زاماندا سايماننان پايدالانىپ مۇز ۇستىندە ارەكەت جاساۋىنىڭ باستاپقى سۇلباسى بولعان. قازىر ەلىمىزدىڭ ءداستۇرلى دەنە تاربيەسى، ويىن - ساۋىعى جانە ونەر باسەكەسى تۇرىندەگى بەيزاتتىق نىسانىنىڭ مۇز دوبى سپورتى رەتىندە، بەيجيڭ قالاسى شيچىڭ رايونىنىڭ رايون دارەجەلى ۋاكىلدىك تۇرىنە اينالىپ، مۇز ويىنى، مۇز ايداعارشا قايىقپەن بىرگە بەيجيڭنىڭ ”شىنشا 3 مۇز ويىنى“ اتالىپ وتىر. بەيحاي، شىشاحاي، حوۋحاي سياقتى قالا ءىشى سۋ الابى بولعاندىقتان، بەيجيڭدەگى كوپتەگەن جەرلەر ءداستۇرلى مۇز ءۇستى سپورت نىساندارىن جالعاستىردى ءارى دامىتتى.
ءتىلشى: «التايدان بەيجيڭگە دەيىن» كورىنىس قوندىرعىسىنىڭ ۇستىڭگى جاعىندا التايدا ارعى زامان ادامدارىنان 7 ادامنىڭ شاڭعى تەۋىپ، قولدارىنا جالعىز سىرىق ۇستاپ، سولدان وڭعا قاراي ويىس فورمالى دوعا سىزىق ءتارتىبى بويىنشا قاتار تۇزەپ تۇرعاندىعىن بايقادى. استىڭعى جاعىندا، وسى زامانعى كونكي كيگەن 6 قار - مۇز سپورتى اۋەسكەرىنىڭ الۋەتتى بەينەسى كورسەتىلگەن. ولار سان مىڭ جىلدىق ۋاقىت - كەڭىستىگىن ەندەي ءوتىپ، بەيجيڭ قىسقى وليمپيادا سپورت جارىسىنا بىرگە ىززەت بىلدىرۋدە.
حان زىيۇڭ بىلاي دەدى: وسى كورىنىس قوندىرعىسى جۇڭحۋا ۇلتىنىڭ ۇزاقتان جالعاسقان قار - مۇز تاريحي مادەنيەتىن بەينەلەيدى. بەيجيڭ قىسقى وليمپيادا سپورت جارىسىنىڭ، قىسقى مۇگەدەكتەر وليمپيادا سپورت جارىسىنىڭ كوپتەگەن ناقتى مازمۇندارىن جۇڭگو فاكتورىنا شەبەرلىكپەن توعىستىرىپ، ادامداردىڭ تاماشا تىلەگىنە ارقاۋ بولعاندىعىن جان - جاقتى ۇعىندىردى.
زالدىڭ كورمە - ويىن رايونىندا التاي ايماقتىق مادەنيەت سارايى تاڭداپ جىبەرگەن موڭعۇل ۇلتىنىڭ ”چور“ جالعاستىرۋشىسى چولۇڭبات الشاننىڭ تارتقان كۇيى قيالدى الىسقا جەتەلەپ، ادامداردى قاتتى ءسۇيىندىردى؛ ”كومەي“ جالعاستىرۋشى ارشىن باقىتتىڭ ورىنداعان شاڭقوبىز، قوبىز، دومبىرا سياقتىلار شينجياڭنىڭ باي مازمۇندى كوركەمونەر فورماسىن ايگىلەپ، كورەرمەندەردىڭ دۇركىن - دۇركىن دۋ قول شاپالاق سوعىپ ماراپاتتاۋىنا يە بولدى.
ءتىلشى كورمەدەن تاعى كوپتەگەن شينجياڭ فاكتورىن بايقادى: ”جىبەك جولى كەسكىندەمەسى“ بولەگىندە قىزىل مىڭ ءۇي، گاۋچاڭ بايىرعى قالاسى سياقتى جەرلەردەگى قابىرعا سۋرەت قالدىق ەسكەرتكىشتەرىنە نەگىزدەلىپ سىزعان تۋىندىلارى شوعىرلى كورسەتىلگەن؛ ”ۋان فاڭ يۋەزوۋ“ بولىگىندە دۋتار، ءتامبىر، راۋاپ، داپ سياقتى مۋزيكا اسپاپتارى كورمەگە قويىلعان.
